Lárani turobuli le
Ibihaaña saragu míñunu gürigia hagidaruni iyereehabúni tídangiñe hanigi lau hafalaruni adundehani le tídanbei Bíbülia. Le linarün katei, siñati wagidaruni iyereehabúni sunsuinagubei. Ka láranibei turobuli le?
Aban agumadihani le úati mégeiti luagu
Arufudaali dan siñagua hamá gumadimatiña houngua lun hagidaruni iyereehabúni. Mini lan san lira úabei lan ni aban agumadihani ibihiti lagidaruni?
Lun lagumuchun aban arúeihani lau iyereehabúni, mosu libihini katei burí le:
-
1. Línchahaniña gürigia asansirei le hasaminarubei luma le hasandirubei hawagu amu.
-
2. Lareidaguagüdüni igarigu le adügübei lun wóuseruniña amu wuriba.
-
3. Ñein hamá gumadimatiña lidan ha ábanbei labu hóuseruniña sun gürigia.
-
4. Ladügün lun lidan hamá úarani sun gürigia ha lídanbaña sun Ubóu.
Chóurugüda tumuti Bíbülia woun adüga laali lan Bungiu Arúeihani le lunbei libihini sun lira. Larúeihan Bungiu líribei (Lúkasi 4:43).
Teni humá lun le lunbei ladügüni Arúeihani le wawagu.
1. Arufudahani le buídutimabei
Hafurendeirubei lílana Ubóu irichaü (ISAÍASI 26:9).
“Lanügüba irichaü, darangilaü luma emenigini [lun] súnwandan” (ISAÍASI 32:17).
Ka mini lubéi le? Larufudahabei lan Larúeihan Bungiu houn gürigia kátima lan buídubei. Dan le wasubudiruni le buídubei lumoun le wuribabei, le richaguabei lumoun le marichabei, sánsiti ligaburi warihiniña ha híbiri. Hafurendeirubei sun gürigia larufudúniwa lan ínsiñeni houn sun hawuyeri gürigia buídubei.
2. Awalidaguni
“Laragahabei [Bungiu] sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei” (ARUFUDÚNI 21:4).
Ka mini lubéi le? Lagumuchuba lan Larúeihan Bungiu lau sun igarigu le lanügübei marichaü. Masandi hañame sun ha ouserúaañabaña wuriba igarihabu ladüga mébunaalime.
3. Aban gumadimati buiti
“Maguseragüdünbei luagu larihín aban katei, masiadihan ligíame luagu katei le machourunti. Laguseragüdüba lau irichaü houn ha débilibaña, ageindagualeime haricha lílana fulasu ha gudemebaña” (ISAÍASI 11:3, 4).
Ka mini lubéi le? Larúeihaba lan Hesukrístu, le Lurúeite Larúeihan Bungiu, siélugiñe lau irichaü ani ábanbei labu lanügüniña sun gürigia. Úati himei lan Hesusu aban néchani luéi amu ani gayaraati libihin lun lagunfulirúniwa lugumadin le richaguabei lidan sun Ubóu.
4. Úarani
Ibihati Larúeihan Bungiu lun “haganóun gürigia lidan úarani luma ínsiñehabuni” luma lun ñein lan “ábanmeme saminaü” hadan (FILIPUNA 2:2).
Ka mini lubéi le? Mámaba lan hafamurarügüña lílana Larúeihan Bungiu lídanñanu lan úarani. Lídanbaña úarani le tímatimaati ladüga hínsiñeguabaña lan houngua tídangiñe sun hanigi.
Háfuga hínsiñebei lan giñe le hun
GARÜDIA AWISAHATU
A World Without Prejudice—When?
Íderaguataña Bíbülia gürigia ha lídangiñeti ámuñegueinarügü rasa luma ageiraü lun masaminarun hamá wuriba hawagu amu. Ídaba san lagumucha sunsuinagubei?
