Mama ítaraguarügü lagidara iyereehabúni hawéi gürigia. Ítara kei mégeiwa lan dan lun lareidagun aban sandi galugurahati, mégeiwati giñe dan lun wagidaruni iyereehabúni houn amu wawariua. Ka gayaraabei wadügüni lun wibihini?

“Hínsiñehabu humá; ligía [...] íchugubalin sun katei lidan aban” (KOLOSANA 3:14).

Ka mini lubéi le? Dan le wadügün katei buiti hawagu amu, aba ñein lan úarani wadan. Ánhaña hínsiñe amu hun ani arufuda humeime houn, agidareina luba iyereehabúni le hasandirubei tidan hanigi.

Samina humá ka burí lan katei gayaraabei hadügüni hawagu gürigia ha ámubaña huéi. Mama mosu hadügün katei hanarimeburiti, buídurügüti lau houchun hadügün katei kéiburi le:

• Arufuda humá lubuidun umenei, kéiburi hágüdahani bena habá lun hásügürün o híchuguni hala houn tidan ugunei.

• Ayanuha humá hama íbini mayanuhan hamani hererun buidu.

• Gaguraasun humá habá dan le harihiniña adüga katei le úati gunfuranda humani.

• Ru humá arigei houn ani áfaagua humá lun gunfuranda humani haturóbulin.