Gayaraati ladügün íñuguni lun wasandirun iyereehabúni hawagu amu. Gürigia le íñugubei, hanarimeti lubuidun lasaminarun lougua. Saminati buídutima lan hawéi amu ani ariha lumutiña ha mítaranbaña kei ligía kei ni kata. Gayaraati lábürühan furumiñeguarügü wádangiñe tidoun sádara to. Ariñagatu aban líburu: “Lidan liibe-agei rasa, afiñetiña gürigia buídutima lan ligaburi hanügüni habagari hawéi amu, buídutima lan heigin, ligaburi hasansiragun, hechun, hafiñen luma katei líbeina lira” (Encyclopædia Britannica). Ka lunbei wadügüni lun méiguadun wamá tidoun sádara to?

“Lau [...] ǘnabuguni, [...] buidulá hanügüniña amu gürigia huéi guánarügü” (FILIPUNA 2:3).

Ka mini lubéi le? Lun wagidaruni íñuguni wawariua, mosu wáyeihan ǘnabuguni. Ánhawa ǘnabugu, gabaroun wabéi anihein lan katei le ídanti buídutima hamá amu wawéi. Úati ni aban rasa le buiti lidan sun katei.

Ariha waméi le asuseredubei lun Stefan. Lidan meha aban ageiraü le ñein lubéi urúei lan gamaniharibei lau sun katei laweirida. Ariñagati: “Lun wagidaruni iyereehabúni wawariua, afiñetina súdini  lan lun wasaminarun buídutima hamá ha híbiri wawéi. Anihein katei le ibidiñeti nun, ligía gayara lubéi nafurendeirun hámagiñe amu”.

Houcha humá harihini katei keisi lubudubu ani ánhara humá anihein lan giñe igaburi le mabuidunti huagu. Mafiñera humá aban lan habu sun gürigia.

Lubaragiñe hasaminarun wuriba luagu aban gürigia le hádangiñeti ítaga gürigia, álügüdagua humá hungua:

• Le san lúgubu wuriba lan le mínsiñebei nun luagu gürigia le, o mítaranrügü liña kei le uágubei néchuda?

• Gayaraati giñe san larihin gürigia le somu katei mabuidunti nuagu?

• Ka idan buídutima lan gürigia le nuéi?

Anhaün óunaba lau sun taruman hanigi lun álügüdahani burí le, gayaraabei hagidaruni iyereehabúni le hasandirubei hawagu amu huáriua, ábameti línsiñedun katei buiti le luágubei gürigia ligía hun.