“Ítara kei lídangiñe lan meha aban wügüri lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (RÓMANA 5:12).

Adüga lumutiña Bungiu furumiñetiña gürigia, Adán tuma Ewa, lau aban saminaü luma aban úgubu mafigounti. Ruti aban fulasu houn ya ubouagu lun hawinwandun ñein, lidan paraísu le gíribei fuluri-agei Edén. Ábati lariñagun houn gayara lan heigin tídangiñe sun tídibu wewe to ñeinboun fuluri-ageirügü, tuéidigia aban tídangiñe lun meigin hamá. Íbini ítara, himei lumuti Adán tuma Ewa lun heigin tídangiñe tídibu wewe to uéigiñeboun heweridirúa, ítara liña hafigouhan (Agumesehani 2:15-17; 3:1-19). Kei maganbadi habéi, aba labuguniña Bungiu Adán tuma Ewa lídangiñe fuluri-agei. Lúmagiñe oura ligía aba hénrenguhaali lan habagari. Lau lásügürün dan, aba gasaanigu hamá ani dereti giñe lidin katei houn hasaanigu. Sun hagía aba haweiyadun ani hilagua hagía (Agumesehani 3:23; 5:5). Ligíati sun lubéi wagía aba wasandirun, waweiyadun ani hilagua wagía ladüga lisaanigu wamá Adán tuma Ewa.

“Lábugiñeñanu [...] lubafu Mafia sun ha lánigubaña ubóu” (1 HUAN 5:19).

“Mafia” ligía Satanási, aban sífiri le agarabaagubei luagun Bungiu (Huan 8:44; Arufudúni 12:9). Lau  lásügürün dan aba hóundarun amu sífirigu lumoun Satanási, aba hayabin lun máfianu hamá. Yusu hamuti sífirigu salufuritiña ha habafu lun heyeeduniña gürigia luma lun hadisedagüdüniña luéi Bungiu, ani ínchaha hamutiña saragu gürigia lun hadügün katei wuribati (Sálumu 106:35-38; 1 Timotéu 4:1). Achubahati Satanási hama lumafianu lau ugundani dan hasufuriragüdüniwa.

“Le lábunagubei gürigia, ligíaba giñe lalubaha” (GALASIANA 6:7).

Anihein dan súfuritiwa ladüga figóu le walagantebei hámagiñe furumiñetiña wagübürigu luma giñe ladüga lábugiñe ñein lan lubafu Satanási sun ubóu. Anihein giñe dan wagía lan agawoundagüdübalin wasufurirun. Ítara kei buidu lan lidin woun dan le wadügüni le buídubei, wuribabei giñe lidin woun dan le wuriba lan wanúadirun, alubaha wamuti le wábunagubei. Kei hénpulu, aban hachügüdina iduheñu le buiti lóuserun lidan sun katei, gawadigimaridadi ligía, hínsiñe hagía liduheñu lun, lagundaraguagüdübaña liduheñu. Ánheinti áhurera lubéi luagu seinsu, gátadi ligía ani maha ligía lawadigimaridun, ladügüba lira lun hagudemedun liduheñu. Ligía buidu lubéi lun wasigiruni ladundehan Le adügübaliwa, ladüga busenti lun walubahan saragu katei buiti, laganagua “saragu darangilaü” (Sálumu 119:165).

“Lídounme lagumuhóun dan [...]. Hóunguarügübei burí gürigia habusenra buiti; hínsiñebei seinsu houn [...], maganbunhabaña hagübürigu [...], siñabei hárügüdagun houngua, hanarimebaña láganibaña sun le buídubei” (2 TIMOTÉU 3:1-5).

Uguñe weyu, ítara liña hóuserun saragu gürigia kei lariñaguni profesía le, chóurugüda lumuti le woun luagu wawinwanduña lan lidan “lagumuhóun dan” lánina ubóu le. Ariñagatu giñe Lererun Bungiu lidan lan wadaani ñeinbei lan burí wuribu, ilamaü, óunwenbu burí hárabaganali luma sandi (Matéu 24:3, 7, 8; Lúkasi 21:10, 11). Hasufuriruña saragu gürigia ani hilagua hagía ladüga burí katei le.