Dan wasubudiruni Bungiu ábatima wayarafadun lun
Mama aban erei Bungiu le Adügübaliwa. Aban gürigia inarüniti ligía buin lau lubuidun burí igaburi. Kei busén lan wasubudiruni luma lun wamada lan, afunranguagüdaali saragu katei woun luougua (Huan 17:3; Santiagu 4:8).
Gíriti Bungiu le Adügübaliwa
“Lun hasubudiruni gürigia, Heowá lan bíribei, buguyarügüñein le Íñutimabei ligibuagu sun ubóu” (SÁLUMU 83:18, TNM).
Arufudahatu Lererun Bungiu Heowarügüñein lan Bungiu le inarüniti ani ligía giñe adügübalin ubóu le, luma ibagari. Ligíati, ligíarügüñein garicha lun láhudurawagun lun (Arufudúni 4:11).
Aban Bungiu lánina ínsiñeni Heowá
“Ínsiñeni Bungiu” (1 HUAN 4:8).
Yusu lumutu Heowá Lererun luma burí katei le adüga láalibei lun larufudahan woun ida liña lan ligaburi. Ínsiñeni igaburi le súdinitimabei luagu, ínsiñeni ínchahabalin lun ladügüni sun le ladügübei. Éibutima wasubudiruni Heowá, hínsiñetimabei woun.
Ferudunati Heowá
“Aban Bungiu [le ruti ferudun] buguya” (NEEMÍASI 9:17).
Subuditi lun Heowá luagu gafigoun wamá, ligíati aranseñu liña lubéi lun feruduna lániwa. Ánhawa amuriaha ferudun ani áfaagua wagía lun madügün wamani le mínsiñebei lun, feruduna lubadiwa ani mabeichun lubadiwa luagu wachara (Sálumu 103:12, 13).
Busenti Heowá lun wafurieidun lun
“Yarafati Aburemei houn ha agúahabaña luagu [...]; dan hamuriahan luma lun líderaguniña” (SÁLUMU 145:18, 19).
Magurabahanti Heowá lun wáhuduragun lun según échuni le hafalarubei saragu gürigia, ni lun wayusurun guáriua lidan wáhuduragun lun. Aganba lumuti wafurieidun keisi aban úguchili dan laganbuniña lisaanigu.
Háfuga hínsiñebei lan giñe le hun
ÁLÜGÜDAHANI LE TÓUNABUBEI BÍBÜLIA
Ka san Heowabei?
Habungiute san lílana aban ageiraü kei meha ísüraelina?
