Anihagua san inebehabu houn amu?
KA UAGU LUNTI LUBÉI INEBE HAMÁ AMU WOUN?
Barüti inebehabu lan aban gürigia darangilaü ani ídehati giñe lun maweiridagun lan aban turobuli.
-
Ariñagati aban ariñawagúni le tídanbei Lererun Bungiu: “Óunabagülei le buiti, gáluma lumuti igañi; anhein óunabagülei le hanarimeti, iñuraguatimarügü lumuti” (Ariñawagúni 15:1). Adügarügüti layanuhóuniwa luma louserúniwa lau minebenehabuni lun laweiridagun turobuli. Ani manügünti louserúniwa ítara ni kata buiti.
-
Ariñagati meha Hesusu: “Katei le buinbei tidan anigi, ligía lariñagubei iyumaü” (Matéu 12:34). Dan le wayanuhan lau minebenehabuni houn amu, arufuda lumuti lira kátañadiwa lan. Másiñati warufuduñein lan kátima lan wasandirubei tidan wanigi hawagu gürigia ha lídangiñetiña amu fulasu, amu rasa, ha ámubei hechun wawéi o ha lílana amu ageiraü. Ligíati, háfuga wagía lan lunbei wasansiruni ligaburi wasaminan.
Lidan aban álügüdawaguni le málügilibei lúmagiñe ladügǘn houn hóugiñe 32,000 gürigia lidan 28 ageiraü, ariñagatiña 65% gürigia ha alügüdawagúbaña marihinñahagiña lan saragu minebenehabuni kei larihíniwa uguñe weyu.
KA GAYARAABEI HADÜGÜNI?
Meberesenga ka lan uma hayanuha, arufuda humá inebesei, íbini houn ha mítaranbei hasaminan kei huguya. Ariha huméi ka lan idan úara humá hama gürigia hagía, míchugun humaamuga hadurun, machuragun humañame.
Óusera humaña amu ítara kei habusenrun lun houserúniwa. Ánhaña hóusera amu lau ínsiñeni luma inebesei, chóurutimati ítara luba lan giñe hóuserunün.
Gíchigadi humá ferudun. Masaminara humá wuriba hawagu gürigia, ani anhein ariñaga somu gürigia aban katei hun le mínsiñeti hun, mafalara huméi.
LE WADÜGÜBEI WAGÍA GEFENTIÑA LUAGU HEOWÁ
Meberesenga halía lan wawinwanda o wawadigimarida, inebetiña sun gürigia woun, ani ínchaha wamutiña amu lun hadügüni ligiaméme.
Ínchaha wamutiña sun hawuyeri gürigia lun haturiahanu Lererun Bungiu mafayeihanga, lau sun lira, mafosutiwa ni aban lun hasaminarun kei wagía ni lun hánharun lun wafiñen. Lubaragiñe lira, falá wamuti adundehani le tídanbei Lererun Bungiu luáguti lunti lan wayanuhan luagu wafiñen houn amu lau darangilaü luma inebesei (1 Féduru 3:15; 2 Timotéu 2:24).
Óusera wamutiña sun gürigia lau ínsiñehabuni. Buiti weresibiruniña sun gürigia ha achülürübaña lidoun burí wadamuridagun ani busén hagía hafurendeiruni le tarufudahabei Lererun Bungiu, meberesenga le winwan hamaalibei. Áfaaguatiwa lun inebe lan hasaminan amu woun ani óusera wamutiña “keisi lubudubu” (1 Féduru 2:17).
Inebetiña gumadimatiña ha lídanbaña fulasu le ñein lubéi wawinwanda woun (Rómana 13:1). Gaganbaditiwa lun lúrudu, afayeiha wagía liseinsuna gumadi. Ani, lau sun mádaragun wamá woungua lidoun polítika, inebeti hasaminan ha busenbaña hádaragun houngua lidoun polítika woun.
