Anihán le hariñagubei fiu aturiahatiña, ha lídangiñetiña ámuñegueinarügü ageiraü, luáguti lasansirun ligaburi dan. Anhein samina hubéi anihein lan aban Bungiu le Adügübalin sun katei, samina ligía wawagu, háfuga ladügün le hariñagubei aturiahatiña siensia ha lun hasaminarun luagu ligaburi ladügüni Bungiu Ubóu lun larumadagun ligía lungua.

Lau sun lira, kei weiri lubéi damichi le adüga hamaalibei gürigia lun Ubóu, úaali buídurügü lan ligaburi ladügüni Bungiu Ubóu lun larumadagun ligía lungua. Ka uagu gayara lubéi wafiñerun luagu laransehabei lan Bungiu Ubóu?

Arufudati bérusu burí le áfuachubei lidan rekuáduru magünrinchawagunbei lan Ubóu ani lawinwandúba lan lidan.

• Adüga lumuti Bungiu Ubóu. “Dan le lagumeserunbei sun katei, aba ladügüni Bungiu sielu luma ubóu” (Agumesehani 1:1).

• Bungiu laburemebei Ubóu. “Lani [Heowá] a sun ubóu, lau sun le lídanbei” (Sálumu 24:1).

• Adüga lumuti Bungiu Ubóu lun ladurarun lun sun dan. “Ru bumuti múa luagu lebu, lun mánhingichun lan lídangiñe lubara” (Sálumu 104:5).

• Ariñagaali Bungiu lawinwandúba lan lidan Ubóu. “Lariñahare Bungiu le adügübalin […] múa, aranseléi, le ederebudagüdübalin, lun haganóun gürigia” (Isaíasi 45:18).

• Ariñagaali Bungiu luagu haganóuba lan gürigia lun súnwandan ubouagu. “Galagantehabei gürigia buítiña múa, haganóuba giñe lidan súnwandan” (Sálumu 37:29).

Seremei lun ligaburi ladügüni Bungiu Ubóu gayaraati lawadigimaridun keisi lubudubu anhein hayusura gürigia buidu. Según profesía le tídanbei Bíbülia, anúadira laali Bungiu dan le ídanba lubéi lagumucha hau sun gürigia ha adügübaña damichi lun Ubóu (Arufudúni 11:18).

Ariñagatu Bíbülia, lárigiñe lanme lasuseredun sun le, ladügüba Bungiu lun ábanbei lan paraísu ubóu ani látulerubei lan lúhabu, lun líchugun lau lugundan “houn sun gürigia luma houn animaalugu” (Sálumu 145:16).