KABA ASUSEREDA LUN UBÓU?
Dabíara luma áraabu
AGÚAHOUATI lun dabíara pulmones de la Tierra, lugundun ídehati lun ñein lan ibagari. Achawaha tumuti wewe, garabali wíyeti (dióxido de carbono), le gayaraati ladügün dañu woun. Adügatu giñe lun ñein lan garabali harumati gayara láamuga wawaragun. Kéiburi 80 lídangiñe san lídangiñe nadü hama animaalugu ha añaheinbaña, wínwantiña dabíararugu luma áraabu burí. Lun hamuga ua lan dabíara lagumuchuba hamuga ibagari.
Lídanñein denchaü dabíara luma áraabu
Lun ñein lan múa lun bunaguaü, sagü irumu chaǘnwatu saragu milu míñunu tídibu burí wewe. Kéiburi lidan 75 irumu le sügühalibei, chaǘnwaaru saragu tídibu wewe le adügübei lun lagumuchagun lamidan dabíara le aniheinbei ubouagu.
Sagü weferidirun aban dabíara, féridi wamuti giñe sun katei buiti le lanügübei.
Adügǘwati Ubóu lun ñein lan ibagari
Wéiriti lubuidun iyaraani le luágubei dabíara lunya láhüchagun tídibu burí wewe le chaǘnwaalibei. Lidan burí fiu irumu le sügühalibei, wéiritu hanigi ha ídehatiña lidan lounigirún katei ubouagu lau lufuresen láhüchün nadü lidan burí dabíara le chaǘnwaalibei, furese ligía taweiridun tídibu burí wewe. Ariha wamá fiu hénpulu:
-
Ariha hamaali fiu aturiahatiña le asuseredubei lidan burí dabíara le chaǘnwaalibei ani yusua ligía lun bunaguaü lárigiñe aba mayusurúnwaali lan. Lidan aban aturiahani le ñein lubéi lakutihóua 2,200 fulasu le lídanbei América luma le lídanbei ageiraü le ñéingiñe lubéi lálüdün weyu libiti Áfürika, arufudati lídanrügü lan 10 irumu, gayara lan lagiribudun aban fulasu lun ñein lan ibagari lidan, luma lun ábaya lan dabíara.
-
Según aban ariñahani le áfuridubei tidan garüdia Science, saminatiña aturiahatiña, lidan lan kéiburi 100 irumu gayaraati lan lagiribudun aban fulasu lunya ñein tan ámuñegueinarügü tídibu wewe lidan, hama ámuñegueinarügü animaalugu sin hídehan gürigia.
-
Málügili lúmagiñe hagoubaguagüdüni aturiahatiña siensia ligaburi loufun láhüchün nadü lidan aban dabíara Bürasíli, le ídanbei mídehan hamá gürigia, luma aban le ñein lubéi hídehan gürigia lauya hábunaguni.
-
Ariñagatu garüdia National Geographic luagu akutihani ligía, aba lan taweiridun hanigi aturiahatiña lídanrügü lan seingü irumu, buin liña lan dabíara ligía tau tídibu burí wewe to ñéingiñetu, to áhüchüboun sin hídehan gürigia.
Láluahoun lárani turobuli le
Lidan sun ubóu, ladügǘña aransehani lun lounigirúniwa dabíara le aniheinguabei luma lunya libihín dabíara le féridiwaalibei. Según aban ariñahani túmagiñeti Óundaruni hani Néchani, seremei ladügǘniwa áfaaguni le, lídanrügü 25 irumu le sügühalibei, rarihali ligaburi táchuahoun wewe lidan sun ubóu lun 50 lídangiñe san.
Lau sun lira, úati buídurügü lan ladügǘniwa katei le. Lidan aban ariñahani túmagiñeti Organización Global Forest Watch ariñagati, lidan lan lagumuhóun irumu le sügühalibei mararirungili lan táchuahoun wewe to lídanboun fulasu le ñein lubéi hárouga lan.
Kónpeni burí to adürühabarun tídibu wewe mibihinga üma hámagiñe gumadimatiña, gáñeitiña saragu míñunu dólarü ani güridíni le, ligíatima adügübei lun agumuchagueina lan dabíara.
Añahein gürigia aturiahatiña ida luba lan lounigirún dabíara ani adügatiña lun ñein lan amu burí dabíara.
Anihein funa san emenigini? Ka tariñagubei Lererun Bungiu?
“Aba giñe labouchagüdün [Heowá] a sun tuwuyeri tídibu wewe to buíduburitu lun teigín” (Agumesehani 2:9).
Bungiu le adügübalin dabíara, adüga lumuti lau ubafu lunya láhüchagun, gayara láamuga lasigirun ahuuda houn gürigia. Busenti lun wóunigiruni dabíara lun lasigirun ágüdahei ibagari.
Arufudahatu Bíbülia mígirunbei lan Bungiu lun hasigirun gürigia güridítiña agumucha lau sun katei le adüga láalibei. Mígirunbei lun hagumuchun gürigia lau Ubóu le ídanbei wawinwanda ni lau ibagari le lídanbei. Ariha huméi ariñahani “Ariñagaali Bungiu labuidurayaba lan Ubóu” lidan ubanaü 15, tidan garüdia to.
a Heowá líribei Bungiu (Sálumu 83:18, TNM).
