Barüti lasansiragun ligaburi dan denchaü lun rifu le baranahabei, houn ámuñegueinarügü hawuyeri animaalugu ha baranahabaña kéiburi gamarun, húgawaru o houn animaalugu híbeina hara. Kéiburi 25 hádangiñe san animaalugu ha baranahabaña ha wasubudirubaña, megei hamuti rifu. Ani según hariñaguni aturiahatiña siensia, sun rifu burí le gayaraati lounwen 30 irumu lárigiñe le.

Según aturiahatiña, sagü irumu hilaguatiña saragu míñunu animaalugu baranahana ladüga heigin plástiku, ani hou hamuti giñe kei burí 90 hádangiñe san dunuru ha erederubaña laru barana.

 Lidan irumu 2022, ariñagati António Guterres, seküretáriu tani Óundaruni hani Néchani: “Kei móunigirun wabalin barana, awanha asufurirei ‘katei wuribati le lanügübei’”.

Adügǘwati barana luma sun le lídanbei lau iyaraani lun larumadagun lungua, mágurunrügaaña ligía gürigia iwiyei lidoun. Afuranguagüdatu líburu Regeneration: Ending the Climate Crisis in One Generation, dan le lan lounirigirúniwa aban fánreinti lánina barana luéi damichi le tadügübei burí bísinisi “gabafuti lun lasigirun arumadaguagüda lungua”. Ariha wamá fiu hénpulu:

• Ragǘ lumuti fitoplancton, lirahüñü burí katei wínwanti baranaha, garabali wíyeti (dióxido de carbono), aban luwuyeri gasi le adügübei lun ñein lan lanarime burí lárouga ubouagu. Le linarün katei, chawá lumuti fitoplancton kéiburi ligiaméme garabali wíyeti le tachawarubei tídibu burí wewe tuma burí amu tuwuyeri nadü to áhüchüboun múarugu.

• Añahein burí bacteria ha éigibaliña úduraü ha óunwegubaña baranaha ani adügati katei lira lun mawiyedun lan barana. Lárigiñe aba héiginiña amu animaalugu baranahana bacteria hagía. Según lariñaguni páhina lánina Internet Smithsonian Institution, le ayanuhabei luagu barana, “ídehati sun katei le lun harumañu lan barana”.

• Anihein aban katei harageirugu saragu animaalugu baranahana le ídehabei lun lasaliragun duna denchati le baranahabei lun dúname le buiti lun rifu, houn gamarun, houn harouru luma houn amu hawuyeri animaalugu.

Lun hamuga machülüti ifei baranahoun, memegeirúnbei hamuga lun larumadahóuniwa. Ligía hariñagubei aturiahatiña lunti lan wayusurun bólusa luma burí umegeguni le gayaraati layusurúniwa lóugiñe ábanrügü wéiyaasu, lubaragiñe wayusurun plástiku le ayusurúbei ábanrügü wéiyaasu.

Úati buídurügü lan ladügǘniwa katei le. Málügili lúmagiñe tabudun aban óundaruni to ídehaboun lidan lounigirúniwa Ubóu 8,300 tonelada ifei, lídanrügü aban irumu, lídangiñe le lagiribudagüdübei barana larun beya lidan 112 ageiraü. Murusunrügüñein lira lídangiñe saragu ifei le achülürübei baranahoun sagü irumu.

Ariñagatu garüdia National Geographic luagu barana, “duna denchati le baranahabei, máraninaali”. Ani afuranguagüdatu “gíbeyaali lan iwiyei le hóunahabei gürigia baranahoun darí lun siñaguaaña lan animaalugu ha ñéinbaña houngua lun harumadahani kei ligaburi hadügǘniwa”.

“Arihúati sun katei le badügübei lidan sun fulasu! Anihán barana, dabubere liña ani migife ligía, añahein saragu animaalugu lidan darí lun siñá lan habahüdǘniwa, wéinamutiña hama ñǘbüritiña” (Sálumu 104:​24, 25).

Adüga lumuti Bungiu, le Wadügagüle, barana lau sun le mégeiwabei lun larumadagun lungua. Kei adüga lubalin Bungiu barana labu sun le lídanbei, gayaraati wafiñerun laranserubei lan sun wuribani le adügǘwaalibei lun barana. Aliiha huméi ariñahani “Ariñagaali Bungiu labuidurayaba lan Ubóu”, le lídanbei ubanaü 15 tidan garüdia to.