Akutiha humaali san le adarirúbei?
“Gayaraati ladügagun ubóu lungua lídangiñe ni kata” (Stephen Hawking luma Leonard Mlodinow: El gran diseño [trad. David Jou luma Mirabent], 2010).
“Adüga lumuti Bungiu sielu luma ubóu” (Agumesehani 1:1).
Adüga lumuti san Bungiu ubóu luma ibagari o saliguarügüti san lábuguarügü? Dimurei le hariñagubei sásaamu ha úagubaña wayanuhan lidan lagumeseha aturiahani luma le tariñagubei Bíbülia múaranti luma óunabagülei lun álügüdahani le. Añahein gürigia afiñetiña luagu aban saminaü ani añahein ha afiñetiña luagu amu katei. Gama lumoun, añahein saragu gürigia chouru hamuti buidu buidu ariñahani le tídanbei burí líburu to alúguruboun saragu luma le harihibei tidan bigibigitu. Luagun le aban oubaü, ibidiñeti houn saragu gürigia kaba lan hafiñera.
Másiñati arufudahóuati houn leskuelarugu saliguarügü lan sun katei lúnguarügü ani ua lan Le adügübalin ubóu luma ibagari. Lau sun lira, chóurugüda hamuti san houn ítara liña lan? Másiñati aganba humaali lan le hariñagubei alidihatiña relihión anihein lan Le adügübalin sun katei. Lau sun lira, arufuda hamuti san houn ítara liña lan? O ariñagarügütiña san houn afiñeni lan lira?
Gayaraati barühadün lan saragu dan asaminara luagu abahüdaguni le ani adügati lira lun hénrengu lan hun lun hasubudiruni anihein lan aban Le adügübalin sun katei. Háfuga álügüdagua humá hungua anhein súdini lubéi lun hasubudiruni óunabagülei.
Tidan garüdia to larufudahóuaba fiu ariñahani le chóurugüda lumuti woun anihein lan aban Le adügübalin sun katei. Lárigiñe lafuranguagüdüwaba ka lan uagu súdini lubéi lun wasubudiruni ida liña lan lagumeserun ibagari.
Háfuga hínsiñebei lan giñe le hun
ARUFUDAHANI SÚDINITI TÍDANGIÑETI LERERUN BUNGIU
Adügǘwarügüti san sun katei?
Añanhein saminatiña luagu abahüdaguni le tídanbei Bíbülia, le luáguti ladügǘniwa sun le aniheinbei, aban lan úraga. Inarüni funa san le?
ÁLÜGÜDAHANI LE TÓUNABUBEI BÍBÜLIA
Adügarügüti san Bungiu aban katei gabagariti ani lárigiñe aba lígiruni lun asaliragueina lan lun ámume hawuyeri gabagaritiña?
Úarati le tariñagubei Bíbülia luma asansiruni le ariha hamaalibei aturiahatiña siensia lidan kada luwuyeri ibagari.
WAWAGU
Amuriaha humá habisidahóun
Ayanuha humá hama gefentiña luagu Heowá luagu óunabagülei le tíchugubei Bíbülia lun somu álügüdahani o lúntima hasubudirun hawagu.
