Le siñá tubéi siensia ariñaga woun
Íbini aturiaha hamaali lan sásaamu sun katei gánibei le huáñurugubei, ániheingiili bandi álügüdahani súdiniti le siñá hamuti íchiga lóunabagüle.
Subudi laali san siensia ida liña lan lagumeserun ibagari luma ubóu? Le linarün katei uá. Aban fánreinti lidan siensia le gíribei kosmología, gayaraati lafuranguagüdüni ida liña lan lagumeserun ubóu. Ariñagati Marcelo Gleiser, le arufudahabei Astronomía tidan luban furendei íñuti Dartmouth: “Mafuranguagüda wamagili ida liña lan lagumeserun ubóu”.
Ka gayarabei lariñawagún luáguti lagumeserun ibagari? Ariñagatu aban arufudahani tidan garüdia Science News: “Másiñati siñabei lan lafuranguagüdüni ida liña lan lagumeserun ibagari lidan Ubóu. Lǘhali lúmagiñe heferidiruni besafu ariñahani le hadarirubei le hamuga gayarabei hafuranguagüdüni woun ida liña lan lagumeserun sun katei”. Arufuda lumuti bián ariñahani le siñá láagili lan siensia ariñaga woun ida liña lan lagumeserun ubóu luma ibagari.
Másiñati álügüdagua humá hungua: “Anhein adügǘwarügüti lubéi ibagari lidan Ubóu, kagia adügübalin? Lau sun lira, anhein anihein lubéi aban chu tau buiti Le adügübalin sun katei, ka uagu ligira lun wasufurirun? Ka uagu ligira lun ñein lan saragu relihión? Ka uagu lígira lun hadügün saragu gürigia ha lílana relihión katei wuribati?”.
Siñá lumuti siensia álügüdahani burí le óunaba, úati mini lan le ua lan óunabagülei le furanguti. Íbini ítara, darí hamaali saragu gürigia óunabagülei tidan Bíbülia.
Añahein fiu sásaamu sagá haña dan lun hakutihani le tariñagubei Bíbülia. Hínsiñeti hamuga san hun hasubudiruni ka uagu chouru hamani anihein lan Le adügübalin sun katei? Heiba lidan jw.org lárigiñe bürǘ humá lidan áluahouala “Saminaü luáguti lagumeserun ibagari”.