Le tariñagubei Bíbülia woun
“Anihán asuseredubei lidan ladügün sielu luma Ubóu” (Agumesehani 2:4). Lau dimurei burí le, afuranguagüda tumutu Bíbülia ida liña lan ladügǘn ubóu. Úarati san le tariñagubei Bíbülia luma le tariñagubei siensia?. Dan le tafuranguagüdüni Bíbülia luagu Ubóu. Genegeti san ligiaméme lan le tariñagubei Bíbülia lumoun le tariñagubei siensia? Akutiha waméi álügüdahani burí le.
Lagumeseha katei: Adügǘwati sielu luma Ubóu.
Ñéingubeiñein san ubóu?
Ariñagati Agumesehani 1:1: “Dan le lagumeserunbei sun katei, aba ladügüni Bungiu sielu luma Ubóu”.
Darí lamidangua sígulu wein, afiñetiña saragu sásaamu ha aturiahabaña siensia ñéingubeiñein lan ubóu. Guentó, seremei lun saragu ariñahani le adarirubei, subudi hamaali gumeseti lan ubóu.
Ida liña meha san Ubóu dan le lagumeserubei?
Según líburu Agumesehani 1:2, 9, lidan lagumeseha, “magaburigili meha Ubóu”, ani buin liña meha lau duna.
Úarati ariñahani le luma le hadarirubei sásaamu. Kei hénpulu, ariñagati Patrick Shih le aturiahabei siensia, lidan lagumeseha katei, “anihein meha garabali le siñati lirimichún lidan Ubóu”, ani “ámuti meha laríawagun sun katei”. Ariñagatu garüdia Astronomy: “Anihein lan iseri ariñahani le ariñagubei buin liña lan meha ubóu lau duna o murusun fulasu le mábeiti”. “Arufudati iseri aturiahani geyegu liña lan meha Ubóu lau duna, le ídanbei ua lan o murusunrügüñein lan meha múa ñein”.
Ida liña asansireina lan idaüdinaü lánina Ubóu?
Afuranguagüdati Agumesehani 1:3-5, gumese lan leiti adagara luagu idaüdinaü lánina Ubóu. Lau sun lira, siñati meha larihíniwa ubouagugiñe halíagiñe lan liabin. Mosu meha lásügürün dan lun lagumeserun arihúa furangu láfuachun Weyu luma Hati (Agumesehani 1:14-18).
Mariñaguntu Bíbülia adügǘwati lan Ubóu lidan sisi weyu lánina 24 oura
Ariñagatu Smithsonian áfisi to ñein lubéi laturiahoun katei le geyegubei wau, mígirunti lidaüdinaü Ubóu lun larihíniwa buidu. Afuranguagüdatu giñe: “Adügati lédedehan métanu le garabalirugubei lun ñein lan aban dúeri le adóuruti lau sun Ubóu lidan lagumeseha”. Dan lárigiñe, “aba agidareina lan dúeri darí lun dingu hali lan laríawagun sielu”.
Ida liña san lagumeserun ibagari Ubouagu?
Según Agumesehani 1:20-27, gumeseti sun le gabagariti ítara: úduraü, dunuru, hama sun hawuyeri animaalugu, lagumuhóun aba hadügǘn furumiñetiña gürigia. Ani ka hariñagubei sásaamu ha aturiahabaña siensia? Saminatiña aba lan háfuachun úduraü, dunuru hama ha híbiri animaalugu ani saragu dan lárigiñe aban háfuachun gürigia.
Mariñagun tumuti Bíbülia, lau lan lásügürün dan, úabei lan sánsiguaü lidan katei le adügǘwati
Le mariñagun tubéi Bíbülia woun
Ariñagatiña fiu gürigia múaran lan le hariñagubei sásaamu luma le tarufudahabei Bíbülia. Lau sun lira, saminatiña ítara ladüga úati gunfuranda hamani buidu le tariñagubei Bíbülia.
Mariñaguntu Bíbülia 6.000 rügüñein lan irumu lau Ubóu. Lubaragiñe lira, ariñagarügütu “dan le lagumeserunbei sun katei” adüga lani sielu luma Ubóu (Agumesehani 1:1). Mafuranguagüdün tumuti Bíbülia ida buga lan lasusereda katei le.
Mariñagun tumuti Bíbülia lidan lan sisi weyu le 24 oura ladügei Bungiu Ubóu luma sun le lídanbei. Lubaragiñe lira, yusu lumuti dimurei weyu lun layanuha luagu ámuñegueinarügü dan. Kei hénpulu, ariñagatu adügǘwarügüti lan ibagari luma Ubóu le ídanbei wawinwanda lidan weyu le ídanbei ladügüni Bungiu a ubóu (Agumesehani 2:4). Ñein ladarirúa sisi weyu le uágubei layanuha kapítulu 1 lidan Agumesehani, ñein lubéi laranserei Bungiu Ubóu ani adügaléi ibagari le lídanbei. Ligíati, kada aban lídangiñe sisi weyu le ídanbei ladügǘwa katei másiñati durati lan saragu dan.
Mariñaguntu Bíbülia úabei lan asansiruni lidan sun le gabagaribei lau lásügürün dan. Ariñagatu giñe liliburun Agumesehani adügǘwarügü hamá “sun hawuyeri” animaalugu ubouagu (Agumesehani 1:24, 25). Tidan Bíbülia dimurei “hawuyeri” mama hámagiñe sásaamu liabin, másiñati layanuhóuña lan luagu ámuñegueinarügü luwuyeri ibagari. Adügati le lun wasubudiruni, ñeinbei lan asansiruni haganagua ámuñegueinarügü animaalugu según ligaburi hawinwandun.
Ka hisaminanbei?
Afuranguagüda tumuti Bíbülia lidan fiu dimurei ida liña lan lagumeserun sun le geyegubei wau, aba lídangiñe b
Ubóu luma ida liña lan lagumeserun ibagari. Anhein gayara lubéi tariñaguni Bíbülia ida liña lan ladügüniwa sun katei lidan aba igaburi le ménrengunti lun gunfurandawa lan, siñati hamuga san tariñaguni woun ka lan adügübalin sun katei? Según tafuranguagüdüni Encyclopædia Britannica, “lau sun mégeiwa lan saragu ubafu lun ladügǘn ibagari, madügünti lira lun múaranbei lan le luma iseri subudi le gunfuranda hamaalibei aturiahatiña siensia uguñe weyu”.