Súdiniti óunabagülei
Ka uagu súdini lubéi wasubudiruni anihein lan aban Le adügübalin sun katei? Ladüga, anhein afiñe hubéi anihein lan Bungiu le gabafuti, másiñati busén humá hasubudiruni anhein lúmagiñe lubéi Bungiu tiabin Bíbülia. Ani, anhoun haliiha Bíbülia, líderagubadün adundehani burí le.
Gúndaatimabei hibagari
ARIÑAGATU BÍBÜLIA: Adüga lan Bungiu katei “ruti huya woun luma alubahani buiti, ru ligía éigini buídurügüti woun, belugüda lumuti ugundani tidoun wanigi” (Adügaü 14:17).
KA MINI LUBÉI? Sun lubuidun katei le geyegubei wau aban idewesei lúmagiñeti Bungiu. Gúndaatimabadün lau idewesei le danme le hasubudiruni adundehani le tídanbei Bíbülia ani subudi humeime lueirin lebereserun Bungiu hau.
Hadariruba adundehani buiti
ARIÑAGATU BÍBÜLIA: “Basubudirubei giñe ísuruni luma irichaü teni buguyame lun sun katei le buídubei” (Ariñawagúni 2:9).
KA MINI LUBÉI? Kei Bungiu lan adügübaliwa, subudi lumuti ka lan hemegeirubei lun gunda humá. Anhein hakutiha le tariñagubei Bíbülia, hadariruba adundehani le huuti lun líderagunün.
Gayaraati tóunabuni hálügüdahan
ARIÑAGATU BÍBÜLIA: “Ítara luba basubudiruni lanichigu lasubudirúniwa Bungiu” (Ariñawagúni 2:5).
KA MINI LUBÉI? Lau hasubudiruni anihein lan Le Adügübalin sun katei líderagubadün óunaba fiu álügüdahani súdiniti, kéiburi ka san lisuunibei ibagari, ka uagu anihein lubéi asufuriruni o ka asuseredubei houn gürigia dan le hounwe. Hadariruba óunabagülei chóuruti tidan Bíbülia.
Harihibei hemenigi ámuñegü
ARIÑAGATU BÍBÜLIA: “Subudi numuti naransehan hubá, aransehani lun buiti mama lun wuribati hun, lun gayaraabei lan níchuguni dan le lunbei liabin buin lau emenigini hun. Au, le Aburemei ariñagubalin” (Heremíasi 29:11).
KA MINI LUBÉI? Füramaseti Bungiu lagumuchuba lan lau wuribani, asufuriruni luma óunweni. Anhaün afiñera luagu le füramase lubéi Bungiu, ganigi badun lun hagagibudagun luma turobuli le lánina sagü weyu.