ATURIAHANI 29
Ídeha wamá luma Hesukrístu, le wábuti
“Rúaali sun ubafu nun sielu luma ubouagu” (MAT. 28:18).
UREMU 13 Kristu wánibei hénpulu
LE LUNBEI WATURIAHANI *
1. Ka san lugundanbei Bungiu uguñe weyu?
LE LUGUNDANBEI Bungiu uguñe weyu lun lapurichihóun uganu buiti luáguti Larúeiha lidan sun Ubóu (Mar. 13:10; 1 Tim. 2:3, 4). Lúmagiñe Heowá liabin dasi le, ani wéiriti lisudinin darí lun lanúadiruni Heowá Lisaani le hínsiñebei lun, lun ligía lan abugurei dasi le. Kei Hesusu lubéi adundehabalin dasi le, gayaraati wachoururuni danme lan liabin lagumuchagüle ubóu, gúndaabei lan Heowá luagu ladügǘña lan kei le aubei labusenra (Mat. 24:14).
2. Kaba wariha lidan aturiahani le?
2 Lidan aturiahani le, warihiba luagu yusu lani Hesusu “musu úaraguati ani gunfuranda ligía” lun líchugun ariñahani lúmagiñeti Bungiu woun le ítarabei woun kei éigini luma lun ladügün aransehani lúntima lapurichihóun lidan sun burí dan le (Mat. 24:45). Warihinbei giñe ka lan gayaraabei wadügüni kada aban wádangiñe lun wídeha dandu luma Hesusu kei luma musu úaraguati.
HESUSU ARIHIBEI LAU DASI LÁNINA APURICHIHANI
3. Ka ubafu ichugúbei lun Hesusu?
3 Larihiña Hesusu lau apurichihani. Ida liña wasubudiruni? Murusun dan lubaragiñe lamudeirun sielun, aba ladamuridagun hama fiu hádangiñe lani disipulugu ha úaragubaña luagu aban wübü Galiléa ani aba lariñagun houn: “Rúaali sun ubafu nun sielu luma ubouagu”. Ariha waméi leeya lariñagubei: “Heiba lubeiti habügürü gürigia ha lílana sun fulasu, adüga humaña nánime disipulugu” (Mat. 28:18, 19). Laganagua amu katei rúaali giñe ubafu lun Hesusu lun labuguruni apurichihani.
4. Ka uagu wachoururei anihagua lan Hesusu ariha lau apurichihani?
4 Ariñagati giñe Hesusu dandu lan apurichihani kei hadügǘn disipulugu ladügǘba lan lidan “sun fulasu ubouagu”, ani hámabei lan “sagü weyu darime lagumuchun ubóu” (Mat. 28:20). Furanguti larihín Hesusuba lan meha abugurei apurichihani lidan wadaani.
5. Ida liña wídehan lidan lagunfulirun Sálumu 110:3?
5 Chouru lumuti meha Hesusu ñéinbaña lan saragu adügüti dasi le lidan lagumuhóun dan lánina lagumuchagüle ubóu. Subudi lumuti lagunfuliruba lan dimurei lánina profesía le: “Deregeguatiña bánigu houngua bun lidan luéyuri bagañeirun” (Sal. 110:3). Anhein hapurichihañein lubéi uganu buiti, híderaguñein Hesusu luma musu úaraguati ani hídehaña giñe lidan lagunfulirun profesía burí le. Lapurichihóuña uguñe weyu, gama lumoun, anihein katei le eberesehabalin.
6. Ka uma lénrengunga úmabei hagagibudagua ha apurichihabalin uganu buiti uguñe weyu?
6 Éibaahouni ligía aban lídangiñe katei le úmabei hagagibudagua apurichihatiña. Buruguagüdaaña dandu polítiku kei ha agarabaagubaña luagu Bungiu, ítara kei alidihatiña relihión saragu iyeeni luagu dasi le wadügübei. Ánhaña afiñera waduheñu, wapanaagu lidan wadagimanu hama burí wasubudiragun lun iyeeni burí le, másiñati hálugun lun wígiruni wapurichihan luma weseriwidun lun Heowá. Anihein burí ageiraü le ñein lubéi hasíadirawa wáganiñu, agayuaha hagía wawagun, ragǘ ani daü hamawa. Maweiriduntu wanigi luagu katei le ladüga ariñagaali Hesusu: “Hiyereegudúba lun sun ubóu nuéigiñe” (Mat. 24:9). Ligíati iyereehabúni le hasandirubei wawagu, arufudati wasigiruñein lan lani Hesusu hénpulu ani gunda lan Heowá wau (Mat. 5:11, 12). Mafia lanagangiñebei sun éibaahouni burí le, gama lumoun, gabafutimati Hesusu luéi. Lau lídehan Hesusu, lachülürüña uganu lánina Larúeihan Bungiu le houn saragu gürigia lidoun sun fulasu ubouagu.
7. Ka achoururagüdübalin woun lagunfuliruña lan profesía le tídanbei líburu Arufudúni 14:6, 7?
7 Ábaya turobuli anihein lan saragu iñeñein uguñe weyu. Lidan arufudúni le larihibei apostolu Huan, afuranguagüda lumuti Hesusu lun madügünbei lan katei le lun mapurichihounbei lan uganu buiti (aliiha huméi Arufudúni 14:6, 7). Ida liña wagañeiruni turobuli le? Lau wadügün lun ñein tan agumeiraguagüdüni tídangiñetu Bíbülia houn sun gürigia lidan jw.org lidan lóugiñe 1,000 iñeñein. Ruti giñe Musu Úaraguati üma lun tásügürawagüdün líburu Winwan humá lau ugundani lidan lóugiñe 700 iñeñein, tuguya agumeiraguagüdüni tótima wayusuruboun lun wíchugun aturiahani houn gürigia. Anihein giñe ariñahani tídangiñeti Bíbülia lidan bidéu houn gürigia ha maganbuntiña tuma burí agumeiraguagüdüni lidan büraile houn marihintiña. Ítarati, gíbetimahaña gürigia gachansintiña sügǘ luéi amu dan lun hánharun lun uganu lánina Larúeihan Bungiu. Ma warihiñein lau wagu guánarügü lagunfulirun profesía tídangiñeti Bíbülia le uguñe weyu? Gürigia terencha “ha lílana líbiri burí fulasu” hafurendeiruña ayanuhei iñeñein harumati le lánina inarüni le tídanbei Bíbülia (Sak. 8:23; Sof. 3:9, TNM). Susereti kati le seremei líchuguni Hesukrístu ídemuei le wemegeirubei woun.
8. Darí guentó ida liña lidin woun lidan apurichihani?
8 Uguñe weyu, añahein hóugiñe 8 míñunu gürigia lidan 240 ageiraü luma burí fulasu ha tílana lóundarun Heowá. Sagü irumu habadiseirun saragu milu. Le súdinibei, igaburi lúmagiñeti Bungiu le harufudubei iseri disipulugu ha, lau hawinwandun lidan igaburi le unbei tagúahan Bíbülia iseri igaburi (Kol. 3:8-10). Saragu hádangiñe ígira hamaali magíaguni, anarimeni, iyereehabúni luma ínsiñeni luagu ageiraü. Lagunfuliruña profesía le lídanbei Isaíasi 2:4: “Mageindagunhalime aban néchani luma ábanya”. Kei wáfaaguña lubéi lun iseri lan wagaburi, adügatiti lira lun hayarafadun gürigia tun lóundarun Bungiu ani arufuda wamuti wafalaruñein lan Hesukrístu, le Wábuti (Huan 13:35; 1 Fe. 2:12). Mama ítaraguarügüti katei lira, líderaguñadiwa Hesusu.
LÍRIDUN HESUSU ABAN MUSU
9. Según Matéu 24:45-47, ka lariñagunbei Hesusu lasusereduba lan lídanme lagumuhóun dan?
9 (Aliiha huméi Matéu 24:45-47). Ariñagati Hesusu lidan lanme lagumuhóun dan líchuguba lan aban “musu úaraguati ani gunfuranda ligía” lun líchugun ariñahani lúmagiñeti Bungiu woun. Ligíati gayaraati warihini lawadigimariduña lan musu le lidan wadaani. Ani ítara liña. Yúsuti Hesusu fiu hádangiñe kristiánugu anuadirúaaña lun híchugun ariñahani lúmagiñeti Bungiu houn lumutuniña Bungiu luma houn gürigia ha arufudubaña busén hamá hafurendeirun luagu Bungiu. Móuseruntiña gürigia ha kamá hamuga hagía laburiñabaña hafiñen amu (2 Ko. 1:24). Lubaragiñe lira, subudi hamuti Hesukrístu lan ábutibei ani ligía lan arufudahabei houn lumutuniña Bungiu (Isa. 55:4).
10. Ka tídangiñe líburu to áfuachuboun tidan iyawaü íderagubadün lun hebelurun lidoun üma le anügübei lidoun ibagari?
10 Lúmagiñe irumu 1919, aransehaali musu úaraguati saragu agumeiraguagüdüni lun hafurendeiruni gürigia inarüni luagu furumiñeti wéiyaasu tídangiñeti Lererun Bungiu. Lidan irumu 1921 aba lagumeiraguagüdün musu úaraguati aban líburu lidan inglesi to gíriboun El Arpa de Dios lun larufudahóun inarüni súdiniti tídangiñeti Bíbülia houn gürigia. Eibu lasansiragun dan, aba burí ladügün musu úaraguati amu burí líburu. Ka tídangiñe líburu to hayusuruboun lun hasubudiruni luma lun línsiñedun Wáguchi Bungiu le siélubei hun? Másiñati tau lan burí líburu to: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, Kátima san tarufudahabei Bíbülia? O hayusuruñoun lan iseri agumeiraguagüdüni to gíriboun: “Winwan humá lau ugundani”. Adügǘwatu líburu to lun tíderaguniwa adüga disipulugu, ani súnwandan táfuridun lidan dan.
11. Ka uagu súdini lubéi lun weresibirun ariñahani lúmagiñeti Bungiu?
11 Mégeitiña aturiahatiña tídangiñeti Bíbülia ariñahani le dǘgüdati luagu Heowá luma tuagu Bíbülia. Le linarün katei, sun wagía megei wamuti. Abürühati apostolu Pábulu: “Éigini le dǘgüdati hounti ha wéinamuhañabaña lidan hafiñen”. Ariñagati giñe ha lan awinwandubalin le hafurendeirubei, hasubudirubei “arufudahani le buídubei lumoun le wuribabei” (Ebü. 5:14). Kei lagumuchaguña lan laruman igaburi, gayaraati güreweibei lan lun gaganbadiwa lan lun lilurudun Heowá luáguti laruman igaburi. Gama lumoun, Hesusu arihibei luagu ariñahani lúmagiñeti Bungiu le tídanbei Bíbülia le íderagubaliwa lun wakipuragun woungua derebuguñu lidan wamadagua luma Bungiu. Musu úaraguati aransehabalin ariñahani le ani afanreinhalei lábugiñe laríaahan Hesusu.
12. Ka wadügübei lun wíchugun uéiriguni lun liri Bungiu ítara kei ladügüni Hesusu?
12 Ítara kei Hesusu, rúhadiwa giñe uéiriguni lun liri Bungiu (Huan 17:6, 26). Kéiburi, lidan irumu 1931 aba wanügüni iri le tídanbei Bíbülia gefentiña luagu Heowá. Ítara liña warufuduni busén wamá wanügüni liri Wáguchi Bungiu le siélubei ladüga busén wamá warufuduni súdini lan woun (Isa. 43:10-12, TNM). Lidan diisi-hati lídanmeme irumu ligía, aba lagumeserun liri Bungiu áfuacha tidan garüdia to lidan inglesi. Lanwoun lira, fidí taali giñe Traducción del Nuevo Mundo liri Bungiu lidan fulasu le ñein lubéi yu lan lun láfuridun tidan Lererun. Katei le madügün tubéi ligilisi to ariñaguboun tuougua kristiánu tan, gidarügü hamuti liri Heowá tídangiñe saragu Bíbülia to hásügüragüdüboun.
ARANSEHA LUMUTI HESUSU IDA LUBA LAN LÉIBUGUN KATEI HADAN LÁNIGU
13. Ka achoururagüdübalin hun luagu layusuruñein lan Hesusu “musu úaraguati ani gunfuranda ligía” uguñe weyu? (Huan 6:68).
13 Lau lídehan “musu úaraguati ani gunfuranda ligía”, adügaali Hesusu aransehani le buiti ya ubouagu lun gayara lan ñein lan áhuduraguni le inarüniti. Ka hisaminanbei tuagu óundaruni to? Másiñati hasaminarun luagu Féduru le ariñagubei lun Hesusu: “Kábagia umoun woudin? Dimurei burí le bariñagubei, lánina ibagari magumuchaditi” (Huan 6:68). Ida waba hamuga san lun hamuga masubudirun wamanu lóundarun Heowá? Anihein sun le wemegeirubei tidan óundaruni to lun wasigirun úaragu lun Bungiu ani arufudahatu woun lun máisturugu wamá ha buítiña. Ani íderagua lumutiwa giñe lun wadaüragun “lau iseri igaburi” lun gayaraabei lan wagundaaragüdüni Heowá (Efe. 4:24).
14. Ida liña líderagunün tidan humá lóundarun Heowá lidan lidaani sandi COVID-19?
14 Dan le wagagibudagun luma sügǘ hénrenguti adundeha lumutiwa Hesusu lau lichú au. Arihúati le furangu dan le lagumeserunbei sandi COVID-19 ani burugua ligía. Saragu gürigia ubouagu ibidiñeti houn kaba lan hadüga, gama lumoun, adügati Hesusu lun weresibirun adundehani le furanguti lun lóunigiruniwa. Ínchahouatiwa lun wayusurun lidáü ígiri luma iyumaü lidan fulasu le ñein habéi saragu gürigia luma lun díseñu wamá hawéi amu. Haritaguagüdüwatiña wéiyaaña lidan afiñeni lun harihini ida haña lan íbirigu ka lan hemegeirubei luma giñe ka lan hemegeirubei lidan hamadagua luma Bungiu (Isa. 32:1, 2). Ru hali ariñahani lúmagiñeti Musu Úaraguati adundehani woun luma dǘgüdaguaü.
15. Ka amu adundehani weresibirubei lidan lidaani sandi COVID-19, ani ida liña lidin woun?
15 Lidan lidaani sandi COVID-19 chülüti giñe adundehani furanguti woun ida luba lan ladügǘn adamuridaguni luma apurichihani. Lau lóufudagun aba wagumeserun adügei adamuridaguni burí luma adamurini, luéigiñe Interneti, ani apurichihatiwa giñe luéigiñe gágamuru luma lau wabürühan gárada. Biní laali Heowá wáfaagun. Ariñagaaru saragu sukursáli gánwountimarügaaña lan apurichihatiña. Ani ariñagaaña saragu íbirigu buídutima lan lidin houn lidan burí dan le (ariha huméi rekuáduru “ Biní lumuti Heowá apurichihani”).
16. Ka katei gayaraabei wachoururuni?
16 Másiñati añahein lan íbirigu asaminarutiña hanarimeya lan duari tan lóundarun Heowá luéi sandi COVID-19. Ani arihúaali furangu buidu lan adundehani le weresibirubei (Mat. 11:19). Ánhawa asaminara hulili luagu ligaburi ladundehaniwa Hesusu lau ínsiñeni, gayaraati wachoururuni meberesenga kaba lan asusereda túteme ñeinbei Heowá wama úara luma Lisaani le hínsiñebei lun (aliiha huméi Ebüréu 13:5, 6).
17. Ida liña hasandiragun hungua lau hawadigimariduña lan lábugiñe laríaahan Hesusu?
17 Ma lueirin ugundani le wasandirubei lau wawadigimaridun lábugiñe laríaahan Hesusu! Tídanñadiwa aban óundaruni to úabei fánreingua tidan meberesenga ka lan hanechanibei tílana, ka lan harasanbei o ka lan hererunbei. Resibitiwa saragu adundehani le tídangiñeti Lererun Bungiu ani adügati lira lun aranseñu wamá lun wapurichihan. Kada aban wádangiñe awanhagua afurendeira akipura aban iseri igaburi luma lun hínsiñe hamá amu woun. Ma lanarime ugundani le wasandirubei ladüga Hesukrístu lan alidihabaliwa!
UREMU 16 Alawaha waméi Heowá luagu Liráü, le Lanúadirubei
^ Uguñe weyu, añahein saragu míñunu wügüriña, würiña hama irahüñü apurichihei uganu buiti lau ubebeni. Huguya san aban hádangiñe? Anhein ítara liña lubéi, hafalaruñein ladundehan Hesukrístu le Wabureme. Lidan aturiahani le, warihiba ka lan achoururagüdübalin woun Hesusu lan arihibei lau apurichihani lidan wadaani. Lau wararamagun asaminara luagu ariñahani le, lánhingichubadiwa lun wasigirun eseriwida lun Heowá lábugiñe ladundehan Kristu.