1. Ka ladügübei Heowá murusun dan lárigiñe lafigouhan Adán tuma Ewa? (Agumesehani 3:15).

 MURUSUN dan lárigiñe lafigouhan Adán tuma Ewa, aba líchugun Heowá emenigini houn hadügawagun lídangiñe aban profesía. Gayaraati waliihani le lariñagubei lidan Agumesehani 3:15 (aliiha huméi).

2. Ka uagu súdini lubéi profesía le lídanbei Agumesehani 3:15?

² Darí wamuti profesía le tidan furumiñetu líburu tidan Bíbülia. Ani sun to tíbiri líburu to tídanboun Bíbülia úaratu luma profesía le. Ítara kei loundarún sun ubanaü tidan aban líburu, adügati giñe dimurei le lídanbei Agumesehani 3:15 lun lidan tan aban sun líburu to tídanboun Bíbülia luma lun ábanmeme lan uganu le tídanbei. Ka uganu ligía? Lóunahaba lan Bungiu aban Esefuhati lun lagumuchun lau Mafia luma hau sun ha afalarubalin. * Ma lubuidun uganu le houn sun ha hínsiñebei Heowá houn!

3. Kaba wakutihan lidan aturiahani le?

³ Lidan aturiahani le, wóunabuba fiu álügüdahani le úarati luma le ariñawagúbei lidan Agumesehani 3:15: kátaña san ha iridúbaña lidan profesía le?, ida liña lagunfulirun? ani, ida liña líderaguniwa uguñe weyu?

4. Katoun san hewe to, ani ida liña wasubudiruni?

⁴ Ayanuhóuati lidan Agumesehani 3:14, 15 tuagu aban “hewe”, luma hawagu “tadügawagun”, ayanuhóuati giñe tuagu  aban “würi” luma hawagu “tadügawagun”. Íderagua tumutiwa Bíbülia asubudiraña kada aban hádangiñe. * Gumese wamá túmagiñe hewe. Mama aban hewe to animaalu, ladüga úabei gunfuranda tani le lariñagunbei Heowá lidan fuluri agei Edén. Kati uma layanuha Heowá? Furanguti tariñaguni Bíbülia woun ka lan uma. Ariñagati Arufudúni 12:9: “Le binadu hewe ligira le gíribei Mafia, o Satanási”. Kátañati tadügawagunbaña hewe?

5. Kátaña san tadügawagunbaña hewe?

⁵ Anihein dan tayusuruni Bíbülia dimurei “adügawagun” lun tayanuha hawagu ha áyeihabalin ítaga saminaü luma ítaga igaburi lúmagiñe ítaga gürigia darí lun laguarún houn lirahüñü. Ligíati, ha tadügawagunbaña hewe sífirigu wuribatiña hama gürigia ha ebedaagubaña lun Heowá luma houn lumutuniña, ítara kei ladügüni Satanási. Hadan tadügawagun hewe añahein ánheligu ha ígirubalin habara sielu lidan lidaani Noé hama giñe gürigia ha wuribatiña ha óuserubaña kei Mafia le háguchi (Agu. 6:1, 2; Huan 8:44; 1 Huan 5:19; Hud. 6).

6. Ka uagu mama lubéi Ewa würi to uáguboun layanuhóua lidan Agumesehani 3:15?

⁶ Guentó, akutiha waméi katoun lan würi. Ewa funa san? Uá. Samina wamá luagu le. Ariñagati profesía lachuinrubei lan tadügawagun würi tichügü hewe. Kei le aubei warihei mama aban animaalu hewe tuguya, Satanási hewe tuguya. Ligíati siñati lagumuchun aban gürigia gafigounti le tadügawagun Ewa lau Satanási. Ida lubati lagünrinchawagun Satanási?

7. Ida liña líderaguniwa Arufudúni 12:1, 2, 5, 10 lun wasubudiruni katoun lan würi to uáguboun layanuhóua lidan Agumesehani 3:15?

⁷ Ariñaga tumuti tagumuhóun líburu tidan Bíbülia katoun lan würi to uáguboun  layanuhóua lidan Agumesehani 3:15 (aliiha huméi Arufudúni 12:1, 2, 5, 10). Mama wayanuhaña tuagu aban würi to lautu abun luma ǘgürügü. Lugundun anihein hati lábugiñe tugudi würi to ani anihein aban ridi hau 12 waruguma tábulugu. Lanwoun lira, aba tágurahan aban irahü espechaliti, Larúeiha Bungiu mini lubéi. Kei siéluna lubéi arúeihani le ligíati siéluna tubéi würi. Mini lan fánreinti le, lóundarun Heowá le siélubei, le haubei sífirigu úaraguatiña (Gal. 4:26).

8. Katei san fánreinti le súdinitimabei hádangiñe tadügawagun würi, ani ka dan lasusereda katei le? (Agumesehani 22:15-18).

⁸ Seremei Lererun Bungiu, gayara lubéi wasubudiruni fánreinti le súdinitimabei hádangiñe tadügawagun würi. Ariñawagúati aban lan hádangiñe ladügawagun Abüraámü (aliiha huméi Agumesehani 22:15-18). Gúnfuliti profesía le ladüga lídangiñe lan wügüri le liabin Hesusu (Luk. 3:23, 34). Mosu meha gabafu lan adügawaguni ligía sügǘ luéi aban gürigia, lun gayaraabei lan lagumuchun lau Mafia. Ligíati kei burí 30 irumu lau Hesusu aba lanuadirún kei Liráü Bungiu lau sífiri sandu. Lúmagiñe dan ligía ábanhali fánreinti le súdinitimabei hadan tadügawagun würi (Gal. 3:16). Lárigiñebei lounwe Hesusu luma láguyugun, dáüguagüda lumuti Bungiu “lau uéiriguni luma inebesei” ani ru lumuti sun ubafu lun “sielu luma ubouagu” luma giñe “lun lagünrinchaguni luadigimari Mafia” (Ebü. 2:7; Mat. 28:18; 1 Huan 3:8).

9, 10. a) Kátaña san amu tadügawagunbaña würi, ani ida liña lasuseredun tadügawagun hamá b) Kaba wariha guentó?

⁹ Mámarügüñein aban fánreinti tadügawagun würi anihein giñe ábaya libiaman. Ariñaga lumuti apostolu Pábulu kátañanu lan dan le labürühabalin dimurei le houn kristiánugu anuadirúaaña huríu luma houn ha mámabaña huríu, lau lariñagun: “Anhein lánigu hubéi Kristu, ladügawagun Abüraámü huguya, heresibirubei giñe le füramase lubéi Bungiu” (Gal. 3:28, 29). Dan le lanúadirun Heowá aban kristiánu lau sífiri sandu, ábanhali hádangiñe tadügawagun würi kristiánu ligía. Ligíati ha lílanabaña adügawaguni le, Hesukrístu hama 144,000 kristiánugu anuadirúaaña ha lúnbaña harúeiha luma (Aruf. 14:1). Sun hagía áfaaguatiña lun hasaminarun luma lun hóuserun kei Heowá, le Háguchi.

¹⁰ Subudi wamaali guentó ka lan uagu layanuha Agumesehani 3:15. Ani guentó águyuguagüda waméi le burí ladügübei Heowá lun lagunfuliruni lererun, ani lárigiñe ábame warihini ida luba lan líderaguniwa profesía burí le uguñe weyu.

11. Ida liña labuleseirun lugudi tadügawagun würi?

¹¹ Ariñagati Agumesehani 3:15 tágürübei lan hewe lihilin lugudi tadügawagun würi. Gúnfuliti katei le dan le hínchahabaliña huríu rómana lun háfaruni Liráü Bungiu hilagubei (Luk. 23:13, 20-24). Aban buleseiti luagu lihilin lugudi gürigia, adügati lun méibugun lan luagu fiu dan. Ítarameme, adügati lounwen Hesusu lun madügün lan ni kata ani ǘrüwañein weyu lau lidan umúahaü (Mat. 16:21).

12. Ídaba ani ida luba lachuinrawagún tábulugu hewe?

¹² Lun lagunfulirun le bürüwañubei lidan Agumesehani 3:15, siñati buga lerederun Hesusu lidan umúahaü, lugundun según profesía, lachuinrubei tadügawagun würi tichügü hewe. Gama lumoun, mosu meha lareidagun Hesusu lídangiñe buleseiti le libihubei. Areidaguati sunsuinagubei! Ǘrüwa weyu lárigiñe lounwen Hesusu aban láguyugun keisi sífiri móunwedaditi. Danme le lachülürün oura le lanúadirubei Bungiu, lagumuchuba  Hesusu lau Satanási sunsuinagubei (Ebü. 2:14). Lagünrinchagubaña Kristu hau sun ha arúeihabaña luma sun tadügawagun hewe (Aruf. 17:14; 20:4, 10). *

13. Ida liña líderaguniwa lagunfulirun profesía le?

¹³ Anhein aban lubéi lubúein Bungiu huguya le deregeguaalibei lungua lun, hasagaruña buiti lídangiñe lagunfulirun profesía le. Ñǘbuinti Hesusu ubouagu kei aban wügüri ani áyeiha lumuti ligaburi Lúguchi (Huan 14:9). Íderagua láadiwa lani Hesusu hénpulu lun wasubudiruni Heowá luma lun línsiñedun woun. Íderagua láadiwa giñe Hesusu lau larufudahan luma lau ligaburi labuguruni damuriguaü kristiánu uguñe weyu. Arufudahati woun ida luba lan wanügün aban ibagari le aubei lagundaara Heowá. Sun wagía gayaraati wasagarun buiti lídangiñe —lounwen Hesusu— mini lan le, buleseiti le leresibirubei luagu lihilin lugudi. Lárigiñe láguyuguagüdüni Heowá Hesusu aba lánharun Heowá lun sákürifisiu le ladügübei Hesusu “ani chibá lumuti lita Hesukrístu sun wafigoun” (1 Huan 1:7).

14. Ida liña wasubudiruni magunfulirun lan profesía le lariñagubei Heowá lidan fuluri-agei Edén lau lóufudagun lidan dan ligía?

¹⁴ Magunfulirunti profesía le lariñagubei Heowá lidan fuluri-agei Edén lau lóufudagun. Mosu meha lásügürün dan lun gadügawagun tan würi, luma lun lóundaruniña Mafia lánigu lun gáganigua hamá hama tadügawagun würi. Ida liña líderaguniwa wasubudiruni katei le? Seriwiti woun kei eweridihani: ubóu le lábugiñebei lubafu Mafia iyereegutiña lubúeingu Heowá houn. Saragu sígulu lárigiñe aba lariñagun Hesusu aban dimurei ítarati houn (Mar. 13:13; Huan 17:14). Furanguti warihini lagunfulirun fánreinti lánina profesía le, lídantima 100 irumu le. Ka uagu wariñagei?

15. a) Ka uagu iyereegutima wabéi lun ubóu uguñe weyu sügǘ luéi amu dan? b) Ka uagu moun lumuti lubéi wanufudedun luéi Satanási?

¹⁵ Gumeseti Hesusu arúeiha sielu lidan irumu 1914 ani murusun dan lárigiñe aba labuguni Hesusu Satanási siélugiñe. Ani guentó yárügaali ubouagu layusurei Satanási lubafu ani lagurabahaña lagünrinchawagun (Aruf. 12:9, 12). Lúmagiñe dan ligía beresegu liña Satanási. Lau igañi luma furundei lagayuaha hawagun lumutuniña Bungiu (Aruf. 12:13, 17). Ligía lébubei iyereegu wamá lun ubóu uguñetima weyu. Lau sun lira manufudeda wamá luéi Satanási luma hawéi ha afalarubalin. Lubaragiñe wanufudedun luéi, lunti wachoururuni le lariñagubei apostolu Pábulu le ariñagubei ítara: “Anhein luéigiñeñein lubéi wafulesein Bungiu, kábagia habafu wáganiñu wawagu?” (Rom. 8:31). Gayaraati wafiñerun sunsuinagubei luagu Heowá ladüga ariha wamaali lagunfulirun liibe-agei fánreinti lídangiñe profesía le lídanbei Agumesehani 3:15.

16-18. Ida liña líderaguniña gunfuranda hamani Curtis, Ursula tuma Jessica Agumesehani 3:15?

¹⁶ Íderagua lumutiwa füramasei le ladügübei Heowá lidan Agumesehani 3:15 lun wagagibudagun luma furumiñeguarügü óuchawaguni le lunbei liabin. Ariñagati Curtis, aban misionéru Guam: “Anihein dan anihein lan lénrengunga luma turobuli lidan nibagari le adügübei lun lóuchawagun núaragun lun Heowá. Dan le nararamagun asaminara luagu profesía le lídanbei Agumesehani 3:15, íderagua lumutina lun nafiñerun luagu Núguchi Bungiu le siélubei”. Memeniha lanigi Curtis lun lachülürün dan lun lagumuchun Heowá lau sun waturobulin.

 ¹⁷ Ariñagatu aban íbiri lídangiñetu fulasu le gíribei Baviera (Yámani) to gíriboun Ursula lau lan gunfuranda tani Agumesehani 3:15 aba lan tachoururuni Lererun lan Bungiu Bíbülia. Aban katei le aweirigüdübarun tanigi Ursula sun lan le líbiri profesía le tídanbei Bíbülia úara lan luma le lídanbei Agumesehani 3:15. Ariñagayatu: “Hingí lumutu nanigi nasubudiruni adüga lan Heowá aransehani lau lóufudagun lun gayara lan ñein lan emenigini houn gürigia ubouagu”.

¹⁸ Ariñagatu aban íbiri gíritu Jessica to awinwanduboun Miküronésia: “Haritagua nágili ida liña lan nasandiragun nungua dan le níchugubei fe darí nan lan inarüni. Lagunfuliruña meha profesía le lídanbei Agumesehani 3:15! Lau gunfuranda nani le, aba nasaminarun ibagari lan le wawinwandubei mama lan ibagari le tímatimaati. Derebugüda laali profesía le nafiñen, leseriwidúniwa lan lun Heowá ligía lan ibagari le buídubei guenlé ani le lunbei liabin ámuñegü ligíaba buídutima”.

19. Ka uagu gayara lubéi wachoururuni lagunfuliruba lan lagumuhóun fánreinti le lídanbei profesía le?

¹⁹ Kei le aubei warihei, lagunfuliruña profesía le lídanbei Agumesehani 3:15. Subudi wamuti buidu buidu ka lan tadügawagunbei würi luma ka lan tadügawagunbei hewe. Areidaguaali luéigiñe lihilin lugudi tadügawagun würi le súdinitimabei Hesusu ani guentó ábanhali Urúei le móunwedaditi ani buin liña lau uéiriguni. Lanwoun lira, yarafaali lun lagumuchuni hanuadirún ha lílana libiaman fánreinti hádangiñe tadügawagun würi. Kei le gúnfulihali lubéi furumiñeti fánreinti le lídanbei profesía le, chouru wamuti buidu lagunfuliruba lan le lagumuhóun: lachuinrawagún tichügü hewe! Ábanbei óunwenbu awalidaguni houn gürigia ha úaraguabaña lagünrinchawagun Satanási. Sunme awanha lan agurabahei weyu ligía, mabürühan lan warüna. Gadünati Wabungiute lun wafiñerun luagu. Lau layusuruni Heowá tadügawagun würi habinirúba “sun néchani ha ubouagubaña” (Agu. 22:18).