1. Ida luba warihini furíei?

 RÚHALI Bungiu le Adügübalin sielu luma Ubóu aba óunwenbu idewesei woun: lun gayara lan wayanuhan luma dan le wafurieidun lun. Samina wamá ka lan mini lubéi katei le. Gayaraati wadaarunu wanigi lun Heowá lidan furumiñeguarügü oura luma lidan furumiñeguarügü iñeñein, ani memegeirunti lun wawisaruni lubaragiñe wayanuhan luma. Gayaraati wafurieidun lun Wáguchi le hínsiñehabubei háspitalirugugiñe o furisunrugúgiñe lau ichouruni luagu laganbubadiwa lan. Ma gúndaatiwa lau lubuidun idewesei le?

2. Ida liña larufuduni urúei Dawidi súdini lan furíei lun?

² Súdiniti meha furíei lun urúei Dawidi. Ariñagati Dawidi lun Heowá lidan aban uremu: “Ítara lan nafurieidun kei kupali bigibugiñe” (Sal. 141:1, 2). Lidan lidaani Dawidi yúsuati meha kupali sagüráuti lun láhudurawagun lun Heowá ani mígisi hamuti meha fádirigu aranse haméi buidu (Afu. 30:34, 35). Busenti meha Dawidi lasaminaruni buidu kaba lan lariñaga lun Lúguchi le siélubei lidan lafurieidun kei meha haranseruni fádirigu kupali le sagüráuti buidu. Ani wagía busentiwa wadügüni ligiaméme, ladüga busén wamá lun lagundaarun Heowá lau wafurieidun lun.

3. Ka igaburi lunbei warufuduni dan le wafurieidun lun Heowá, ani ka uagu?

³ Dan le wafurieidun lun Heowá moun lumuti wadügüni kei wayanuhan luma furumiñeguarügü wamada, lunti wadügüni lau saragu inebesei. Samina wamá luagu lanarime arufudúni le heresibirubei Isaíasi, Esekiéli, Danieli luma Huan. Íbini ámuñegueinarügüti  lan arufudúni burí le, genegeguati lidan aban katei: arufudúati Heowá ñein kei aban Urúei le wéirigutimabei. Ariha lumuti Isaíasi Heowá “ñun luagu aban lala urúei íñuti” (Isa. 6:1-3). Ariha lumuti Esekiéli Heowá ñun tidan likarün “ñeinñein aban larugounga geyegu lau tenege heremuru” (Ese. 1:26-28). Arihati Danieli “Aban Weiriei Mutu” harutu ladaüragun ñun liña lidan lálana arúeihani le ñéingiñe lubéi láfurida watu gemeti (Dan. 7:9, 10). Ariha lumuti Huan Heowá ñun lidan lálana arúeihani geyegu liña haláü ligía tau “aban heremuru [...] ámirihatu kei aban dübü le ésümeralüda” (Aruf. 4:2-4). Lau wararamagun asaminara luagu lanarime luéirigun Heowá, haritaguagüda lumutiwa luagu lueirin lisudinin wafurieidun lun, ani mosu wadügüni lau saragu inebesei. Kábati wariñaga lidan wafurieidun?

4. Ka wafurendeirubei lídangiñe furumiñeti katei le lamuriahabei Hesusu lidan furíei le gíribei Wáguchi Bungiu? (Matéu 6:9, 10).

⁴ (Aliiha huméi Matéu 6:9, 10). Lidan Serumu luagu Wübü, arufudahati Hesusu houn lani disipulugu lun hafurieidun lidan aban igaburi le aubei lagundaara Bungiu. Lárigiñe lariñagun “ítara luba lubeiti hafurieidun”, aba líriduni Hesusu furumiñeti katei le súdinitimabei, le gánibei luma liricha Heowá lun Larúeihan, furíeiti lun inebewa lan liri Heowá, ñübuin ligíame Larúeihan —le lunbei lagumuchun hau láganigu Bungiu—, lúmati lun lagunfulirun abiniruni le lunbei liabin Ubouagun ámuñegü houn sun gürigia. Ánhawa ayanuha luagu burí sun katei le lidan wafurieidun, warufuduba súdini lan lugundan Heowá woun.

5. ka uagu wasubudirei mariban lan wafurieidun luagu katei le wemegeirubei?

⁵ Lidan le aban fánreinti lidan furíei le, arufudati Hesusu mariban lan wafurieidun luagu katei le wemegeirubei. Gayaraati wamuriahan luma Heowá lun líchugunu weigan fein to lánina sagü weyu woun, ferudunaleime wafigoun, luma lóunigiruniwa luéi wábürühan lidoun óuchawaguni lúmati lun ladisedagüdüniwa luéi wuribani (Mat. 6:11-13). Dan le wamuriahani katei burí le luma Heowá, warufuduña megei wamani lídehan, lúmati busén wamá wagundaaragüdüni.

6. Gayaraati san wafurieidun luágurügü katei le líridubei Hesusu lidan furíei le larufudahabei houn lánigu?

 ⁶ Mabusenrunti meha Hesusu lun hariñaguni lani disipulugu ligiaméme dimurei le lariñagubei lidan furíei le. Lidan amu burí furíei le ladügübei Hesusu ayanuhati luagu amu burí katei le súdinitimabei lun lidan dan ligía (Mat. 26:39, 42; Huan 17:1-26). Gayaraati giñe wafurieidun luagu furumiñeguarügü katei le adügati lun wadiheridun o le súdinitimabei woun. Kei hénpulu, dan le wanúadirun kaba lan wadüga, gayaraati wamuriahan lichú aau luma gunfurandaü luma Heowá (Sal. 119:33, 34). Dan le wadüga lan somu dasi hénrenguti, gayaraati wafurieidun lun Heowá amuriaha ídemuei luma, amuriaha wagíame subudi luma, lun gunfuranda wamani kaba lan wadüga ani ida luba lan wadügüni (Ari. 2:6). Gayaraati hafurieidun agübürigu hawagu hasaanigu, gayaraati giñe hafurieidun isaanigu hawagu hagübürigu. Sun wagía gayaraati wafurieidun hawagu gürigia ha aturiahabarun Bíbülia wama luma hawagu gürigia ha únbaña wapurichiha. Gama lumoun, mámarügübei lun wamuriahan katei wafurieida.

7. Ka uagu lunti lubéi walawahani Heowá dan le wafurieidun?

⁷ Dan le wafurieidun, lunti giñe waritagun wíchugun alawahóuni lun Heowá. Úati amu gadünati lun walawahani luéi Wabungiute. Ariñagati aban abürühati sálumu: “Buítibu ani gíchigadi buguya ferudun”. Ani ariñagati giñe: “Buguya, Aburemei, Bungiu, gudemehabutibu, gaguraasuntibu, ínsiñeni luma inarüni buguya” (Sal. 86:5, 15). Inarüni anihein lan resun buiti wama lun walawahani Heowá luagu lubuidun ligaburi luma luagu sun le ladügübei.

8. Ka fiu katei uágubei gayara lan wíchugun eteingiruni lun Heowá dan le wafurieidun lun? (Sálumu 104:12-15, 24).

⁸ Amu luéi walawahani Heowá, lidan wafurieidun busentiwa giñe wíchugun eteingiruni lun luagu sun katei buíduburiti le líchugubei woun, kei burí lubuidun burí likolorun fuluri, ámuñegueinarügü luwuyeri éigini semeeti lúmati ugundani le wasandirubei dan le hama wamá wamadagu. Ru lumuti Wáguchi le hínsiñehabuti sun katei le woun ani ruti giñe lóugiñe lira woun ladüga busén lan lun gunda  wamá (aliiha huméi Sálumu 104:12-15, 24). Rútiwa seremei lun Heowá lau lubuidun adundehani le líchugubei woun lun wederebudagüdüni wafiñen luma giñe luagu lubuidun emenigini le líchugubei woun lubá ámuñegü.

9. Ka lunbei wadügüni lun mabulieidun wamani wíchugun seremei lun Heowá? (1 Tesalónikana 5:17, 18).

⁹ Ménrengunti wabulieiduni wíchugun seremei lun Heowá luagu sun katei le ladügübei wawagu. Ka lunbei wadügüni lun masuseredun lan katei le woun? Gayaraati wabürüdüni ámuñegueinarügü katei le amuriaha wamaalibei luma Heowá lidan wafurieidun ani kada átiri dan aban warihinu lísüta lun warihini ida liña lan lóunabuni Heowá wafurieidun. Lárigiñe gayaraati wafurieidun lun Heowá lun weteingiruni luagu ídemuei le líchugubei woun (aliiha huméi 1 Tesalónikana 5:17, 18). Ma gúndaatiwa ani buiti wasandiragun woungua dan le híchugun amu eteingiruni woun? Ruti giñe ugundani lun Heowá dan le waritagun wíchugun eteingiruni lun ladüga lóunabuni wafurieidun (Kol. 3:15). Gama lumoun aniheinya amu katei le uágubei lunti lan wíchugun seremei lun Heowá, ani wéiriti lisudinin. Ariha waméi katei lan.

10. Ka uagu mosu lubéi weteingiruni Heowá ladüga lóunahani Hesusu Ubouagun? (1 Féduru 2:21).

¹⁰ (Aliiha huméi 1 Féduru 2:21). Mosu weteingiruni Heowá luagu lóunahani Liráü le hínsiñetimabei lun, lun larufudahan woun. Dan le waturiahani libagari Hesusu, furendeitiwa saragu luagu Heowá luma ka lan lunbei wadügüni lun wagundaaragüdüni. Ánhawa arufuda afiñe wamá luagu lani Kristu sákürifisiu, gayaraati gamadagua wamá luma Heowá gunda wagíame lau darangilaü le líchugubei woun (Rom. 5:1).

11. Ka uagu wafurieida lidan liri Hesusu?

¹¹ Lunti weteingiruni Heowá ladüga gayara lan wafurieidun lun lidan liri Liráü. Yusu lumuti Heowá Hesusu lun líchuguni le wamuriahabei luma woun. Ánhawa afurieida lidan liri liráü, laganbubei Heowá wafurieidun ani óunabaleime. Ariñagati Hesusu: “Sun le hamuriahan lidan niri, nadügübei, arufuda náamugei luéirigun Núguchi” (Huan 14:13, 14).

12. Ka amu resun wámabei lun wíchugun eteingiruni lun Heowá luagu líchuguni Liráü?

¹² Feruduna lumuti Heowá wafigoun seremei lani Hesusu sákürifisiu. Ariñagatu Bíbülia luagu Hesusu lan wafadirinbei le íñutimati ani “ñuruhali luéigiñe lóunwenren lálana larúeihan Bungiu sielu” (Ebü. 8:1). Ariñagatu giñe: ‘ladimurehaba Wabureme Hesukrístu luéigiñe wafulesein ligibugiñe Wáguchi Bungiu’ (1 Huan 2:1, Lerérun Búngiu to lánina iséri darádu). Rútiwa óunwenbu seremei lun Heowá luagu líchugun aban Fádiri Íñutimati woun le gunfurandabalin gafigoun wamá, ani anihein “afurieida wawagu” (Rom. 8:34; Ebü. 4:15). Lun hamuga michu lani Hesusu libagari kei sákürifisiu, siñati hamuga wafurieidun lun Heowá. Úati dimurei le gayaraabei larufuduni óunwenbu eteingiruni le wasandirubei luagu Heowá luagu óunwenbu idewesei le líchugubei woun: Liráü le hínsiñebei lun.

13. Guñoun le lubaragiñebei lounwen Hesusu, ida liña larufuduni hínsiñe hamá lani disipulugu lun?

¹³ Guñoun lubaragiñe lounwen Hesusu, aba ladügün aba furíei migifeti hawagu lani disipulugu, ani amuriahati luma lúguchi lun lóunigiruniña luéi wuribani (Huan 17:15). Ma lueirin ínsiñeni le larufudubei Hesusu houn lánigu! Íbini subudi lani lasufurira lan saragu, lau sun lira, nidiheriti meha hawagu lani apostolugu.

14. Ida liña warufuduni hínsiñe hamá wábirigu woun?

 ¹⁴ Ítara kei Hesusu, masaminaruntiwa luágurügü le wemegeirubei. Lubaragiñe lira, héchutiwa afurieida hawagu wíbirigu. Ítara liña, gaganbadi wamá lun gumadi le líchugubei Hesusu lun hínsiñegua wamá wámagua ani arufuda wamuti lun Heowá weiri lan hínsiñe wábirigu woun (Huan 13:34). Ani subudi wamuti dan lan le wafurieidun hawagu amu lubúeingu Heowá, mama lan weferidiruñein wadaani. Ariñagatu Bíbülia: “Wéiriti lubafu afurieiduni le ladügübei gürigia le richaguabei tau sun lanigi” (Sant. 5:16).

15. Ka uagu megei habéi wábirigu lun wafurieidun hawagu?

¹⁵ Mégeitiña wábirigu lun wafurieidun hawagu ladüga hagagibudaguña lan luma saragu sügǘ hénrenguti. Gayaraati wamuriahan luma Heowá lun líderaguniña lun hawanduni lénrengunga kei burí sandi, liñawan dan, wuribu luma éibaahouni. Gayaraati giñe wafurieidun hawagu íbirigu ha ídehabaña lidan híderawagun gürigia ha asufurirubaña ladüga liñawan dan, hárabaganali, hiriri o katei líbeina lira. Gayaraati subudi humá somu gürigia ha asufurirubaña sügǘ libe le. Ka uagu míridun hubalin hiri dan le hafurieidun? Dan le wamuriahan luma Heowá lun líderaguniña íbirigu ha lun habaruaguóun hamá, warufuduña luagu hínsiñe hamá woun tídangiñe sun wanigi.

16. Ka uagu lunti lubéi wafurieidun hawagu wábirigu ha alidihabaliwa?

¹⁶ Teinki hamutiwa íbirigu ha arihibaña lau damuriguaü saragu, ladüga wafurieidun hawagu ani íderagua lumutiña furíei burí le. Ítara liña lasandiragun apostolu Pábulu lungua. Abürühati: “Afurieida humá giñe nuagu lun líchugun Bungiu dimurei nun dan le nadimurehan, lun giñe nadimurehan lau manufudei lun nasubudiragüdüni uganu aramudaguati le luáguti Kristu” (Efe. 6:19). Uguñe weyu añahein giñe íbirigu benefatiña ha alidihabaliwa. Lau wamuriahan luma Heowá lun labiniruni sun le hadügübei, warufuduña hínsiñe hamá woun.

17, 18. Dan le lamuriahóun luma aban íbiri lun lafurieidun hawagu amu, ka lunbei gabaroun lani?

¹⁷ Anihein dan gayara lan lamuriahóun wama lun wafurieidun hawagu amu. Kei hénpulu, gayaraati tamuriahan aban íbiri to íchugutu aban aturiahani tídangiñe Bíbülia tuma  tupaaná lun tafurieidun. Kei ibidiñe tubéi aturiahatu to tun paaná buidu, gayaraati tamuriahan lun tadügüni lagumuhóun furíei. Ítara gayaraati tasubudiruni buidu kaba lan tariñaga danme le tafurieidun.

¹⁸ Ánheinti amuriahóua luma aban íbiri lun lafurieidun lubá apurichihani o lubá lagumeserun aban adamuridaguni? Íbirigu ha adügübalin dasi le, lunti hasubudiruni ka lan un ladügǘwa adamuridaguni ligía. Furíei burí le mama lun lichugún eweridihani lun adamuridaguni ni lun lichugún ñunsu. Lidan liibe-agei adamuridaguni burí le, rúati seingü minutu lun uremu luma lun furíei. Ligíati íbiri le adügübalin furíei le, moun lumuti “layusurun saragu dimurei”, dántima le lagumeserun adamuridaguni (Mat. 6:7).

19. Kaba íderaguawa lun aranseñu wamá lubá luéyuri laguseragüdün Heowá?

¹⁹ Kei ayarafadeinatima liña lan luéyuri laguseragüdün Heowá, mosu súdinitima lan furíei woun. Ariñagati Hesusu: “Aranseñu humá lubeiti, afurieida huguyame lun Bungiu sun dan, gayara láamuga hibihin ubafu lun hawanduni sun burí katei le lunbei lasuseredun” (Luk. 21:36). Ánhawa afurieida súnwandan, héretimabei wafiñen ani aranseñu waba lubá lachülürün luéyuri laguseragüdün Heowá.

20. Ka gayaraabei wadügüni lun ítara lan wafurieidun kei kupali le buiti líhemen?

²⁰ Ka akutiha wamaalibei lidan aturiahani le? Gebegiti woun saragu, furíei le wadügübei lun Heowá. Katei le súdinitimabei le gayaraabei wafurieidun luagu, luágutima le arihubei lau lisuuni Heowá. Rútiwa giñe seremei luagu Hesusu le Liráü Bungiu luma luagu Larúeihan, furíeitiwa giñe hawagu wábirigu. Gayaraati giñe wamuriahan luma Heowá lun líchuguni le wemegeirubei woun luma lun líderaguniwa lun héretima lan wafiñen. Lau wasaminaruni buidu kaba lan wariñaga lidan wafurieidun, arufudatiwa weiri lan lebegi furíei woun. Lun Heowá, ítara liña dimurei le wariñagubei lidan furíei kei kupali le buiti líhemen, ani “resibi lumuti lau ugundani” (Ari. 15:8).