ATURIAHANI 28
Gumeseeli Larúeihan Bungiu agumadiha!
“Lánihali Bungiu luma Kristu larúeihan ubóu” (ARUF. 11:15).
UREMU 22 Gumeseeli larúeihan Bungiu agumadiha!
LE LUNBEI WATURIAHANI *
1. Ka katei wachoururubei ani ka uagu?
DAN le harihini turobuli le ubouagubei uguñe weyu, ma hénrenguti hun hasaminarun laranseraguba lan sun katei? Úaali ínsiñeni le meha hádanbei saragu iduheñu. Uguñe weyu, furundetimahaña saragu gürigia ani hawouguarügüñein hasaminara. Hiibe-agei gürigia hénrenguti houn lun hafiñerun hawagu gumadimatiña. Le linarün katei, sun katei le asuseredubei gayaraati ladügün lun hafiñerun labuiduruba lan sun katei. Ka uagu? Ladüga harufuduñein lan gürigia igaburi le uágubei tayanuha Bíbülia lidan aban profesía luáguti “lagumuhóun dan” (2 Tim. 3:1-5). Úati ni aban gürigia haruma tanigi gayara lasigeneruni lagunfuliruña lan profesía le. Arufudati lagunfulirun profesía burí le, urúeihali lan Kristu lidan Larúeihan Bungiu. Gama lumoun, anihagua amu burí profesía luáguti arúeihani le, ánhawa asagara dan lun wakutihani profesía le agunfulirubei lidoun lagumuhóun burí irumu, ladügüba lun derebugu lan wafiñen.
Ítara kei úara lan aban katei luma aban, ítarameme liña giñe úara lan profesía le tídanbei liliburun Danieli lumoun le tídanbei líburu to gíriboun Arufudúni ani líderagubadiwa katei le lun wasubudiragun woungua buidu kaba lan asusereda yarafa madise según profesía luáguti lisuuni Heowá (ariha huméi párafu 2).
2. Kaba wakutiha lidan aturiahani le ani ka uagu? (Ariha huméi dibuhu le luágubei tidáü garüdia).
2 Kaba wakutiha lidan aturiahani le? Furumiñe, wariha aban profesía le lunbei líderaguniwa gunfurandei ida buga lan lagumesera Larúeihan Bungiu agumadiha. Libiaman, warihiba fiu burí profesía le lunbei líderaguniwa gunfurandei urúeihali lan Kristu lidan Larúeihan Bungiu. Ani, lagumuhóun, wayanuhaba luagu profesía le arufudubei ida luba lan hagumuchun láganigu Bungiu. Ítara kei gayara lan lóundaragun aban áhüchaguti saragu pisi gamisa lun ladügün aban holu sütu, gayaraati giñe warihini furangu ka lan dan ídanbei wawinwanda tidan likalendariu Heowá.
IDA LIÑA WASUBUDIRUNI IDA BUGA LAN LAGUMESERA LARÚEIHA BUNGIU
3. Ka lachoururagüdübei profesía le lídanbei Danieli 7:13, 14 woun luagu Urúei le lunbei larúeihan lidan Larúeihan Bungiu?
3 Lidan Danieli 7:13, 14 daritiwa aban profesía le achoururagüdübalin woun Hesukrísturügüñein lan gürigia le buídutimabei lun ligía lan Urúei lidan Larúeihan Bungiu. Ariñagati bérusu le, heseriwiduba lan gürigia lun, ha lílana sun néchani lau sun hagundan ani úabaña amu gumadimatiña lárigiñe. Ani ida buga lagumesera Hesusu arúeiha? Ariñagati ábaya profesía le tídanbei liliburun Danieli, lagumeseruba lan meha Hesusu arúeiha lídanme dan le gíribei sedü irumu. Ariha waméi ida buga lan lagumesera Hesusu arúeiha.
4. Ida liña líderaguniwa Danieli 4:10-17 lun wasubudiruni ka lan irumu lagumesera Hesusu arúeiha? (Ariha huméi abürüdǘni).
4 (Aliiha huméi Danieli 4:10-17). “Sedü irumu” le úagubei layanuhóua mini lan 2,520 irumu. Gumeseti dan le abahüdǘwa lidan irumu 607 lubaragiñe lidaani Kristu, dan le hagidarunbalin babilóniana lagumuhóun urúei le arúeihabei Herusalén. Gumuti dan ligía lidan irumu 1914, dan le liábinbei le lunbei “laguseragüdün”; aba lañuuragüdüni Heowá Hesusu kei Urúei lidan Larúeihan Bungiu (Ese. 21:25-27). *
5. Ka aban lídangiñe buiti le gayaraabei wasagarun dan le gunfuranda wamani le mini lubéi profesía le lánina “sedü irumu”?
5 Ida liña líderaguniwa profesía le? Lau gunfuranda wamani profesía le lánina “sedü irumu” ruti ichouruni woun lagunfulirubei lan Heowá le füramase lubéi lidan lidaani. Ítara kei lanúadiruni dan lun lagumeseruni Larúeihan, ítarameme lagunfulirubei lan le líbiri profesía lidan dan le anúadira láalibei. Ligíati, lachülürüba luéyuri Heowá “lidan dan” (Abak. 2:3).
IDA LIÑA WASUBUDIRUNI URÚEIHALI LAN KRISTU LIDAN LARÚEIHAN BUNGIU
6. a) Ka seini warihibei ya ubouagu arufudubalin woun larúeihaña lan Kristu sielu? b) Ida liña lachoururuni profesía le lídanbei Arufudúni 6:2-8 lasusereduña lan katei le?
6 Dan le ayarafadeina lubéi lagumuchuni Hesusu lani ministeriu ubouagu, ayanuhati Hesusu luagu fiu sügǘ lidan sun ubóu le gayaraabei líderaguniña lani disipulugu asubudirei gumeseeli lan arúeiha sielu. Kei hénpulu, ayanuhati luagu ñeinbei lan wuribu, ilamaü luma hárabaganali. Ariñagati giñe ñeinbei lan sandi “lidan ámuñegueinarügü fulasu”, kei burí sandi le gíribei COVID-19. Sun sügǘ le lídangiñeti fiu seini le uágubei tayanuhan Bíbülia luagu lagumeserun Kristu arúeiha (Mat. 24:3, 7; Luk. 21:7, 10, 11). Lóugiñe meha 60 irumu lárigiñe lounwe Hesusu ani giribu ligía sielun, ariñagati lun apostolu Huan lasusereduba katei le (aliiha huméi Arufudúni 6:2-8). Gumeseti sun burí sügǘ le asusereda dan le lagumeserubei Hesusu arúeiha lidan irumu 1914.
7. Ka uagu anihein lubéi saragu turobuli ubouagu lúmagiñe lagumeserun Hesusu arúeiha?
7 Ka uagu weiri lubéi wuribani ubouagu dan le lagumeserubei Hesusu arúeiha? Ariñagati Arufudúni 6:2 aban katei súdiniti woun: dan le lagumeserubei Hesusu arúeiha, ageindaguati aban wuribu. Ka uma lageindagua? Luma Satanási hama lumafianu. Según Arufudúni kapítulu 12, féridi lumuti Satanási wuribu ani dandu ligía kei lumafianu aba hachagarún ubouagun. Kei adüga lubéi katei lira lun lagañidun Satanási saragu, aba lagumeserun agayuaha hawagu gürigia. Ligía tariñagubei Bíbülia: “Fugiabugu ha aganóubaña ubouagu luma baranaha!” (Aruf. 12:7-12).
Magundantiwa lau ñunsu wuribati, gama lumoun dan le warihin lagunfulirun profesía le tídanbei Bíbülia, ruti ichouruni woun luagu gumeseeli lan Larúeihan Bungiu agumadiha. (Ariha huméi párafu 8).
8. Ka buiti wasagarubei dan le warihin lagunfuliruña lan profesía luáguti Larúeihan Bungiu?
8 Ida liña líderaguniwa fiu profesía burí le? Arufuda lumuti le asuseredubei ubouagu luma asansiruni lidan ligaburi hóuserun gürigia Urúeihali lan Hesusu. Ligía madiheridun wabéi dan le warihin hawouguarügüñein lan gürigia hasaminara ani óusera hagía lau furundei. Haritagua waméi igaburi lan le harufudubei gürigia lagunfuliruña lan le tariñagubei Bíbülia. Furanguti lagumadihaña lan Larúeihan Bungiu! (Sal. 37:1). Ligíati, agurabatiwa aganwoundeina luba lan wuribani ubouagu éibume ayarafadeina lan Arümahedón (Mar. 13:8; 2 Tim. 3:13). Hínsiñetiwa lun Wáguchi le siélubei saragu ani íderagua lumutiwa lun gunfuranda wamani wawinwanduña lan lidan lagumuhóun dan. Ma rútiwa seremei lun?
IDA LUBA HAGUMUCHUN LÁGANIGU LARÚEIHAN BUNGIU
9. Según Danieli 2:28, 31-35, ka lafuranguagüdübei luagu lagumuhóun arúeihani gabafuti le arúeihabei ubouagu ani ka dan lachülaagua?
9 (Aliiha huméi Danieli 2:28, 31-35). Warihiña lagunfulirun profesía le uguñe weyu. Lidan aban uénedü, ariha lumuti Nabukodonosoru le lunbei lasuseredun “lídounme lagumuhóun dan”, lárigiñe lagumeserun Hesusu arúeiha. Lagumuhóun arúeihani le gabafutimabei ubouagu ligía aban hádangiñe láganigu Hesusu ya ubouagu le úagubei tayanuhan Bíbülia. Arúeihani gabafuti le, mini lan “gürabu líbiri lugudi múa le líbiri”, ani lagumadihaña uguñe weyu. Gumeseti arúeihani gabafuti le agumadiha ubouagu lidan furumiñe Wuribu Wéiriti, dan le lóundarun Reino Unido luma Meriga lun hídeha hámagua. Lidan luénedü Nabukodonosoru anihein bián katei le adügübei lun amu lan arúeihani gabafuti le luéi burí le líbiri.
10. a) Ka katei lídangiñe lani Danieli profesía arufudubalin le lunbei lasuseredun lidan arúeihani le gabafutimabei uguñe weyu Reino Unido luma Meriga? b) Ka denchaü lunbei wóunigiragun woungua luéi? (Ariha huméi rekuáduru “ Góunigi humá luéi ugudi lauti múa!”).
10 Ariha waméi furumiñeti katei le adügübei lun amu lan arúeihani le gabafutimabei Reino Unido luma Meriga. Mítaranti kei burí arúeihani gabafuti le lubaragiñebei, ladüga le lubaragiñebei mamigisiragunti lúmagua, lau gürabu luma múa. Mini lan múa gürigia ha ubouagubaña (Dan. 2:43). Furanguti larihín uguñe weyu gaturobulin lan arúeihani le gabafutimabei lun libihini le labusenrunbei, ladüga abuduhani le hadügübei lílana luma aransehani le ladügübei ageiraü lun líchuguni le hemegeirubei gürigia houn luma aransehani le tídanbei kónpeni lun tageindagun luagu haricha nadagimeintiña lúmati hamarücharun gürigia lun hageindagun luagu haricha.
11. Ka katei adügübei lun lederebudagüdüni wafiñen wawinwanduña lan lidan lagumuhóun dan?
11 Libiaman katei le larufudubei lugudi guáriua, arúeihani lan le gabafutimabei, le úagubei tayanuhan Bíbülia, ligíaba lan lagumuhóun arúeihani gabafutimati ubouagu. Mini lan úabei lan amu arúeihani lárigiñe, dandu arúeihani le gabafutimabei kei ha híbiri urúeigu ubouaguna, lau lóufudagun lagünrinchagubaña Larúeihan Bungiu lidan Arümahedón (Aruf. 16:13, 14, 16; 19:19, 20). *
12. Ka amu katei larufudubei lani Danieli profesía, ani ida liña líchugun gurasu luma emenigini woun?
12 Ida liña líderaguniwa profesía le? Ruti lani Danieli profesía lanwoun ariñahani luagu wawinwanduña lan lidan lagumuhóun dan. Lóugiñe 2,500 irumu guentó, ariñagati meha profeta Danieli lárigiñe lanme lagünrinchawagun uburugu Babilónia, liñuraguba lan gádürü arúeihani gabafuti ubouagu lun hábürüha hawagu lumutuniña Bungiu. Ariñagati giñe, luagu Reino Unido luma Meriga ligíaba lan lagumuhóun arúeihani gabafuti arúeiha ubouagu. Ruti katei le dǘgüdaguaü luma emenigini woun ladüga subudi wamuti lagünrinchagubei lan Larúeihan Bungiu sun arúeihani le ubouagubei ani ligíaba lan agumadirei Ubóu (Dan. 2:44).
13. Katei san “hawidünbei urúeigu” luma “diisi urúeigu” le úagubei layanuhan Arufudúni 17:9-12, ani ida liña lagunfulirun profesía le?
13 (Aliiha huméi Arufudúni 17:9-12). Wéiriti günringuaü le lanügübei Furumiñeti Wuribu Wéiriti ubouagu, adügati lun lagunfulirun ábaya profesía luáguti lagumuhóun dan. Busentiña yebe urúeigu ubouaguna lun hanügün darangilaü ubouagu, ligíati, lidan eneru irumu 1920 aba tagumeserun Sétanu hani Néchani (Sociedad de Naciones), lídanti irumu 1945 aba tiabin Óundaruni hani néchani teweñegua, to asubudirúaboun kei ONU. Ariñagatu Bíbülia óundaruni lan to tuguya lan “hawidünbei urúeigu”. Gama lumoun, mama aban arúeihani gabafuti ubouagu. Ubafu le tuágubei hámagiñe urúeigu ha ubouagubaña liabin. Tidan Bíbülia wáwati houn gumadimatiña ha “diisi urúeigu”.
14, 15. a) Ka tariñagubei líburu Arufudúni 17:3-5 tuagu “Babilónia to wéiriboun”? b) Ka asuseredubei lun ídemuei le teresibirubei relihión to mama inarünitu?
14 (Aliiha huméi Arufudúni 17:3-5). Ruti Heowá aban arufudúni lun apostolu Huan le ñein lubéi lariha aban horu to gíriboun “Babilónia to wéiriboun”. Mini tan würi tuguya sun relihión mama inarünitu to ubouaguboun. Ida liña lagunfulirun arufudúni le? Barüharu óundaruni to tani relihión mama inarünitu saragu irumu íderaguaña urúeigu ha ubouagubaña. Lau sun lira, yarafa madise líchugubei Bungiu tidoun hanigi lun “hadügüni le labusenrubei”. Kábati asusereda? “Diisi urúeigu” —mini lan sun gumadimatiña— ha ubouaguna, hábürühaba tuagun óundaruni lánina sun relihión mama inarünitu ani hagumuchuba tau (Aruf. 17:1, 2, 16, 17).
15 Ida liña wasubudiruni layarafaduña lan tagünrinchawagun Babilónia to Wéiriboun? Le gayaraabei líderaguniwa óunabei álügüdahani le lau waritaguni aban lan meha lídangiñe katei le óunigirubalin binadu uburugu Babilónia lanarime duna-agei Éufüratesi. Ariñagati Arufudúni saragu lan míñunu gürigia ha íchugubalin hídehan tun Babilónia to Wéiriboun ítara haña lan kamá “duna” le óunigirubarun (Aruf. 17:15). Ariñawagúati giñe lamabeiduba lan duna ligía, mini lan lira míchugun hamaali lanme saragu gürigia hídehan tun relihión mama inarünitu (Aruf. 16:12). Lagunfuliruña profesía le: saragu gürigia ígira hamaaru relihión to mama inarünitu ani aba houdin áluaha ídemuei lidan amu fulasu lun gayaraabei lan haransehani haturobulin.
16. Ka buiti wasagarubei lídangiñe gunfuranda wamani profesía luagu tadügǘn Óundaruni hani Néchani luma tagünrinchawagun Babilónia to Wéiriboun?
16 Ida liña líderaguniwa profesía le? Aban lídangiñe katei le achoururagüdübalin woun wawinwanduña lan lidan lagumuhóun dan, tadügün Óundaruni hani Néchani luma teferidiruni relihión mama inarünitu hídehan gürigia. Inarüni luagu lamabeiduña lan “duna” le óunigirubarun Babilónia to Wéiriboun, gama lumoun mámaba katei le agumucha tau. Kei le aubei warihei, ládarubei Heowá tidoun hanigi “diisi urúeigu” —gumadimatiña ha ubouagubaña ha íchugubalin hídehan tun Óundaruni hani Néchani— “lun ladügüni le labusenrubei”. Sódiniba hagumuchun néchanigu tau óundaruni tani relihión mama inarünitu, ábameti herederun gürigia wagañu (Aruf. 18:8-10). * Lánhigichubaña lílana ubóu tagünrinchawagun Babilónia to Wéiriboun ani másiñati lanügüba lan katei le turobuli. Gama lumoun wagía le eseriwidubei lun Heowá, wagundaaruba íbini luagu bián resun. Luagu le aban oubaü, lagumuchuba Heowá tau binadu lágani lun súnwandan. Luagu le ábaya oubaü, yarafaali wesefurúniwa lídangiñe libidiegun ubóu le (Luk. 21:28).
AFIÑEBÁ LÓUNIGIRUBAÑA LAN HEOWÁ LUMUTUNIÑA ÁMUÑEGÜ
17, 18. a) Ka lunbei wadügüni lun wederebudagüdüni wafiñen? b) Kaba uagu wayanuhan lidan leweñegua aturiahani?
17 Ariñagati Danieli laganwounduba lan subudi. Ani ítara liña. Guentó gunfuranda wamaali profesía le buidu luagu le asuseredubei lidan wadaani (Dan. 12:4, 9, 10). Wéirigüda lumutu profesía le wanigi ladüga adügati lun wasandirun aban óunwenbu inebesei luagu Heowá luma tuagu Lererun (Isa. 46:10; 55:11). Ligíati, sigí wamá ederebudagüdei wafiñen. Ida? Lau waturiahanu Bíbülia súnwandan ani íderagua wamañame amu lun gamadagua hamá luma Heowá. Lóunigirubaña Bungiu sun ha árügüdübaña luagu sunsuinagubei ani líchuguba “darangilaü houn ha deregeguabaña” houngua lun (Isa. 26:3).
18 Lidan leweñegua aturiahani warihiba fiu profesía le gániti luma damuriguaü kristiánu lidan lagumuhóun dan le. Warihiba giñe luagu arufuda lani profesía luagu wawinwanduña lan lidan lagumuhóun dan. Wakutihaba giñe ábaya katei le arufudubalin woun Hesusu lan Warúeitebei le siélubei ani líchuguña lan adundehani houn lánigu ha úaraguabaña.
UREMU 61 Gefentiña, hubaruaguóun humá!
^ Wawinwanduña lidan aban dan súdiniti ubouagu. Ítara kei tariñaguni Bíbülia lidan saragu profesía, gumeseeli larúeihan Bungiu agumadiha. Lidan aturiahani le, lakutihóuba fiu lídangiñe profesía le, ani líderagubadiwa katei le lun wederebudagüdüni wafiñen luagu Heowá ani líderagubadiwa giñe lun darangilu wamá luma lun wafiñerun luagu, dandu guentó kei ámuñegü.
^ Ariha humóun líburu Winwan humá lau ugundani arufudahani 32, párafu 4. Belú humá lidoun jw.org ani ariha huméi bidéu le gíribei Gumeseti larúeihan Bungiu agumadiha lidan irumu 1914.
^ Hadariruba lanwoun ariñahani luáguti lani Danieli profesía tidan Garüdia Atalaya 1 lidan sisi-hati irumu 2012, páhina 16 darí 20.
^ Hadariruba lanwoun ariñahani luagu le lunbei lasuseredun yarafa madise lidan kapítulu 21 tidan líburu El Reino de Dios ya está gobernando.