1. Ka uagu gunda habéi gefentiña luagu Heowá? (Ariha humoun iyawaü to lídanboun lagumeseha arütíkulu).

FURANGUTI larihíniwa gunda hamá gefentiña luagu Heowá. Aganbúati lubuidun burí héherahan luma dan le hayanuhan hámagua dan le hóundaragun lun háhuduragun lun Bungiu o lun hásügürün dan hámagua. Ka uagu weiri lubéi hagunda? Ladügatima subudi hamani “Bungiu le gúndaabei”, seriwi hagía lun ani áfaaguatiña lun háyeihani (1 Tim. 1:11, TNM; Sal. 16:11). Lúmagiñe Bungiu liabin ugundani, ligía busén lubéi lun gunda wamá ani ruti saragu resun woun lun gúndaañu wamá (2 Lur. 12:7; Apur. 3:12, 13).

2, 3. a) Ka mini lubéi ugundani? b) Ka burí katei gayaraabei ladügün lun weferidiruni wagundan?

² Agiati huguya? Gúndaatün san? Ka gayaraabei hadügün lúntima gunda humá? Dan le gunda lan aban gürigia mini lan buiti lan lasandiragun lungua, gufuruma lan lau le lúmabei o íbini weiri lan lugundan. Ariñagatu Bíbülia lun lan gunda wamá le tímatimaati lunti gamadagua wamá luma Heowá. Gama lumoun, lidan ubóu le ídanbei wawinwanda gayaraati hénrengu lan houn gürigia lun gunda hamá. Ka uagu?

³ Anihein ámuñegueinarügü katei le gayaraabei ladügün lun  weferidiruni wagundan, kéiburi weferidiruni wawadigimari, ígiraguni, labugún somu waduhe o wamada lídangiñe damuriguaü o lounwen somu waduhe. Gayaraati giñe ladügün turobuli hadan waduheñu, hadügün wapanaagu lidan wadagimanu o leskuelarugu bula wau, wéibaahoun o wadaürǘn lun magundan wamá. Gayaraati giñe ladügün aribadeina lan wátuadi, wálüdün lau sandi o lueirin íruni lun weferidiruni wagundan. Lau sun lira, busenti Hesusu, gumadimati “le gúndaabei ani le gabafutimabei”, líchugun dǘgüdaguaü houn gürigia adüga ligíame lun gunda hamá (1 Tim. 6:15, TNM; Mat. 11:28-30). Lidan yanu le líchugubei Hesusu luagu wübü, ayanuhati luagu saragu katei le gayaraabei líderaguniwa lun gunda wamá íbini wagagibudagun luma lénrengunga lidan ubóu le le lábugiñebei lubafu Satanási.

4, 5. Ka lunbei wadügüni lun wibihin ugundani luma lun wakipuruni?

⁴ Wéiriti lisudinin furumiñeti katei le uágubei layanuha Hesusu. Ariñagati: “Fuleseiwatiña ha asubudirubalin luagu megei hamani lídehan Bungiu, ladüga ménrengubei houn lun hebelurun lidoun larúeihan Bungiu” (Mat. 5:3). Ida liña warufuduni megei wamá wasubudiruni Bungiu luma lun wafalaruni ladundehan? Lau waturiahanu Bíbülia, gaganbadi wagía lun lugumadin ru waméi weseriwidun lun lidan furumiñeti lúgaaru lidan wabagari. Ánhawa adügei katei le gúndaatimabadiwa. Lederebuguduba wafiñen luagu lagunfuliruba lan le füramase laalibei Bungiu yarafa madise. Ani líchuguba “emenigini lánina ugundani” le tíchugubei Lererun erei woun lun wawanduni lénrengunga (Titu 2:13, TNM).

⁵ Lun wibihin ugundani luma lun wakipuruni, súdiniti lun buidu lan wamadagua luma Heowá. Abürühati apostolu Pábulu: “Gunda humá súnwandan, ladüga lídanñadün aban luma Wabureme [Heowá]. Águyuguagüda numuti: Gunda humá!” (Fili. 4:4). Lun wibihini lubuidun umadaguaü le, lunti wibihin lichú aau le lúmagiñeti Bungiu. Ariñagatu Lererun Bungiu: “Fuleseiwatiña gürigia ha adarirubaña lichú aau, ha ibihubaña lualin ichügü”. Ariñagatu giñe: “Ibagari lichú aau houn ha gámabalin; fuleseiwatiña ha árügüdübaña luagu!” (Ari. 3:13, 18).

6. Ka lunbei wadügüni lun gúndaañu wamá súnwandan?

⁶ Lun meferidirun wamani wagundan mosu gaganbadiméme wamá lun le wafurendeirubei tídangiñe Bíbülia. Ariñagati Hesusu weiri lan lisudinin katei le dan le lariñagunbei: “Anhein gunfuranda humá burí katei le ani adüga humeime, gúndaabadün” (Huan 13:17; aliiha huméi Santiagu 1:25). Anihán katei le adügübei lun gamadagua wamá luma Bungiu luma lun gunda wamá súnwandan. Ida lubati wagundaarun anhein anihein lubéi saragu katei le adügübei lun magundan wamá? Akutiha waméi le lariñagubei Hesusu lídanmeme yanu le líchugubei luagu wübü.

7. Ka uagu gunda habéi ha gagarigubaña?

⁷ “Fuleseiwatiña ha ayahubaña, ladüga líchuguba Bungiu gurasu houn” (Mat. 5:4). Másiñati álügüdagua hamá fiu gürigia houngua: “Ida luba san gunda hamá ha gagarigubaña?”. Mama meha hawagu ha ekeharubaña luagu furumiñeguarügü katei layanuha Hesusu. Íbini gürigia wuribatiña sandiguatiña houngua wuriba luagu burí turobuli le lídanbei “weyu hénrenguti” le ídanbei wawinwanda (2 Tim. 3:1). Gama lumoun, madügünti íruni mabuidunti le hasandirubei lun hayarafadun lun Heowá, ligía magundan habéi. Lasaminaruña meha Hesusu hawagu ha subudibalin mosu lan gamadagua hamá luma Bungiu ani ligía sandí habéi igarigu lau  harihin díseeña lan lílana ubóu le luéi Bungiu. Rútiña fe gafigoun hamá ani ladüga lan figóu lasuseredunbei katei wuribati ubouagu. Ariha lumutiña Heowá gürigia haruma tanigi ha, ruti dǘgüdaguaü houn tau Bíbülia, íderagua lumutiña lun gunda lan habagari ani ruti emenigini houn lun hawinwandun lun súnwandan (aliiha huméi Esekiéli 5:11; 9:4).

8. Afuranguagüda huméi ida liña lan lídehan darangilu hamá gürigia lun gunda hamá.

⁸ “Fuleseiwatiña ha ǘnabugubaña [o darangilubaña] ani mabafu hagía, ladüga heresibirubei múa keisi alagan” (Mat. 5:5). Ka uagu adüga lubéi darangilu hamá gürigia lun gunda hamá? Añahein gürigia ha meha deretu hanigi, áluahatiña meha turobuli, fasi hagía. Gama lumoun, aba hafurendeiruni inarüni tídangiñeti Bíbülia, aba hasansirun ani aba harufudun ‘iseri igaburi’. Guentó, hínsiñehabuhaña, gudemehabutiña, buiti hagaburi, ǘnabugutiña, darangilutiña ani gaguraasunhaña (Kol. 3:9-12). Ligía buíduhali lubéi hanaagun houngua hama amu ani gúndaatiña. Ani füramasetu Bíbülia galagante habéi lan gürigia ha múa (Sal. 37:8-10, 29).

9. a) Ka uagu lariñawagúa galagantehabei lan ǘnabugutiña múa? b) Ka uagu gayara lubéi hagundaarun ha “lamabaña ani mágürabu hagía lun hadügüni lugundan Bungiu”?

⁹ Ka uagu lariñawagúa galagantehabei lan gürigia darangilutiña múa? Galagantehabei lani Hesusu disipulugu ha anuadirúaaña múa danme le fádirihaña agumadiha hagía ligibuagu ubóu kei urúeigu (Aruf. 20:6). Ani saragu míñunu gürigia ha memenigintiña houdin sielun, galagantehabei múa danme le hawinwandun ya mafigounga, gúndaañu ani lidan darangilaü. Ariñagati giñe Hesusu hawagu bián sétanu ha: “Fuleseiwatiña ha lamabaña ani mágürabu hagía lun hadügüni lugundan Bungiu” (Mat. 5:6). Hibihibei le habusenrunbei sunsuinagubei lídanme iseri ubóu (2 Fe. 3:13). Danme le lagumuchun Bungiu lau wuribani sunsuinagubei, gúndaabaña ha richabaña le tímatimaati ani mírudagunhañame luagu wuribani luma marichaü (Sal. 37:17).

10. Ka mini lubéi gudemehabu?

¹⁰ “Fuleseiwatiña ha gudemehabubaña, ladüga gudemehabubei giñe Bungiu houn” (Mat. 5:7). Anihein aban dimurei lidan ebüréu le genegeguati luma gudemehabu ani mini lan “tañuludagun lanigi gürigia”. Ítarameme, lidan güriegu, arufudati dimurei le lunti lan gudemehabu hamá gürigia houn amu. Gama lumoun, tidan Bíbülia, mámarügüñein tañuludagun lanigi gürigia mini lubéi gudemehabu. Lunti giñe ladügün somu katei lun líderagun amu mini lubéi.

11. Ka wafurendeirubei lídangiñe abahüdaguni luáguti samariana?

¹¹ (Aliiha huméi Lúkasi 10:30-37). Arufuda lumuti abahüdaguni le labahüdagubei Hesusu luagu samariana buidu le mini lubéi larufudún gudemehabu. Dan le larihinbei samariana le aban wügüri le habuleseirubei híwerutiña, aba lagudemedagun lun, ábati líderaguni. Lárigiñe labahüdaguni Hesusu abahüdaguni le, ariñagati lunti lan wadügüni ligiaméme. Ligíati, álügüdagua wamá woungua: “Adüga numuti san lememe ladügübei samariana? Gudemehabutina san? Dan le narihin hasufuriruña lan amu, arufudatina san gudemehabu houn? Gayaraati san nadügün lanwoun le nadügübei lun níderaguniña? Íderagua numutiña san íbirigu derebuguhaña, würiña ha hilaali hani weiriei hama nibureintiña ha meseriwiduntiña hagübürigu lun Heowá? Gayaraati san náfaagun lun níchuguni furumiñeti pasu lun níderaguniña ha wéiribei hirun?” (1 Tes. 5:14; Sant. 1:27).

12. Ka uagu adüga lubéi gudemehabu wamá lun gunda wamá?

¹² Ka uagu adüga lubéi gudemehabu wamá lun gunda wamá? Dan le gudemehabu wamá  houn amu arihatiwa ‘gúndaatimati lan le íchugubei sügǘ lau le eresibirubei’. Ani subudi wamuti gúndaaguagüda wamuti lan Heowá lau wadügüni le (Adü. 20:35; aliiha huméi Ebüréu 13:16). Ariñagati urúei Dawidi hawagu ha gudemehabubaña: “Lóunigirubaña Aburemei, líchuguba ibagari luma lubuidun dan houn ubouagu” (Sal. 41:1, 2). Ánhawa gudemehabu houn amu, gudemehabubei giñe Heowá woun ani lanügüba katei le ugundani magumuchaditi woun (Sant. 2:13).

13, 14. Ka uagu gunda habéi gürigia ha harumabaña anigi?

¹³ Ariñagati Hesusu: “Fuleseiwatiña ha harumabaña anigi, ladüga harihubei Bungiu” (Mat. 5:8). Lun haruma tan wanigi, mosu giñe haruma lan wasaminan luma le wayumahabei. Súdiniti katei le lun gayaraabei lan lánharun Heowá lun wáhuduragun (aliiha huméi 2 Korintuna 4:2; 1 Tim. 1:5).

¹⁴ Gúndaatiña gürigia ha harumabaña anigi ladüga gúndaati Heowá hau, le ariñagubei: “Fuleseiwatiña ha achibubarun hadaüragun” (Aruf. 22:14). Ka mini lubéi hachibunu hadaüragun? Chibá hamutu kristiánugu anuadirúaaña hadaüragun ladüga harumatiña ligibugiñe Heowá ani líchuguba ibagari luma ugundani magumuchaditi houn sielu. Hounti saragu gürigia ha lúnbaña hawinwandun ubouagu, mini lan gamadagua lan Bungiu hama ladüga ariha lumutiña kei gürigia richaguatiña. Ariñagatu Bíbülia ‘chibá hamaaru lan hadaüragun, harumagüda hamóun lau lita Mudún’ (Aruf. 7:9, 13, 14).

15, 16. Ida liña harihini ha harumabaña anigi Bungiu?

¹⁵ Ida lubati harihini ha harumabaña anigi Bungiu anhein siñá lubéi harihini gürigia Bungiu ani sigí hagíame abagarida? (Afu. 33:20). Dimurei güriegu le ásügürawagüdübei kei “ariha” gayaraati mini lan “larihin gürigia aban katei lidan lisaminan, líchugun fe luagu luma lasubudiruni”. Ha arihubalin Bungiu lidan hasaminan, subudi hamaali buidu ani hínsiñeti ligaburi houn (Efe. 1:18). Áyeiha lumuti Hesusu ligaburi Bungiu machararunga, ligía lariñagunbei: “Le arihitina, larihiñein giñe Bungiu Úguchili” (Huan 14:7-9).

¹⁶ Amu luéi wasubudiruni ligaburi Bungiu, gayaraati giñe warihini lau wetenirun lun le ladügübei lun líderaguniwa (Hob. 42:5). Gayaraati giñe warihini lau wíchuguni warihin luagu lubuidun burí abiniruni le lunbei líchuguni houn ha áfaagubaña lun haruma hamá úaragua hagía lun. Ani kristiánugu ha anuadirúaañabaña ariha hamuti Heowá lau hagu dan le háguyugun sielu (1 Huan 3:2, TNM).

17. Ka uagu gunda habéi ha awadigimaridubaña luagu darangilaü?

¹⁷ Ariñagati giñe Hesusu: “Fuleseiwatiña ha awadigimaridubaña luagu darangilaü” (Mat.  5:9). Gébunati hagundan gürigia ha ladüga ariñagati disipulu Santiagu: “Ha áluahabalin darangilaü, bunaguatiña ilaü lun lalubahóuniwa aban ibagari le richaguati hadan, luma hadan amu” (Sant. 3:18). Anhein gaturobulin wabéi luma somu gürigia lidan damuriguaü o hadan waduheñu, gayaraati wamuriahan luma Heowá lun líderaguniwa lun wáluahani darangilaü. Líchugubei lani sífiri sandu woun ani líderagubadiwa lun warufudun igaburi kristiánu luma lun gúndaatima wamá. Arufuda lumuti Hesusu lisudinin wíchuguni furumiñeti pasu lun wáluahani darangilaü dan le lariñagunbei: “Anhein banüga bidewese luagun lani Bungiu latarü, bau ñein aba baritaguni luagu anihein lan katei lidan furumiñeguarügü gürigia bubá, ígirabei le lunbei bedewehani ñein ligibugiñe latarü, ábame bidin arandara luma gürigia ligía. Lárigiñemeti, gayaraahalime bagiribudun luagun latarü íchigei bidewese” (Mat. 5:23, 24).

18, 19. Ka uagu gunda habéi kristiánugu íbini dan le héibaahoun?

¹⁸ “Fuleseiwatün dan le hanabagunün gürigia, éibaaha hamáün, ariñaga hagía sun luwuyeri iyeeni huagu, luéigiñe nánigu humá”. Ka uagu lariñagei Hesusu le? Ligiaméme ariñagubei: “Gúndaañu humá, ladüga heresibiruba aban óunwenbu fáyeiti sielu; ítara liña meha giñe héibaahouniwa profetagu ha ñǘbuinbaña hubaragiñe” (Mat. 5:11, 12). Dan le hagayuahanbei lúrudugu hawagu apostolugu ru hagía gumadi houn lun herederuni hapurichihan, ‘aba háfuridun hámagiñe lúrudugu gúndaañu’. Mama luagu habeichúniwa gunda habéi. Gúndaatiña meha ladüga “larihiniña Bungiu keisi gürigia gadünamatiña lun hasufurirun busiganu luagu liri Hesusu” (Adü. 5:41).

¹⁹ Lidan wadaani, keisi lubúeingu Heowá, awandatiwa giñe gúndaañu dan le wasufurirun luéigiñe liri Hesusu o dan le wagagibudagun luma lénrengunga (aliiha huméi Santiagu 1:2-4). Ítara kei apostolugu, mínsiñeti giñe woun wasufurirun. Lau sun lira, ánhawa úaragua lun Heowá dan le wagagibudagun luma óuchawaguni, líderagubadiwa lun wawandun lau ganigi. Ariha waméi le asuseredubei houn bián íbirigu. Lidan widü-hati, irumu 1944, óunaha hamutiña lúrudugu Henryk Dornik luma líbugaña lidoun fulasu le ñein lubéi meha hafosurua nasi gürigia lun hawadigimaridun. Ábati hariñagun ha máhabaña lun weseriwidun lun Heowá: “Siñati wadügün lun hafiñerun luagu ni kata. Kamá hínsiñeti houn lun hasufurirun”. Ariñagati íbiri Dornik: “Lau sun magundan nan lau nasufurirun, gúndaatina meha lau nasubudiruni sun lan le nasufurirubei —nawandun lau ganigi ani sin busiganu— awanda numuti ladüga busén nan úaragua nan lun Heowá”. Ariñagati giñe: “Adügati nayumuragun lun Heowá tau sun nanigi lúntima nayarafadun lun. Heowá íderagubalina dántima le nemegeirubalin!”.

20. Ka uagu gunda wabéi lau weseriwidun lun “Bungiu le gúndaabei”?

²⁰ Dan le gunda lan “Bungiu le gúndaabei” wau, gúndaatiwa íbini wasufuriruña lan éibaahouni luéigiñe wafiñen, hamahadun waduheñu lun weseriwidun lun Heowá, sándiñadiwa lan o derebuguhadiwa lan (1 Tim. 1:11, TNM). Gúndaatiwa giñe ladüga chouru wamuti lagunfulirubei lan Bungiu “le meyeehanbei,” le füramase laalibei (Titu 1:2). Danme le ladügüni, wéiribei lubuidun abiniruni le lunbei wibihini darí lun masudinin haali lanme lénrengunga le úmabei wagagibudagua guentó. Ibidiñegubeiti woun sun le lunbei líchuguni Heowá woun lidan Paraísu. Chóuruti wagundaaruba lau darangilaü le dayarüti ani wasandiruba aban ugundani léñaha masandirunñaha wamagili (Sal. 37:11).