1. Ida liña harufudun lubúeingu Bungiu hínsiñegua hamá hámagua?

ÍTARA haña sun lubúeingu Bungiu keisi iduheñu ha hínsiñeguabaña hámagua (1 Huan 4:16, 21). Liibe-agei dan, mama lidan aban katei le wéiriti lubuidun larufudúa ínsiñeni ligía, arufuda hamuti lidan liraüraü burí katei le hadügübei, kéiburi hariñagun somu katei lau ínsiñehabuni luma hadügün katei buiti hawagu amu. Dan le wóuseruniña amu buidu arufuda wagía gunfuranda wamutiña lan, wáyeihañein Bungiu kei lirahüñü “ha hínsiñetiña lun ” (Efe. 5:1).

2. Ida liña láyeihani Hesusu línsiñehabu Lúguchi?

² Áyeiha lumuti Hesusu Lúguchi machararunga. Óusera lumutiña meha gürigia buidu súnwandan. Ariñagati: “Higougu numoun, sun huguya ha buchaañabaña uagu lárigi huádigimari luma lihürü hanügün, emeraaguagüda náamugaün”. Ariñagati giñe gaguraasun lan, ñulú tuguya lanigi (Mat. 11:28, 29). Dan le wafalaruni le ladügübei, arufuda wagía gunfuranda wamutiña lan “ha mérebaña hama ha gudemebaña”,  gúndaaguagüda wamuti Wáguchi le siélubei ani gúndaatiwa giñe (Sal. 41:1). Ariha waméi ida luba lan warufudun gunfuranda wamutiña lan waduheñu, lílana damuriguaü hama gürigia ha únbaña wapurichiha.

3. Ida luba lóuserunu wügüri maríeiti lani weiriou? (Ariha humoun iyawaü to lídanboun lagumeseha arütíkulu).

³ Wügüriña ha maríeihañabaña hagía furumiñetiña ha lúnbaña harufudun gunfuranda hamutiña lan haduheñu (Efe. 5:25; 6:4). Ariñagatu Bíbülia mosu lan háfaagun lun gunfuranda hamanu hani weiriou (1 Fe. 3:7). Subudi lumuti wügüri maríeiti aban lan ídemuei lani weiriou lun ani amu lan burí hagaburi hawariuagua, lau sun lira, subudi lumuti úa lan ǘnabu tan luéi (Agu. 2:18). Ligía súdini lubéi le tasandirubei lun ani óusera lumutu lau inebesei. Ariñagatu aban íbiri kanadána: “Marufudunti nani weiriei meberesen lan lau le nasandirubei, mariñagun ligía nun: ‘Mama mosu basandiragun bungua ítara’. Aganba lumutina. Dan le líderagunina lun nasansiruni ligaburi narihin somu katei, adüga lumuti lau ínsiñehabuni”.

4. Ida luba larufudun wügüri maríeiti gunfuranda lumutu lan lani weiriou lidan ligaburi lóuserun hama amu würiña?

⁴ Arufudati giñe wügüri maríeiti gabaroun lumuti lan le tasandirubei lani weiriou lau madariha lan amu würiña o lasandirun aban uámahabuni le moun lumuti hawagu. Madügün lumuti giñe lidan páhina le ñein lubéi hadügǘwa umadagu ni lidan Internet (Hob. 31:1). Úaraguati tun lani weiriou mámarügü ladüga hínsiñe tan lun, úaraguati, ladüga hínsiñe lan Heowá lun ani iyereeguti le wuribabei lun (aliiha huméi Sálumu 19:14; 97:10).

5. Ida luba tarufudun würi maríeitu gunfuranda tani tani weiriei?

⁵ Dan le lafalaruni wügüri maríeiti le ladügübei Hesukrístu, le lichügüdina, ídehati lun inebe lan tun lani weiriou (Efe. 5:22-25, 33). Ábameti gunfuranda tani, kéiburi dan le mosu lan lasagarun dan lun letenirun lun lani buligasion lidan damuriguaü o dan le anihein lan burí turobuli le nidiherigüda lumuti. Ariñagati aban íbiri gürán büretáñana: “Anihein dan tarihin nani weiriou nidiheri nan ladüga sánsigua lan ligaburi nóuserun. Ábati tafalaruni le lariñagubei Ariñawagúni 20:5, íbini anihein lan dan mosu lan tagurabahani dan le buídutimabei lun nariñaguni le nasaminarubei, ánheingubeirügü aban lubéi katei le siñati nabahüdahani tun”.

6. Ida luba warufudahan sun wagía houn irahüñü lun gunfuranda hamaniña amu, ani ida luba lahuudun le houn?

⁶ Dan le harufudun agübürigu gunfurandaü hámagua rútiña aban buiti hénpulu houn hasaanigu. Hani giñe buligasion lun harufudahan houn hasaanigu lun gunfuranda hamaniña amu. Kéiburi, gayaraati harufudahan houn lun méibaagun hamá tidan Luban Adamuridaguni o dan le hásügürün dan hama íbirigu lun hígiruniña íbirigu ha derebuguhaña lun hasagarun éigini habaragiñe. Gayaraati giñe híderaguniña sun lílana damuriguaü agübürigu. Samina wamá hamuga anhein adüga aban irahü somu katei buiti wawagu, kei hamuga ladaaruni bena wabá, lunti wariñagun lun buidu lan ladüga. Lahuuduba katei le lun irahü ani mabulieidun lubéi dimurei le: “Fuleseiwatimati le íchugubei sügǘ lau le eresibirubei” (Adü. 20:35).

7. Ida liña larufudun Hesusu gunfuranda lumuti lan aban wügüri le maganbunti, ani ka gayaraabei wafurendeirun lídangiñe le ladügübei?

⁷ Luagu aban dan, dan le lídinbei Hesusu lidoun burí fulasu le lani Dekapolisi, aba hanügün gürigia aban wügüri le maganbunti, dagadaga ligía lererun lun (Mar. 7:31-35). “Aba ladiñurun Hesusu ñéingiñe lau hawéi gürigia” ani aba lareidaguagüdüni. Ka uagu madügün lubalin hagibugiñe? Másiñati adüga lan le gádanbalin wügüri le lun masandiragun lan lungua buidu hagibugiñe amu. Másiñati ligía lan mama lubéi hagibugiñe gürigia lareidaguagüdei Hesusu. Inarüni siñá lan wadügün milaguru. Lau sun lira, gayaraati ani lunti gabaroun wamani le hemegeirubei luma le hasandirubei wíbirigu.  Abürühati apostolu Pábulu: “Lunti giñe wáfaagun wíderaguniña wíbirigu lun hínsiñehabu hamá, luma lun hadügüni le buídubei” (Ebü. 10:24). Ida luba wafalaruni le ladügübei Hesusu dan le larufudunbei gunfuranda lani wügüri le maganbunbei?

8, 9. Ida luba warufudun gunfuranda wamaniña íbirigu derebuguhaña hama sánditiña? Ru humá hénpulu.

⁸ Gunfuranda wamaña ha derebuguhañabaña hama ha wuribabei hátuadi. Mama lun hadügüni katei buidu luágurügü murusun dan súdinitimabei houn kristiánugu inarünitiña, ínsiñeni le harufudubei hámagua ligía súdinitimabei houn (Huan 13:34, 35). Ínchaha lumutiwa ínsiñeni le lun wáfaagun lun wíderaguniña ha derebuguhaña hama ha wuribabei hátuadi lun houdin adamuridagua luma apurichiha. Ani adüga wamuti katei burí le íbini siñá lan hadügüni sun yebe le habusenrun (Mat. 13:23). Wéiriti leteingiruni Michael, aban íbiri le lídanbei haláü balabalati, ídemuei le híchugubei liduheñu lun hama lílana sétanu lánina apurichihani le ñein lubéi. Ariñagati: “Kei íderagua hamutina lan, gayaraati nidin lidoun liibe-agei adamuridaguni, gabügürügua ligía napurichihan. Napurichihan lidan guririguaü ligíatima hínsiñebei nun”.

⁹ Añahein saragu íbirigu derebuguhaña hama sánditiña tidan saragu Beteli. Arufudatiña ha arihibaña lau hadasin íbirigu úaraguatiña ha gunfuranda hamutiña lan lau hadügün aransehani lun hapurichihan luéigiñe gágamuru luma tau gárada. Ariñagati aban íbiri gíriti Bill, le 86 irumu lau ani abürühati houn gürigia ha awinwandubaña lidan fulasu díseti: “Teinki wamutiña íbirigu luagu gachansin wamá lun wabürühan gárada”. Ariñagatu Nancy, kéiburi 90 irumu tau: “Marihin numuti tabürühóun gárada kéirügü níchahaaña lan gárada lidoun tagei. Wapurichihaña. Mégeitiña gürigia hafurendeiruni inarüni”. Ariñagatu Ethel, to águrahouboun lidan irumu 1921: “Súnwandan nasandirun gáriti. Anihein dan hénrenguti nun íbini lun nasansiragun”. Lau sun lira, hínsiñeti tun tapurichihan luéigiñe gágamuru ani buiti hóunabun fiu gürigia ha únbaña tapurichihan danya le tagúarun houn. Ani ariñagatu Barbara, 85 irumu tau: “Kei wuriba lan nátuadi, hénrenguti nun lun gabügürügua lan napurichihan. Lau sun lira, adügati napurichihan luéigiñe gágamuru lun gayara lan nayanuhan hama amu gürigia. Seremei Heowá!”. Lídanrügü fiu hati, apurichihatiña fiu íbirigu derebuguhaña ani hínsiñehabutiña, ha tílana aban Beteli, 1,228 oura, abürühatiña 6,265 gárada, wátiña houn hóugiñe 2,000 gürigia luéigiñe gágamuru ani deregetiña 6,315 agumeiraguagüdüni. Chóuruti gunda lan Heowá lau le! (Ari. 27:11).

10. Ida luba wíderaguniña wíbirigu lun hasagaruni sun buiti le hayaraati lídangiñe adamuridaguni?

¹⁰ Arufuda wamá gunfuranda wamutiña lan íbirigu lidan damuriguaü. Ánhawa arufuda gunfuranda wamutiña lan wíbirigu, wíderagubaña lun hasagaruni sun buiti le hayaraati lídangiñe adamuridaguni. Ida? Aban lídangiñe lau chülügiñe wamá lidoun adamuridaguni lun meberesehan wamaniña amu mébunouga. Inarüni ñeinbei lan dan lasuseredun katei le magurabun wamuti le adügati lun wadarasahan. Ánheinti hechu wabéi achülüra tarü, lunti wasaminarun ka lan asansiruni lunbei wadügüni lun warufudun gabaroun wamaniña wíbirigu. Ani haritagua waméi Heowá lan luma Liráü agunbirahabaliwa lidoun adamuridaguni (Mat. 18:20). Ani garichatiña lun warufudun inebenehabúni houn.

11. Ka uagu lunti lubéi gaganbadi hamá íbirigu ha gadasinbaña lidan adamuridaguni lun le lariñagubei 1 Korintuna 14:40?

¹¹ Ábaya igaburi le ídanbei warufuda gunfuranda wamutiña lan lílana damuriguaü lau gaganbadi wamá lun gumadi luáguti lunti lan ladügǘn “sun katei lidan lubudubu”, lidan amu dimurei lun ua lan chagaguaü (1 Ko. 14:40). Kéiburi, íbirigu ha gadasinbaña lidan adamuridaguni lunti hachoururuni másügürün hamá lóugiñe dan le ídanbei lunti lan híchuguni hadasin. Lau hadügüni le, harufuduña samina hamá luagu íbiri le lunbei liabin hárigiñe hama híbiri lílana damuriguaü. Ka uagu? Ladüga añahein íbirigu ha díseti herederun tuéi Luban Adamuridaguni, ha lunti haweiyasuhan tidan burí ugunei to ídanboun haweiyasuha lílana fulasu ani  añahein maríeitiña mama Gefenti aban hádangiñe ani agurabatiña lau maguraasuni lun hachülürün hánigu paaná múnadoun.

12. Ka uagu garicha habéi wéiyaaña lidan afiñeni lun hínsiñe hamá woun saragu? (Ariha huméi rekuáduru “ Arufuda wamá gunfuranda wamaniña ha anügübalin ubaraü tidan lóundarun Heowá”).

¹² Nadagimeintiña wéiyaaña lidan afiñeni saragu ani buiti igaburi le harufudubei lau hapurichihan lau ubebeni, ligía lunti lubéi hínsiñe hamá woun saragu (aliiha huméi 1 Tesalónikana 5:12, 13). Chóuruti teinki wamani sun le hadügübei wawagu. Ligía lunti lubéi wídehan hama. Le linarün katei, hagía óunigirubaliwa ani laguseragüdübaña Bungiu luagu le (Ebü. 13:7, 17).

13. Ka gayaraabei wafurendeiruni lídangiñe ligaburi lóuseruniña Hesusu gürigia?

¹³ Ariñagati Isaíasi lidan aban profesía luagu Hesusu: “Máhalachagun lubéi maburu le halamémeelibei méñeguchunleime lanpu le ñegumémeelibei” (Isa. 42:3). Hínsiñetiña meha gürigia lun Hesusu ani rúguati meha lungua lidoun halugaarun. Gunfuranda lumuti meha ida liña lan hasandiragun gürigia ha ítarabaña kei maburu le halamémeelibei o ha ítarabaña kei limechan aban lanpu lauti agülei le ñegumémeelibei. Ligía meha gunfuranda lubaliña, óusera lumutiña buidu ani gaguraasun ligía habá. Íbini irahüñü busentiña meha houdin lumoun (Mar. 10:14). Inarüni ua lan iyarani wawagu lun gunfuranda wamaniña gürigia luma lun warufudahan houn ítara kei meha ladügüni Hesusu, íbini ítara, gayaraati ani mosu gunfuranda wamaniña gürigia ha únbaña wapurichiha. Ariha waméi ka lan lánibei le luma ligaburi wayanuhan houn, ka lan dan wayanuha hama luma átiribei lan lidura wayanuhan hama.

14. Ka uagu lunti lubéi duari wamá lidan ligaburi wayanuhan houn gürigia?

¹⁴ Ida luba wayanuhan houn gürigia? Uguñe weyu, saragu gürigia sandiguatiña houngua wuriba lan  houserúniwa ani meberesenwa ligía hau ladüga luriban burí hagaburi ha adügütiña bísinisi, ha lídanbaña polítika hama lábutigu relihión, móuserun hagía lau arumani (Mat. 9:36). Ani saragu gürigia mafiñentiña luagu ni aban ani memenigintiña. Ligía súdini lubéi lun warufudun lau le wariñagubei luma lau ligaburi wayanuhan buidu lan wagaburi ani gunfuranda wamutiña lan. Liibe-agei dan, aganba hamuti gürigia uganu le wapurichihabei houn mámarügü ladüga subudi wamani le tarufudahabei Bíbülia o ladüga buidu lan burí le wafuranguagüdübei houn, aganba hamutiwa ladüga óusera wamutiña lan lau inebesei arufuda wagía berese wamá hau tau sun wanigi.

15. Ida luba warufudun gunfuranda wamaniña gürigia ha únbaña wapurichiha?

¹⁵ Anihein saragu igaburi le ídanbei gayara lan warufudun gunfuranda wamutiña lan gürigia ha únbaña wapurichiha. Kéiburi álügüdahani le wadügübei houn, aban lubuidun igaburi lun warufudahan, lau sun lira, lunti wadügüni lau inebesei. Seriwiti meha aban prekursoru lidan aban fulasu le ñein habéi hiibe-agei gürigia ha lóuguatiña luma dimurei. Ábati líchugun fe moun lumuti lan ladügün álügüdahani le gayaraati ladügün lun habusigaridun gürigia anhein ibidiñe lubéi óunabagülei houn. Málügüdün lumutiña meha anhein subudi habalin ka lan líribei Bungiu o katei lan Larúeihanbei. Lubaragiñe lira, aba meha lariñagun houn: “Furendeihadina tidan Bíbülia giri lan Bungiu. Gayaraati narufuduni hun?”. Kei ámuñegueinarügü lan hechun luma hagaburi gürigia, siñati wariñagun ida luba lan wapurichihan houn. Lau sun lira, lunti gunfuranda wamaniña, inebehabu wagíame houn súnwandan ani lun wadügüni le, lunti wasubudiruni buidu ídatima haña lan gürigia ha awinwandubaña lidan fulasu le ñein lubéi wapurichiha.

16, 17. Anhein busén wabéi warufudun gunfuranda wamutiña lan gürigia a) kaba dan wabisidahaña hábiñe? b) átiribei lidura wayanuhan hama?

¹⁶ Kaba dan wayanuha hama gürigia? Dan le wapurichihan tidan burí muna, magurabun hamutiwa gürigia ladüga magunbiraha hamutiwa. Ligía súdini lubéi lun woudin hábiñe lidan burí dan le buídutimabei lun haganbuniwa (Mat. 7:12). Samina wamá anhein tarü lubéi hásaarun gürigia ha erederubaña le ñein lubéi wapurichiha samudi luma dimaasu. Anhein ítara liña lubéi, másiñati gayara lan wagumeserun apurichiha ǘmadarugu o lidan guririguaü, o bisidaña ha saraañabaña.

¹⁷ Átiribei dan wau ayanuha hama? Beresegu haña burí gürigia ligía másiñati buídutimabei lan ánhawa málüdün ayanuha hama, dántima le furumiñe lan wéiyaasu wayanuhan hama. Buídutimati lun mayanuhan wamá saragu (1 Ko. 9:20-23). Dan le harihini gürigia gabaroun wamuti lan le gádantiña o beresegu hamá, másiñati hánharuba lan lunya wabisidahaniña. Ánhawa arufudei igaburi le líchugubei sífiri lidan wapurichihan, warufuduba wídehaña lan luma Bungiu. Gayaraati íbini layusuruniwa Heowá lun labusenrun somu gürigia lasubudiruni inarüni (1 Ko. 3:6, 7, 9).

18. Ka abiniruni wagurabubei wibihin ánhawa arufuda gunfuranda wamutiña lan amu?

¹⁸ Áfaagua wamá lun warufudun gunfuranda wamutiña lan waduheñu, lílana damuriguaü hama gürigia ha únbaña wapurichiha. Ánhawa adügei, wibihiba saragu abiniruni guentó luma ámuñegü. Ariñagati Sálumu 41:1, 2: “Fuleseiwatiña ha haritaguabaña hawagun ha mérebaña hama ha gudemebaña, lesefurubaña Aburemei lidan lidere dan [...]. Líchuguba ibagari luma lubuidun dan houn ubouagu”.