1. Ka katei súdiniti uágubei layanuha Hesusu hama lani disipulugu lidan lagumuhóun guñoun le laubei hama?

LIDAN lagumuhóun guñoun lau Hesusu hama lani disipulugu, ayanuhati luagu ínsiñeni kéiburi darandi wéiyaasu. Furanguti lariñagun houn lunti lan hínsiñegua hamá hámagua (Huan 15:12, 17). Wéiribei meha larihín hínsiñegua hamá hámagua darí lun ligíaba lan arufudei hagía lan lánibaña disipulugu (Huan 13:34, 35). Mámarügüñein luagu ínsiñeni le asandirúbei layanuha Hesusu, layanuha meha luagu aban igaburi gabafuti ani le larufudubei gürigia le asaminaruti luagu le lemegeirubei amu lubaragiñe lasaminarun luouguoun. Ariñagati Hesusu: “Lueirin-agei ínsiñeni le gayaraabei gani lani gürigia, lun líchuguni libagari hawagu lumadagu. Numadagu huguya, anhein hadüga le nubeibei” (Huan 15:13, 14).

2. a) Ka adügübei lun mítaran hamá lubúeingu Bungiu kei híbiri gürigia? b) Kaba álügüdahani wóunaba lidan arütíkulu le?

² Subudiwatiña lubúeingu Bungiu uguñe weyu luagu ínsiñeni inarüniti le harufudubei hóuniwagua adüga hagía sákürifisiu hawagu amu luma úarani le hádanbei (1 Huan 3:10, 11). Áfaaguatiwa lun ñein  lan ínsiñeni libe le wadan meberesenga halíana wamá, ka lan wánibei türibu, ka lan iñeñein wayanuhabei o ligaburi wagüriarúniwa. Lau sun lira, másiñati álügüdagua wamá woungua: “Ka uagu lemegeirúa ínsiñeni uguñe weyu? Ida liña líchugun Heowá luma Hesusu dǘgüdaguaü woun? Ani ida luba wáyeihani Hesusu arufuda wagíame ínsiñeni le ruti iderebugu?” (1 Ko. 8:1).

3. Ida liña ladügün “weyu hénrenguti le” lun hasandiragun gürigia houngua?

³ Kei buin liña lubéi “weyu hénrenguti le”, lau turobuli luma igarigu, súfuritiña saragu gürigia lau lanarime idiheri (2 Tim. 3:1-5; Sal. 90:10). Saragu gürigia aba burí mabusenrunhaña lan hasigirun awinwanda. Según ariñahani, sagü irumu áfaraguatiña kéiburi 800,000 gürigia houngua, kéiburi 1 gürigia kada 40 segundu. Ma lirun sandiguaña lan íbini fiu kristiánugu houngua ítara ani aba giñe háfaragun houngua.

4. Ka burí gürigia ha lánina tidaani Bíbülia ariñagubaña busén hamá yebe hounwen?

⁴ Lidan tidaani Bíbülia, añahein meha lubúeingu Bungiu úaraguatiña ha asandirubaña lanarime idiheri darí lun busén hamá yebe hounwen. Ligía asuseredubei lun Hobu, kei aba lan lasandiragun lungua lau lanarime igarigu ariñagati: “Siñá nun, mabusenrunhadina nasigirun abagarida” (Hob. 7:16; 14:13). Kei magundan lubéi Honasi ladüga masuseredun lan katei lun lidan lidasin kei yebe lagurabuni, aba lariñagun: “Ligíati namuriahanbei buma Nabureme lun bagidaruni nibagari. Himei nágili nounwen sügǘ lau nasigirun abagarida” (Hon. 4:3). Ani luagu aban dan, sandiguati profeta Elíasi lungua wuriba darí lun lamuriahan luma Bungiu lun lígirun lun lounwen. Ariñagati: “Buídurügaali, Nabureme! Gidabei nibagari” (1 Uru. 19:4). Lau sun lira, gebegitiña meha lubúeingu Heowá úaraguatiña ha lun ani busenti meha lun hasigirun awinwanda. Mererehanti houn luagu le hasandirubei, rúrügüti gurasu houn lau ínsiñehabuni ani íderagua lumutiña lunya busén hamá hasigirun awinwanda luma eseriwida lun lau úaraguni.

5. Ka uagu megei habéi wíbirigu lun hínsiñehabu wamá houn uguñetima weyu?

⁵ Íbini mígirun hamá hiibe-agei hádangiñe wíbirigu lun lábürühan harüna, lau sun lira, saragu hádangiñe mosu hagagibudagun luma burí lénrengunga ani mégeitiña wíchugun dǘgüdaguaü houn luma lun warufudun ínsiñehabuni houn. Fiu hádangiñe éibaahouatiña ani adügǘwati bula hau. Añahein amu, mosu hawandun hayanuhan hapanaagu lidan wadagimanu wuriba hawagu. O másiñati buchá lan hawagu ladüga mosu lan hawadigimaridun lóugiñe le mégeiwabei o ladüga adüga lan hawadigimari lun hadiheridun saragu. Ani añahein fiu gaturobulintiña hadan haduheñu, másiñati ladüga mama lan Gefentiña aban hádangiñe maríeitiña ani súnwandan hayanuhan wuriba hawagu Gefentiña. Ligíati, adügati burí katei le lúmaya amu, lun hasandirun saragu kristiánugu lubucha uagun luma íruni. Kaba íderaguaña lun hasigirun habaruagoun?

6. Ida liña líchugun Heowá dǘgüdaguaü houn lubúeingu?

⁶ Ruti Heowá dǘgüdaguaü houn lubúeingu lau lachoururagüdüni houn hínsiñebaña lan lun súnwandan. Chóuruti ragǘ hamá ísüraelina gurasu lau haganbuni dimurei le lariñagubei Heowá houn: “Ladüga bínsiñe nun, wéiriti bebegi ani hínsiñetibu nun. [...] Manufudedabá, ladüga anahein buma” (Isa. 43:4, 5). Gayaraati hachoururuni hínsiñe humá lun Heowá gebegi huguya lun. * Füramaseti Heowá houn lumutuniña: “Gabafuti ani lesefurubadibu! Gúndaabei Wabureme bau” (Sof. 3:16, 17).

7. Ida liña genegegua lan línsiñehabu Heowá luma ínsiñeni le tasandirubei aban úguchuru luagu tisaani le ñǘraügili? (Ariha huméi dibuhu le lídanbei lagumeseha arütíkulu).

 ⁷ Meberesenga ka lan lénrengunga úmabei hagagibudagua lubúeingu Bungiu, füramaseti líderagubaña lan ani líchuguba lan dǘgüdaguaü houn. Ariñagati tidan liliburun Isaíasi: “Tátagüdübadün Herusalén keisi aban úguchuru, tanügübadün tarünarugu, ábame tasalagadunün lau saragu ínsiñeni. Kei támalihani aban úguchuru tiráü, ítara luba námalihanün” (Isa. 66:12, 13). Adügati dimurei le lun wasaminarun luagu aban lubuidun katei: tuagu aban úguchuru hínsiñehabutu to anügübalin tisaani ñǘraügili tarünarugu o adibiriha luma. Ítara liña larufuduni Heowá lueirin ínsiñeni le lasandirubei hawagu lubúeingu. Maweiyasun wamá asaminara mebegi wamá lun Heowá (Her. 31:3).

8, 9. Ida liña líchugun línsiñehabu Hesusu erei woun?

⁸ Wagía kristiánugu inarünitiña anihein ábaya katei le achoururagüdübalin woun hínsiñe wamá lun Heowá. Ariñagati Huan 3:16: “Ladüga wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi”. Ma lueirin ínsiñeni le lasandirubei Hesusu wawagu lau lederegeruni libagari! Füramasetu Lererun Bungiu woun mafanreinragun lubadiwa lan ni íbini lénrengunga o igarigu luéi “línsiñehabu Kristu” (Rom. 8:35, 38, 39). Ma adügati ínsiñeni le lun wasigirun wabaruagoun?

⁹ Dan le wagagibudagun luma burí óuchawaguni le adügüti lun labuchadun wawagu o lun wadiheridun, íderagua lumutiwa waritaguni hínsiñe wamá lun Kristu lun wawandun (aliiha huméi 2 Korintuna 5:14, 15). Adügati ínsiñeni le lun busén wamá wasigirun awinwanda luma eseriwida lun Heowá íbini dan le wasandirun igarigu, wagagibudagun luma éibaahouni, liñawan dan o masalirun lan katei woun kei yebe wagurabuni.

10, 11. Kátaña lúnbaña híchugun dǘgüdaguaü houn ha maguraasunbaña? Afuranguagüda huméi.

¹⁰ Yusu lumuti giñe Heowá damuriguaü lun líchugun dǘgüdaguaü woun lau ínsiñeni. Dan le hínsiñe hamá wíbirigu woun arufudatiwa hínsiñe lan giñe Bungiu woun. Áfaaguatiwa lun wadügüni sun wayaraati lun wíderaguniña lun harihini gebegi hamá lun Heowá hínsiñe hagía lun (1 Huan 4:19-21). Ariñagati apostolu Pábulu  houn kristiánugu: “Rúmeme humá lubéi gurasu luma erei húniwagua ítara kei hadügüni guentó” (1 Tes. 5:11). Ligíati, mámarügüñanu wéiyaaña lidan afiñeni, sun wagía gayaraati wáyeihani Heowá luma Hesusu lau wíchugun gurasu luma dǘgüdaguaü houn íbirigu (aliiha huméi Rómana 15:1, 2).

¹¹ Añahein íbirigu hénrenguti houn hárügüdagun houngua luéi luriban saminaü ani másiñati megei hamá híderaguniña surusiagu luma hatun árani (Luk. 5:31). Dandu wéiyaaña lidan afiñeni kei amu íbirigu lidan damuriguaü subudi hamuti mama lan surusiagu hagía lun burí luwuyeri sandi le. Lau sun lira, subudi hamuti súdini lan gaganbadi hamá lun gumadi le: “Híchugun gurasu houn ha maguraasunbaña, lun híderaguniña ha débilibaña lidan hafiñen, lun giñe gaguraasun humá habá súngubei” (1 Tes. 5:14). Sun wagía mosu warufudun ínsiñeni houn ha maguraasunbaña, wíchaagun woungua lidoun halugaarun, gaguraasun wagíame houn, ayanuha wagíame houn lau ínsiñehabuni gayara láamuga wíchugun dǘgüdaguaü houn. Álügüdagua wamá woungua: “Rútina san dǘgüdaguaü luma gurasu houn amu? Kaba íderaguana lúntima níderaguniña níbirigu?”.

12. Abahüdagua humá ida liña lan líderagunu ínsiñeni le harufudubei lílana aban damuriguaü aban íbiri.

¹² Ida luba lídehan hínsiñehabu wamá houn ha asufurirubaña lau luriban saminaü lun hárügüdün gurasu? Ariñagatu aban íbiri yuropana: “Anihein dan nasaminarun náfaragun nungua. Gama lumoun, añahein saragu numadagu ha íderagubalina. Sefu láadina damuriguaü le ñein nubéi. Súnwandan harufudun íbirigu ínsiñeni nun ru hagía dǘgüdaguaü nun. Lau sun mibe hamá ha asubudirubaña anihein lan lueirin íruni nuagu, súngubei hagía aranseñu haña lun híderagunina súnwandan. Anihein aban feru maríeitiña ha óunigirubalina kei hamuga hasaani. Aranseñu haña lun híderagunina furumiñeguarügü oura, wéyuagu lan yebe o guñoun”. Inarüni siñá lan hídehan súngubei lidan ligiaméme igaburi. Lau sun lira, gayaraati líderaguniña saragu ídemuei le wíchugubei lau ínsiñehabuni houn ha asufurirubaña lau luriban saminaü. *

13. Ka mégeiwabei lun wíchugun dǘgüdaguaü houn wíbirigu?

¹³ Aranseñu wamá lun waganbuniña amu (Sant. 1:19). Arufudatiwa ínsiñehabuni dan le waganbuniña amu lau wíchaagun woungua lidoun halugaarun. Áfaagua wamá lun wasaminarun ida luba lan hamuga wasandiragun woungua lun hamuga lídanñadiwa lan halugaarun ani adüga wamá álügüdahani houn lau duari gayara láamuga gunfuranda wamani le hasandirubei. Mosu larihíniwa luagu wagibu berese wamá hau tau sun wanigi hínsiñe hagía woun. Anhein megei lubéi íbiri ligía labahüdaguni woun sun le lásügürübei, gaguraasun wamá ani madüraagua waméi liyanun. Másiñati gunfuranda wabéi lan le lasandirubei ánhawa aganbei lau gurasu. Ítara, lafiñerubatima wawagu ani aransetimabei lun laganbuni le wariñagubei lun. Dan le warufudun berese wamá hau amu tau sun wanigi, hibihuba dǘgüdaguaü wama.

14. Ka uagu busén wabéi lun mayanuhan wamá wuriba hawagu amu?

¹⁴ Mayanuhan wamá wuriba hawagu amu. Anhein asaminara somu gürigia le wéiriti lirun wayanuhaña lan wuriba luagu, wéiritimabei ligarigu. Ani lau sun wáfaaguña lan wíderaguni tau sun wanigi, hénrengutimabei woun wíchugun dǘgüdaguaü lun. Ariñagatu Bíbülia: “Añahein  gürigia, abuleseihatiña láurügü hererun, gama lumoun ha chúbaña aau, areidaguagüdatiña lau hadimurehan” (Ari. 12:18). Chóuruti mabusenrun wamá wabuleseiruniña amu lau le wariñagubei, gama lumoun, ítara luba hasandiragun houngua ánhawa ayanuha masaminarunga. Lun wíchugun dǘgüdaguaü houn amu lau ínsiñeni, áfaagua wamá lun wíchaagun woungua lidoun halugaarun (Mat. 7:12).

15. Ka tubuidun ídemuei gayaraaboun wayusurunu lun wíchugun dǘgüdaguaü houn amu?

¹⁵ Yusu wamóun Lererun Bungiu (aliiha huméi Rómana 15:4, 5). Rutu Bíbülia awalidaguni ladüga lúmagiñetu aban Bungiu le ruti “gurasu luma dǘgüdaguaü”. Lun wayusurunu ídemuei to buidu, anuhein líburu Índice de las publicaciones Watch Tower wama tuma Adundehani lun haturiahan gefentiña luagu Heowá to gayaraaboun tíderaguniwa adarira bérusu tuma agumeiraguagüdüni lun wíchugun dǘgüdaguaü houn amu.

16. Ka burí igaburi lunbei gagaburi wamani dan le wíderagun somu íbiri le wéiriti lirun?

¹⁶ Buidu lan wagaburi hínsiñehabu wagíame. Buíduburiti igaburi le lun warufuduni dan le wíchugun dǘgüdaguaü luma gurasu lun somu gürigia. Heowá “Wáguchibei le gudemehabubei woun; ani aranseñu liña lun líchugun gurasu woun súnwandan” ani gudemehabuti houn ha eseriwidubaña lun (aliiha huméi 2 Korintuna 1:3-6; Luk. 1:78; Rom. 15:13). Ruti Pábulu aban lubuidun hénpulu woun lau larufuduni igaburi le ladüga áyeiha lumuti lan Heowá. Abürühati: “Óuserarügütiwa keisi irahüñü haganagua, keisi aban úguchuru to agüriahabaliña tirahüñü, góunigitaña. Wéiriti hínsiñe woun darí lun mámarügüñein lan hamuga luganute Bungiu wabusenra wíchugun hun, busentiwa hamuga wíchuguni wabagari guánarügü hun, le lueirin hínsiñe woun” (1 Tes. 2:7, 8). Anhein hínsiñehabu wabéi ítara kei Bungiu, gayaraati layusuruniwa lun lóunabuni lafurieidun somu gürigia le gagariguti.

17. Ida liña lunti lan warihiniña wíbirigu lun gayaraabei lan wíchugun iderebugu houn lau ínsiñehabuni?

¹⁷ Maguraba wamá lun hadügüni íbirigu katei machararunga. Mosu warihiniña keisi lubudubu. Wagurabun machararunbaña lan íbirigu lanügüba magundani woun ani warufuduña marihin wamuti lan katei keisi lubudubu (Apur. 7:21, 22). Haritagua waméi richá lan Heowá lau le lamuriahabei hámagiñe lubúeingu. Ánhawa áyeihei ligaburi, aranseñubadiwa lun wawanduni hachararun amu woun (Efe. 4:2, 32). Madüga wamá lun hasaminarun máfaaguntiña lan saragu lidan heseriwidun lun Heowá, magoubaguagüda waméi giñe le hadügübei luma le hadügübei amu luéi heferidiruni haguraasun. Lubaragiñe lira, hechu wamá ariñaga houn buidu lan hadügüni le hadügübei. Líchuguba katei le dǘgüdaguaü houn ani líderagubaña lun heseriwidun lun Heowá lau ugundani (Gal. 6:4).

18. Ka uagu busén wabéi wíchugun iderebugu houn wábirigu lau ínsiñehabuni?

¹⁸ Wéiriti hebegi sun lubúeingu Heowá lun luma lun Hesusu, le íchugubalin libagari keisi sákürifisiu wawagu (Gal. 2:20). Hínsiñetiña sun wíbirigu woun tau sun wanigi ani busentiwa wóunigiruniña lau ínsiñehabuni. Lun gayaraabei lan wíchugun dǘgüdaguaü houn, “ítarameme wamá [...] áluaha lun lidan lan darangilaü sun katei, lun gayara lan wíderagun woungua lun wederebugudun lidan wafiñen” (Rom. 14:19). Memeniha wanigi lachülürün Paraísu, le ñeinba lubéi masandirun wamá maguraasuni. Úaalime sandi, wuribu, óunweni le lanügübei figóu, éibaahouni, turobuli hadan iduheñu luma magundani. Danme le lagumuchun milu irumu, mafigoun haañame gürigia. Lanügübaña Heowá ha ásügürübaña lídangiñe lagumuhóun óuchawaguni keisi lirahüñü ha ubouagubaña, ha lúnbaña ‘gafanranbaña lan lidan haweirigun lirahüñü Bungiu’ (Rom. 8:21). Sigí wamá arufudei ínsiñeni le ruti iderebugu íderagua wagíame wóuniwagua lun webelurun lidoun lubuidun iseri ubóu le füramase laalibei Bungiu.