LIDAN sun ubóu, gebegiti wadagimanu le hadügübei wéiyaaña lidan afiñeni tidan lóundarun Heowá houn. Ani súngubei wagía gúndaatiwa lau ídemuei le híchugubei woun. Gama lumoun, mameme binarü, aba lamuriahóun hama wéiyaaña ha derebuguhaña lun hásügüragüdün lídangiñe hani buligasion le wéiritimati hóuntima ha nibureingiñabaña.

Lúmagiñe ladügǘn asansiruni le, gumú hamuti óunigirutiña sirkuitu hama íbirigu ha arufudahabaña tidan leskuela houn kristiánugu hadasin dan le hagunfulirun 70 irumu. Ani wéiyaaña ha barühañabaña lóugiñe 80 irumu, lunti hásügüragüdün lídangiñe hani buligasion houn ha nibureingiñabaña, kéiburi lun harihin lau hawadigimari lílana Sétanu le arihibei tau Sukursáli o kei aransehati hawadigimari wéiyaaña lidan damuriguaü. Ida liña harihini íbirigu derebuguhaña ani hínsiñehabutiña ha asansiruni burí le? Arufudaaña úaraguni lun Heowá luma tun lóundarun.

Ariñagati Ken, aban íbiri le eseriwidubei kei le arihubei lau hawadigimari lílana Sétanu le arihibei tau Sukursáli luagu kéiburi 49 irumu: “Gúndaatina lau asansiruni le dan le níchugunbei fe luagu. Le linarün katei, furíei hádina meha binaafinméme ligía  amuriaha luma Heowá lun ñein lan aban íbiri létima nibureingili lun letenirun lun dasi le”. Saminatiña saragu íbirigu derebuguhaña lidan sun ubóu ítara kei Ken. Lau sun lira, kei hínsiñe lubéi houn íbirigu úaraguatiña ha heseriwidun houn hábirigu, aba hírudun murusun luagu asansiruni le.

Ariñagati Esperandio, le meha aransehabalin hawadigimari wéiyaaña lidan damuriguaü le ñein lubéi, hiru lan meha murusun furumiñe. Lau sun lira, ariñagati giñe: “Mégeitina meha dan lun gayaraabei lan netenirun lun nátuadi le wuribatimahalibei”. Ani sigimémegili Esperandio eseriwida lun Heowá lau úaraguni ani ábangili abiniruni houn lílana damuriguaü le ñein lubéi.

Agiati íbirigu ha meha eseriwidubaña kei óunigirutiña sirkuitu ani guentó sánsiwaali hadasin? Ariñagati Allan, le eseriwidubei kei óunigiruti sirkuitu luagu lóugiñe 38 irumu: “Wagatina dan le naganbubalin ñunsu le”. Lau sun lira, ruti fe hu lan lun larufudahóun houn wügüriña hátima nibureingiñabaña ani sigimémeti eseriwida lun Heowá lau úaraguni.

Seriwiti Russell kei óunigiruti sirkuitu luma arufudahati tidan leskuela houn kristiánugu luagu 40 irumu. Abahüdaguati hiru lan meha tau sun lani weiriou furumiñe. Ariñagati: “Wéiriti meha línsiñe wadasin woun ani genegeti meha woun héregidiwa lan lun wasigirun agunfulira lau”. Layusuruñein Russell tuma lani weiriou le hasubudirubei luma le winwan hamaalibei lun hídehan lidan damuriguaü le ñein habéi ani gúndaatiña íbirigu lau añahein lan ñein hama.

Íbini masandiragungidiwa lan hamuga woungua ítara kei íbirigu ha, líderagubadiwa aban abahüdaguni le lídanbei 2 Samueli lun gunfuranda wamaniña.

Haritagua waméi dan le lebedaagunbei Abüsalón lun urúei Dawidi, le lúguchi. Aba lanurahan Dawidi Herusaléngiñe lun Manaímü, le luéigiñebei oubaü le ñéingiñe lubéi laboucha weyu libiti duna Hordán. Ñein, lemegeira Dawidi hama luwügüriñanigu umegeguni le lánina sagü weyu. Kati asuseredubei lárigiñe?

Aba híchugun ǘrüwa wügüriña ha erederubaña lidan fulasu ligía gabana, éigini luma amu burí katei le hemegeirubei houn. Bárüsilai aban hádangiñe wügüriña ha (2 Sam. 17:27-29). Dan le lerederunbei lebedaagun Abüsalón, gayaraahali meha lagiribudun Dawidi Herusaléun ani aba lidin Bárüsilai íchaahei darí duna Hordán. Aba lamuriahan Dawidi luma lun lidin luma Herusaléun ani ariñagati lun ladügüba lan lun geigin lan, lau sun memegeirun lan meha Bárüsilai lichugún éigini lun “lugundun rísiti buga saragu” (2 Sam. 19:31-33). Másiñati hínsiñe lan meha ligaburi Bárüsilai lun Dawidi luma adundehani le meha gayaraabei líchuguni lun ladüga burí sügǘ le winwan laalibei lidan libagari. Ábanbei hamuga lubuidun chansi lun Bárüsilai lun lawinwandun luma lun lawadigimaridun tidan luban urúei.

Arufudati Bárüsilai ǘnabugu lan ani ariha lumuti katei keisi lubudubu ligía lariñagubei lun Dawidi gádürü-wéinhali lan meha irumu lau ani siñaali  meha lasubudiruni “le buídubei lumoun le wuribabei”. Ka uagu layanuha? Chóuruti, ibihaali lan meha Bárüsilai saragu lichú aau lidan sun libagari. Ani chóuruti rúgili lan meha lubuidun adundehani, ítara kei hadüga “wéiyaaña mutu” dan lárigiñe luma Roboamü (1 Uru. 12:6, 7; Sal. 92:12-14; Ari. 16:31). Ligíati, másiñati layanuha lan meha Bárüsilai luagu le siñá lubéi adüga ladüga wéiyaali lan meha. Ariñagati adügaali lan aweiyaduni lun masandi lani lisemén éigini luma lun ladaünrün laganbun (Apur. 12:4, 5). Ligía lariñagunbei lun Dawidi lun lanügüni Kimamü, aban nibureinti másiñati liráü lan, Herusaléun (2 Sam. 19:35, TNM, 36-40).

Genegeguati asansiruni le uágubei layanuhóua lidan lagumeseha arütíkulu le luma le gabaroun lubéi Bárüsilai. Lunti gabaroun wamani lidan lan likesin Bárüsilai, luágurügüñein le gádanti aban gürigia luma le gayara lubéi adüga lasaminarúa. Ánheinti lidan wadaani, mosu lasaminarun luagu le buídutimabei houn saragu wéiyaaña lidan afiñeni úaraguatiña lidan sun ubóu.

Arufudaaña wéiyaaña ha ǘnabuguni ani gunfuranda hamuti lau lóufudagun barǘ lan asansiruni le buiti. Ánhaña ígira lun íbirigu lan hátima nibureingiñabaña etenira lun buligasion le meha unbei hetenira, aranseñu túbatima lóundarun Heowá lun tetenirun lun buligasion wéiritimati ámuñegü. Liibe-agei dan, íbirigumeme derebuguhaña ha arufudahabaña houn hátima nibureingiñabaña, másiñati ítara liña lan ladüga Bárüsilai luma liráü o kei ladüga Pábulu luma Timotéu (1 Ko. 4:17; Fili. 2:20-22). Arufudaaña wügüriña nibureingiña ha ítara haña lan kei idewesei houn hábirigu ani gayara lan hídehan “lun hederebudagüdüni lúgubu Kristu” (Efe. 4:8-12; ariha huméi giñe 1 Lúrudu 11:16, 17, 29).

Lidan sun ubóu, yusu hamaali saragu hádangiñe íbirigu ha sügügüda hamaalibei lídangiñe hani buligasion houn amu hadaani lun haganwoundagüdüni heseriwidun lun Heowá.

Ariñagati Marco, le eseriwidubei kei óunigiruti sirkuitu luagu 19 irumu: “Adügati iseri nani buligasion lun gadaanitima nan lun nayanuhan tuagu Bíbülia hama hani íbirigu weiriei ha mama Gefentiña”.

Ariñagati Geraldo, le eseriwidubei kei óunigiruti sirkuitu luagu 28 irumu: “Náfaaguña tuma nani weiriou lun wadügün amu katei lidan weseriwidun, kéiburi wíderaguniña ha madamuridagunhaña mapurichihan hagía luma lun gíbetima hamá gürigia ha únbaña wíchiga aturiahani”. Ariñagati giñe híchuguña lan aturiahani tídangiñe Bíbülia houn 15 gürigia ani fiu hádangiñe ha meha madamuridagunhaña mapurichihan hagía, habasihaña lidoun adamuridaguni.

Ariñagati Allan, le uágubei wayanuha lidan lagumeseha arütíkulu: “Gayaraahali weteniruntima lun wapurichihan. Hínsiñeti woun wapurichihan lidan guririguaü, tidan burí bísinisi luma houn wabesinanigu. Ñǘdünhaña bián wabesinanigu wama tidoun Luban Adamuridaguni”.

Anhein aban lubéi íbiri úaraguati huguya ani resibihadün aban iseri dasi, anihein ábaya katei le gayaraabei hadügüni lun hídehan tidan lóundarun Heowá, lau hayanuhan luagu le winwan humaalibei houn hátima nibureingiñabaña. Ariñagati Russell, le uágubei wayanuha lidan lagumeseha arütíkulu: “Larufudahaña ani layusuruñanu Heowá íbirigu nibureingiña ha buítiña, benefa hagía. Hasagaruña sun íbirigu buiti lídangiñe harufudahan houn luma lídangiñe hadundehaniña lau ubebeni” (ariha huméi rekuáduru “ Íderagua humaña wügüriña nibureingiña lun buídutima lan hadügüni hawadigimari”).

Anhein málügili lubéi lúmagiñe heresibirun aban iseri dasi, kipu humá aban lubuidun igaburi. Húuhali sun wadagimanu le adüga humaalibei tau sun hanigi houn saragu gürigia ani gayaramémegili lahuudun houn saragu. Hínsiñetün houn saragu íbirigu ani hínsiñememebadün houn.

Le súdinitimabei adügaali le lun wéiritima lan hínsiñe lun Heowá. Füramasehali mabulieidun lubéi lan “le adüga humaalibei, luma ínsiñehabuni le arufuda  humaalibei lun lau híderaguniña hiduheñu luagu afiñeni, katei le áünhaguabei adüga” (Ebü. 6:10). Chóurugüda lumuti bérusu le woun mámarügüñein lan luagu le adüga wamaalibei laritagua Heowá. Kei gebegi hubéi lun, mabulieidun lumuti le adüga humaalibei luma le áünhaguabei adüga lun hagundaaragüdüni.

Ánheinti mibihingidün lubéi aban iseri dasi? Íbini ítara, gadan lumutiwa sügǘ le. Ida?

Ánhawa ásügüra dan hama íbirigu derebuguhaña ha eresibirubaña aban iseri dasi gayaraati lahuudun sun le winwan hamaalibei luma hasubudin woun. Buídubei lun wamuriahan adundehani hama. Ani teni wamá lun ligaburi hayusuruni le furendei hamaalibei lau úaraguni lidan hadasin guentó.

Dandu anhein aban hubéi íbiri derebuguhali le eresibirubei aban iseri dasi o aban wamá íbiri, wügüri o würi, le gayaraabei lasagarun buiti lídangiñe le winwan laalibei íbiri le derebuguhalibei, haritagua waméi gebegi lan úaraguni le harufudubei ha eseriwidubaña lun Heowá luagu saragu dan ani sigimémetiña lidan heseriwidun lun.