Afiñetiña saragu míñunu gürigia lidan sun ubóu efeduhóua lan lagunfulirun Hesusu irumu lidan duusu-hati. Álügüdaguadün san hungua anhein efeduha habalin kristiánugu lánina furumiñeti sígulu, ha yarafatimabaña lun Hesusu Fedu lánina duusu-hati? Subudi humuti san le tariñagubei Bíbülia luagu lagunfulirún irumu? Líderagubadiwa lóunabagüle álügüdahani burí le lun wasubudiruni anhein lunti lubéi hefeduhani Kristiánugu Fedu lánina duusu-hati.

Furumiñe, mariñaguntu Bíbülia efeduhóua lan lagunfulirun Hesusu irumu ni lani somu lubúein Bungiu le úaraguati. Hawagurügüñein bián gürigia tariñaga Bíbülia efeduha hamani hagunfulirun irumu ani meseriwiduntiña biángubei lun Heowá, Bungiu le abürügüdübarun Bíbülia. Wuribati lagumuchun bián fedu ligía (Agumesehani 40:20; Márükosu 6:21). Ariñagatu Encyclopædia Britannica, máhatiña lan furumiñetiña kristiánugu lun “échuni mama lúmagiñeti Bungiu lánina lefeduhóun lagunfulirún irumu”.

Mariñagun tumuti Bíbülia kátima lan weyu nasirua lan Hesusu. Ariñagatu Diccionario de historia de la Iglesia: “Úati ni kata arufuduti lau ichouruni ka lan weyu o hati nasirua lan Kristu”. Furanguti lun hamuga lan busén lan meha Hesusu hefeduhani lani disipulugu lagunfulirun irumu, ladügüña hamuga lun hasubudiruni kátima lan weyu nasirua lan.

Libiaman, mariñaguntu Bíbülia efeduha lani Hesusu o lani disipulugu Fedu lánina duusu-hati. Según New Catholic Encyclopedia ayanuhóuati luagu furumiñeti wéiyaasu luagu lufedun duusu-hati “tidan aban kalendáriu rómana to gaganaboun ariñahani lúmagiñeti irumu 336 gíritu Cronógrafo de Filócalo”. Furanguti, susere lan katei lira saragu dan lárigiñe lagumuchún tabürüdǘn Bíbülia ani saragu sígulu lárigiñe ya lan Hesusu ubouagu. Ligía tariñagunbei Cyclopedia lani McClintock luma Strong luagu mama lan aban gumadi lúmagiñeti Bungiu lefeduhóun Fedu lani duusu-hati ani úati giñe tidan Iseri Daradu. *

Ariñaga lumuti Hesusu, Máisturu le Wéirigutimabei, houn lani disipulugu kátima lan meha labuserunbei lun hadügün ani anihein adundehani ligía tidan Bíbülia. Gama lumoun, mariñagunti houn lun hefeduhani Fedu lánina duusu-hati. Ítara kei lagurabahan aban máisturu lun másügürün hamá lani aturiahatiña luéi adundehani le líchugubei houn, mabusenrunti giñe Hesusu lun houdin lani disipulugu “yagürounmeme luéi le bürüwañubei” tidan Bíbülia (1 Korintuna 4:6).

Gama lumoun, anihein aban sügǘ le wéiriti lisudinin houn furumiñetiña kristiánugu: Laritaguagüle lounwen Hesusu. Ariñaga lumuti houn lani disipulugu ídaba lan hadügei efeduhani ligía luma ida luba lan hadügüni. Anihein adundehani furanguti le líchugubei houn luma luéyuri lounwen tidan Bíbülia (Lúkasi 22:19; 1 Korintuna 11:25).

Kei aubei warihei, dan le layanuhóun luagu Fedu le, layanuhóuña luagu lagunfulirún irumu, ani mafalarun hamuti meha furumiñetiña kristiánugu échuni mama kristiánu le. Mariñaguntu giñe Bíbülia efeduha lani Hesusu o amu gürigia Fedu le. Ligíati, desidírühaña saragu míñunu kristiánugu lidan sun ubóu mefeduhan hamani Fedu lánina duusu-hati.