Máfuachunti Hesusu tidan somu iyawaü. Madügǘnti giñe lúgubu lau baribarabu madibuhóun ligía. Gama lumoun, lau lásügürün saragu sígulu fuaali Hesusu lidan hawadigimari ha adibuhabaña úgubu lau baribarabu o dübü.

Chóuruti ibidiñe lan meha houn gürigia hagía ídatima liña lan meha larihín Hesusu. Libe-agei dan aba meha hadibuhani según dan le ídanbei hawinwanda, le hafiñerubei o según meha le hínsiñebei houn gürigia ha agañeihabalin le hadügübei. Lidan sun le hadügübei adibuhatiña ha, gayaraati meha hasansiruni le harufudahabei luma le hasaminarubei gürigia luagu Hesusu.

Añahein hádangiñe adibuha hamuti kei aban wügüri débiliti, lau ídiburi migifeti, lau murusun ídiumaü o lau íruni. Lidan burí amu dibuhu le hadügübei, adibuha hamuti Hesusu kei aban ánheli lau aban igaburi le dísegüda lumuti hawéi gürigia. Genegeguatu funa san iyawaü burí tuguya luma Hesusu? Ida luba wasubudiruni? Líderagubadiwa wakutihani abahüdaguni burí le tídanbei Bíbülia lun warihini kei lubeibei ani lun wasaminarun ida liña lan meha laríawagun.

Másiñati dan lan le labadiseirunbei Hesusu lariñagei dimurei le lidan aban furíei (Ebüréu 10:5; Matéu 3:13-17). Ida liña meha san úgubu ligía? Kéiburi 30 irumu lubaragiñe sügǘ ligía ariñagati ánheli Gabüriéli tun María: “Badageinadá, ábame bagaraüdün aban irahü. [...] Ligía sándubei lubéi irahü le lunbei bagaraüdüni, Liráü Bungiu luba laguarún” (Lúkasi 1:31, 35). Ligía mafigoun lubéi meha Hesusu kei Adán dan le ladügǘnbei (Lúkasi 3:38, TNM; 1 Korintuna 15:45) Háfuga buidu lan meha lúgubu Hesusu ani gayaraati genegegua lan tuma María, huríu to meha lúguchuboun.

Gádiumati meha Hesusu kei huríu ha awinwandubaña lidan lidaani ani mítarantiña meha kei Rómana. Adügati meha ídiumaü lun gadüna lan aban gürigia lun inebewa lan, gama lumoun, moun lumuti wuriba lan laríawagun ni weiri lan limigifen. Chóuruti buidu lan meha lásaruni Hesusu lídiuma luma lídiburi ani haruma ligía lakipuruni. Hárügüñanu meha nasaréugu kei Sansón masarún hádiburi (1 Lúrudu 6:5; Alidihatiña 13:5)

Másiñati here lan meha Hesusu ladüga awadigimarida lan kei sarafangei libe-agei dan lídangiñe 33 irumu le labagaridubei ubouagu ani úatu meha tulu lun lawadigimaridun kei to anuheinboun uguñe weyu (Márükosu 6:3). Dan lagumeserunbalin lapurichihan aba labugaguniña sun ha adügübaña bísinisi tidan tibürürün ténpulu hau sun “halügüniña mudún hama bágasu, chagalei haseinsun ha asansihabaña seinsu, garabagualéi hadabulan” (Huan 2:14-17). Mosu meha ábanbei lan wügüri héreti Hesusu lun ladügüni katei lira. Yusu lumuti úgubu le líchugubei Bungiu lun, lun lagunfulirun lau dasi le ichugúbei lun, ariñagati: “Gasu giñe níchuguni uganu le luáguti larúeihan Bungiu houn lílana líbiri fulasu, ladüga lun lira nounahóua” (Lúkasi 4:43). Mégeiwati meha saragu erei lun gayara lan laweiyasuha éibugeina lidan sun Palestina lun líchuguni uganu.

Háfuga adüga lan igaburi buiti le aubei lariñagei Hesusu dimurei le lun buídutima lan amisurahani le ladügübei houn ha nidiheribaña ladüga lihürü hanügün (Matéu 11:28-30). Adügati ligaburi lóuserun luma lubuidun ligaburi lun larihín lagunfulirubei lan  le lariñagubei luagu lemeraaguagüdabaña lan ha busenbaña hafurendeirun. Busentiña meha íbini ha nibureintiña hásügürün dan luma, ladüga ariñagatu Bíbülia aba lan “lanügüniña [irahüñü] larünarugu” (Márükosu 10:13-16).

Lau sun sandí lan Hesusu saragu gáriti dandu lidan lisaminan kei lidan lúgubu lubaragiñe lounwen, mama meha aban gürigia híruti. Kei hénpulu, ídehati Hesusu lun ñein lan ugundani lidan aban maríei Kaná, aba lasaliraguagüdün duna diweinme le buiti (Huan 2:1-11). Lidan amu burí adamuridaguni arufudahati katei le lunbei mabulieidun hamani ha ñéinbaña (Matéu 9:9-13; Huan 12:1-8).

Ligibuagu sun katei, lau lapurichihan Hesusu adügati lun gachansin hamá sun gürigia ha aganbubalin lun hawinwandun lun súnwandan (Huan 11:25, 26; 17:3). Dan habahüdagunbalin 70 hádangiñe lani Hesusu disipulugu lun ida liña lan lidin houn lidan apurichihani aba labuinchun lau ugundani ani aba lariñagun: “Gunda humá luagu anihein lan [h]iri bürüwañu sielu” (Lúkasi 10:20, 21).

Adüga hamuti meha alidihatiña relihión ha lídanbaña lidaani Hesusu sun hayaraati lun hetenirun gürigia houn luma lun hasubudiragüdüni habafu (1 Lúrudu 15:38-40; Matéu 23:5-7). Gama lumoun, ariñagati Hesusu houn lani apostolugu masaminarun hamá hagía lan hábutigu o habureme amu gürigia (Lúkasi 22:25, 26). Ábanrügü leweridiruniña ítara: “Góunigi humatia hawéi arufudahatiña lilurudun Moisesi; hínsiñeti houn lun héibugun tau daüguaü dururutu luma lun labusurúniwa houn ǘmada lau saragu inebesei” (Márükosu 12:38).

Ánheinti Hesusu, óuserati meha kei furumiñeguarügü gürigia, anihein dan ibidiñewati káteiñein lan (Huan 7:10, 11). Marihínwati meha kei le wéirigutimabei hadan 11 lani apostolugu ha úaraguabaña. Ligía, mosu lubéi meha líchugun Húdasi, le agarabaagubei lun, aban chuti luagu lun hasubudiruni gürigia ligía lan Hesusubei (Márükosu 14:44, 45).

Ligíati, íbini ibidiñe lan sun katei woun, furanguti mítaran lan meha Hesusu kei hasaminaruni saragu. Gama lumoun, lubaragiñe werederun asaminara súdinitima lan lasubudirúniwa ídatima liña lan meha Hesusu, mosu wasaminarun ida liña lan larihín guentó.

Murusun dan lárigiñe lariñaguni Hesusu dimurei burí le, aba lounwen ani aba labunún (Huan 14:19). Ru lumuti libagari “lebegime hasalbarun saragu” (Matéu 20:28). Ǘrüwa weyu lárigiñe lounwen aban láguyuguagüdüni Bungiu lau aban úgubu sífiriti ani “aba larufudagun lungua wínwanñu” houn fiú hádangiñe lani disipulugu (1 Féduru 3:18; Adügaü 10:40). Ida liña meha san laríawagun Hesusu dan le larufudagunbei lungua houn lánigu disipulugu? Genegeti aba lan lasansiragun ligaburi laríawagun, ladüga ibidiñeli meha houn besi lumadagu dan harihinbalin. Sun yebe tariñagun María Mágüdalena aba lan óunigiruti fuluri-agei Hesusu, saminatiña giñe disipulugu ha éibugubaña Emaúsun aba lan terenchana ligía (Lúkasi 24:13-18; Huan 20:1, 14, 15).

Ida liña lunti lan laríawagun Hesusu uguñe weyu lidan wasaminan? Ariha lumuti Huan, apostolu le hínsiñewabei, Hesusu lidan aban arufudúni kéiburi lóugiñe 60 irumu lárigiñe lounwen. Marihinti Huan aban wügüri le hilamémeeli lidan gurúa, ariha lumuti “Harúeite sun urúeigu, Habureme sun aburemeigu” le lunbei lagünrinchaguniña láganiñu Bungiu dandu wügüriña kei máfianu, ani lanügüba saragu abiniruni houn sun gürigia lun súnwandan (Arufudúni 19:16; 21:3, 4).