Ligía tariñagubei aban irahü to tareisibei irumu tau dan le ledewehóunbei aban ounli nǘraügili tun. Ariñagatu aban wuri to buídubei lidin tun lidan bísinisi, sansi tani konputadora to ledewehaboun túguchi tun dan le nibureingiru tibagari. Ani saminati aban wügüri le málügili lamarieidun, gárada lan to tadügüboun lani weiriou lun dan le hagunfulirubei aban irumu lúmagiñe hamarieidun, ligía lan idewesei buídutimati le rúaalibei lun.

Sagü irumu díreitiña saragu gürigia dan luma erei lun háluahani idewesei le “buídutimabei” lun aban hamada o haduhe lidan somu dan espechaliti. Ani busentiña hamuga hiibe-agei lun lasandiragun gürigia le eresibirubalin idewesei lungua ítara kei ha uágubaña wayanuha iñu. Hínsiñeti hamuga san hun híchugun o heresibirun aban idewesei ítarati?

Buiti saminaü le, mámarügü ladüga le lasandirubei gürigia le eresibirubalin idewesei, ladüga giñe le gayaraabei lasandiruni le íchugubalin. Ariñagatu Bíbülia: “Fuleseiwatimati le íchugubei sügǘ lau le eresibirubei” (Adügaü 20:35). Ligíati, wéiritimati ugundani le lasandirubei le íchugubalin idewesei dan le larihin gebegi lan lun le eresibirubalin.

Ka gayaraabei wadügün lun gunda wamá dan le wíchugun idewesei lun somu gürigia gunda ligíame gürigia le eresibirubalin? Ani anhein siñá lubéi wíchuguni idewesei le “buídutimabei”, ida luba wachoururuni gúndaabei lan gürigia ligía lau idewesei le wíchugubei lun?