Gúndaati Dan tuma Margaret * ladüga tachülürün hasaani hama tiduheñu ebeluha hamoun. Aban würi to subudiboun saragu luagu ábouguni Margaret ani mawadigimaridunharu meha, busentu meha tábougun macarrones lau furumasu, aban éigini merigana le hínsiñebei houn bián tibañan, lun heigin úara lagumuhóun wéiyaasu.

Aba tanügüni Margaret éigini lamidanguoun dábula le ñein lubéi hañuura súngubei. Dan tadaarubalin lidáü sóudieru aba háwagachun súngubei. Furumasurügüñein ñein! Aba tabulieiduni Margaret tíchuguni aganagu le súdinitimabei ñeinhin: macarrones.

Meberesenga átiri lan irumu wau o átiriñein lan wasubudin, sun wagía charatiwa. Ayanuhatiwa masaminarunga, adügatiwa katei dan le moun lumuti lan wadügüni, dan le meberesegun wamá o wabulieidagun luagu somu katei. Ka uagu lasusereda katei le? Gayaraati san masuseredun lan? Líderagubadiwa warihini charati keisi lubudubu lun wóunabuni álügüdahani burí le.

Dan le wadügüni katei buidu, ánhatiwa lau ugundani lun lariñawagún woun buidu lan wadüga. Gama lumoun, dan le wachararun mabusenrunga, íbini marihin hamani ha híbiri, ánhatiwa san lun wachara? Mégeitiwa ǘnabuguni lun wadügüni.

Anhein barügua wabéi woungua, másiñati busenbadiwa lan wañǘraüdagüdüni wachara, wariñagun mama lan wachara o wariñagun lichara lan amu. Ánhawa óusera ítara wuribabei lagumuchun katei, maranserunbei katei ani gayaraabei hamuga herederun amu gürigia lau duru. Íbini ánhawa esefura luéi le lanügübei wachararun guentó, haritagua waméi le lunbei lasuseredun lárigiñe: “Kada lubeiti aban wádangiñe, laguseruba luougua luma Bungiu” (Rómana 14:12).

Ariha lumuti Bungiu charati kei lubeibei. Lidan Sálumu ariñagati “areidati” lan ani “gudemehabu” lan. Ariñagati giñe madeinhan lan “woun sagü dan, madurati giñe ligañi lun súnwandan”. Subudi lumuti gafigoun wamá ani subudi lumuti giñe le gayaraabei ladügün lun wachararun, subudi lumuti “buidu luagu múa lan wabuñabei” (Sálumu 103:8, 9, 14).

Kei aban úguchili le areidabei, busenti Bungiu lun warihini, wagía ha lisaanigu, wachara kei larihini (Sálumu 130:3). Ruti saragu adundehani woun tídangiñe Lererun lau ínsiñeni lun waransehani wachara ani awanda wameime hachara amu.

Añahein gürigia dan le hachararun aba burí hayusurun saragu seinsu luma erei lun híchuguni duru hawagun amu luagu le hariñagubei o le hadügübei. Lubaragiñe hadügüni lira, danme hariñagun somu katei le gáriti lun aban gürigia, amuriaha humá ferudun luma ani aranseha huméi turobuli, madüraagua láamuga humadagua luma gürigia ligía. O lubaragiñe hasafaragun o híchuguni  duru luagu amu gürigia dan le hadügün somu katei le anügübei wuribati hun o houn amu, áfaaguarügü humá haransehani katei. Ladügüba herederun ariñaga luagu madurun humá lun laweiridun turóbuli luma lun hadiheridun luagu saragu dan. Buídubei lun hafurendeirun lídangiñe le hásügürübei, haransehani le mégeiwabei ani bulíei humeime le asuseredubei.

Ménrengunti wasafaragun dan le lachararun somu gürigia. Ligía buídutima lubéi wafalaruni adundehani le líchugubei Hesusu dan lariñagunbei: “Súnwandanla lubeiti hadügün houn amu kei le habusenrubei lun hadügün hun” (Matéu 7:12). Danme wachararun, íbini maweirin lan, ru wamá seremei houn híbiri ladüga haguraasun o ladüga merederun hamá aritagua luagun wachara. Ligíati, ka uagu máfaagun wabéi wóuseruniña amu ítara kei hóuserun wama? (Éfesuna 4:32).

Según aban dimurei-agei, charatiwa ladüga, wachararun lidan wasaminan, ladüga wibihin ariñahani le mabuidunti o ladüga meberesenhabu wamá. Lunti waritaguni susere lan katei le houn súngubei lidan furumiñeguarügü dan. Gama lumoun, manarimebei wachararun anhein wafalara saragu adundehani méiniti le tídanbei Bíbülia.

Aban lídangiñe adundehani méiniti le darí wamuti lidan Ariñawagúni 18:13: “Libidiounigan aau ani nibusigarídünati giñe hóunabun gürigia lubaragiñe haganbun”. Ladügüba wararamagun asaminara luagu le waganbubei lubá wóunabun, lun mariñagun wamá somu katei le lunbei ladügün lun lasandiragun aban gürigia lougua wuriba o lun wuriba lan wóunabun. Súdinibei ariñahani le lunbei waganbuni lun manarime la wachararun ladüga le waganbubei.

Ariñagati ábaya adundehani: “Adüga huméi sun le huáraati lun habagaridun lidan darangilaü hama súngubei” (Rómana 12:18). Áfaagua humá lun hídehan lun ñein lan darangilaü luma úaraguni. Danme hawadigimaridun hama amu, óusera humaña lau inebesei ani manarimelá hadeinhan houn. Ariñaga humá houn buiti lan hadüga ani ru humá giñe gurasu houn. Dan le ítara lan katei ídehati lira lun ménrengun lan feruduna wamaniña amu, lun merederun wamá aritaguei le asuseredubei ani lun madügün wamá katei masaminarunga. Ítara, gayaraabei laranseragun íbini charati wéiriti lau gamadóuni.

Yusu huméi hichara lun hafurendeirun katei buiti lídangiñe. Meredera humá áluaha kaba lan hariñaga luagu ka lan uagu hadügei o hariñaga somu katei, ariha huméi kei aban chansi lun habuiduragüdüni higaburi. Másiñati mégeibadün lan gaguraasuni, lubuidun igaburi luma ragüguaü unguaü, lun gaguraasuntima humá o lun hídehan lun ñein lan darangilaü luma ínsiñeni (Galasiana 5:22, 23). Hafurendeirubei le lunbei madügün humani dánmeya hagagibudagun luma aban katei ítarati. Masandiragua humá hungua wuriba luagu hichara, gama lumoun, moun lumuti giñe hóuserun lau meberesenhabuni. Anhein mabuidun lubéi katei, lídehaba héherahan murusun lun labuidurun.

Anhein wariha charati kei lubeibei, wóunabuba buidu danme lasuseredun. Darangilu baadiwa ani buídubei wanaagun woungua hama amu. Wóuseruba lau lichú aau ani buídubei wagaburi ánhawa áfaagua lun wafurendeirun lídangiñe wachara. Mírudagunbadiwa ani masaminarun wagíame wagía lan achararubei súnwandan. Líderagubadiwa gunfuranda wamá háfaaguña lan giñe amu lau hachara guánarügü lun wayarafadun houn. Le buídutimabei wafurendeiruba lan áyeihei línsiñehabu Bungiu luma aranseñu lan lun feruduna lan (Kolosana 3:13).

Ida liña lagumuchun charati le tadügübei Margaret, to uáguboun wayanuha lidan lagumeseha arütíkulu? Gadei tumuti san sun katei weyu ligía? Úa. Ábanrügü héherahan súngubei, tuguyatima, gúndaatiña súngubei lau éigini íbini ua lan macarrones lidan. Saragu irumu lárigiñe, haritagua hamagili tibañan sügǘ lira, ani abahüdagua hamuti houn hasaanigu. Haritagua hamuti dan buiti le hásügürübei hama hárugutinu. Ladüga ábanrügüñein meha charati lira.