“Sun buiti le ichugúbei woun, le úabei mégeiti luagu siélugiñe liabin, lúmagiñe Bungiu le adügübalin burí lilanpuna sielu” (Santiagu 1:17). Ayanuhati sügǘ le luagu líchigadi Heowá le Wabungiute, Wáguchi le siélubei. Lídangiñe saragu idewesei le ru laalibei woun anihein aban le wéiritimabei luéi súngubei. Katei san? Lidan Huan 3:16 darí wamuti dimurei le lariñagubei Hesusu ani le subudi wamaalibei, ariñagati: “Ladüga wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi”.

Úati amu idewesei buídutimati le gayaraabei weresibiruni lidan sun wabagari kei líchuguni Bungiu libagari Liráü le ábanrügüti wawagu. Seremei lun Bungiu, gayaraabei wesefurun luéi figóu le agüragubaliwa, aweiyaduni luma óunweni (Sálumu 51:5; Huan 8:34). Íbini hamuga wáfaagun saragu lun wagidaruni katei burí le agüragubaliwa, siñabei hamuga wadügüni lau were guánarügü. Gama lumoun, wéiriti wínsiñe lun Bungiu darí lun aba lan laransehani sun katei le mégeiwabei lun lesefuruniwa. Ruti Heowá chansi houn sun gürigia ha gaganbadibaña, lun gayara lan hawinwandun lun súnwandan, lau líchuguni libagari Liráü Hesukrístu le ábanrügüti kei lebegi esefuruni. Gama lumoun, katei san lebegi esefuruni? Ka uagu mégeiwa lubéi? Ani ida luba wasagarun buiti lídangiñe?

Lebegi esefuruni ligía katei le afayeirúbei lun lagiribudagüdüniwa o lesefurúniwa aban gürigia le daüwañubei. Afuranguagüdatu Bíbülia adüga lumutiña lan Bungiu furumiñetiña wagübürigu, Adán tuma Ewa, mafigounga ani busenti meha lun hawinwandun lun súnwandan hama hadügawagun lidan aban paraísu (Agumesehani 1:26-28). Híruti aba lan heferidiruni sun katei dan le desidírü habéi maganbadi hamá lun Bungiu ani aba gafigounhaña lan. Ka lanügübei le desidírü habéi? Óunabatu Bíbülia: “Ítara kei lídangiñe lan meha aban wügüri lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (Rómana 5:12). Lubaragiñe galagante hamá ladügawagun Adán aban ibagari mafigounga, resibirügü hamuti figóu le anügübei óunweni.

Lun lafayeirún lebegi asalbaruni mosu meha lafayeirún lebegi le eferidirubei. Afigouhati Adán ladüga maganbadi lan lun lisuuni Bungiu ani adügati lira lun leferidiruni libagari le mafigounbei. Kei tariñaguni Bíbülia, adügati lira lun herederun ladügawagun Adán kei lidamun figóu luma óunweni. Lun libihíniwa esefuruni mosu meha lafayeirún lau aban ibagari mafigounti: libagari Hesusu (Rómana 5:19; Éfesuna 1:7). Lun hamuga mafayeirun lani Bungiu lebegi asalbaruni lau ínsiñeni, machansinbaña yebe sun gürigia lun hawinwanduni le heferidirubei Adán tuma Ewa: aban ibagari magumuchaditi lidan paraísu (Arufudúni 21:3-5).

Arihúati lidan sun katei buiti le lanügübei lebegi esefuruni, kéiburi ibagari magumuchaditi, luagu ligía lan “idewesei le buídutimabei”. Lun gunfurandawa lan buidu ka lan uagu buídutima lubéi idewesei le luéi furumiñeguarügü idewesei, ariha waméi ida liña lan lagunfulirun idewesei le buidu buidu lau katei le adügübei lun buidu lan aban idewesei, kei wakutihani lidan arütíkulu le ásügürübei.

 Ru lumuti le wabusenrubei woun. Ayumahatiwa wawinwandun lun súnwandan (Apurichihati 3:11). Siñati wagunfuliruni ayumahani le lau wabafu guánarügü, gama lumoun, adügati lebegi esefuruni lun gayara lan. Ariñagatu Bíbülia: “Lugundun óunweni lafayeihabei figóu; ánheinti edewehani le líchugubei Bungiu woun, ibagari le magumuchaditi lidan Wabureme Hesukrístu” (Rómana 6:23)

Ru lumuti le wemegeirubei woun. Siñabei yebe lafayeiruni aban gürigia lebegi esefuruni. Ariñagatu Bíbülia wéiriti lan meha liñun lafayeirún lebegi esefuruni darí lun siñabei lan meha wafayeiruni (Sálumu 49:8). Megei wamuti meha lídehan Bungiu lau lóufudagun lun lesefuruniwa luéi figóu luma óunweni. Ani ru lumuti Bungiu le mégeiwabei lun lesefuruniwa lau lederegeruni Kristu libagari wawagu (Rómana 3:23, 24).

Lidan dan le buídutimabei. Ariñagatu Bíbülia óunaha lumuti lan Bungiu “Hesukrístu lun lounwen wawagu, lau sun meha gafigoungidiwa lan” (Rómana 5:8). Fayei lumuti Bungiu lebegi esefuruni “lau sun meha gafigoungidiwa lan”, chóurugüda lumuti lira woun weiri lan wínsiñe lun lau sun gafigoun wamá. Íbini mósugili lan wawanduni katei le lanügübei figóu, adügati lebegi esefuruni lun wasandirun ugundani luagu le lunbei liabin.

Arufuda lumuti lugudemehabu luma líchigadi. Ka adügübei lun busén lan Bungiu líchuguni libagari Liráü kei lebegi esefuruni? Ariñagatu Bíbülia: “Arufuda lumuti Bungiu wínsiñe lun lau lóunahani Liráü le ábanrügüti ubouagun gabagari wamaamuga lídangiñe. Anihán ínsiñenibei: Mama luagu wagía lan hínsiñehabubei lun Bungiu, luagu ligía lan hínsiñehabubei woun” (1 Huan 4:9, 10).

Kaba hadüga lun harufuduni gebegi lan lubuidun idewesei le hun? Haritagua huméi ariñaga lan Hesusu lidan Huan 3:16 “sun lan ha afiñerutiña luagu” hesefuruba lan. Ariñagatu Bíbülia afiñeni lan “achoururuni le gumuti luagu wabihibei lan le wagurabubei” (Ebüréu 11:1). Lun hibihini achoururuni ligía mosu haganwoundagüdüni hisubudin luagu Bungiu. Ligíati, ínchaha wamutün lun hadireirun dan lun hasubudiruni Bungiu le Adügübalin “lubuidun idewesei” le ani lun hasubudiruni kaba lan hadüga lun hagundaarun lau ibagari magumuchaditi le lunbei wibihini seremei sákürifisiu le ladügübei Hesusu.

Lun gayara lan haganwoundagüdüni hisubudin akutiha huméi ariñahani tídangiñeti Bíbülia le lídanbei wani páhina lidan Internet www.pr418.com/cab. Gúndaabadiwa, wagía gefentiña luagu Heowá, lun wíderagunün. Chouru wamuti danme lan haganwoundagüdüni hisubudin luagu idewesei le, ariha humeime ka lan buiti lanügübei hun, busenbadün lan hariñagun: “Teinki niña lun Bungiu!” (Rómana 7:25).