MA LUBUIDUN EMENIGINI LE! Füramase haali Bungiu le Adügübaliwa woun wawinwanduba lan lun súnwandan ya ubouagu. Íbini ítara, güreweiti houn saragu gürigia lun hafiñeruni. Saminatiña lachülürüba lan dan lun wóunwegun súngubei ani lun lan lira wadügǘwa. Añahein amu, saminatiña lárigiñerügüñein lan lounwen gürigia ñüdün ligía sielun gayara lan lawinwandun lun súnwandan. Agia huguya, ka hisaminanbei?

Lubaragiñe hóunabun, agunbiraha wamutün lun hakutihani óunabagülei le tíchugubei Lererun Bungiu lun álügüdahani burí le: Átiriñein san dan gayara lan wawinwandun según ligaburi wadügǘniwa? Ka un ladügei Bungiu Ubóu hama gürigia? Ka uagu wóunwegua?

Dan le wíchaagun woungua hóubagiñe amu gabagaritiña ha adüga láañabaña Bungiu ubouagu, aba wíchugun fe amu lan ladügüniwa hawéi. Ida? Ariñagatu Bíbülia lenege guánarügü lan Bungiu ladügawa (Agumesehani 1:26, 27). Ka mini lubéi le? Lau lan iarani lun wáyeihani ligaburi Bungiu ladügawa, kéiburi línsiñehabu luma lóuserun lau irichaü.

Adüga lumutiwa giñe Bungiu lau iarani lun wasaminarun, wasubudiruni le buídubei lumoun le wuribabei luma lun busén wamá wayarafadun lun, adüga wagíame umadaguaü luma. Ligía gayara lubéi taweiridun wanigi tau burí saragu waruguma luma amu burí katei le warihibei sielu, lau lubuidun burí katei le geyegubei wau, hínsiñe ligía katei kéiburi músika luma poema woun. Ani létima adügübei lun amu wamá hawéi ha híbiri gabagaritiña ubouagu: gayara lan wáhuduragun lun Bungiu le adügübaliwa.

Samina huméi le: lun hamuga busén lan Bungiu lun luágurügü lan fiu irumu wabagarida, ka hamugati uagu ladügawa lau lubuidun burí iarani le, adüga lawa lau ubafu lun wasigirun ayusurei gumugua dan? Le linarün katei, lau ladügüniwa Bungiu ítara, larufuduñein woun luagu busén lan lun wasigirun awinwanda lun súnwandan ubouagu.

Añahein saminatiña mabusenrungubeiñein lan Bungiu lun hawinwandun gürigia lun súnwandan ubouagu. Ariñagatiña aban lan fulasu ubóu lun larihíniwa ka lan gadünabei lun lawinwandun luma Bungiu sielu lun súnwandan. Lun hamuga inarüni lan lira, ma lidurun hamuga Bungiu sun wuribani le yaabei ubouagu? Múaranti hamuga lira luma ligaburi Bungiu. Ayanuhatu Bíbülia luagu ítara: “Richaguati sun le ladügübei ligía Búngiubei lánina inarüni, úati marichaü lidan, richaguati ani inarüniti” (2 Lúrudu 32:4).

 Ariñaga tumuti Bíbülia furangu ka lan un ladügei Bungiu Ubóu: “Lani Aburemei sielu, ánheinti houn gürigia ru lumuti múa” (Sálumu 115:16). Ítara liña, adüga lumuti Bungiu lubuidun ubóu le lun hawinwandun gürigia lidan lun súnwandan, ani aranseha lumuti lau sun le mégeiwabei lun buidu lan wabagari, gunda ligíame (Agumesehani 2:8, 9).

“Lani Aburemei sielu, ánheinti houn gürigia ru lumuti múa” (Sálumu 115:16).

Ariñaga lumuti giñe Bungiu tidan Lererun ka lan lisuunibei houn gürigia. Ru lumuti wadagimanu le houn furumiñetiña wagübürigu: “Buíngüda huméi ubóu hau hirahüñü ani gumadi huméi, gumadi humañame [...] sun animaalugu” (Agumesehani 1:28). Chóuruti aban lan meha lubuidun chansi líchugubei Bungiu houn lau lígiruniña lun hóunigiruni Ubóu, adüga hameime ábanme paraísu. Gayaraabei meha lawinwandun Adán tuma Ewa hau sun hadügawagun lun súnwandan ya ubouagu, mama sielu.

Afuranguagüdatu Lererun Bungiu aban lan lagarabaagun aban ánheli luagun Bungiu, lau lásügürün dan, wáwati lun ánheli ligía Satanási le Mafia, ani áfaaguati lun lagadeiruni le meha labusenrubei Bungiu lun Ubóu lúmagiñe furumiñeti dan. Ida liña ladügüni?

Ibihati Mafia lun hóundarun furumiñetiña wagübürigu, Adán tuma Ewa, lumoun lidan lebedaagun lun Bungiu. Ariñagati houn laramuduña lan meha Bungiu aban katei buiti hawéi: hanúadiruni houngua ka lan buídubei lumoun le wuribabei. Ábati lárügüdün Adán tuma Ewa luéigiñe lóubadina Mafia ani aba híchuguni hanagan luagun Bungiu. Ka lanügübei lira houn? Lau lásügürün dan, aba hóunwegun kei aubei lariñagei Bungiu houn. Féridi hamuti chansi lun hawinwandun lun súnwandan lidan aban paraísu ubouagu (Agumesehani 2:17; 3:1-6; 5:5).

Lidan sun dan le sügühalibei, hasufuriruñein gürigia le lanügübei lebedaagun Adán tuma Ewa. Ariñagatu Lererun Bungiu: “Ítara kei lídangiñe lan meha aban wügüri [Adán] lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (Rómana 5:12). Hilatiwa lubeiti ladüga galagante wamani figóu luma óunweni, mama ladüga lareidahaña lan buga Bungiu somu “saminaü” wabá le úati gunfuranda wamani.

Madügünti ebedaaguni le asuseredubei Edén lun lasansirun lisuuni Bungiu lun Ubóu luma houn gürigia. Kei ua lubéi charati lidan línsiñehabu luma liricha Bungiu, ligía ínchahabalin lun ladügüni sun le mégeiwabei lun lesefuruniwa luéi lamudihan figóu luma óunweni. Afuranguagüdati apostolu Pábulu: “Óunweni lafayeihabei figóu; ánheinti edewehani le líchugubei Bungiu woun, ibagari le magumuchaditi lidan Wabureme Hesukrístu” (Rómana 6:23). Ínchaha lumuti ínsiñeni le lasandirubei Bungiu wawagu lun lóunahani Hesukrístu, “Liráü le ábanrügüti, lun lounwen luagu hafigoun [gürigia], lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16). Lau lánharun Hesusu lun líchuguni libagari wawagu, fayei lumuti lebegi esefuruni le meha mégeiwabei lunya libihíniwa sun le leferidirubei Adán. a

Málühali füramasei luáguti ábanbei lan paraísu Ubóu agunfulira. Lun gayara lan harihini lagunfulirun lubuidun füramasei le, mosu hafalaruni adundehani le líchugubei Hesusu dan le lariñagunbei: “Belú humá lídangiñe bena le bürüraübei. Ladüga bena luma üma le anügübei gürigia lidoun féridiguaü, tulé buriti, gabaranouga ligía ñein; ani saragu haña ebelurutiña lídangiñe. Ánheinti bena luma üma le anügübei gürigia lidoun ibagari le magumuchaditi, bürüraü liña, murugua, míbetiñati adariruti” (Matéu 7:13, 14). Kei aubei harihei, húhaburuguñein le gayaraabei lasuseredun hun ámuñegü. Kaba san hanúadira?