LE SAN LÚGUBU GAYARA LAN HANÚADIRUNI LE LUNBEI LASUSEREDUN HUN ÁMUÑEGÜ? Añahein gürigia saminatiña hasinun lan gamaniharibei lau habagari, añaheinti amu, saminatiña Bungiu lan gamaniharibei lau. Ligía dan lubéi mibihin hamani le uágubei háfaagua, ábagubei hederaaguagüdün houngua lidan gádantiña ladüga samina hamá bürüwaali lan sun le lunbei lasuseredun houn.

Aba burí hahirudagun gürigia dan le harihin máraninaali lan marichaü luma wuribani le ubouagubei. Másiñati áfaagua hamá lun hanügün aban ibagari buiti, íbini ítara, liibe-agei dan, aba burí lerederun áfaaguni le hadügübei lidan ni kata ladüga somu wuribu, héiguadun háhaburugun wuribatiña, sandi, hárabaganali, herigini o katei líbeina lira. Aba buriti hariñagun hóunguarügü: “Kagia un hu lan náfaagun?”.

Inarüni gayara lan ladügün katei burí le asuseredubei geyegu wau lun wasansiruni le yebe wasaminarubei wadügün (Apurichihati 9:11, TNM). Íbini ítara, gayaraati wanúadiruni émeri le lunbei lanügüniwa lidoun ibagari le magumuchaditi. Arufudahatu Lererun Bungiu woun gayara lan wanúadiruni le lunbei lasuseredun woun ámuñegü. Ka uagu wariñagei lira?

Dan meha le yarafaali dan lun hebelurun ísüraelina lidoun Fulasu Füramasewati, aba lariñagun Bungiu houn lau lídehan Moisesi: “Ru naadün lun hanúadahan lídangiñe ibagari luma óunweni, lídangiñe abiniruni luma íñarawaguni. Anúadira huméi lubeiti ibagari, gabagari humaamuga hau sun hadügawagun, lau línsiñedun Heowá le Habungiute hun, haganbuni lumalali, gúnfuli huguyame luma” (2 Lúrudu 30:15, 19, 20, TNM).

Lau lesefuruniña Bungiu ísüraelina lídangiñe hamudirawagun Ehiptu, ruti chansi houn lun gayara lan hanúadiruni le habusenrubei hadügün lun hawinwandun gúndaañu lidan Fulasu Füramasewati. Gama lumoun, meresibirun habéi meha abiniruni ligía ítaraguarügü. Mosu meha hadügün aban katei: hanúadiruni ibagari. Ida? Lau línsiñedun Bungiu houn, haganbuni lumalali, gúnfuli hagíame luma.

Mosu giñe hanúadahan aban katei ítarati ani ligíaba arufudei kaba lan asusereda hun ámuñegü. Ánhadün anúadira lun línsiñedun Bungiu hun, haganbuni lumalali luma hagunfulirun luma, hanúadirubei ibagari, aban ibagari le magumuchaditi lidan aban paraísu ubouagu. Kati lunbei hadügüni lun hagunfulirun lau kada aban lídangiñe katei le?

Ínsiñeni ligaburibei Bungiu le wéirigutimabei. Ligía adügübei lun labürüdüni apostolu Huan dimurei burí le: “Ínsiñeni Bungiu” (1 Huan 4:8). Subudi lumuti meha Hesusu lira, ligía dan le lubéi lálügüdünwabei luagu ka lan gumadi wéirigutimabei, aba lóunabun: “Hínsiñela Babureme le Bubungiute bun tau sun banigi, tau sun buani luma lau sun bisaminan” (Matéu 22:37). Mama wanufude luéi Bungiu o gaganbadi wamá masaminarunga ínchahabaliwa lun wadügün aban buiti umadaguaü luma, adüga wamuti ladüga línsiñe woun. Ka uagu lunti lubéi línsiñedun Bungiu woun?

Ítara liña ínsiñeni le lasandirubei Heowá hawagu gürigia kei ínsiñeni le hasandirubei agübürigu hawagu hasaanigu. Lau sun gafigoun hamá agübürigu, áfaaguatiña lun híderaguniña hasaanigu, harufudahan  houn, híchugun gurasu houn ani ererehatiña giñe houn lau ínsiñeni ladüga busén hamá lun buidu lan lidin houn lidan habagari ani gunda hagíame. Kati hagurabubei agübürigu? Agurabatiña lun hasandirun hasaanigu ínsiñeni hawagu, gaganbadi hamá houn ani gunfuranda hameime háluahaña lan hagübürigu buiti houn. Ma yuuti giñe lun wasaminarun lagurabuba lan Wáguchi macharati le siélubei lun wasandirun ínsiñeni luagu ani teinki wameime luagu sun le adüga láalibei wawagu?

Dan le layusurún dimurei aganba lidan iñeñein le ídanbei tabürüdǘwa Bíbülia furumiñe, liibe-agei dan, layanuhóuña luagu “gaganbadi”. Ani, ma ligía lagurabubei aban úguchili lun ladügüni lisaani dan le lariñagun lun: “Aganbabána”? Ligíati, lun waganbuni Bungiu, mosu wasubudiruni ka lan lagurabubei wámagiñe ani adüga wameime. Keiti mayanuhan lubéi Bungiu wama uguñe weyu, lun waganbuni, mosu waliihanu Bíbülia, to Lererun, adüga wameime le tariñagubei lidan wabagari (1 Huan 5:3).

Lun larufuduni Hesusu súdini lan laganbúniwa lumalali Bungiu, ariñagati: “Mámarügübei tau fein habagarida gürigia; habagariduba giñe lau sun dimurei le lariñagubei Bungiu” (Matéu 4:4). Íbini súdini lan weigin, súdinitimati wabuinchagüdüni wasaminan lau subudi le lúmagiñeti Bungiu. Ka uagu? Afuranguagüdati urúei Salomón: “Lugundun óunigihati lichú aau kéigubeirügü seinsu, gama lumoun buítimati lichú aau ladüga ruti ibagari lun chu tau” (Apurichihati 7:12). Gayaraati lanügüniwa lichú aau luma subudi le lúmagiñeti Bungiu lidoun émeri le buídutimabei: le anügübei lidoun ibagari magumuchaditi.

Lidan arütíkulu le ásügürübei, ayanuhatiwa luagu le lariñagubei Hesusu, águyuguagüda wamá murusun lídangiñe: “Ánheinti bena luma üma le anügübei gürigia lidoun ibagari le magumuchaditi, bürüraü liña, murugua, míbetiñati adariruti” (Matéu 7:13, 14). Lun woudin lídangiñe émeri le, hínsiñebei hamuga woun lun ñein lan aban gürigia wama le subudihabúti lun üma lun ladundehaniwa darime wachülürün lidoun ibagari magumuchaditi. Ligía mosu lubéi yarafañu wamá lun Bungiu (Sálumu 16:8). Ida lubati wadügüni?

Sagü weyu, anihein saragu katei le lunti wadügüni ani anihein saragu amu le wabusenrubei wadügün. Wéiriti waberesegun darí lun madaani wamá lun wasaminarun luagu le labusenrubei Bungiu lun wadügüni. Ligía aba lubéi laritaguagüdüniwa tidan Lererun: “Góunigi humá lubeiti buidu ida liña lan hóuserun. Mabagarida humá kei ibidiougua tau, habagarida kei chu tau. Yusu huméi hidaani lidan katei buiti, lugundun wuribaali dan” (Éfesuna 5:15, 16). Wíchuguni wamadagua luma Bungiu lidan furumiñeti lúgaaru mini lubéi wagunfulirun luma (Matéu 6:33).

Íbini siñá lan hadügün ni kata lun hasansiruni le sügühalibei lidan hibagari, gayaraati hadügün aban katei huougua luma hawagu hiduheñu lun buidu lan lidin hun lidan hibagari ámuñegü. Arufudahatu Lererun Bungiu hínsiñe wamá lun Heowá, Wáguchi le siélubei, ariñagatéi woun ka lan lagurabubei wámagiñe. Teni humá lun le lariñagubei profeta Mikeasi:

“Arufuda laali Bungiu le buídubei bun, luma ka lan lamuriahabei búmagiñe: Lun badügün irichaü, lun gudemehabu ban luma lun manaagun ban bungua ligibugiñe Bungiu” (Mikeasi 6:8).

Agia huguya? Hánharuba san lun agunbirahani le ladügübei Heowá? Anhein hadüga, heresibirubei abiniruni magumuchaditi le aranse láalibei Bungiu habá lumadagu. Huguya lun hanúadirun!