Ayanuhaadiwa luagu fádiri délüfosuna le eyeedubalin Küresu, adüga ítara lun lidin awuribuha luma lurúeite Pérüsia le agumuchubei lau. Ánheinti tidan Bíbülia, daritiwa aban profesía luáguti lurúeite Pérüsia le agunfulirubei kei aubei labürüdǘwa. Adügati lira lun taweiridun wanigi.

Kéiburi bián-san irumu lubaragiñe —saragu dan lubaragiñe nasirua lan urúei le—, írida lumuti profeta ebüréu Isaíasi liri Siru ani bürǘ lumuti ida luba lan lábürügüdüni uburugu gabafuti Babilónia.

Isaíasi 44:24, 27, 28. “Lariñahare Bungiu, [...] gayaraati níchugun lúrudu lun lamabeidun barana luma lun lerederun duna éibaaguati mábeiñu. Ariñagatina lun Siru: ‘Buguya nánibei hóuniri mudún, badügübei sun le nabusenrun’; ariñaga au lun Herusalén: ‘Bararamagüdüwayaba’, ariñaga au tun ténpulu: ‘Lichugúba buagaburi’”.

Ariñagati aban abahüdaguti güriegu gíriti Erodótu aba lan hegeyeduni lisudaranigu Siru lémeri duna Éufüratesi, le meha ásügürübei lamidanguagiñe Babilónia. Adügati lira lun gayara lan hebelurun lisudaranigu Siru éibugeina lídangiñe lémeri duna. Lárigiñe lábürühan Babilónia, aba lígiragüdüniña Siru huríu ha meha dáüwañubaña ñein ani aba lígirun lun hagiribudun Herusaléun lunya hábunaguni uburugu le meha agünrinchawagúbei ǘrüwa-wein-diisi irumu lubaragiñe.

Isaíasi 45:1. “Anúadira lumuti Bungiu Siru keisi urúei, barǘ lumuti luéigiñe lúhabu lun lagumadiruniña néchanigu luma lun lagünrinchaguniña urúeigu. Adügati Bungiu lun lánhunrenchun lubenari burí uburugu ligibugiñe Siru, úouga kaba lan adourei luéi”.

Kei aba lubéi habulieidagun babilóniana ígirei óunwenbu burí lubenari uburugu hunren, aba hebelurun pérüsiana ñeinhin. Lun hamuga meha subudi hamani Babilóniana le lasaminarubei Siru ladügün, darú hamuti hamuga sun bena le luágunbei duna. Kei madügün habalin, ménrengunhali meha hebelurun áganiñu.

Anihein amu burí profesía tidan Bíbülia le agunfulirubei kei aubei labürüdǘwa. a Liibe-agei dan, lidan hiri búngiugu mama inarünitiña hariñagei garíaahatiña uganu le híchugubei libügürü le lunbei lasuseredun, ánheinti profesía le tídanbei Bíbülia lúmagiñeti Bungiu le ariñagubei luougua: “Ariñaga numuti le lunbei lasuseredun lúmagiñe furumiñeti dan; ariñaga numuti le anitebei saragu dan lubaragiñe” (Isaíasi 46:10).

Heowarügüñein, Bungiu le ábanrügüti ani inarüniti, gayara lariñaguni lira. Kei “Le lan Adügübei lun Lasuseredun” mini lubéi liri, arufudati lira gabafu lan lun lariñaguni kaba lan asusereda ámuñegü luma lun  ladügün lun lagunfulirun le labuserunbei. Adügati katei le lun wachoururuni gabafu lan Bungiu lun lagunfulirun lau sun le füramase lubéi.

Hínsiñeti hamuga hun hasubudiruni le tariñagubei Bíbülia luagu dan le ídanbei wawinwanda? Kéiburi bián-milu irumu guentó lúmagiñe tariñagun Lererun Bungiu ñeinbei lan weyu hénrenguti lidan “lagumuhóun dan”. Kati uagu layanuhóua lau dimurei “lagumuhóun dan”? Mama layanuhóuña luagu lagumuhóun dan le erederubei lun Ubóu o houn ha awinwandubaña lidan, layanuhaña luagu málühali lan dan lun úaali lanme sigenei hadan gürigia, amudirawaguni luma asufuriruni le winwan hamaalibei luagu saragu milu irumu. Akutiha wamá fiu profesía le ayanuhabei luagu “lagumuhóun dan”.

2 Timotéu 3:1-5. “Lídounme lagumuhóun dan [...] hóunguarügübei burí gürigia habusenra buiti, hínsiñebei seinsu houn, panta hagíame, barüguabaña houngua. Hadimurehaba wuriba luagu Bungiu, maganbunhabaña hagübürigu, meteingiradibaña, minebenme katei lánina Bungiu houn. Mínsiñehabubaña, magudemehabu, marasualugubaña, siñabei hárügüdagun houngua, hanarimebaña, láganibaña sun le buídubei. Halugurubaña hamadagu, hadügüba burí katei mabuidunti meberesenga hagía kaba lan asusereda lárigiñe, hanarimebei hanaagun houngua, háluahabei hagundan guánarügü lubaragiñe hamuga háluahani Bungiu. Hafamuruba kamá gúnfulitiña luma Bungiu gama lumoun larihúba luagu iyeeni lan lau ligaburi habagaridun”.

Ariha humaali san ítaratimahali lan hóuserun gürigia eibu lásügürün dan? Ma arihatün geyegu waña lan hau gürigia ha barüguatiña houngua, ha hóunguarügüñein habusenra buiti ani hínsiñe ligía seinsu houn? Ma arihatün giñe lau lan héregu gürigia hamuriahei katei ani mígirun hamá lun lásügürün ni kata ítaraguarügü? Másiñati giñe ariha humaali lan maganbadi hamá saragu isaanigu houn hagübürigu ani himei hamani gürigia háluahani hagundan guánarügü lubaragiñe hamuga háluahani Bungiu. Wuribatimarügüti katei lau lásügürün dan.

Matéu 24:6, 7. “Haganbuba lamuri wuribu yarafa hun luma uganu luáguti burí wuribu dise huéi. [...] Lageindaguba aban ageiraü luma aban, lawuribuhaba aban fulasu luma aban”.

Según aban ariñahani, lúmagiñe irumu 1914 hilatiña hóugiñe 100 míñunu gürigia lidan burí wuribu o lidan burí hálugun haransehan turobuli tau áruma ani íñutimaati hanumerun hilaaña sügǘ lau hanumerun lílana saragu ageiraü. Samina humá luagu sun águiraü, igarigu luma asufuriruni le lanügübei sun óunweni lira. Seriwihali san le lun masigirun hamá gürigia ageindagua hámagua?

Matéu 24:7. “Ñeinbei ilamaü”.

Fuati aban ariñahani lídangiñeti Aransehani le Adügǘbei lidan sun Ubóu lun larihin lau Éigini, le ariñagubei: “Alubahóuati éigini le mégeiwabei lun heigin sun gürigia ha awinwandubaña ubouagu, íbini ítara, arumugatiña 815 míñunu gürigia —1 hádangiñe kada 9— lau halama. Ani gíbetimatiña gürigia láutiña magülegu —1 hádangiñe kada 3—”. Saminawati hilá hamá hóugiñe ǘrüwa míñunu irahüñü sagü irumu ladüga ilamaü.

Lúkasi 21:11. “Ñeinbei óunwenbu burí hárabaganali”.

Sagü irumu, susereti kéiburi 50,000 hárabaganali le wéiriti lere darí lun hasandiruni gürigia ani adügati 100 lídangiñe óunwenbu burí damichi tun muna. Díseguati irumu lun madagabei lan aban hárabaganali le wéiriti lere. Ariñagati aban ariñahani adügaali lan hárabaganali lun hóunwegun 471,000 gürigia labadinagua burí irumu 1975 luma 2000.

Matéu 24:14. “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu”.

Hóugiñe haaña widü míñunu gefentiña luagu Heowá apurichihei uganu buiti le luáguti Larúeihan Bungiu lidan lóugiñe 240 ageiraü lidan sun larigeirugu ubóu. Aganbúati uganu le hapurichihabei lidan burí uburugu wéinamuti, aüdü díseti, dabíara luma burí wübü. Arufudati giñe profesía le danme lan larihini Bungiu apurichihóuaali lan saragu, ligíaalime “lagumuchun ubóu”. Ka mini lubéi le? Mini lan lagumuchuba lan Bungiu hau urúeigu ubouaguna ani lagumeseruba lan aban iseri ibagari lábugiñe Larúeihan. Kaba burí füramasei agunfulira lábugiñe Larúeihan Bungiu? Sigí humá aliiha lun hadariruni óunabagülei.