Busenti Bungiu líderagunün
TIDAN Bíbülia wadarirei adundehani lúmagiñeti Bungiu le buídutimabei. Lau sun mama tan aban líburu lánina agaranihani, rutu adundehani woun le gayaraabei líderaguniwa lun wadarirun awalidaguni lídangiñe saragu idiheri, saminaü mabuidunti, igarigu le wasandirubei, wasandi luma dan le wasufuriruña lan ladüga lisandi ichügü.
Ani létima buídubei, chóurugüda tumuti Bíbülia woun gunfuranda lani Heowá, a Bungiu le adügübaliwa, le wasaminarubei luma le wasandirubei sügǘ lau furumiñeguarügü. Busenti líderaguniwa lidan furumiñeguarügü turobuli le úmabei wagagibudagua. Samina humá luagun le lariñagubei bián bérusu tídangiñeti Bíbülia le. Líchuguba dǘgüdaguaü hun.
“Yarafati Aburemei lun lesefuruniña ha gáribei hasandirunu hanigi, ha féridi hamaalibei hemenigin” (SÁLUMU 34:18).
“Lugundun au le Bubungiute, ragǘ naali búhabu; ani ariñagaadina bun: ‘Manufudedabá, íderagua numutibu’” (ISAÍASI 41:13).
Ida liñati líderaguniwa Heowá agagibudagua luma lisandi ichügü? Lidan burí ariñahani le asigirubei, harihubei le lan lúgubu busén lan Heowá lóunigiruniwa lidan ámuñegueinarügü igaburi.
a Heowá líribei Bungiu (Sálumu 83:18, Traducción del Nuevo Mundo).
