Dimurei burí le, gürigia ha asufurirubaña somu lisandi ichügü ariñagubalin. Sandiguañahaadün san hungua kei aban hádangiñe o hóunigiruña somu gürigia le laubei sandi le?

Anhein ítara liña lubéi, chouru huméi mama lan hábuguarügüñadün. Gíbetiña gürigia lidan sun ubóu, hasufuriruña lisandi ichügü o gaduhetiña lau sandi le.

Furanguti wawinwanduña lan lidan “weyu hénrenguti” le anügübei saragu idiheri luma igarigu (2 Timotéu 3:1). Afuranguagüdatu Organización Mundial de la Salud luagu anihein lan lisandi ichügü luagu 1 hádangiñe kada 8 gürigia lidan sun ubóu. Ani adügaali laburuchagun sandi COVID-19 lidan sun ubóu, lidan irumu 2020, lun haganwoundun gürigia ha láubaña sandi le lánina lueirin idiheri lun 26 hádangiñe san, ánhañati ha láubaña sandi le lánina lueirin íruni, 28 hádangiñe san.

Lau sun buidu lan lun wasubudiruni átiriñanu lan gürigia lau sandi burí le uguñe weyu, buídutimati lun hasubudiruni ka lan gayaraabei hadügüni, huguya hau sun hiduheñu, lun buídutima lan hasandiragun hungua.

Dan le ua lan lisandi ichügü luagu aban gürigia, buiti lasandiragun gürigia ligía lungua ani maturobulinti lun ladügüni luberesegun le lánina sagü weyu. Buiti lahandilihani liibe katei lun lichügü, benefati ani gúndaati lau libagari.

• MAMA LADÜGA gürigia lasandiragunbei lungua ítara.

• SANDI adügübei lun lasandirun gürigia saragu idiheri, le agadeirubalin ligaburi lisaminan, adüga ligía lun lásiñarun lárügüdagun lungua lidan ligaburi lóuserun o le lasandirubei.

• Liibe-agei dan, adügati le lun hénrengu lan houn lun hanaagun houngua buidu hama amu luma lun lahandilihani ámuñegueinarügü katei le lanügübei ibagari sagü weyu.

•   Gayaraati ladagarun sandi le hawagu furumiñeguarügü gürigia meberesenga harumudiri, hechun, harasan, hani relihión, hafurendein, ni anhein risi habéi o gudeme hamá.

Anihein dan lasansirun ligaburi lóuserun aban gürigia sódini, aba lagumeserun arumuga saragu o aba lalouguadun larumugun; aba lalouguadun leigin o aba gíbeya lan, o aba lagumeserun asandira saragu íruni o idiheri. Anhein asusereda le hun o lun aban hádangiñe hiduheñu, háfuga mégeibadün lan houdin lumoun surusia lun líderagunün asubudirei ka lan turobulibei luma lun líchugun árani hun. Halíabati hidin áluaha lun híderawagun?

Ariñagati Hesukrístu, wügüri chútimaati aau le wínwanhalibei ubouagu: “Ha magadiñebaña, memegeiruntiña surusia; ha sándibaña, hagía emegeirubaña surusia” (Matéu 9:12). Anhein libiha gürigia le sándibei agaranihani le lemegeirubei, ménrenguntimabei ladarirun awalidaguni lídangiñe le gádanbalin ani gayaraayabei lasandirun ugundani lidan libagari. Buítimabei lun madarasahan humá lun háluahan árani anhein weiri lubéi luriban hasandiragun hungua o lǘhadün lan lau sandi le. a

Lau sun mama lan aban líburu lánina agaranihani Bíbülia, gayaraati líderaguniwa le tariñagubei lun wadarirun awalidaguni lídangiñe lisandi ichügü. Agunbiraha wamutün lau sun taruman wanigi lun haliihani ariñahani le asigirubei, le afuranguagüdübalin ida liña lan tíderaguniwa Bíbülia agagibudagua luma lisandi ichügü.