3 | Sügǘ burí tídangiñeti Bíbülia
ARIÑAGATU BÍBÜLIA: Gürigia buítiña ha meha ítarabaña “kei wagía” (SANTIAGU 5:17).
Le mini lubéi
Buin tiña Bíbülia lau burí abahüdaguni hawaguti wügüriña hama würiña inarünitiña ha meha asandirubaña ámuñegueinarügü katei. Anhein waliiha le hásügürübei, gayaraabei wadarirun somu sügǘ le genegeguati luma le wásügürübei.
Ida lubati líderaguniwa katei le?
Sun wagía mégeitiwa lun gunfurandawa wamá, dántima le anihein lan lisandi ichügü wawagu. Dan le waliihan luagu le meha hasandirubei fiu gürigia ha uágubaña tabahüdagua Bíbülia, másiñati wíchugun fe sandí hamani lememe wasandirubei. Íderagua lumutiwa lira lun wíchugun fe mámarügüñein lan wagía asandira idiheri luma liibe katei lun wachügü.
Abahüdagua tumuti Bíbülia woun ka lan hariñagubei fiu wügüriña ha meha asandirubaña siñá lan houn. Ariñagañahaadün san húniwagua: “Siñá nun, mawandun naali katei le”? Ligía meha lasandirubei Moisesi, Elíasi luma Dawidi (1 Lúrudu 11:14; 1 Urúeigu 19:4; Sálumu 55:4).
Abahüdaguatu Bíbülia woun tuagu Ana, aban würi to meha wéiribei tidiheri ladüga masaanigu tan ani adügatu meha tubuyamun bula tau lau magudemehabu (1 Samueli 1:6, 10).
Másiñati sandigua humá hungua kei Hobu, aban wügüri le uágubei tayanuha Bíbülia. Lau sun meha weiri lan lafiñen, aba labuinchun lau idiheri darí lun lariñagun: “Siñá nun, mabusenrunhadina nasigirun abagarida” (Hobu 7:16).
Sun gürigia ha, ibihatiña meha hagidaruni luriban saminaü hawariua. Wibihibei giñe erei le wemegeirubei lun wadügüni ligiaméme ánhawa etenira lun hani hénpulu.
