Ka uagu lariñaga iduhei le yarafatimabei ‘lañawarihabei’ lan lalagante anhein amarieida tuma Rudu? (Rudu 4:​1, 6).

Lidan tidaani Bíbülia, anhein meha ounwe aban wügüri maríeiti marahüñüga, ka meha lunbei ladügǘn? Mosu lounabún fiu álügüdahani. Kaba meha asusereda lau lufulasun wügüri ligía? Leferidirubei meha san hiri liduheñu lun súnwandan? Afunranguagüdüwati meha sun katei le lidan lilurudun Moisesi.

Anhein meha ounwe aban wügüri o aban lan laluguruni lufulasun ladüga léiguadun lidoun gudemei, gayaraati meha lagañeihani aban líbiri múa ligía o aban liduhe le yarafatimabei lun. Ítara luba meha hafulasunmémebei lan iduheñu fulasu ligía (Fad. 25:​23-​28; 1 Lur. 27:​8-​11).

Ka meha adügǘbei lun magumuchagun lan liri iduhei le óunwebei? Mosu meha lamarieidun lamulen wügüri le óunwebei tuma lúmari líbiri lun gasaani lan tau lun magumuchagun lan liri le óunwebei hádangiñe ísüraelina luma lun libihini lalagante. Ligía meha échunibei lidan binadu Ísüraeli, wáwati lun igaburi le maríei lánina échuni kei uguñoun. Adügati lubuidun échuni le lun tounigirún würi to hilaalibei tani weiriei (2 Lur. 25:​5-7; Mat. 22:​23-​28). Falawati meha échuni le lidan tikesin Rudu.

Samina wamá luagu le tásügürübei Noemí. Maríeitu meha luma Elimélekü. Gama lumoun, dan le lóunwenbei Elimélekü hilá hagía bián lisaanigu, úaali meha ni aban wügüri lun gayara lan lóunigirunu Noemí (Rudu 1:​1-5). Dan le tagiribudunbei Noemí Hudáun, aba tariñagun tun Rudu to tídiñu lun tariñagun lun Boosu, le liduhe Elimélekü le yarafatimabei lun lun lagañeihani lufulasun Elimélekü (Rudu 2:​1, 19, 20; 3:​1-4). Gama lumoun, subudi lumuti meha Boosu anihein lan aban iduhei yarafatimaati lun Elimélekü le unbei yu lan lagañeihani múa ligía (Rudu 3:​9, 12, 13). Watu Bíbülia lun wügüri ligía iduhei le yarafatimabei

Furumiñe, busenti meha iduhei ligía lagañeihani fulasu ligía (Rudu 4:​1-4). Íbini subudi lani sérubei lan lun, subudi lumuti meha giñe luagu derebuguharu lan Noemí ani siñá lan meha tagaraüdün aban irahü le gayaraabei lerederun lau lalagante Elimélekü. Subudi lumuti meha giñe iduhei le, lichugúba lan meha lufulasun Elimélekü lun, ligíaba meha eredera lau. Ligíati, genegeti yebe buídubei lan lidin lun, lau lagañeihani fulasu ligía.

Gama lumoun, dan le líchugunbei iduhei le fe mosu lan lamarieidun tuma Rudu, aba magañeihan laali lan fulasu ligía. Ariñagati: “Anhein ítara liña lubéi, siñabei nagañeihani, ladüga ítara, gayaraabei nañawarihani nalagante” (Rudu 4:​5, 6). Ka uagu lamahara lagañeihani?

Anhein hamuga amarieida iduhei le o furumiñeguarügü iduhei le yarafatimaati tuma Rudu ani aba tagaraüdün aban irahü lau, irahüba ligía eredera lau lumúan Elimélekü, kei alagan. Ida luba hamuga ‘lañawarihani’ aransehani le lalagante iduhei le? Mariñagun tumuti Bíbülia, gama lumoun ariha wamá fiu resun luagu le gayaraabei lasuseredun.

• Furumiñe, háfuga saminati iduhei le leferidirubei lan liseinsun lugundun mámaba ligía eredera lau lufulasun Elimélekü tiraüba Rudu eredera lau fulasu ligía.

• Libiaman, mosu meha lanuriahanu dandu Noemí kei Rudu.

• Lǘrüwan, anhoun hamuga agaraüda Rudu amu irahü lau iduhei le, mosu hamuga hafarenhani lirahüñü halagante hama tirahüñü Rudu.

• Ligadürün, anhein hamugati masaani lubéi iduhei le, irahüba hamuga le liráü tabu Rudu eredera dandu lau lumúan Elimélekü kei lau lufulasun iduhei le. Ítara lerederuña hamuga lumúan lun aban irahü le lunbei lanügüni liri Elimélekü, mama liri iduhei le. Mabusenrunti meha iduhei le lagadeiruni lalagante lúnrügü líderagunu Noemí. Himei lumuti lígirun lun lagañeihani Boosu fulasu, ladüga ligía lan meha iduhei le garichabei lárigi le mabusenrunbei lagañeihani. Aba lagañeihani Boosu múa ligía. Ka uagu? Ligía guánarügü ariñagubei: Lun “magumuchagun lan liri Malón hádangiñe lánigu, mabulieidúniwa ligíame lidan fulasu le” (Rudu 4:​10).

Kei le aubei warihei, létima súdinibei lun buga iduhei ligira lakipuruni liri luma lalagante. Luouguounrügüñein meha lasaminara! Lau sun lira, mebegiti áfaaguni le ladügübei lun ni kata ladüga bulíeiwati liri. Lanwoun lira, féridi lumuti óunwenbu chansi le leresibirubei Boosu: lun aban lan hádangiñe ladügawagun Hesukrístu le Mesíasi. Ma lirun weiri lan leferidirun iduhei le ladüga luouguounrügüñein lan laritagua luma mabuseerun lan líderagun amu gürigia ha mégeihabubaña (Mat. 1:5; Luk. 3:​23, 32).