1. Ka aweiridagüdübarun hanigi saragu gürigia dan le houdin furumiñe wéiyaasu adamuridagua? (Ariha humóun giñe iyawaü).

 SAMINA wamá hawagu aban feru maríeitiña ha ñǘdünbaña luagu furumiñeti wéiyaasu lidan aban adamuridaguni tidan Luban Wadamuridagun. Aba taweiridun hanigi dan le harihin lubuidun ligaburi heresibiruniña íbirigu, lúmati luagu ínsiñeni le harufudubei hámagua. Dan le hagiribudun hábiñoun, aba tariñagun würi lun tani weiriei: “Anihein aban katei espechaliti hawagu gefentiña luagu Heowá, ani hínsiñeti nun”.

2. Ka uagu ígira hamaali lubéi hádangiñe íbirigu heseriwidun lun Heowá?

² Espechaliti ínsiñeni le lídanbei damuriguaü kristiánu. Inarüni, sun gefentiña luagu Heowá charatiwa (1 Huan 1:8). Ligíati, eibu wasubudiruniña wábirigu buidu, eibu ménrengun lan woun lun warihini hachara (Rom. 3:23). Ma lirun ígiraaña lan hádangiñe íbirigu lun ladügün hachara amu lun hígiruni heseriwidun lun Heowá.

3. Ida luba hasubudirúniwa kristiánugu inarünitiña? (Huan 13:34, 35).

³ Teni wamaaya lun bérusu le ídangiñebei lasagarúa aturiahani le (aliiha huméi Huan 13:34, 35). Kaba adüga lun hasubudirúniwa lani Kristu disipulugu? Ínsiñeni, mama hachara. Lanwoun lira, mariñagunti Hesusu: “Ítara luba hasubudiruni sun huguya nani humá disipulugu”, ariñagarügüti: Ítara luba hasubudiruni “sun gürigia luagu nani humá disipulugu”. Ligía lafuranguagüdünbalin Hesusu houn lani disipulugu ida luba lan hasubudiruni ha híbiri gürigia kátaña lan kristiánugu ha inarünitiña ladüga ínsiñeni inarüniti le harufudubei hámagua.

4. Ka álügüdahani gayaraabei hadügüni fiu gürigia?

 ⁴ Másiñati hálügüdagun ha mámabaña gefentiña luagu Heowá houngua: “Ka uagu ínsiñeni lubéi adügübei lun hasubudirúniwa kristiánugu inarünitiña? Ida liña larufuduni Hesusu ínsiñeni houn lani apostolugu? Ani ida luba wáyeihani Hesusu?”. Buídubei lun wadügüni álügüdahani le wóuniwagua wagía le Gefenhadiwa luagu Heowá. Líderagubadiwa wadügüni álügüdahani le, lúntima warufudun ínsiñeni, dántima le hachararun amu woun (Efe. 5:2).

5. Ka luwuyeri ínsiñeni uágubei layanuha Hesusu lidan Huan 15:12, 13?

⁵ Furanguti lariñaguni Hesusu espechali lan ínsiñeni le adügübei lun hasubudirúniwa lani disipulugu (aliiha huméi Huan 15:12, 13). Teni wamá lun gumadi le líchugubei houn, le ariñagubei ítara: “Lun hínsiñegua humá hungua kei hínsiñe nun”. Ka luwuyeri ínsiñeni uágubei layanuha Hesusu? Ligía guánarügü afuranguagüdei ínsiñeni lan le larufudubei aban kristiánu, ligía lan ínsiñeni le adügübei lun aranseñu lan lun lounwen luagu líbiri. b

6. Ida liña tarufuduni Lererun Bungiu súdini lan ínsiñeni?

⁶ Arufudahatu Lererun Bungiu súdini lan ínsiñeni. Ariñagatiña saragu íbirigu anihán lan burí bérusu tídangiñeti Bíbülia le hínsiñetimabei houn: “Ínsiñeni Bungiu” (1 Huan 4:8); “Hínsiñe hamá bíbirigu bun kei bínsiñegua bungua” (Mat. 22:39); “Daruguati ínsiñeni lau saragu figóu” (1 Fe. 4:8), luma “Magumuchagunbei ínsiñeni” (1 Ko. 13:8). Arufuda lumuti bérusu burí le luma burí amu súdini lan hínsiñehabu wamá luma lun warufuduni lubuidun igaburi le.

7. Ka uagu siñá lubéi libihini Satanási lun lidan hamá aban gürigia luma lun hínsiñegua hamá hámagua?

⁷ Álügüdaguatiña saragu gürigia houngua: “Ida luba nasubudirunu ka lan relihión inarüniboun? Ariñagatu sun relihión arufudaha  tani inarüni, le linarün katei, ámuñegueinarügüti katei le harufudahabei luagu Bungiu”. Adügaali Satanási lun ñein tan saragu relihión mama inarünitu, lun layuridaguagüdüniña gürigia. Lau sun lira, maweiyasunbei adüga lun kristiánugu hamá gürigia ha lílanabaña ámuñegueinarügü ageiraü luma fulasu luma lun hínsiñegua hamá hámagua; lásiñarubei adüga. Heowarügüñein gayara ladügün aban katei ítarati. Subudi wamuti ítara liña lan ladüga lúmagiñe lan Heowá liabin ínsiñeni. Ani hárügüñanu gánibalin lani sífiri sandu luma labinihan gayara harufuduni ínsiñeni inarüniti le (1 Huan 4:7). Ligía lariñagunbei Hesusu ladügüba lan ínsiñeni inarüniti lun hasubudirúniwa lani disipulugu ha inarünitiña.

8, 9. Ka lánibei ínsiñeni le harufudubei gefentiña luagu Heowá hawagu saragu gürigia?

⁸ Ítara kei lariñaguni Hesusu, rúhaña saragu gürigia fe kátaña lan kristiánugu inarünitiñabaña ladüga ínsiñeni le harufudubei hámagua. Kei hénpulu, haritagua lágili aban íbiri gíriti Ian, dan le lídinbei furumiñe wéiyaasu lidan aban Adamurini Wéiriti, le adügǘbei lidan aban estadiu yarafa tun luban. Ñǘdünhali meha lidan estadiu ligía fiu hati lubaragiñe Adamurini Wéiriti aríagua huraraü. Ariñagati: “Amu igaburi le narihibei ñein. Buiti hagaburi gefentiña luagu Heowá, buiti meha hasansiragun, ani buiti giñe ligaburi hóuserun hasaanigu”. Ariñagayati: “Létima aweiridagüdübarun nanigi gunda lan harihiniwa súngubei ani lídanñanu meha darangilaü, anihán meha katei le nayumahabei. Maritagunaali ni aban lídangiñe yanu le ichugúbei, le naritagubei ligaburi hóuserun Gefentiña”. c Adügati lubuidun wagaburi lun larihín ínsiñeni inarüniti le wádanbei. Keiti hínsiñe hamá wábirigu woun saragu, óusera wamutiña lau areini luma lau inebesei.

⁹ Aba giñe taweiridun lanigi aban íbiri gíriti John dan le lídinbei furumiñe wéiyaasu tidan Luban Wadamuridagun. Wéirigüda lumutu lanigi dandu lubuidun hagaburi sun íbirigu kei hínsiñehabu darí lun lariñagun: “Ínsiñeni inarüniti le harufudubei, adügati lun nachoururuni tugía lan relihión to inarüniboun”. d Le linarün katei, anihein saragu sügǘ le achoururagüdübalin, gefentiña lan luagu Heowá hagía lan kristiánugubaña ha inarünitiña.

10. Kaba burí katei adüga lun lóuchawagun ínsiñeni le wasandirubei? (Ariha huméi giñe abürüdǘni).

¹⁰ Ítara kei wariñaguni lidan lagumeseha aturiahani le, úatiña ni aban íbirigu lun macharabaña lan. Mama uguñe ani mama haruga, hadügüba íbirigu somu katei le gáriti woun o katei le adügübei lun wuriba lan wasandiragun woungua (Sant. 3:2). e Adügati katei ítarati lun lóuchawagun ínsiñeni le wasandirubei wádangua. Kaba íderaguawa lun wóunabun lau aban igaburi buiti luma lau ínsiñeni? Ariha waméi lani Hesusu hénpulu (Huan 13:15).

11. Ka igaburi larufudubei Santiagu luma Huan luagu meha aban dan? (Ariha huméi giñe dibuhu).

¹¹ Magurabunti meha Hesusu macharabaña lan lani disipulugu. Lubaragiñe lira, íderaguarügü lumutiña lau ínsiñeni lun hasansiruni luriban hagaburi lun lagundaarun Heowá hau. Luagu aban dan, aba hamuriahan apostolugu Santiagu luma Huan tuma háguchu lun tamuriahan  aban ubaraü súdiniti luma Hesusu lidan Larúeihan Bungiu houn (Mat. 20:20, 21). Harufuduña meha bián apostolugu ha pantaü luma giñe igaadua (Ari. 16:18).

12. Ida liña wasubudiruni mámarügüñein lan Santiagu luma Huan arufuda luriban igaburi?

¹² Mámarügüñein Santiagu luma Huan arufuda luriban igaburi dan ligía. Teni wamá lun ida liña lan hóunabun ha híbiri apostolugu: “Dan le haganbunbalin híbiri diisi disipulugu katei le, aba hagañidun hama bián amulenugu hagía” (Mat. 20:24). Gayaraati wasaminarun weiri lan sigene le hádanbei. Másiñati aban lan hariñagun ha híbiri apostolugu lun Santiagu luma Huan: “Kátañadün san hamuriahanbei ubaraü súdiniti lidan Larúeihan Bungiu? Mámarügüñadün huguya awadimarida here luma Hesusu. Gadüna wamuti giñe ubaraü le ítara kei huguya”. Lidan dan ligía, marufuduntiña apostolugu ha ínsiñeni hámagua.

13. Ida liña lóuseruniña Hesusu lani apostolugu lau sun chará hamá? (Matéu 20:25-28).

¹³ Ka san ladügübei Hesusu? Magañidunti hama. Mariñagunti houn lanúadira lan amu wügüriña ha ǘnabugutiña heweñegua, ha óuserubaña lau ínsiñeni ani buidu hagía hawéi. Le ladügübei aba gaguraasun lan habá, ladüga subudi lani haruma tan hanigi (aliiha huméi Matéu 20:25-28). Lau sun meha mama lan furumiñeti wéiyaasu hasigenehan apostolugu luagu ka lan súdinitimabei hadan, súnwandan lóuseruniña Hesusu lau ínsiñeni (Mar. 9:34; Luk. 22:24).

14. Ida liña meha igaburi le ídanbei hagüriarúa lani Hesusu apostolugu?

 ¹⁴ Chóuruti gabaroun lani Hesusu ida liña lan igaburi le ídanbei hagüriarúa lani apostolugu (Huan 2:24, 25). Lidan meha dan ligía, gürigia ha meha súdinibaña houn tábutigu relihión, gürigia ha buídubei dan houn hama burí ha lídanbaña aban ubaraü súdiniti o ha rísibaña (Mat. 23:6; ariha huméi bidéu Asientos del frente en la sinagoga, le lídanbei abürüdǘni lánina aturiahani le adarirúbei lidan Matéu 23:6, TNM). Ani wéiriguti meha hanaagun tábutigu relihión houngua hawéi ha híbiri gürigia (Luk. 18:9-12). f Subudi lumuti meha Hesusu gayara lan ladügün igaburi le lun wéirigu lan hanaagun apostolugu houngua (Ari. 19:11). Magurabunti meha Hesusu macharabaña lan lánigu, ani magañidun ligía hama dan le hachararun. Kei le subudi lubalin haruma tan hanigi, aba líderaguniña lau gurasu lun hasansiruni pantaü luma igaaduaü luagu ǘnabuguni luma ínsiñeni.

15. Ka wafurendeirubei lídangiñe le asuseredubei lun Santiagu luma Huan?

¹⁵ Gayaraati wafurendeirun saragu lídangiñe le asuseredubei lun Santiagu luma Huan. Mabuidunti hamuriahan ubaraü súdiniti lidan Larúeihan Bungiu. Gama lumoun, mabuidunti giñe hígirun ha híbiri apostolugu lun ladügün katei le lun wuriba lan hasandiragun houngua. Ánheinti Hesusu, óusera lumutiña 12 lani apostolugu lau ínsiñeni luma areini. Ka wafurendeirubei lídangiñe sügǘ le? Mámarügüla luagu hachara amu wasaminara, lubaragiñe lira, súdiniti giñe wasaminarun luagu igaburi le warufudubei dan le hachararun amu. Ligíati, dan le wasandiragun woungua wuriba ladüga somu katei wuribati le ladügübei aban íbiri, álügüdagua wamá woungua: “Ka san uagu nagañida saragu luagu le ladügübei? Mosu funa san nabuiduragüdüni somu katei lidan nigaburi? Lásügürüña funa san íbiri le lídangiñe somu lénrengunga? Ma buídutimabei hamuga narufudun ínsiñeni luma lun násügüragüdüni le ladügübei nun, lau sun genege lan garicha nan lun nasandiragun nungua wuriba?”. Ánhawa óuseraña ha híbiri lau ínsiñeni súnwandan, warufudubei wagía lan kristiánugubaña inarünitiña.

16. Ka amu katei gayaraabei wadügüni lun wafurendeirun lídangiñe lani Hesusu hénpulu?

¹⁶ Arufuda lumuti giñe lani Hesusu hénpulu lunti lan wáfaagun lun gunfuranda wamaniña wábirigu (Ari. 20:5). Inarüni gayara lan laliihanu Hesusu sun anigi, wagía siñati wadügüni lira. Lau sun lira, le gayaraabei wadügüni lun gaguraasun wamá habá wábirigu dan le hachararun (Efe. 4:1, 2; 1 Fe. 3:8). Líderagubadiwa wasubudiruniña wábirigu buidu lun gaguraasun wamá habá. Ariha wamá aban hénpulu.

17. Ka asuseredubei dan le láfaagunbei aban óunigiruti sirkuitu lúntima lasubudiruni aban íbiri buidu?

¹⁷ Aba lasubudirun aban óunigiruti sirkuitu le meha eseriwidubei Áfürika Orientali aban íbiri, ani laganóun lun hénrengu lan ligaburi íbiri ligía. Rédeiti san óunigiruti sirkuitu lau saminaü ligía? Ariñagati: “Lubaragiñe meha nadisedun luéi, aba nayarafadun lun lun nasubudiruni buidu”. Ítara liña lasubudiruni óunigiruti sirkuitu, saragu burí lan katei le lawinwandubei íbiri le, ligía lan adügübei lun ítara lan ligaburi. Ariñagayati óunigiruti sirkuitu: “Dan le gunfuranda nubalin óunwenbu áfaaguni le ladügübei íbiri le  lun lígiruni le asuseredubei lun lárigiñegua luma lanarime awanseruni le adüga láalibei, aba taweiridun nanigi lau asansiruni le ladügübei. Aba nadügün aban umadaguaü buiti luma”. Ánhawa áfaagua lun wasubudiruniña luma lun gunfuranda wamaniña wábirigu buidu, ménrenguntimabei woun wóuseruniña lau ínsiñeni.

18. Ka álügüdahani gayaraabei wadügüni wóuniwagua anhein adüga aban íbiri somu katei le mínsiñebei woun? (Ariñawagúni 26:20).

¹⁸ Ñeinbei dan mosu lan wayanuhan luma aban íbiri le adügübei aban katei le mínsiñebei woun. Gama lumoun, lubaragiñe wayanuha luma, lunti wálügüdagun woungua: “Subudi numuti san sun lanichigu katei le?” (Ari. 18:13). “Ibidiñega san lun ladügei?” (Apur. 7:20). “Adügaadina meha san aban katei ítarati?” (Apur. 7:21, 22). “Ánhana ayanuha luma íbiri le, nadügüba san lúntima laweiridun turobuli le nabusenrubei naranserun?” (aliiha huméi Ariñawagúni 26:20). Ánhawa adireira dan lun wasaminarun luagu álügüdahani burí le, másiñati wasaminarun buídutimabei lan warufudun ínsiñeni luma lun wabulieiduni le asuseredubei.

19. Ka lunbei aranseñu wamá lun wadügüni?

¹⁹ Kei sétanu, arufudatiña gefentiña luagu Heowá lani hamá Kristu disipulugu ha inarünitiña. Ida lubati wadügüni kada aban wádangiñe katei le? Lau warufudun ínsiñeni inarüniti houn wábirigu lau sun chará hamá. Ani seremei lun katei le, gayaraati híchugun amu gürigia fe ka lan relihión inarüniboun luma lun habusenrun háhuduragun úara wama lun Heowá, Bungiu le Lubungiute ínsiñeni. Ligíati aranseñu wamá lun wasigirun arufudei luwuyeri ínsiñeni le adügübei lun hasubudirúniwa kristiánugu inarünitiña.