1, 2. a) Ka asuseredubei dan le labadiseirun aban gürigia? b) Kaba wariha lidan aturiahani le?

 ARIHAADÜN san aban sétanu gürigia ha lúnbaña habadiseirun? Dan le hóunabuni bián álügüdahani le ladügübei íchuguti yanu houn, aganbúati hamalali lau ichouruni. Dandu haduheñu kei hamadagu siñati haramuduni hagundan. Dan le habadiseirun gürigia ha, arihúati ugundani luagu hagibu ani ábati hapouhani ha ñéinbaña háhabu. Kei burí sagü dimaasu badiseitiña saragu míñunu gürigia. Ítara liña ábanhaña lan gefentiña luagu Heowá ha deregeguaaña houngua lun Heowá ani badisei hagía.

² Anhein hasaminaruña lubéi habadiseirun, mini lan le háluahañein lan Bungiu, ani adügati le lun larugoungadun hau lidan ubóu búrigati le (Sal. 14:1, 2). Adügǘwati aturiahani le hun, meberesenga anhein niburein hubéi o derebuguhadün lan. Lidan aturiahani le, hadariruba ǘrüwa resun lídangiñe saragu le wámabei lun heseriwidun lun Heowá. Agia wagía ha badiseihalibei, ka lunbei wadügüni? Líderagubadiwa aturiahani le lúntima wabusenrun weseriwidun lun Wabungiute lun súnwandan.

3. Ka uagu hínsiñe lubéi inarüni luma irichaü houn lubúeingu Heowá? (Sálumu 119:128, 163).

³ Ru lumuti Heowá gumadi le houn lubúeingu: “Hínsiñela lubeiti inarüni [...] hun!” (Sak. 8:19). Ani arufuda lumuti Hesusu lisudinin laluahóun irichaü (Mat. 5:6). Mini lan le lunti lan wabusenrun tídangiñe sun wanigi wadügüni le buídubei luma le harumabei ligibugiñe Bungiu. Hínsiñeti san inarüni luma irichaü hun? Anha. Ligía iyereegu lubéi iyeeni hun luma sun luwuyeri wuribani (aliiha huméi Sálumu 119:128, 163). Ha yéebaña óuseratiña kei Satanási, le agumadirubalin ubóu le (Huan 8:44; 12:31). Aban katei le labusenrubei Mafia ladügün, lawiyeduni liri Heowá le sándubei. Lúmagiñe lebedaagun Mafia lidan fuluri-agei  Edén, lariñaguña iyeeni luagu Bungiu, ariñagati luagu aban lan Bungiu le mabusenrunbei buiti houn gürigia luma aban lan gumadimati yeeti (Agu. 3:1, 4, 5). Ladüga sun burí iyeeni le lariñagubei, wuribati hasaminan saragu gürigia luagu Heowá. Dan le hanúadirun gürigia lun moudin hamá luéigiñe lóubadina inarüni, gayaraati ladügün Satanási lun hadügün sun luwuyeri marichaü luma katei wuribati (Rom. 1:25-31).

4. Ida liña larufuduni Heowá ligía lan Lubungiutebei inarüni? (Ariha huméi giñe dibuhu).

⁴ “Lubungiute inarüni” Heowá ani gürigia ha hínsiñehabubaña lun, arufudaha lumuti inarüni houn lau areini (Sal. 31:5). Ítara liña léfegechuni hagu ani aba lesefuruniña luéi liyeeni Mafia. Lanwoun lira, arufudahati Heowá houn lubúeingu lun haruma lan hagaburi luma lun hóuserun lau irichaü, ani adügati le lun inebewa hamá ani barüti giñe darangilaü houn (Ari. 13:5, 6). Ariha humaali san katei le lidan hibagari lúmagiñe hagumeserun aturiahoun Bíbülia? Furendeihadün ua lan amu adundehani houn sun gürigia le buítimati luéi le líchugubei Heowá (Sal. 77:13). Ligía busén hubéi hafalaruni lugumadin Heowá le richabei (Mat. 6:33). Ligía busén hubéi hidin luéigiñe lóubadina inarüni, arufuda humeime sun lan le lariñagubei Satanási luagu Wabungiute iyeeni lan. Ida luba hibihini katei le?

5. Ka gayaraabei hadügüni lun luéigiñebadün lan lóubadina inarüni luma irichaü?

⁵ Le hanúadirubei hadügün lau hibagari, larufudubei houn amu maha humá lun liyeeni Satanási, ani luéigiñeñadün lan lóubadina inarüni, ani busén humá lun Heowá lan hurúeite luma lun gaganbadi humá lun lugumadin le richabei. Ida luba hadügüni katei le? Lau füramasei humá lun Heowá lidan aban furíei hederegeraalin lan hibagari lun heseriwidun lun lun súnwandan. Lárigiñe, aba habadiseirun lun harufuduni houn sun gürigia deregeguaadün lan houngua lun Heowá. Furanguti ínsiñeni lan luagu inarüni luma irichaü ínchahabalün lun habadiseirun.

6. Según Sálumu 45:4, ka resun wámabei lun línsiñedun Hesukrístu woun?

⁶ Ka uagu hínsiñe lubéi Hesukrístu hun? Daritiwa fiu resun súdiniti lidan Sálumu 45:4 (aliiha huméi). Luéigiñeñein lóubadina inarüni, ǘnabuguni luma irichaü Hesusu. Ligíati, anhein hínsiñe lubéi inarüni luma irichaü hun, hínsiñebei giñe Hesusu hun. Samina humá ida liña lan lawinwanduni Hesusu inarüni luma irichaü lau ganigi (Huan 18:37). Gama lumoun, ida liña larufudahani Hesusu ǘnabuguni?

7. Kátima hínsiñebei hun lídangiñe ǘnabuguni le larufudubei Hesusu?

 ⁷ Arufudahati Hesusu luagu ǘnabuguni dandu lau le lariñagubei kei lau le ladügübei. Kei hénpulu, súnwandan líchuguni Hesusu uéiriguni lun Lúguchi; máluahanti Hesusu lun lichugún uéiriguni lun (Mar. 10:17, 18; Huan 5:19). Ka hasaminarubei luagu ǘnabuguni le larufudubei Hesusu? Ma ínchaha lumutün lun línsiñedun Liráü Bungiu hun luma lun hafalaruni ligaburi? Anha, chóuruti ítara liña lan. Ka uagu ǘnabugu lubéi Hesusu? Ladüga ǘnabugu lan Heowá, ani hínsiñeti Heowá lun Hesusu, áyeiha lumuti giñe ligaburi buidu buidu (Sal. 18:35; Ebü. 1:3). Lau hasubudiruni katei le, ma yarafagüda lumutün lun Hesusu?

8. Ka uagu hínsiñe lubéi woun lun Hesusu lan Warúeite?

⁸ Hínsiñeti woun Warúeite lan Hesusu ladüga ligía gumadimati buídutimabei. Heowá adundehabalin ani ligía giñe íridubalin Urúeime (Isa. 50:4, 5). Lanwoun lira samina wamá luagu ínsiñeni inarüniti le larufudubei Hesusu woun (Huan 13:1). Kei Hesusu lan Warúeitebei, gadünati lun warufudun ínsiñeni lun. Ligía guánarügü afuranguagüdübalin gürigia lan ha arufudubaña ínsiñeni le inarüniti lun —barǘ lumutiña kei lumadagu— arufuda hamuti hínsiñe lan houn lau gaganbadi hamá lun lugumadin (Huan 14:15; 15:14, 15). Ma lubuidun gayara lan gamadagua wamá luma Liráü Heowá!

9. Ida liña genegegua lan labadiseirun Hesusu luma habadiseirun kristiánugu?

⁹ Aban lídangiñe gumadi le líchugubei Hesusu lunti lan habadiseirun lánigu (Mat. 28:19, 20). Ligía guánarügü íchugubalin hénpulu. Íbini anihein lan katei le ídanti amu lan labadiseirun Hesusu luéi habadiseirun lani disipulugu, anihein giñe katei le ídanti genegegua lan (ariha huméi rekuáduru “ Katei le ídanti amu lan labadiseirun Hesusu hawéi lani disipulugu”). Kei hénpulu, dan le labadiseirunbei Hesusu, adüga lumuti lun ladügüni lugundan Lúguchi (Ebü. 10:7). Ligiaméme hadügübei lani disipulugu. Dan le habadiseirun, harufuduñein houn sun gürigia deregeguaaña lan houngua lun Heowá ani létima lan súdinitimabei houn lidan habagari lúmagiñe oura ligía lun lubaruaguóun hadügüni lugundan Heowá, mama hagundan guánarügü. Ítara liña hasigiruni lani Hamaisturun hénpulu.

10. Ka resun húmabei lun línsiñedun Hesusu hun, ani kaba un línchahaün ínsiñeni le lun hadügüni?

¹⁰ Ánhatün lun Hesusu kei Liráü Heowá le ábanrügüti, le lanúadirubei kei Urúei, lun ligíaba lan agumadirawa. Subudi humuti ǘnabugu lan Hesusu ani áyeiha lani ligaburi Lúguchi buidu buidu. Furendeihadün ru lan éigini houn ha lamabaña, ruti dǘgüdaguaü houn ha hírubaña ani areidaguagüdati giñe sánditiña (Mat. 14:14-21). Ariha humaali hungua ligía lan alidihabalin damuriguaü kristiánu le uguñebei weyu (Mat. 23:10). Ani subudi humuti ligía lan Urúeibei lidan Larúeihan Bungiu ani ladügüba lan katei buíduburiti luagu wafulesein ámuñegü. Ida luba harufuduni hínsiñehabu lun Hesusu? Lau hafalaruni lani hénpulu (Huan 14:21). Ligíati, aban katei le lunbei hadügüni hederegeragun hungua lun Heowá luma lun habadiseirun.

11. Ka resun súdinitimabei lun habadiseirun, ani ka uagu?

¹¹ Ka resun súdinitimabei lun habadiseirun? Darí wamuti lidan dimurei le lariñagubei Hesusu luagu lugumadin Bungiu le súdinitimabei. Ariñagati: “Hínsiñela lubeiti Babureme le Bubungiute bun tau sun banigi, tau sun buani, lau sun bisaminan, lau sun bere” (Mar. 12:30). Arufuda lumuti san dimurei burí le ínsiñeni le hasandirubei luagu Bungiu?

12. Ka uagu hínsiñe lubéi Heowá hun? (Ariha huméi giñe dibuhu).

¹² Anihein saragu resun súdiniti lun línsiñedun Heowá woun. Kei hénpulu, furendeihadün lídanñein lan Bungiu “lubuñe ibagari” ani ligía lan íchugubalin “sun buiti le ichugúbei woun,  le úabei mégeiti luagu” (Sal. 36:9; Sant. 1:17). Sun katei buiti le wámabei, Heowá íchugubalin, Bungiu le gíchigadibei ani hínsiñetiwa lun saragu.

13. Ka uagu espechali lubéi idewesei lánina esefuruni?

¹³ Lebegi esefuruni, ligía aban idewesei espechaliti le ñǘbuinbei lúmagiñe Heowá. Ka uagu gayara lubéi wariñaguni le? Samina wamá luagu óunwenbu ínsiñeni le lasandirubei Heowá luma Hesusu hámagua. Ariñagati Hesusu: “Hínsiñetina lun Núguchi” ani Hínsiñeti “Núguchi nun” (Huan 10:17; 14:31). Ábatima buidu lan hanaagun houngua eibu lásügürün saragu milu míñunu irumu (Ari. 8:22, 23, 30). Guentó samina humá luagu lanarime igarigu le lasandirubei Heowá lau lígirun lun lasufurirun liráü ani hilá ligía. Gama lumoun, wéiriti hínsiñe gürigia lun Heowá, darí lun lederegeruni Liráü le hínsiñebei lun kei sákürifisiu gayara láamuga hawinwandun huguya hama amu gürigia lun súnwandan (Huan 3:16; Gal. 2:20). Anihein funa san resun wéiritimati luéi le lun hínsiñe lan Bungiu hun?

14. Ka katei buítimati gayaraabei hanúadiruni lidan hibagari?

¹⁴ Wéiritimahali ínsiñeni le hasandirubei luagu Heowá eibu afurendeireina humá luagu. Chóuruti busén humá lun buídutima lan humadagua luma Heowá guentó luma lun súnwandan, ani gayaraati ítara lan. Lau le hariñagubei luma le hadügübei, gayaraati hagundaaragüdünu lanigi Heowá. Ligía línchahanbadün Heowá  lau ínsiñeni lun hadügüni (Ari. 23:15, 16). Le hanúadirubei hadügün lau hibagari, larufuduba anhein hínsiñe lubéi Heowá hun le tímatimaati (1 Huan 5:3). Labagaridun gürigia aban ibagari ítara kei labusenruni Heowá ligía katei buídutimabei le gayaraabei hanúadiruni lidan hibagari.

15. Ida luba gayara lan harufuduni hínsiñe lan Heowá hun?

¹⁵ Ida luba gayara lan harufuduni hínsiñehabu luagu Heowá? Furumiñe, lunti hadügün aban furíei espechaliti lun, lun hariñaguni lun hederegeraali lan hibagari lun Bungiu ábanrügüti, le inarüniti (Sal. 40:8). Lárigiñe, lunti habadiseirun lun hasubudiruni sun gürigia deregeguaadün lan hungua lun. Kei buga wariñaguni lidan aturiahani le, barüti badisei ugundani, ani lúmagiñe dan ligía lun lubaruaguóun, aba hagumeserun aban iseri ibagari. Lúmagiñeme weyu ligía lun lubaruaguóun, hawinwanduba lun hadügüni lugundan Heowá, mama lun hadügüni hugundan guánarügü (Rom. 14:8; 1 Fe. 4:1, 2). Gayaraati aban lan awanseruni lira, ani chóuruti ítara liña lan, gama lumoun ruti katei le aban chansi hun lun habagaridun aban ibagari le buídutimabei. Ariha wamá ka lan uagu.

16. Kei lariñaguni Sálumu 41:12, kaba afayeiruahaü líchiga Heowá houn ha ederegerubalin habagari lun lun heseriwidun lun?

¹⁶ Heowá, ligía Bungiu le gíchigaditimaabei. Meberesenga átiriñein lan híchugun lun, súnwandan líchuguba lan lóugiñe le híchugubei lun (Mar. 10:29, 30). Íbini guentó, lidan ubóu gumumémeeli le, líchuguba aban ibagari le barüti ugundani hun le gumuti. Ani mámarügübei ugundani le líchiga hun. Iseri ibagari le hagumeserubei lau badisei, moun lumuti lagumuchun; gayaraati heseriwidun lun Húguchi Bungiu le hínsiñebei hun lun súnwandan. Aganwoundeina luba ínsiñeni le hasandirubei luagu Heowá, ani gayaraabei hawinwandun kei ligía, lun súnwandan (aliiha huméi Sálumu 41:12).

17. Ka katei úabei luma Heowá le gayaraabei híchuguni lun?

¹⁷ Lau hederegeragun hungua lun luma lau habadiseirun, gayaraati híchuguni le gebegitimabei lun Húguchi Bungiu. Sun katei buiti le húmabei luma ugundani le hasandirubei, Heowá íchugubalin hun. Gayaraati híchugun lun le adügübalin sielu luma ubóu aban katei le úati luma: húaragun luma heseriwidun lun magurabahanga  ni kata (Hob. 1:8; 41:11; Ari. 27:11). Úati amu katei buídutimati le gayaraabei hadügüni lau hibagari kei le. Chóuruti ínsiñeni lan le hasandirubei luagu Heowá ligía lan resun wéiritimabei lun habadiseirun.

18. Ka burí álügüdahani gayaraabei hadügüni huniwagua?

¹⁸ Lárigiñe sun le ariha wamaalibei, habadiseiruba san? Huguyarügüñein gayara hóunabuni álügüdahani le. Gayaraati líderagunün álügüdahani le lun hálügüdagun hungua: “Aranseedina san lun nabadiseirun?” (Adü. 8:36). Haritagua huméi ǘrüwa resun le akutiha wamaalibei lidan aturiahani le lun habadiseirun. Furumiñe, ínsiñeni le hasandirubei luagu inarüni luma luagu irichaü. Álügüdagua humá hungua: “Busentina san lachülürün weyu lun narihini hariñaguni sun gürigia inarüni luma lun hadügüni le buídubei?”. Libiaman, ínsiñeni le hasandirubei luagu Hesukrístu. Álügüdagua humá hungua: “Busentina san lun Larúeihanina Liráü Bungiu? Ani busentina san nafalaruni lani hénpulu?”. Ani le lǘrüwan ani létima súdinitimabei, ínsiñeni le hasandirubei luagu Heowá?. Álügüdagua humá hungua: “Busentina san neseriwidun lun Heowá ani gúndaagüdanounme lanigi?”. Anhein anha lubéi hóunabagüleibei lun burí álügüdahani le, ka uagu mabadiseirungidün lubéi? Ka eredahabalün? (Adü. 16:33).

19. Ka uagu moun lumuti lubéi heredehani habadiseirun? Ru humá aban hénpulu (Huan 4:34).

¹⁹ Anhein ibidiñegili lubéi hun anhein lunti lubéi habadiseirun, samina humá luagu hénpulu le líchugubei Hesusu (aliiha huméi Huan 4:34). Ariñagati Hesusu ladügüni lan lugundan Lúguchi ítara liña lan lun kei éigini. Ka uagu? Ladüga adügati éigini buiti woun. Subudi lumuti Hesusu luagu sun lan le lamuriahabei Heowá wámagiñe barǘ lan buiti woun. Mamuriahanti Heowá wama lun wadügün katei le gayaraabei ladügün wuribani woun. Ligía busén lubéi Bungiu lun habadiseirun (Adü. 2:38). Ligíati gayaraati hachoururuni ánhaadün lan gaganbadi lun gumadi luáguti badisei, lanügüba saragu buiti hun. Anhein ichugúa éigini létima semeetimabei lidan sun ubóu hun, ma héigiñein hamuga? Ligíati, moun lumuti lubéi heredehani habadiseirun.

20. Kaba wariha lidan leweñegua aturiahani?

²⁰ Ka eredehabaliña fiu gürigia luéi habadiseirun? Háfuga samina hamá maranserungiña lan. Inarüni hederegeragun lan hungua lun Heowá luma habadiseirun ligía katei súdinitimabei lun hanúadiruni hadügün lidan hibagari. Ligíati, samina huméi buidu, áfaagua humá saragu lun hararamagun asaminara luma lun aranseñu humá. Ligíati, anhein busén hubéi habadiseirun, kaba íderaguaün lun hadügüni? Warihibei lidan leweñegua aturiahani.