1, 2. Anhein maranserungidün lubéi lun habadiseirun, ka uagu moun lumuti lubéi lábürühan harüna? (Ariha humóun iyawaü to luáguboun tidáü garüdia).

 ANHEIN háfaaguña lubéi lun habadiseirun, buiti hadüga. Aranseedün san lun habadiseirun? Anhein sandiguaadün lubéi hungua aranseedün lan ani úaratiña wéiyaaña lidan afiñeni huma, meredeha huméi habadiseirun. Ítara luba gunda lan hibagari lau heseriwidun lun Heowá.

² Ánheinti ariñawagúa hun maranserungidün lan lun habadiseirun? O Anhein sandigua hubéi hungua maranserungidün lan? Mábürühala harüna, gayaraati hasigirun áfaagua lun habadiseirun, meberesenga anhein nibureingidün lubéi o derebuguhadün lan.

3. Ka lariñagubei wügüri etiopíana lun Felipe, ani ka álügüdahani lunbei wadügüni wóuniwagua? (Adügaü 8:36, 38)

³ (Aliiha huméi Adügaü 8:36, 38). Aba lálügüdüni wügüri Etiopíana ligía Felipe: “Siñati san nabadiseirun?”. Furanguti busén lan meha wügüri ligía labadiseirun. Gama lumoun, aranseñu liña meha san lun labadiseirun?

4. Ida liña larufuduni wügüri etiopíana busén lan lasigirun afurendeira?

⁴ Liábiña meha wügüri etiopíana ligía “Herusaléngiñe lárigi lidin áhuduragua lun Bungiu” (Adü. 8:27). Ligíati chóuruti aban lan hádangiñe gürigia ha adügagubaña houngua huríume. Aturiaha lumutu meha Abürüdǘni Ebüréu ani tidan lafurendeira luagu Heowá. Lau sun lira, busenti meha lasigirun afurendeira lanwoun le subudi laalibei. Ligíati, ka meha ladügübei wügüri etiopíana dan le ladunragunbei Felipe luma luagu üma? Laliihañoun meha hóuburatu tani liliburun profeta Isaíasi (Adü. 8:28). Aban meha ariñahani huliliti lira. Úati gufuruma lan wügüri  etiopíana ligía láurügü fiu ariñahani; busenti meha lasigirun afurendeira.

5. Ka ladügübei wügüri Etiopíana lau le lafurendeirubei?

⁵ Aban meha wügüri wéiriguti ligía, leseriwiduña meha tun Kandase, to lurúeite Etiopía. “Ligía giñe gamaniharibei lau sun tiseinsun” (Adü. 8:27). Chóuruti gibe lan meha wadagimanu lau ani wéiriti meha luberesegun. Íbini ítara sagati dan lun lidin áhuduragua lun Heowá. Úati gufuruma lan láurügü lafurendeiruni inarüni; ínchaha lumuti giñe le lafurendeirubei lun lawinwanduni. Aranseñu liña meha lun laweiyasuhan Etiopíagiñe lun Herusaléun lun láhuduragun lun Heowá. Chóuruti dise lan meha wéiyaasu ligía ani seru ligía, gama lumoun busenti meha wügüri ligía láhuduragun lun Heowá, meberesenga áfaaguni le lunbei meha ladügüni.

6, 7. Ka ladügübei wügüri etiopíana lun laganwoundun ínsiñeni le lasandirubei luagu Heowá?

⁶ Afuranguagüda lumuti Felipe lun wügüri etiopíana inarüni súdiniti, le ibidiñegubeiti lun wügüri ligía, kei burí Hesusu lan Mesíasibei (Adü. 8:34, 35). Chóuruti aba lan taweiridun lanigi wügüri etiopíana le, lau lasubudiruni sun katei le adüga laalibei Hesusu luagu. Kábati ladüga lárigiñe lasubudiruni katei le? Gayaraati hamuga meha lerederun kei lubéi láurügü le lasubudirubei. Gama lumoun, kei weiri lubéi ínsiñeni le lasandirubei luagu Heowá luma luagu Hesusu aba labadiseirun lun aban lan lani Hesusu disipulu. Ábati larihin Felipe aranseeli lan wügüri le lun labadiseirun, ligíati labadiseirunbalin.

⁷ Líderagubadün lani wügüri etiopíana hénpulu lun haranserun lun habadiseirun. Gayaraabei hariñagun lau ichouruni kei ligía: “Siñati san nabadiseirun?”. Warihaali ida luba lan gayara lan hadügüni ítara kei ladügüni wügüri etiopíana le: lau hasigirun afurendeira, lúmati hawinwanduni le hafurendeirubei luma lun hederebudagüdüni hínsiñehabu luagu Heowá.

8. Según Huan 17:3, ka lunbei hadügüni?

⁸ (Aliiha huméi Huan 17:3). Ínchaha lumutün san dimurei le lariñagubei Hesusu lun hagumeserun aturiahoun Bíbülia? Ligía asuseredubei houn saragu gürigia. Gama lumoun, ínchaha lumutiwa giñe dimurei burí le lun wasigirun aturiaha. Magumuchunbei hasubudiruni “Bungiu buidu buidu” (Apur. 3:11). Wasigiruba afurendeira lun súnwandan. Éibutimaame wasubudiruni Heowá, éibume wayarafadun lun (Sal. 73:28).

9. Ka lunbei wadügüni lárigiñe wafurendeiruni arufudahani le ménrengunbei tídangiñe Bíbülia?

⁹ Dan le lagumeserun aban gürigia afurendeira luagu Heowá, gumeseti lau le unbei lagúara apostolu Pábulu “katei létima ménrengunbei tídangiñe Lererun Bungiu”. Tidan  gárada to labürühaboun houn ebüréuna, úati mini lan le lagidaruñein lan apostolu Pábulu lisudinin “arufudahani le ménrengubei”; lubaragiñe lira lariñaguña ítara liña lan kei míligi le látubei aban irahü figigili (Ebü. 5:12; 6:1). Ínchaha lumutiña giñe kristiánugu lun hafurendeirun lóugiñe arufudahani le ménrengunbei luma lun hafurendeiruni inarüni huliliti le tídangiñeti Lererun Bungiu. Sanditün san aban lanarime ínsiñeni lun habusenrun hasubudirunu? Aranseedün san lun háfaagun lun hasigirun awansera luma lun hasigirun afurendeira luagu Heowá luma luagu le labusenrunbei ladügün?

10. Ka uagu hénrengu lubéi aturiahani houn saragu gürigia?

¹⁰ Houn fiu gürigia, gayaraati hénrengu lan aturiahani. Agiati hun? Arufudahóuati san aliihani luma aturiahani hun leskuelarugu? Hínsiñeti san aturiahani hun? O subudi humaali luagu mínsiñe lan aliihani hun? Anhein ítara liña lubéi, mámarügüñein hun lasusereda katei le. Gama lumoun, aranseñu liña Heowá lun líderagunün. Macharati Heowá ani ligía Máisturu le buídutimabei.

11. Ka uagu Heowá lubéi Wamaisturunbei le buídutimabei?

¹¹ Ariñagati Heowá ligía lan Wamaisturunbei (Isa. 30:20, 21). Dan le larufudahan arufudati gaguraasuni, ínsiñehabuni luma gunfurandaü, ani súnwandan letenirun lun katei buiti le hadügübei ha aturiahabaña luma (Sal. 130:3). Mamuriahanti lóugiñe le gayara wabéi adüga. Mabulieida waméi ligía lan adügübalin wasesun, aban lubuidun idewesei le líchugubei woun (Sal. 139:14). Lanwoun lira, adüga lumutiwa lau aban igaburi lun wabusenrun wafurendeirun, ani busenti lun wasigirun afurendeira lun súnwandan luma lun wagundaarun lau le wafurendeirubei. Ligíati lúmagiñe guentó mosu wáfaagun lúntima waganwoundagüdüni wasubudin luagu inarüni le tídanbei Lererun Bungiu (1 Fe. 2:2). Ka gayaraabei líderagunün? Áfaagua humá lun hibihini le habusenrubei hadügün, aliiha humóun ani aturiaha humounme Bíbülia sagü weyu (Hos. 1:8). Lau lídehan Heowá, hasandiruba ínsiñeni luagu taliihóun Bíbülia ani hafurendeiruba luagu.

12. Ka uagu lunti lubéi waturiahani libagari luma lani Hesusu ministeriu?

¹² Sagá humá dan lun hararamagun asaminara luagu libagari luma luagu lani Hesusu ministeriu. Ladüga lun leseriwidúniwa lun Heowá, lídantima dan hénrenguti le mégeiwati lafalarún lani Kristu hénpulu lau úaraguni (1 Fe. 2:21). Furanguti lariñaguni Hesusu houn lani disipulugu hagagibudaguba lan luma lénrengunga (Luk. 14:27, 28). Lau sun lira subudi lumuti úaraguamemebaña lan kei ligía (Huan 16:33). Aturiaha huméi libagari Hesusu ani áfaagua humá lun háyeihani ligaburi sagü weyu.

13. Ka lunbei hasigirun amuriaha luma Heowá, ani ka uagu?

¹³ Le wabusenrubei wibihin lau waturiahan mámarügü lun wabuinchun lau subudi. Le wabusenrubei wibihin wasubudiruni Heowá, lun línsiñedun woun luma lun wafiñerun luagu (1 Ko. 8:1-3). Ítarameme humá aganwoundagüdei hufurendein luagu Heowá, sigí huma amuriaha lanwoun hafiñen luma (Luk. 17:5). Lóunabubei hafurieidun lau areini. Anhein derebugu lubéi hafiñen luagu Wabungiute, gayaraabei hasigirun awansera (Sant. 2:26).

14. Ida liña lariñaguni Féduru lisudinin wadügüni le wafurendeirubei? (Ariha huméi giñe dibuhu)

¹⁴ Ariñaga lumuti apostolu Féduru súdini lan hawinwanduni lani Hesusu disipulugu le hafurendeirubei. Afuranguagüda lumuti lau layusuruni lani Noé hénpulu. Ariñagati Heowá lun Noé lóunahaba lan aban guran lun lagünrinchaguniña sun gürigia wuribatiña ha awinwandubaña  lidan dan ligía. Gama lumoun, úati buídurügü lan lasubudiruni lasusereduba lan katei ligía. Mosu meha ladügün Noé tuma lani weiriou hama lisaanigu somu katei lun hesefuruni habagari. Yusu lumuti Féduru dimurei “lidan le lagurabahani tagumuchún ugunei to ladügüboun Noé” lun layanuhan luagu dan le lubaragiñebei guran (1 Fe. 3:20). Adüga lumuti Noé hama liduheñu le meha lariñagubei Heowá houn lun hadügün aban óunwenbu árüka (Ebü. 11:7). Lárigiñe, aba lagoubaguagüdüni Féduru le ladügübei Noé luma badisei. Ariñagati: “Dúnati ligía, ítara liña hamuga kei lidunarina badisei guentó, le ídangiñebei wanügǘwa lun wasalbarun” (1 Fe. 3:21). Ítarameme, le hadügübei lun haranserun lubá badisei genegeguati luma le ladügübei Noé hama liduheñu lidan burí irumu le añaha lubéi adügoun árüka. Ligíati, ka lunbei hadügüni lun haranserun lubá habadiseirun?

15. Ka san mini lubéi asakürihani inarüniti?

¹⁵ Aban lídangiñe katei le lunbei wadügüni, wasakürihan tídangiñe sun wanigi luagu wafigoun (Adü. 2:37, 38). Ladügün gürigia asansiruni lidan libagari ligía asakürihani inarünibei. Madügün humaali san katei le mínsiñebei lun Heowá, kei burí magíaguni, agumulahani, hayanuhan bulagiadi o hayusurun dimurei le abuleseihati? (1 Ko. 6:9, 10; 2 Ko. 7:1; Efe. 4:29). Anhein mígirun humagili lubéi, sigí humá áfaagua lun hibihini. Gayaraati hayanuhan luma íbiri le íchugubei aturiahani hun o hama wéiyaaña lidan afiñeni anhein megei hubéi ídemuei o adundehani. Ánheinti nibureingidibu lubéi ani abunhagua awinwanda hama bagübürigu, gayaraati bamuriahan ídemuei hama lun híderagunibu lun bígiruni furumiñeguarügü échuni le mígirunbei lun babadiseirun.

16. Ka mini lubéi wawinwandun kei labusenruni Heowá?

¹⁶ Súdiniti giñe lun hadügün katei lánina láhudurawagun lun Bungiu. Lunti giñe hidin adamuridagua luma lun híchugun óunabagülei (Ebü. 10:24, 25). Ani danme le hiridúniwa kei apurichihati mabadiseirúngili, apurichiha humá lau ubebeni. Harihubei éibutima lan hadügüni, hínsiñetimabei hun (2 Tim. 4:5). Ánheinti nibureingidibu lubéi ani abuhangua awinwanda hama bagübürigu, alügüdaguabá bungua: “Súnwandan san haritaguagüdünina nagübürigu mosu lan nidin adamuridagua o apurichiha? O adüga numuti ladüga busén  nan?”. Dan le badügüni katei le ladüga busén ban, arufudati le afiñe ban, arufudatibu giñe hínsiñe lan Heowá bun ani teinki bani. Dan le hadügüni le labusenrubei Bungiu, habagariduña “deregeguañu hungua lun Bungiu sunsuinagubei”; ítara liña kamá hamuga híchuguña idewesei lun Heowá (2 Fe. 3:11; Ebü. 13:15). Hínsiñeti lun Heowá wíchugun idewesei lun ladüga busén wamá, mama ladüga wafosurún (ariha huméi giñe 2 Korintuna 9:7). Gúndaatiwa dan le wíchuguni le buídutimabei lun Heowá.

17, 18. Kaba igaburi íderaguaün lun habadiseirun, ani ka uagu? (Ariñawagúni 3:3-6).

¹⁷ Lidan aünha lan áfaagua lun habadiseirun, hadunraguba luma turobuli. Másiñati hadügüba lan fiu gürigia bula hau o héibaahouba lan ladüga hafiñen (2 Tim. 3:12). O másiñati háfaaguña lan lun hígirun somu igaburi mabuidunti, gama lumoun anihein dan ábaya héiguadun lidoun. Háfuga samina humá maranserungidün lan lun habadiseirun, ani adügati lira lun hírudun. Kaba íderaguaün lun mábürühan lan harüna? Líderagubadün aban lubuidun igaburi súdiniti: ínsiñeni le hasandirubei luagu Heowá.

¹⁸ Ínsiñeni le hasandirubei luagu Heowá ligía aban katei le buídutimabei huma (aliiha huméi Ariñawagúni 3:3-6). Anhein hínsiñe lubéi Heowá hun lau sun here gayaraabei hidin hubaruaguóun íbini laganagua turobuli lidan ibagari. Ariñagatu Bíbülia saragu wéiyaasu arufuda lan Heowá ínsiñeni inarüniti hawagu lubúeingu. Mini lan le mígirun lumutiña lan, ani súnwandan lasandiruba lan ínsiñeni hawagu (Sal. 100:5). Ladüga adüga lanün Bungiu lenege guánarügü (Agu. 1:26). Ligíati, ida luba harufudun ínsiñeni libe le?

19. Ka gayaraabei hadügüni lun heteingiruni Heowá luagu le ladügübei huagu? (Galasiana 2:20).

¹⁹ Le lunbei hadügüni furumiñe, lun geteingiradi humá (1 Tesa. 5:18). Álügüdagua humá hungua sagü weyu: “Ida liña larufuduni Heowá nun uguñe hínsiñe nan lun?”. Ani lárigiñe danme le hafurieidun lun, ru humá seremei lun luagu katei le líchugubei hun. Ariha huméi giñe ínsiñeni le larufudubei kei aban katei espechaliti hun, ítara kei ladügüni apostolu Pábulu (aliiha huméi Galasiana 2:20). Ani álügüdagua humá hungua: “Busentina san narufuduni lun Heowá hínsiñe lan nun?”. Líderagubadün ínsiñeni le hasandirubei luagu lun méiguadun humá lidoun óuchawaguni, luma lun hagagibudagun luma turobuli ani lun hasigirun adügei  le lagurabubei Heowá húmagiñe. Ítara luba harufuduni sagü weyu hínsiñe lan Húguchi le siélubei hun.

20. Ka mini lubéi wederegeragun woungua lun Heowá, ani ka uagu súdini lubéi wadügüni katei le?

²⁰ Lau lásügürün dan, línchahabadün lueirin ínsiñeni le hasandirubei luagu Heowá lun hadügün aban furíei espechaliti lun lun hederegeragun hungua lun. Ani danme le habadiseirun, gachansinbadün lun lánibadün lan Bungiu lun súnwandan. Dan le hederegeragun hungua lun Heowá, furamasetün lun heseriwiduba lan lun lidan dan buiti luma lidan dan hénrenguti. Ábanrügüñein wéiyaasu lidan ibagari ladügǘniwa füramasei le. Inarüni aban lan katei sériuti ederegeraguni unguaü. Gama lumoun, haritagua huméi: lídangiñe lan sun katei le hanúadirubei hadügün, ederegeraguni ungua, ligíatima lan le buídutimabei (Sal. 50:14). Láfaaguba Satanási lun lagumuchun lau ínsiñeni le hasandirubei luagu Heowá lun hígiruni heseriwidun lun. Gama lumoun, mígira humá lun libihini katei le (Hob 27:5). Lueirin ínsiñeni le hasandirubei luagu Húguchi le siélubei, líderagubadün lun hagunfulirun lau füramasei le hadügübei lun luma lun hayarafaduntima lun.

21. Ka uagu wariñaga lagumeseharügüñein lan weseriwidun lun Heowá badisei?

²¹ Lárigiñe hederegeragun hungua lun Heowá, ayanuha humá hama wéiyaaña lidan afiñeni lun hasubudiruni, ka lan amu katei lunbei hadügüni lun gayara lan habadiseirun. Gama lumoun, haritagua huméi mama lan badisei lagumuchagülebei weseriwidun lun Heowá, lubaragiñe lira lagumeseharügüñein aban ibagari magumuchaditi lidan weseriwidun lun Heowá. Ligíati, héregüda huméi ínsiñeni le hasandirubei luagu Húguchi le siélubei lúmagiñe guentó ani áfaagua humá lun aganwoundeina lan ínsiñeni le, sagü weyu. Líderagubadün katei le lun habadiseirun. Ábanbei weyu le mabulieidun hubéi wéyume ligía. Gama lumoun, lagumeseharügüñein heseriwidun lira. Adüga huméi sun hiyaraati lun haganwoundagüdüni ínsiñeni le hasandirubei luagu Heowá luma luagu Liráü.