Lun hamuga anha lan lóunabagülebei álügüdahani le, ida liña hamuga san wasandiragun woungua? Ariha wamá aban hénpulu. Aba láfaragun lisaani aban íbiri lungua. Wéiriti igarigu le lasandirubei íbiri le. Aba lagumeserun álügüdagua lungua anhein subudi laali lubéi Heowá le lunbei lasuseredun ani anhein desidírühali lubéi luagu dandu lan ligía kei lani weiriou gayara habéi lan lamiselu ligía awanda. Híruti wásügürüba lan besafu wádangiñe lídangiñe turóbuli wéinamuti lidan ubóu le. Gama lumoun, lunti san wasaminarun Heowá lan ahandilihabalin sun le asuseredubei woun?

Anhein wakutiha 1 Korintuna 10:13, wíchuguba fe luagu marufudahan tan Bíbülia luagu ariha lani Heowá furumiñe halía lan lébeda wawandun ani lárigiñe aba lan lanúadiruni óuchawaguni le lunbei wawanduni. Ariha wamá gádürü resun le uágubei wariñagei katei le.

Le furumiñeti resun, ladüga ru lan Heowá ubafu houn gürigia lun desidírü hamá. Busenti Heowá lun desidírü wamani kaba lan wadüga (2 Lúrudu 30:19, 20; Hosué 24:15). Ánhawa desidírü katei le auti lagundaara Heowá, gayarabei wachoururuni ladundehabadiwa lan (Ariñawagúni 16:9). Gama lumoun, ánhawa desidírü wuriba, mósume wasufuriruni lani resultóu (Galasiana 6:7). Lun hamuga anúadaha lani Bungiu óuchawaguni le lunbei wawanduni, inarüni hamuga san luagu líbüre wamá lun desidírü wamá?

Le libiaman resun, ladüga móunigirun lániwa Heowá luéi “katei le asusereduti sódini” o le magurabúnti (Apurichihati 9:11). Gayarati lasufurirun aban gürigia aban óunwenbu danaguaü ladügarügü lídanñein lan aban fulasu lidan lóurate lasuseredun somu katei mabuidunti. Ayanuhati meha Hesusu luagu aban danaguaü le ídanbei hóunwegua 18 gürigia dan le lábürühan aban wáyelesi hawagun. Furanguti meha lariñaguni mama lan Bungiu adügübei lun hóunwegun gürigia hagía (Lúkasi 13:1-5). Marichati hasaminarun gürigia lubaragiñe lan lasuseredun aban danaguaü desidírü laali lan Bungiu kaba lan ounwe ani kaba lan awinwanda.

Le lǘrüwan resun, mosu larufuduni kada aban wádangiñe úaragua lan lun Heowá. Ariñagati Satanási seriwi wamá lun Heowá luágurügü katei burí le líchugubei woun ani múaragunbadiwa lan lun ánhawa asufurira óuchawaguni (Hobu 1:9-11; 2:4; Arufudúni 12:10). Lun hamuga lóunigiruniwa Heowá luéi fiú óuchawaguni, genegeti hamuga luagu linarün lan meha Satanási le lariñagubei.

Le ligadürün resun, desidírüti Heowá masubudirun lani sun le lunbei lasuseredun woun ámuñegü. Anhein busén gayarati lasubudiruni (Isaíasi 46:10). Gama lumoun, ariñagatu Bíbülia anihein lan katei luáguti ámuñegü le himei lumuti Heowá masubudirun lani (Agumesehani 18:20, 21; 22:12). Ka uagu? Ladüga hínsiñehabu lan ani richati ani inebehabuti giñe lun chansi le líchugubei woun lun desidírü wamá (2 Lúrudu 32:4; 2 Korintuna 3:17).

Ligíati, ka san labusenrubei Pábulu lariñagun dan le lariñagunbei mígirunbei lan Heowá lun wóuchawagun lóugiñe le gayara wabéi awanda? Layanuhaña Pábulu luagu ligaburi líderaguniwa Heowá dan le wásügürüña lan lénrengunga, mama luagu le ladügübei lubaragiñe * (ariha huméi aburüdǘni). Ánhawa afiñera luagu Heowá, líderagubadiwa awanda furumiñeguarügü lénrengunga (Sálumu 55:22). Guentó ariha wamá bián resun le uágubei lariñaga Pábulu mígirunbei lan Bungiu lun wóuchawagun lóugiñe le gayarabei wawanduni.

Le furumiñeti resun, ladüga masufurirungidiwa lan óuchawaguni “le hásiñarun gürigia awanda”. Mini lan le sun lan gürigia ha awinwandubaña lidan ubóu le lani Satanási gaturobulintiña. Sun wagía wásügürüba lídangiñe turóbuli hénrenguti o íbini  lídangiñe somu lamiselu. Gama lumoun, ánhawa afiñera luagu Heowá, gayarabei wawanduni óuchawaguni ani kipu wagíame úaraguni (1 Féduru 5:8, 9). Lidan fiú bérusu le lubaragiñebei 1 Korintuna 10:13, ayanuhati Pábulu luagu fiú óuchawaguni le meha hasufurirubei ísüraelina lidan fulasu mageirawati (1 Korintuna 10:6-11). Ha ísüraelina ha afiñerubaña luagu Heowá awanda hamuti óuchawaguni. Ánhañati ha mafiñerunbaña luagu aba maganbadi hamá ani marufuduntiña úaraguni.

 Le libiaman resun, ladüga “gúnfuliti Bungiu”. Ka mini lubéi le? Ánhawa asaminara ida liña lan líderaguniña Bungiu lumutuniña súnwandan, warihibei luagu úaragua lan ani íderagua lániña “ha hínsiñehabubaña lun ani gúnfuli haméi lugumadin” (2 Lúrudu 7:9). Ani súnwandan giñe lagunfuliruni Bungiu le füramase lubéi (Hosué 23:14). Ligía gayara lubéi wachoururun bián katei. Furumiñe, luagu mígirunbei lan Heowá lun hénrengu lan aban óuchawaguni darí lun siñá wamani awanda. Ani libiaman, luagu larufudubei lan woun ‘ida luba lan wáfuridun lídangiñe’.

Ida liña san larufuduni Heowá woun ida luba lan ‘wáfuridun lídangiñe’ óuchawaguni ánhawa afiñera luagu? Inarüni gayara lan lagidaruni óuchawaguni wawéi. Gama lumoun ariñagati Pábulu larufudubei lan Heowá woun ida luba lan wáfuridun lídangiñe o kaba lan wadüga lun wawanduni. Arufudahati le woun súnwandan lan líderaguniwa Heowá lau líchugun erei woun lun wakipurun úaraguni. Ruti erei woun lidan ámuñegueinarügü igaburi. Ariha wamá fiú.

• Ruti Heowá “dǘgüdaguaü woun lidan sun wasufurirun”, lidan amu dimurei, dan le gaturobulin wamá (2 Korintuna 1:3, 4). Gayarati líchugun darangilaü lun wasaminan tuma wanigi tau Bíbülia, lau lani sífiri sandu luma lau lídehan musu úaraguati (Matéu 24:45; Huan 14:16, Rómana 15:4).

• Gayarati ladundehaniwa Heowá lau lani sífiri sandu (Huan 14:26). Gayarati líderaguniwa lani Heowá sífiri sandu lun waritagun somu abahüdaguni luma somu ariñahani tídangiñeti Bíbülia le lunbei líderaguniwa lun desidírü wamá buidu.

• Gayarati layusuruniña Heowá lani ánheligu lun híderaguniwa (Ebüréu 1:14).

• Gayarati layusuruniña Heowá íbirigu lun líderaguniwa. Gayarati híchugun gurasu woun lau hadügün somu katei wawagu o lau dimurei burí le hariñagubei woun (Kolosana 4:11).

Ka san gunfuranda wabéi luagu dimurei le lariñagubei Pábulu lidan 1 Korintuna 10:13? Furendeitiwa manúadahan lani Heowá óuchawaguni le lunbei wagagibudagun luma. Furendeitiwa giñe ánhawa lan afiñera luagu, wawanduba lan furumiñeguarügü lénrengunga. Súnwandan líderagubadiwa lan Heowá lun gayara lan wasigirun eseriwida lun lau úaraguni.