ABAN meha wügüri le hínsiñehabuti lun Bungiu núguchi. Arthur meha líribei. Dan le nibureingili busenti meha lun minisi lan tidan ligilisi Metodista. Gama lumoun, aba lasansirun lisaminan dan le laliihanbei fiú agumeiraguagüdüni to hani Aturiahatiña Bíbülia ani aba lagumeserun adamuridagua hama. Aba labadiseirun lidan irumu 1914, dan le meha 17 irumu lau. Lidan lidaani Furumiñeti Wuribu Wéiriti, aba laguarún luagu lun lasudarahan, máhati meha ladügüni. Aba ladaürǘn luagu 10 hati Kingston (Ontario, Canadá). Dan le láfuridunbei furisunrugugiñe, aba leseriwidun kei colportor, ítara liña meha laguahóun houn prekursorugu lidan dan ligía.

Lidan irumu 1926, aba lamarieidun núguchi tuma Hazel Wilkinson. Furendei tumuti meha túguchu Hazel Wilkinson inarüni lidan irumu 1908. Au 24 lidan gádürü-hati lidan irumu 1931 nasirua nan, au habiamanbei hádangiñe gádürü isaanigu. Hínsiñetu meha Bíbülia lun núguchi ani inebehabuti meha tun, ani arufudaha lumuti katei ligía woun. Eseriwiduni meha lun Heowá súdinitimabei houn niduheñu. Ligía meha hechu wabéi apurichiha úara muna tuagu muna (Adügaü 20:20).

Lidan irumu 1939, aba lagumeserun Libiaman Wuribu Wéiriti. Lidan irumu le asigirubei, aba lamahadúniwa lun hawadigimari gefentiña luagu Heowá Canadá. Mosu meha habusuragun irahüñü lun fanidira ani eremuha haméi luremun ageiraü leskuelarugu. Dandu au kei Dorothy to namulelua, súnwandan meha hígiruniwa máisturugu lun wáfuridun lídangiñe lasali le ñein lubéi wibiha külase lidan oura ligía. Gama lumoun luagu aban weyu, aba busén tan numaistaran tágawagüdünina busiganu lau tariñagun luagu hanufude nan. Dan le náfuridunbei leskuelarugugiñe, aba habuleseirunina fiú nánigu paaná ani aba hágurunina múarugun. Gama lumoun, meferidirun numuti nuguraasun. Adügarügüti lúntima busén nan gaganbadi nan lun Bungiu lubaragiñe gaganbadi nan houn wügüriña (Adügaü 5:29).

Lidan irumu 1942, aba nabadiseirun lidan aban óunwenbu lagei duna le lídanbei fulasu le ñein lubéi hagüriahóua animaalugu. Unsu meha irumu nau. Yusu numuti nani bakechanu leskuelarugugiñe lun neseriwidun kei prekursoru lánina bakechanu, le asubudirúabei uguñe weyu kei prekursoru ídehati. Anihein meha aban irumu, aba nidin hama ǘrüwa íbirigu apurichiha houn gürigia ha áhinubaña lidan aban fulasu luagun nórute lani Ontario.

Aba nagumeserun eseriwida kei prekursoru weyu 1 lidan seingü-hati lidan irumu 1949. Lidan dan ligía aba namisurahóun nadagimein lidan tábunawagun sukursáli Canadá. Ani dan lárigiñe, aba neseriwidun ñein Betelirugu. Aba híchugunina nadagimein ñein lubéi imprimírua tan agumeiraguagüdüni, ñein nafurendeira nadagimein tau aban tídangiñe máhina to ñeinboun. Haritagua nágili mosu lan meha nawadigimaridun sagü guñoun luagu saragu dimaasu lun nídehan lidan imprimírua tan aban tiraüraü garüdia to meha ayanuhaboun luagu héibaahoun Gefentiña Canadá.

Fiú dan lárigiñe, aba nasansirún lidoun Departamentu lánina Eseriwiduni. Luagu aban weyu, mosu meha nadügün fiú álügüdahani houn fiú prekursorugu ha meha lúnbaña heseriwidun Quebec. Hasufuriruña meha íbirigu aba lanarime éibaahouni lidan fulasu ligía. Haganagua prekursorugu ha nálügüdagubaña anuhein meha Mary Zazula, lídangiñe fulasu le gíribei Edmonton (Alberta). Tídangiñetiña meha ligilisi Ortodoxa tagübürigu. Ligíati, dan le maha tubéi tuguya luma tíbugaña hígiruni haturiahanu Bíbülia, aba habugún hábiñegiñe. Badiseitiña biángubei hagía lidan sisi-hati lidan irumu 1951, ani sisi hati lárigiñe, aba heseriwidun kei prekursorugu. Lau álügüdahani burí le nadügübei houn, aba níchugun fe weiri lan línsiñe Heowá tun Mary. Haritagua nágili aba lan nasaminarun tuguya lan würi to úmaboun nabusenra namarieidun. Ani ítara liña nadügüni. Aba wamarieidun 30 lidan eneru irumu 1954, nefu hati lárigiñe wasubudiragun woungua. Aba dimaasu lárigiñe wamarieidun, aba wamisurahoun lun larufudahóun woun lun weseriwidun óunigira sirkuitu.  Lidan bián irumu le asigirubei, aba wabisidahani damuriguaü le burí luágubei nórute Ontario.

Kei le meha lawanseruña lan apurichihani lidan sun ubóu, mégeiwatiña meha hanwoun misionerugu. Aba wasaminarun tuma Mary anhein lan awanda wabaliña marín hama mabiri irumurugu luma lanarime lidiliga lidan lidaani lidiliga Canadá, gayarabei lan wawinwandun lidan furumiñeguarügü fulasu. Ligía aba lubéi woudin lidan külase númeru 27 tánina Galaadü. Lidan sedü-hati lidan irumu 1956 wagumucha, ani lidan unsu-hati chülühadiwa lun weseriwidun Brasil.

Dan le wachülürünbei Brasil, aba wagumeserun afurendeira portugués. Furumiñe gumesetiwa afurendeira ida luba lan wagumeserun aban yanu sensiyuti. Lárigiñe, aba wafurendeirun aban liraüraü yanu lun wígirunu garüdia houn gürigia. Ábati wáfuridun apurichiha. Saminatiwa meha danme lan wadarirun gürigia ha busentiña haganbuniwa ábame lan waliihan aban bérusu houn le ayanuhati luagu ibagari lábugiñe Larúeihan Bungiu. Dan le wadarirubei aban gürigia to aganbubaliwa, aba naliihani Arufudúni 21:3, 4 tun. Gama lumoun, aba nachúegun. Méchuntina meha luagu lanarime lárouga ligía. Le lúgubu, méchuduntina luagu.

Aba wounahóun eseriwida lidan uburugu le gíribei Campos (Rio de Janeiro). Guentó anihein 15 damuriguaü ñein. Anhein dan le wachülürünbei ábanrügüñein meha liraüraü sétanu tuma aban muna ñein lubéi heredera 4 íbirigu würiña: Esther Tracy, Ramona Bauer, Luiza Schwarz tuma Lorraine Brookes (lúgubu tiri dan le maríeiharu Wallen). Tidan haban misioneru tuguya ídeha meha lidan tachibawagún daüguaü luma áluaha watu lun ábouguni nifisiutebei. Aban weyu leindi guñoun, lárigiñe waturiahanu garüdia Atalaya, aba nayanuhan tuma Mary luagu katei le wadügübei weyu ligía. Temeraaguña meha luagu aban haláü tau aban tiraüraü ichügübarari lábugiñe tichügü. Dan le tiñuragun ñéingiñe, aba táfuridun aban hewe tábugiñegiñe ichügübarari! Ma lanarime chagaguaü oura ligía, darí náfarunu hewe.

Kéiburi aban irumu wau afurendeira portugués, aba wagumeserun eseriwida lidan sirkuitu. Seriwitiwa lidan fulasu burí le ñein lubéi ua lan leiti. Aweiyasuhatiwa meha luagu gabayu luma tidan kareta ani múarugu meha warumuga. Luagu aba weyu, aba woudin apurichiha lidan aban fulasu díseti. Aba woudin tidan íngiini lidoun aban fulasu le ligibuagubei wübü ani ñein wáhayara aban rumu. Aba tóunahan sukursáli 800 garüdia woun lun wapurichihan. Mosu meha waweiyasuhan saragu wéiyaasu tidoun áfisi tani koréu lun wanügünu gafu tau garüdia burí tuguya.

Lidan irumu 1962, aba tadügǘn Leskuela houn wéiyaaña lidan afiñeni hama ídehatiña lidan damuriguaü lidan saragu fulasu Brasil. Sísiñein hati nau aweiyasuha lidoun ámuñegueinarügü fulasu sin Mary. Rútina külase Manaos, Belém, Fortaleza, Recife luma Salvador. Dan le Manaos nubéi, aba nadügün aransehani lun ladügǘn aban adamurini lánina distritu tidan aban tiáturu lánina ópera. Hanarimeti láhuyun huya dan ligía darí lun ua lan duna harumati buídurügüti lun watun ani úati meha giñe aban fulasu buiti lun weigin lidan adamurini ligía. Aba nayanuhan luma aban hábuti súdara ani aba nafuranguagüdüni turóbuli ligía lun. Buiti lóunabun ani aba lídehan lun wibihini duna darí lagumuchun adamurini. Aba giñe lóunahan súdaragu lun  híchugun bián kianpu wéinamutu, lun gayara lan wayusurunu kei gusina luma éigagülei.

Lidan anangüra lan aweiyasuha, aba tapurichihan Mary lidan fulasu le ñein tubéi burí bísinisi ani mabusenruntiña meha gürigia hagía haganbun ni kata tuagu Bíbülia. Portugalna meha gürigia hagía ani aba houdin Brasil lun hadügün seinsu. Aba teferidiruni Mary tugundan ani aba tariñagun houn íbirigu: “Portugal lagumuhóun ageiraü le ñein lubéi nabusenra nawinwandun”. Murusun dan lárigiñe, aba wibihin aban gárada. Aban meha amisuragülei lun woudin eseriwida Portugal, ani máhawañein meha lun apurichihani lidan fulasu ligía. Aba talouchun Mary! Gama lumoun, ánhatiwa lun amisurahani ligía ani aba woudin Portugal.

Aba wachülürün Lisboa (Portugal) lidan widü-hati irumu 1964. Hénrenguti meha habagari íbirigu ñein hadüga súdara. Ligía wasaminarunbei lun máluahan wamaniña íbirigu dan le wachülürünbei ñeinhin. Furumiñe, aba wáhayarun aban rumu. Dan le wibihinbarun wagaradan, aba wáhayarun aban rumu le wéiritimati. Seingü hati lárigiñe, aba wayanuhan hama íbirigu ha tídanbaña sukursáli. Ma wagundan dan le gayara lubéi woudin lidan aban adamuridaguni.

Kei le máhawa lubéi meha lun hawadigimari gefentiña luagu Heowá, aba meha tadourúniwa Luban Adamuridaguni ani aba meha ladügün adamuridaguni tidan burí haban íbirigu. Súnwandan meha houdin súdaragu asagarahoun haban Gefentiña. Ani barüwatiña giñe saragu íbirigu dandu wügüriña kei würiña lidoun fulasu le ñein lubéi heredera súdara lun hálügüdawagun. Aba meha hóuseruniña wuriba lun hafosuruniña lun hariñaguni hiri íbirigu ha anügübalin ubaraü lidan damuriguaü. Ligía aba lubéi mayusurun hamani íbirigu lúgubu hiri lun hóunigiragun houngua. Lérügüñein meha furumiñeti hiri hayusura.

Súdinitimati meha woun lun heresibirunu íbirigu agumeiraguagüdüni, ladüga tuguyaba meha íderaguaña lun wawandun. Aba meha tabürühani Mary arütíkulu burí lánina aturiahani tídangiñe garüdia La Atalaya tuma amu burí agumeiraguagüdüni. Tidan meha aban gárada espechalitu tabürüdei, seriwitu meha lun ladügǘn kopia houn íbirigu.

Lidan sisi-hati lidan irumu 1966 aba ladügǘn aban aguseruni súdiniti Lisboa. Lichugúña meha hadurun 49 íbirigu ha lídanbaña damuriguaü Feijó luagu hadügün aban adamuridaguni tidan aban muna. Lun haranserun íbirigu lubá aguseruni, aba wadügün kamá hamuga au awogóu le lunbei líchugun hadurun lidan aguseruni ligía. Gama lumoun, féridi wamuti kesi ítara kei wagurabuni. Aba hadaürǘn 49 íbirigu hagía. Híbiri dáüwatiña 45 weyu, ani ha híbiri rédeitiña furisunrugu seingü hati dimí. Gama lumoun, adügati aguseruni ligía lun layanuhóun buidu wawagu. Lidan aguseruni ligía, íbini wani awogóu íridati fiú dimurei le lariñagubei aban wügüri le uágubei tayanuha Bíbülia gíriti Gamalieli (Adügaü 5:33-39). Ani fuati giñe ñunsu ligía tidan burí radiu tuma bigibigitu. Aba wagundaarun dan le lagumeserun wani awogóu aturiahoun Bíbülia ani ñüdün ligía adamuridagua.

Lidan duusu-hati lidan irumu 1966, aba niridún keisi le arihibei lau wadagimanu tidan sukursáli. Sügütina meha saragu dan etenira lun katei lánina lúrudu. Adüga  wamuti meha sun wayaraati lun líbüre hamá gefentiña luagu Heowá Portugal (Filipuna 1:7). Weyu 18 lidan duusu-hati lidan irumu 1974 ligía líbüre hamá gefentiña luagu Heowá. Aweiyasuhatiña íbirigu Nathan Knorr luma Frederick Franz lúmagiñe Merigagiñe lun hefeduhani lidaani ugundani ligía wama. Adügatiwa aban adamuridaguni le mabulieidúwaditi Oporto luma Lisboa le ídounbei hachülüra 46,870 gürigia.

Lau lídehan Heowá, aba laganwoundun apurichihani lidan fiú lídangiñe ubouhu le ñein lubéi layanuhóua Portugués, kéiburi Azores, Cabo Verde, Madeira luma Santo Tomé y Príncipe. Kei le aba lubéi aganwoundeina hamá gefentiña luagu Heowá lidan fulasu burí le, aba mégeiwa tan aban sukursáli to wéiritimatu. Ligía aba lubéi tadügǘn aban iseri. Íbiri Milton Henschel íchugubalin yanu lánina tederegerúniwa sukursáli 23 lidan gádürü-hati lidan irumu 1988. Chülütiña 45,522 íbirigu aganbei yanu ligía, haganagua añahein meha 20 misioneru ha seriwihaña Portugal.

Lidan sun irumu le sügühalibei, dandu Mary kei au furendeitiwa saragu hámagiñe íbirigu ha úaraguatiña. Kéiburi dan le nídinbei luma íbiri Theodore Jaracz abisidaha aban sukursáli, furendeitina aban katei súdiniti. Anihein meha aban óunwenbu turóbuli tidan sukursáli tuguya. Adüga hamaali meha íbirigu ha arihibaña tau sukursáli tuguya sun hayaraati lun haransehani turóbuli ligía ani wuribati meha hasandiragun houngua ladüga siñá hamani aranseha. Aba líchugun íbiri Jaracz dǘgüdaguaü houn lau lariñagun houn: “Guentó lunti wígirun lun ladügüni sífiri sandu le líbiri”. Mabulieidun nubéi giñe le lariñagubei íbiri Franz tun Mary luma nun dan le wóudinbei Brooklyn saragu irumu guentó. Dan le wamuriahanbei somu adundehani luma úara hama fiú íbirigu, aba lariñagun woun: “Maweiyasun humá ígirei fánreinti tani lóundarun Heowá le yaabei ubouagu, meberesenga ka lan suserebei. Tuguyarügüñoun adügei le lariñagubei Hesusu: apurichihei uganu buiti luáguti Larúeihan Bungiu”.

Dandu Mary kei au gúndaatiwa afalarei adundehani le líchugubei íbiri Franz woun. Haritaguatiwa giñe saragu katei buiti luáguti dan le wabisidahanbei saragu sukursáli lidan sun ubóu. Hínsiñeti woun wasubudirun lubúeingu Heowá ha ámuñegueinarügüti harumudiri luma waritaguagüdüni houn weiri lan lebegi eseriwiduni lun Heowá. Súnwandan wínchahaniña lun hasigirun eseriwida lun Bungiu.

Sügühali saragu irumu, ani biángubei wagía gúnfulihadiwa lóugiñe 80 irumu. Gíbeti tisandi Mary (2 Korintuna 12:9). Ani gagibuguatiwa giñe luma amu burí óuchawaguni. Gama lumoun, héregüda laali óuchawaguni wafiñen ani íderagua lumutiwa lun desidírü wamá úaragua wamá lun Heowá. Dan le waritaguni ida liña lan wabagari eseriwida lun Heowá, ariha wamuti luagu weiri lan lubuidun wama * (ariha huméi abürüdǘni).