BUSENTIÑA sun gürigia lun gunda lan habagari. Gama lumoun, wawinwanduña “weyu hénrenguti” lidan lagumuhóun dan le (2 Tim. 3:1). Anihein saragu katei le adügübei lun magundan hamá gürigia kéiburi, marichaü, luriban átuadi, lúan wadagimanu o lounwen somu haduhe. Íbini lumutuniña Bungiu gayaraabei hahirudagun saragu murusun murusun darí heferidiruni hagundan. Anhein ítara liña lubéi gádantiwa, kaba wadüga lunya wagundaarun?

Lun lounabún álügüdahani le, mosu gunfurandawa lan káteitima lan ugundanibei ani ka lan hadügübei fiu gürigia lun gunda hamá íbini gaturobulin hamá. Lárigiñe, warihubei ka lan lunbei wadügüni lun gúndaañu wamá luma lun waganwoundagüdüni wagundan.

Úati mini lan gunda lan aban gürigia dan le léherahan. Ru wamá aban hénpulu, másiñati weiri lan léherahan aban gürigia dan le látagun saragu. Gama lumoun, méherahanli dan le lasuruwadun ni dan le laritaguni gibe lan lituróbulin. Murusunrügüñein oura lidura lugundan. Mama ugundani inarüniti lira (Ari. 14:13).

Mítaranti ugundani. Ligía, aban katei wéiriti le asandirúbei luagu lagurabahan o gani lan gürigia somu katei buiti. Mini lan lasandirún ugundani, gunda wamá meberesenga anhein wásügürüña lubéi lídangiñe katei buiti o wuribati (1 Tesa. 1:6). Ligíati, gayaraati lasandiragun aba gürigia lungua wuriba luagu somu katei íbini gunda ñein lan. Kei hénpulu, béiwatiña apostolugu ladüga hayanuhan luagu Kristu, gama lumoun, ariñagatu Bíbülia: “Aba háfuridun apostolugu hámagiñe lúrudugu, gúndaañu lau larihiniña Bungiu keisi gürigia gadünamatiña lun hasufurirun busiganu luagu liri Hesusu” (Adü. 5:41). Furanguti, masandirun hamá ugundani luagu habeichún, gúndaatiña ladüga kipu hamá úaraguni lun Bungiu.

Úati nasirua lan ni aban lau ugundani ani máfuachunti giñe ítaraguarügü. Ka uagu? Ladüga lúmagiñe lani Bungiu sífiri sandu liabin ugundani inarüniti. Íderagua lumutiwa sífiri ligía lun wadaüragun lau “iseri igaburi” le ñéingiñe lubéi liabin ugundani (Efe. 4:24; Gal. 5:22). Ani buídutimati wagaburi dan le wagagibudagun luma idiheri lánina ibagari dan le gunda wamá.

Busenti meha Heowá lun buidu lan sun katei dan le ladügünbalin ubóu, mama lun lasuseredun katei wuribati kei le warihibei uguñe weyu. Íbini wuriba lan hóuserun gürigia, meferidirun lágili lugundan. Ariñagatu Lererun Bungiu: “Anihein ubafu luma ugundani lúbiñe” (1 Kro. 16:27). Ani aba giñe tagundaarun lanigi Heowá dan le larihini katei buiti le hadügübei lumutuniña (Ari. 27:11).

Ida luba wáyeihani Heowá? Lau madiheridun wamá saragu dan le masuseredun lan katei le wagurabahabei. Lubaragiñe weferidiruni wagundan, teni wamá lun katei buiti le wámabei ani agurabaha wamá lun labuidurun katei lau gurasu. *

 Tidan Bíbülia daritiwa saragu hénpulu hani lumutuniña Bungiu ha meferidirun hamuti hagundan íbini gagibugua hamá meha luma saragu lénrengunga. Abüraámü aban hádangiñe. Gagibuguati luma turobuli le hadügübei amu gürigia luma turobuli le adügübei lun dencha lan libagari (Agu. 12:10-20; 14:8-16; 16:4, 5; 20:1-18; 21:8, 9). Gama lumoun, meferidirun lumuti lugundan. Ka uagu? Ladüga furangu lan meha emenigini lánina lawinwandúniwa lun sun dan lábugiñe larúeiha Mesíasi lun (Agu. 22:15-18; Ebü. 11:10). Ariñagati Hesusu: “Abüraámü le meha hagücha, gúndaati meha lau lasubudiruni luagu larihibei lan nuéyuri” (Huan 8:56). Gayaraati wáyeihani Abüraámü ánhawa araramagua asaminara lau ugundani luagu sun buiti le lunbei wibihini ámuñegü (Rom. 8:21).

Ítara kei Abüraámü, téniti giñe apostolu Pábulu luma Sílasi le lupaaná lun le füramase lubéi Bungiu houn. Gayaraati meha hawandun lénrengunga ladüga derebugu lan meha hafiñen. Aba weyu, aba habeichún ani daüwa hagía. Ariñagatu Bíbülia kei burí lan “luagun amidi áriebu, ñéinñanu Pábulu luma Sílasi afurieida luma eremuha lun Bungiu” (Adü. 16:23-25). Kei sagá habéi erei lídangiñe hemenigin, sanditiña meha ugundani ladüga hasufuriruña lan meha luéigiñe heseriwidun lun Kristu. Anhein busén wabéi wáyeihaniña, mosu waritaguni buiti le wabihibei lídangiñe weseriwidun lun Bungiu lau afiñeni sun dan (Fili. 1:12-14).

Anihein giñe saragu hénpulu buiti le híchugubei íbirigu ha meferidirun habalin hagunda íbini hagagibudagun luma turobuli. Kei hénpulu, dagati aban óunweboun liñawan dan, áhuyati huya saragu ani here ligía láfurun garabali lidan unsu-hati irumu 2013 ani günringua lumuti fulasu le ñein lubéi gíbetima hamá gürigia Filipína. Günringua lumutu haban hóugiñe milu íbirigu. Ligía asuseredubei lun aban íbiri gíriti George lídangiñeti aban uburugu gíriti Tacloban. Ariñagati: “íbini sun le asuseredubei, gúndaatiña meha íbirigu. Úati dimurei lun nafuranguagüdüni ugundani le nasandirubei”. Ánhawa asaminara luagu sun le adüga laalibei Heowá wawagu ani geteingiradi wagíame, gúndaatimabadiwa íbini wagagibudagun luma turobuli hénrenguti. Ka amu katei líchugubei Heowá woun lun wasandirun ugundani?

Wamadagua luma Heowá, ligía resun wéiritimati le wámabei lun gunda wamá. Subudi wamuti Lurúeite sun ubóu. Ligía Wabungiutebei, Wáguchi ani Wamada (Sal. 71:17, 18).

Amu resun lun gunda wamá, gabagari wamá ani gayaraati lan wagundaarun lidan wabagari (Apur. 3:12, 13). Ani kei subudigüda laali lan Heowá lugundan woun, subudi wamaali ka lan lugundanbei ani ka lan lagurabahabei wámagiñe (Kol. 1:9, 10). Seremei katei lira, gasuuniti wabagari ani buiti lidin woun. Ánhañati hiibe-agei gürigia úati furangu lan houn ka lan lisuunibei ibagari. Ayanuhati Pábulu luagu katei le dan le lariñagubei: “Katei le marihínwañahagili, ni le maganbúnwañahagili, le burí mebelugili tidoun hanigi gürigia, ligía burí laransehabei Bungiu houn ha hínsiñehabubaña lun” (1 Ko. 2:9, 10). Gunfuranda wamani lisuuni luma lugundan Bungiu, ligía ábaya resun le wámabei lun wasandirun ugundani.

Ariha wamá amu katei le adüga laalibei Heowá hawagu lubúeingu. Adüga laali le megei wabéi lun ferudunawa lan wafigoun (1 Huan 2:12). Ani seremei lugudemehabu ru laali emenigini lun wawinwandun lidan aban iseri ubóu woun, le yarafatimahalibei (Rom. 12:12). Ani adügaali giñe lun lidan wamá aban lun wáhuduragun lun (Sal. 133:1). Chóurugüda tumuti Bíbülia lóunigirubaña lan Heowá lubúeingu luéi Satanási luma hawéi máfianu (Sal. 91:11). Ánhawa araramagua asaminara luagu sun abiniruni lúmagiñeti Bungiu le wámabei, wasandiruba ugundani eibu dan (Fili. 4:4).

Gayaraati san waganwoundagüdüni wagundan? Ariñagati Hesusu: “Nadimurehanbei hun  ítara lun hagundaarun numa, dayarü láamuga hugundan” (Huan 15:11). Arufudati dimurei le woun gayara lan wasandirun ugundani. Ítara liña ugundani kei aban watu gemeti. Anhein busén wabéi lúntima ladurangun watu gemeti, mosu wíchugun lanwoun watu. Ítarameme anhein busén wabéi waganwoundagüdüni ugundani le wasandirubei mosu waganwoundagüdüni lau lani Bungiu sífiri sandu. Ligíati, sigí wamá amuriahei lani Bungiu sífiri ani ráramagua wamá asaminara luagu le waliihabei tídangiñe Bíbülia, to abürüdǘboun lau lídehan sífiri sandu (Sal. 1:1, 2; Luk. 11:13).

Waganwoundagüdübei giñe wagundan lau wagunfulirun lau lugumadin Heowá (Sal. 35:27; 112:1). Ka uagu wariñagei le? Ladüga adüga lumutiwa lun gaganbadi wamá lun. Ariñagatu Bíbülia: “Ruba inebesei lun Bungiu, gúnfulibei lugumadin lugundun ligía lunbei hadügüni gürigia” (Apur. 12:13). Ligía, ru lubéi weseriwidun lun Heowá ugundani woun. *

Ánhawa asandira ugundani, mama sandiguarügübadiwa woungua buidu, wibihiba giñe amu burí katei. Kei hénpulu, gúndagüda wamuti Wáguchi le siélubei dan le weseriwidun lun lau ugundani, íbini wásügürüña lan lídangiñe saragu turobuli (2 Lur. 16:15; 1 Tesa. 5:16-18). Adügati ugundani inarüniti lun maha wamá lun ínsiñeni luagu seinsu ani ínchaha lumutiwa lun waganwoundagüdüni weseriwidun lun Heowá (Mat. 13:44). Ladügüba buiti le lunbei wibihin lídangiñe sun burí katei le lun wagundaarun, lun buidu lan wasandiragun woungua ani áfaagua wagíame lun hagundaarun amu gürigia (Adü. 20:35; Fili. 1:3-5).

Ani másiñati labuiduruba lan giñe wátuadi ánhawa aganwoungüdei wagundan. Ariñagatu Bíbülia: “Árani buiti anigi gúndaatu” (Ari. 17:22). Ariñagati aban surusia le akutihabalin katei tidan Luban Furendei Íñuti Nebraska (Meriga) aban katei le úarati luma le tariñagubei Bíbülia. Ariñagati: “anhein gunda hubéi ani buidu ligíame hibagari guentó, másiñati buídutimabei lan hátuadi ámuñegü”.

Kei aubei warihei, íbini wawinwanduña lan lidan dan hénrenguti, gayaraati wasandirun ugundani inarüniti. Lun lira, mosu wamuriaha sífiri sandu dan le wafurieidun, waturiahanu Bíbülia ani ráramagua wagíame asaminara tuagu. Ani anhein busén wabéi waganwoundagüdüni ugundani le wasandirubei mosu wararamagun asaminara luagu abiniruni le resibi wamaalibei, wáyeihani hafiñen lubúeingu Bungiu ani áfaagua wagíame lun wagunfuliruni lugumadin Heowá. Ítara, wasandirubei le lariñagubei Sálumu 64:10: “Hagundaaruba gürigia ha buídubaña lidan Aburemei háluahaba giñe haramudagun lóubawagu”.