1, 2. a) Ka gunfuranda lubéi aban íbiri? b) Ka ladügübei lun laransehani lituróbulin?

ABA labadiseirun Robert dan meha nibureingili, ani úati meha seriu lan lanügüni inarüni. Ariñagati: “Madügüntina meha ni kata wuribati, gama lumoun, neseriwiduña meha lun Heowá ítaraguarügü. Genegeti meha nun derebugu lan numadagua luma Bungiu, ñǘdüntina adamuridagua ani prekursoru meha ídehati au saragu wéiyaasu lidan irumu. Gama lumoun, anihein meha nemegeirun”.

² Úati meha gufuranda lani Robert ka lan mégeibei darí lamarieidun. Anihein meha dan láhurerun tuma lani weiriou lau hadügün álügüdahani luáguti ariñahani le tídangiñeti Bíbülia. Aba meha würi gamadaguatu luma Bungiu tugía, ani subuditi meha óunabagülei tun. Súnwandan meha lasandirun busiganu lárigiñe háhurerun lugundun ibidiñe lan óunabagülei lun ani genegeti meha lun ibidiñe lan ni kata lun. Aba lasaminarun: “Anhein au lubéi tichügüdinabei nani weiriou lidan wamadagua luma Bungiu, lunti nadügün somu katei”. Ani ítara liña ladügüni, ariñagati: “Aba nagumeserun aturiahoun Bíbülia saragu ani aba lagumeserun katei abuidura”. Aba gunfuranda lani inarüni ani le súdinitimabei aba labuidurun lumadagua luma Heowá.

3. a) Ka larufudahabei le asuseredubei lun Robert woun? b) Kaba álügüdahani wakutiha?

³ Arufudahati le asuseredubei lun Robert aban katei súdiniti woun. Gayaraati subudi lan somu katei tuáguti Bíbülia woun, ñüdün wagía lidan sun  adamuridaguni ani apurichiha wagía úara hamá lílana damuriguaü. Úati mini lan le gürigia baadiwa lan ha rúguaaña houngua lun Bungiu wagía. Gayaraati awansediwa lan murusun, gama lumoun, gayaraabei giñe larufudun aban akutihani hulili woun ka lan lunbei wadügüni lúntima wabuiduragüdüni wamadagua luma Bungiu (Fili. 3:16). Lidan aturiahani le, wakutihaba ǘrüwa álügüdahani le lunbei líderaguniwa awansera. Furumiñeti, kaba íderaguawa lun wakutihani ida liña lan wamadagua luma Bungiu? Libiaman, ka lunbei wadügüni lun gamadaguatima wamá luma Bungiu? Ani le lǘrüwan, ida luba lahuudun woun derebugu lan wamadagua luma Heowá lidan wabagari?

4. Kátaña san lúnbaña hafalaruni adundehani le lídanbei Éfesuna 4:23, 24?

⁴ Lun lubúeingu wamá Bungiu, mosu meha wadügün saragu asansiruni lidan wabagari. Ani lárigiñe wabadiseirun sigitiwa asansira. Ariñagatu Bíbülia: “Iserigua humá lidan hani sífiri luma lidan hisaminan” (Efe. 4:23, 24). Mini lan dimurei “iserigua humá” lidan güriegu le ídanbei tabürüdǘwa Bíbülia, hasigirun asansirei hagaburi. Kei gafigoun wabéi, sun wagía mosu wasigirun adüga asansiruni. Íbini ha barühañabaña saragu irumu eseriwida lun Heowá lunti hóunigiruni hamadagua luma Bungiu (Fili. 3:12, 13).

5. Ka álügüdahani gayaraabei líderaguniwa akutihei ida liña lan wamadagua luma Bungiu?

⁵ Lun wakipuruni luma lun waganwoundagüdüni wamadagua luma Bungiu lunti wakutihani ida liña lan. Nibureingidiwa lan yebe o wéinamugaadiwa lan, sun wagía gayaraati wadügüni álügüdahani burí le wóuniwagua: “Ariha numuti san eibu lan dan gamadagua nan luma Bungiu? Aba san nigaburi luma ligaburi Kristu? Ka larufudubei nigaburi luma nusan lidan adamuridaguni? Ka larufudunbei ligaburi niyanun luagu le nayumahabei? Ka larufudahabei nuagu ligaburi naturiaha, ligaburi nadaüragun, luma ligaburi neresibiruni ererehóuni? Ka nadügübei dan le nagagibudagun luma óuchawaguni? Ígira naali san katei le meha súdinitimabei nun? Aba san kristiánu le derebugubei lafiñen nuguya?” (Efe. 4:13). Líderagubadiwa wasaminarun ida luba lan wóunabuni álügüdahani burí le lun warihini ida liña lan wamadagua luma Bungiu.

6. Lun wakutihani ida liña lan wamadagua luma Bungiu, ka amu katei wemegeirubei?

⁶ Lun wakutihani ida liña lan wamadagua luma Bungiu, gayaraati anihein lan dan megei wamá lun híderaguniwa burí amu kristiánugu. Ariñagati apostolu Pábulu wügüri lan le mibihinbalin sífiri míchugunti fe luagu magundan lan Bungiu lau le ladügübei. Ánheinti gürigia le gámabalin sífiri ariha lumuti katei kei larihini Bungiu ani subuditi giñe lun, mínsiñe lan luriban hagaburi ubouaguna lun Bungiu (1 Ko. 2:14-16; 3:1-3). Kei le aban lubéi hasaminan wéiyaaña lidan afiñeni kei lisaminan Kristu, anihein dan rútiña fe lau lóufudagun anihein lan somu gürigia le marihibalin katei kei larihini Bungiu. Anhein asusereda le woun ani aba hálügün wéiyaaña lidan afiñeni híderaguniwa, wadügübei san le hariñagubei woun? Anhein wadüga, warufudubei busén wamá lun gamadagua wamá luma Bungiu (Apur. 7:5, 9).

7. Ida liña wasubudiruni úa lan buídurügü lan wasubudiruni le tariñagubei Bíbülia lun gamadagua wamá luma Bungiu?

⁷ Lunti waritaguni ua lan buídurügü lan wasubudiruni le tariñagubei Bíbülia lun gamadagua wamá luma Bungiu. Gíbeti meha katei lasubudirun urúei Salomón luagu Heowá. Ani anihein giñe lídangiñe dimurei le lariñagubei tidan Bíbülia. Lau sun lira, aba lachararun lun Heowá (1 Uru. 4:29, 30; 11:4-6). Ligíati, lubaragiñe werederun láurügü le wasubudirubei tídangiñe Bíbülia, mégeitiwa wasigirun ederebudagüdei wafiñen (Kol. 2:6, 7). Ida luba wadügüni?

8, 9. a) Ka gayaraabei líderaguniwa lun úaragua wamá lidan wamadagua luma Bungiu? b) Ka wabusenrubei wibihin lidan waturiahanu Bíbülia luma dan le wararamagun asaminara? (Ariha humóun iyawaü to lídanboun lagumeseha arütíkulu)

⁸ Ariñagati Pábulu houn kristiánugu ha lídanbaña  furumiñeti sígulu, mosu lan háfaagun lúntima hederebudagüdüni hafiñen (Ebü. 6:1). Uguñe weyu lunti giñe wadügüni le lariñagubei Pábulu. Lun lira súdiniti lun waturiahanu líburu “Redei humá lidan línsiñehabu Bungiu”. Líderagubadiwa waturiahanu lun warihini ida liña lan wíchuguni adundehani le tídanbei Bíbülia lidan wabagari. Ánheinti gumú wamaaru lubéi gayaraati waturiahan amu agumeiraguagüdüni to gayaraaboun tíderaguniwa ederebudagüdei wafiñen (Kol. 1:23). Gama lumoun, mosu wafurieidun ani samina wagíame hulili ida luba lan wadügüni le wafurendeirubei lidan wabagari.

⁹ Wagundaaragüdüni luma lun gaganbadi wamá lun Heowá ligía katei le wabusenrubei wibihin lídangiñe waturiahan luma wararamagun asaminara hulili (Sal. 40:8; 119:97). Wafurendeiruba giñe amahada lun katei le adügübei lun mawanserun lan wamadagua luma Bungiu (Titu 2:11, 12).

10. Ka lunbei hadügüni nibureintiña anhein háfaaguña lubéi lidan heseriwidun lun Heowá?

¹⁰ Anhein nibureingidibu lubéi, subudi bumuti san ka lan babusenrubei badügün lidan beseriwidun lun Bungiu? Héchuti aban íbiri le eseriwidubei Betelirugu ayanuha hama nibureintiña ha lúnbaña habadiseirun, lidan adamurini sirkuitu. Aba lálügüdüniña ka lan habusenrubei hadügün lidan heseriwidun lun Bungiu. Arufuda lumuti óunabagülei le híchugubei saragu hádangiñe lun luagu furangu lan ka lan habusenrubei hadügün ámuñegü lidan heseriwidun lun Heowá. Añahein hádangiñe busentiña heseriwidun lun Heowá lidan dan dayarüti o houdin eseriwida lidan amu fulasu le ñein lubéi mégeiwa hamá apurichihatiña. Anihein dan dúnguati íbiri le hama nibureintiña ha ibidiñeti houn kaba lan hariñaga. Másiñati susere lan lira ladüga hasaminarun memegeirun hamá hasaminarun kaba lan hadüga lidan heseriwidun lun Bungiu. Ligía lunti lubéi hálügüdagun nibureintiña houngua: “Ladüga san busén hamá nagübürigu náfuridunbei apurichiha ani ñüdün nuguya adamuridagua? Odi gamadaguatina san luma Heowá?”. Furanguti, sun lan wagía lunti lan wáfaagun lidan weseriwidun lun Heowá, nibureingidiwa lan yebe o wéinamugaadiwa lan. Líderagubadiwa katei le lun wederebudagüdüni wamadagua luma Bungiu (Apur. 12:1, 13).

11. a) Ka lunbei wadügüni lun gayara lan wawanserun lidan wamadagua luma Bungiu? b) Ka gürigia tídangiñe Bíbülia gayaraabei wáyeihaniña?

¹¹ Dan le subudi wamaali kaba lan wadüga, lunti wagumeserun adüga asansiruni. Súdiniti katei le. Lugundun aba katei lánina óunweni o ibagari (Rom. 8:6-8). Inarüni, dan le awanse lan aban gürigia lidan lumadagua luma Bungiu úati mini lan lira luagu mafigoun lan. Ru lumuti Heowá lani sífiri woun lun líderaguniwa. Íbini ítara lunti wáfaagun. Átiri irumu guentó lúmagiñe layanuhan John Barr, aban meha hádangiñe lílana Sétanu le Arihibei luagu Hawadigimari Gefentiña luagu Heowá lidan sun Ubóu, luagu Lúkasi 13:24 ani ariñagati wuribati lan lidin houn saragu kristiánugu “ladüga madügün hamani katei lau lóufudagun”. Lunti ítara wamá kei Hakobu, le mígiragüdübalin aban ánheli darí labiniruni (Agu. 32:26-28). Gayaraati buidu lan taturiahoun Bíbülia. Gama lumoun, moun lumuti waliihanu kamá hamuga furumiñeguarügü líburu to abürüdüboun lúnrügü wásügürün dan. Lunti wakutihanu buidu buidu lun wadarirun pérüla lúmagiñeti Bungiu le lunbei líderaguniwa awansera.

12, 13. a) Kaba íderaguawa asaminara “keisi ladügüni Hesukrístu”? b) Ida luba líderaguniwa le ladügübei luma le lariñagubei Féduru? c) Ka lunbei wadügüni lúntima gamadagua wamá luma Bungiu? (Ariha huméi rekuáduru “ Ka gayaraabei wadügüni lun wawanserun lidan wamadagua luma Bungiu”).

¹² Dan le wáfaagun lun gamadaguatima wamá luma Bungiu, ruti sífiri sandu erei woun lun wasansiruni ligaburi wasaminan. Ítara, aba wagumeserun asaminara kei Kristu murusun murusun (Rom. 15:5). Gama lumoun, líderagubadiwa sífiri lun wagidaruni luriban ayumahani luma lun gagaburi wamani igaburi le aubei lagundaara Bungiu (Gal. 5:16, TNM, 22, 23). Ánhawa íchiga fe anihein lan igaburi le lánina layumahan ǘgürügü wawagun o busentiwa lan saragu umegeguni, mábürühan lan warüna. Sigí wamá amuriaha sífiri sandu ani líderagubadiwa Heowá lun madireirun lan wasaminan luéi le  buídubei (Luk. 11:13). Haritagua waméi likesin apostolu Féduru. Anihein meha dan móuserun lan kei gürigia le gámabalin sífiri (Mat. 16:22, 23; Luk. 22:34, 54-62; Gal. 2:11-14). Mábürühanti larüna, sigiti áfaagua lun lóuserun buidu. Lau lídehan Bungiu, aba lagumeserun asaminara murusun murusun kei lasaminarun Kristu. Gayaraati giñe wadügüni ligiaméme.

¹³ Dan lárigiñe, íridati Féduru igaburi buiti le lunbei gagaburi wamani, kéiburi, ragüguaü unguaü, awanduni luma ínsiñehabuni (aliiha huméi 2 Féduru 1:5-8). Líderagubadiwa wáfaagun lun gagaburi wamani igaburi le lúntima buidu lan wamadagua luma Bungiu. Buídubei hamuga lun wálügüdagun woungua sagü weyu: “Ka gayaraabei nadügüni uguñe lúntima gamadagua nan luma Bungiu?”.

14. Ida luba lidin woun lidan wabagari ánhawa gamadagua luma Bungiu?

¹⁴ Ánhawa asaminara kei Kristu buídubei wóuserun lidan wadagimanu, leskuelarugu, lidan ligaburi wayanuhan luma le desidírü wabéi wadügün sagü weyu. Larihúba luagu wáfaaguña lan lun wafalaruni Kristu. Anhein buidu lubéi wamadagua luma Bungiu, mígirunbadiwa lun ladügün somu katei lun lagadeirun wamadagua luma. Danme le wagagibudagun luma óuchawaguni, gayaraabei wanurahan luéi. Ani danme wadügün somu katei, wadügübei álügüdahani burí le wóuniwagua: “Ka adundehani tídangiñeti Bíbülia gayaraabei líderagunina lun desidírü nani kaba lan nadüga? Kaba hamuga ladüga Kristu lidan kesi le? Gúndaabei san Heowá lau le nasaminarubei nadügün? Mosu wéchudun asaminara ítara. Ariha wamá fiu katei le lunbei líderaguniwa. Lidan kada kesi, aniheinbei aban adundehani tídangiñeti Bíbülia le gayaraabei líderaguniwa lun buidu lan le lunbei wadügüni.

15, 16. Ariñaga huméi ida luba lan líderaguniwa wasaminarun kei kristu lun wanúadahan buidu lidan kesi burí le: a) dan le wanúadahan kaba lan uma wamarieida; b) dan le wanúadahaniña wamadagu.

¹⁵ Dan le wanúadahan kaba lan uma wamarieida. Wadarirubei le tariñagubei Bíbülia lidan 2 Korintuna 6:14, 15 (aliiha huméi). Furanguti le lariñagubei Pábulu luagu siñá lan lerederun aban gürigia le gámabalin sífiri tuma aban gürigia to mibihinbalin sífiri. Ida luba gaganbadi wamá lun adundehani le dan le wanúadahan kaba lan uma wamarieida?

¹⁶ Dan le lanúadahan gürigia umadagu. Ariha waméi adundehani le lariñagubei 1 Korintuna 15:33 (aliiha huméi). Mamadaguatiña gürigia ha gámabalin sífiri, hama gürigia ha gayaraabei hadügün lun lidan lan denchaü hamadagua luma Bungiu. Samina wamá ida luba lan wayusuruni bérusu le lidan ámuñegueinarügü sügǘ. Kéiburi, ida liña líderagunina adundehani le asaminara, ida luba lan nayusuruni páhina lidan Internet lun hadügǘn umadagu? Kaba nadüga ánhana lagunbiraha aban gürigia le ibidiñeti nun áhurera tuéigiñe Internet?

17-19. a) Ka katei maweiyasunbadiwa adügei anhein gamadagua wabéi luma Bungiu? b) Kaba uagu wáfaagua ánhawa gamadagua luma Bungiu? c) Ida liña líderaguniwa gamadagua wamá luma Bungiu dan le gaturobulin wamá hama somu gürigia?

¹⁷ Katei le adügübei lun mawanserun lan gürigia lidan lumadagua luma Bungiu. Daritiwa aban eweridihani súdiniti lidan Ebüréu 6:1 (aliiha huméi). Dan le lariñagubei Pábulu lunti lan “ligirún binadu igaburi le málati”, layanuhaña luagu katei le midehanbei lun gamadagua wamá luma Bungiu.  Gayaraati ladügün eweridihani le lun wóunabun saragu álügüdahani le gayaraabei wadügüni lidan wabagari. Kéiburi: “Sagatina san buiti lídangiñe katei le nadügübei o mahuudunti nun lun ni kata? Lunti funa san nánharun lun wadagimanu le lun nagañeirun saragu seinsu? Ka uagu moun lumuti lubéi nóundaragun hama gürigia ha álugubaña habuiduragüdüni ubóu?”

¹⁸ Le lunbei ladügǘn lidan leseriwidún lun Bungiu. Ruti Hesusu aban adundehani furanguti lidan Serumu luagu wübü libügürü ka lan áfaaguni lunbei wadügüni (Mat. 6:33). Gürigia le rúguati lungua lun Bungiu ru lumuti Larúeihan Bungiu lidan furumiñe lúgaaru lidan libagari. Líderagubadiwa wasaminarun luagu adundehani le, lun desidírü wamá katei kéiburi: “Naturiahaba san tidan luba furendei íñuti? Nánharuba san lun wadagimanu le?”.

¹⁹ Magundani. Líderagubadiwa wasigiruni adundehani le líchugubei Pábulu houn lílana damuriguaü Roma, danme magundan wamá luma somu gürigia (Rom. 12:18). Wagía ha afalarubalin Kristu áfaaguatiwa lun wabagaridun “lidan darangilaü hama súngubei”. Ka san wadügübei dan le gaturobulin wamá luma somu gürigia? Hénrenguti san woun waransehani katei, odi subudiwatiwa kei gürigia ha áfaagubaña lun ñein lan darangilaü? (Sant. 3:18).

20. Ka uagu busén hubéi haganwoundagüdüni humadagua luma Bungiu?

²⁰ Kei larufuduni sügǘ burí le warihibei, líderagubadiwa wasaminarun hulili luagu le tariñagubei Bíbülia lun wadügüni le buídubei, le arufudubalin buidu lan wamadagua luma Bungiu. Lídehaba le lun gunda lan wabagari. Ariñagati Robert le buga uágubei wayanuhan lidan lagumesehan arütíkulu: “Dan le labuidurunbei numadagua luma Heowá, aba nagumeserun agunfulira buidu lau nuadigimari keisi wügüri maríeiti ani keisi úguchili. Gúndaatina ani sandiguatina nungua buidu”. Buídubei giñe lidin woun kei lun íbiri le, ánhawa áfaagua lun wabuiduragüdüni wamadagua luma Heowá. Ánhawa afalarei adundehani le, wabagariduba aban ibagari buin lau ugundani ani wibihiba “ibagari magumuchaditi” ámuñegü (1 Tim. 6:19).