1, 2. a) Ka hariñagubei saragu kristiánugu luagu wíchaagun wougua lun Bungiu? b) Kaba álügüdahani súdiniti wakutiha?

ARIÑAGATU aba íbiri Kanadána: “Adügaali níchaagun nungua lun Bungiu lun gunda nan ani adügati lun gayara lan nagagibudagun luma lénrengunga sagü weyu”. Ariñagati aban íbiri Brasilina: “Barǘ haadiwa wein ǘrüwa irumu maríeiñu ani gúndaatina au tuma nani weiriou seremei wáfaagun lun wíchaagun wougua lun Bungiu”. Ariñagati giñe ábaya íbiri Filipínana, seremei lan líchaagun lungua lun Bungiu, lasandiragunbei lungua darangilañu ani buidu lan lanaagun lungua hama sun hawuyeri íbirigu.

² Kei le aubei warihei, huuti saragu wíchaagun woungua lun Bungiu. Chóuruti, busén wamá wagundaarun lau katei le. Ligíati, gayaraati wálügüdagun woungua, kaba nadüga lúntima níchaagun nungua lun Bungiu? Akutiha waméi. Gama lumoun, mosu gunfuranda wamani furumiñe le tarufudahabei Bíbülia luagu aban gürigia le rúguaabei lungua luma Bungiu. Lidan aturiahani le, wóunabuba ǘrüwa álügüdahani súdiniti. Furumiñe, ka mini lubéi aban wamá gürigia ha rúguatiña houngua lun Bungiu? Libiaman, kaba íderaguawa lun  gürigia wamá ha rúguatiña houngua lun Bungiu? Lǘrüwan, ida luba wadüga lun wibihini “lisaminan Kristu” lun gürigia wamá ha rúguatiña houngua lun Bungiu?

3. Según tariñaguni Bíbülia, ida liña amu lan “gürigia le mibihinbalin sífiri” lumoun “gürigia le gámati sífiri sandu”?

³ Afuranguagüda lumuti apostolu Pábulu ida liña lan amu lubéi “gürigia le mibihinbalin sífiri” lumoun “gürigia le gámati sífiri sandu” (aliiha huméi 1 Korintuna 2:14-16). Ariñagati, “gürigia lan le mibihinbalin sífiri meresibirun lumuti katei le lánina lani Bungiu Sífiri lugundun libidiounigan aau lanügüni; siñá lumuti giñe gunfuranda”. Ánheinti “gürigia le gámati sífiri sandu gabafuti lun gunfuranda lani sun katei,” anihein “lisaminan Kristu” lidan. Ligíati lamuriahabei Pábulu wamá lun wíchaagun woungua lun Bungiu. Kati amu katei adügübei lun ámuñegueinarügü hamá hawuyeri gürigia ha hawariuagua?

4, 5. Ida liña gürigia le mibihinbalin sífiri?

⁴ Furumiñe ariha waméi ida liña lan lasaminarun gürigia le mibihinbalin sífiri. Téniti lun le layumahabei ladüga lígiraguagüdün lungua lun igaburi ubouaguna, le unbei lagúahan Pábulu “sífiri le agumadihabei garabalirugu, le nadagimeinbei hádangiñe ha maganbadibaña lun Bungiu” (Efe. 2:2). Adügati sífiri le lun hígiraguagüdün hibe-agei gürigia houngua lun hadügüni le hadaagubei ha híbiri gürigia. Adüga hamuti le genegebei houn buidu lan ani máfaagutiña lun gaganbadi hamá lun lilurudun Bungiu. Wéiriti hasaminarun gürigia ha mibihinbalin sífiri, kaba lan hariñaga gürigia ani áfaaguatiña lun hibihin umegeguni o hageindaguni haricha según gufuranda hamani.

⁵ Gürigia le mibihinbalin sífiri adüga lumuti “layumahan ǘgürügü” (Gal. 5:19-21). Tidan furumiñetu ligaradan Pábulu lun damuriguaü le Korintubei, íridati ámuya igaburi le hawagubei gürigia burí ha: sigenetiña, álugatiña hafanreinraguagüdüniña gürigia, adügatiña lun hebedaagun, barǘ hamutiña ligibugiñoun lúrudu, úati inebe lan lúrudu houn ani súdinitimati héigin luma hatun houn. Ábaya katei, siñá hamuti óuchawaguni awanda (Ari. 7:21, 22). Ariñagati disipulu Húdasi úa lan sífiri sandu hadan fiu hádangiñe (Hud. 18, 19).

6. Ida liña san lasubudiruniwa gürigia le gámabei sífiri sandu?

⁶ Amu ligaburi gürigia le gámabei sífiri sandu. Bereseti lau lumadagua luma Bungiu ani áfaaguati lun láyeihani (Efe. 5:1). Mini lan le áfaagua hamá hasaminarun kei Heowá ani ariha haméi katei kei larihini. Inarüniti Bungiu houn. Inebeti lilurudun houn lidan sun le hadügübei lidan habagari (Sal. 119:33; 143:10). Áfaaguatiña harufuduni “igaburi le líchugubei sífiri” mama “layumahan ǘgürügü” (Gal. 5:22, 23). Líderagubadiwa le lunbei warihini guentó lun gunfuranda wamani ka lan mini lubéi gürigia wamá ha rúguatiña houngua lun Bungiu. Dan le letenirun gürigia lun eremuhani ani hínsiñe ligía lun, ariñawagúati luagu deregegua lan lungua lun eremuhani. Ligiaméme ariñawagúbei luagu gürigia le hínsiñebei katei lánina Bungiu lun ariñawagúati luagu deregegua lan lungua lun Bungiu.

7. Ka tariñagubei Bíbülia hawagun gürigia ha gámabalin sífiri sandu?

⁷ Ariñagati Hesusu gunda hamá gürigia ha gámabaña sífiri sandu. Ariñagati Matéu 5:3: “Fuleseiwatiña ha asubudirubalin luagu megei hamani lídehan Bungiu, ladüga ménrengubei houn lun hebelurun lidoun larúeihan Bungiu”. Ani ariñagati giñe Rómana 8:6 ka lan uéigiñe lunti lubéi deregegua wamá wougua lun Bungiu. Lariñaga: “Dan le habagaridun gürigia según igaburi lánina figóu le hádanbei, barǘ lumutiña lidoun óunweni; ánheinti dan le habagaridun keisi lugundan sífiri sandu, barǘ lumutiña lidoun ibagari tímatimaati luma darangilaü”. Ánhawa etenira  lun katei le lúmagiñebei Bungiu, lídanbadiwa darangilaü luma Bungiu, wasandiruba giñe darangilaü guentó ani gayaraabei wawinwandun lun sun dan ámuñegü.

8. Ka uagu mosu lubéi wáfaagun lun gürigia wamá ha rúguatiña hougua lun Bungiu?

⁸ Denchati ubóu le ídanbei wawinwanda lun wamadagua luma Bungiu. Geyeguwaña hau gürigia ha masaminarunbaña kei Bungiu, ligíati lunti lunbei wáfaagun lun wóunigiruni wasaminan. Dan le leferidiruni gürigia lumadagua luma Bungiu, aba ni kata haali lan libagari, ábati lagumeserun áyeihei igaburi luma layumahan ǘgürügü le lídanbei ubóu. Kaba íderaguawa lun méiguadun wamá lidoun igaburi le? Kaba wadüga lúntima aban wamá gürigia ha rúguatiña hougua lun Bungiu?

9. a) Kaba íderaguawa lun gürigia wamá ha rúguaaña houngua lun Bungiu? b) Kaba igaburi buiti wakutiha?

⁹ Ítara kei irahüñü ha afurendeirubaña katei buiti lau háyeihani le hadügübei hagübürigu, furendeitiwa giñe lun buídutima lan wamadagua luma Bungiu lau wáyeihaniña gürigia ha derebugubei hamadagua luma. Luagu amu oubaü, wafurendeiruba moun lumuti lan wáyeihani hagaburi ha adügübalin layumahan ǘgürügü (1 Ko. 3:1-4). Ayanuhatu Bíbülia hawagun gürigia ha gagaburibalin bián luwuyeri igaburi le. Lidan aturiahani le, warihibei lubuidun igaburi le larufudubei Hakobu, Hesusu tuma María. Ítara luba wafurendeirun lun aban wamá gürigia ha deregeguabaña houngua lun Bungiu.

10. Ida liña larufuduni Hakobu rugua lan lungua lun Bungiu?

¹⁰ Ayanuha wamá furumiñe luagu Hakobu. Hénrenguti meha libagari wügüri le ítara kei libagari furumiñeguarügü wádangiñe. Álugati meha Esaú le líbiri láfaruni hilagubei. Ani álugati meha giñe límedamuru saragu wéiyaasu leyeeduni luma lun lamudiraguni. Gama lumoun aban meha wügüri rúguati lungua lun Bungiu Hakobu íbini geyegu liña lan hau gürigia ha mamadagubaña luma Bungiu. Afiñeti meha luagu le füramase  lubéi Bungiu lun Abüraámü, ani súnwandan lóunigiruniña liduheñu, ha súdinibaña lun lidan lisuuni Bungiu (Agu. 28:10-15). Arufudati le ladügübei luma dimurei le lariñagubei, gebegi lan lilurudun luma lugundan Heowá lun saragu. Kéiburi dan le lasaminarubei luagu busén lan Esaú láfaruni hilagubei, aba lafurieidun lun Bungiu lun lesefuruni libagari. Aba lariñagun lidan lafurieidun: “Ariñaga baali furangu luagu badügüba lan lun buidu lan lidin nun, luma giñe gíbebaña lan nadügawagun kei sagoun le, gíbebaña nege darí lun siñabei lan habahüdǘn” (Agu. 32:6-12). Furanguti larihín lidan ligaburi lawinwandun Hakobu afiñe lan luagu le füramase lubéi Heowá lun luma houn binadu lagübürigu.

11. Ka arufudubalin aban tan meha würi rúguatu tungua lun Bungiu María?

¹¹ Ariha waméi le tadügübei María. Ka uagu lanúadiroun Heowá lun tuguya lan lúguchu Hesusu? Chóuruti, aban tan würi to rúguatu tungua lun Bungiu. Subudi wamuti ladüga lubuidun dimurei le tariñagubei lun Heowá dan le tídinbei arihei Sakaríasi tuma Isawéli ha tiduheñu (aliiha huméi Lúkasi 1:46-55). Arufudati dimurei le tariñagubei María sandi tan aban lanarime inebesei tuagu Lererun Bungiu luma luagu subudi tani Abürüdǘni Ebüréu (Agu. 30:13; 1 Sam. 2:1-10; Mal. 3:12). Danti le tamarieidunbei luma Hosé, magamaridun lumutu darí lárigiñe tágurahani Hesusu. Arufudati le súdinitima lan lugundan luma lilurudun Heowá houn biángubei sügǘ lau hagundan guánarügü (Mat. 1:25). Lau lásügürün dan, ténitu María lun sun le ladügübei luma le lariñagubei Hesusu, ábati burí tareiduni sun katei le tidan tanigi (Luk. 2:51). Busentu meha tarihini lagunfulirun le lariñagubei Bungiu luagu Mesíasi. Buídubei wadüga lun wáyeihani le tadügübei luma lun wíchuguni lugundan Bungiu furumiñe lidan wabagari.

12. a) Ida liña aban lan ligaburi Hesusu kei Lúguchi? b) Ida luba wáyeihani Hesusu? (Ariha huméi dibuhu le lídanbei lagumesehan arütíkulu).

¹² Ayanuha wamá guentó luagu Hesusu, ligia gürigia le wínwanhalibei Ubouagu ani le rúguatimahalibei lungua lun Bungiu. Lidan sun libagari luma lani ministeriu, arufudati busén lan láyeihani Heowá le Lúguchi. Arufuda lumuti ligaburi lisaminan, le lasandirubei luma le ladügübei, lilurudun lan luma lugundan Heowá adundehabalin libagari (Huan 8:29; 14:9; 15:10). Ariha waméi le lariñagubei Isaíasi luagu lugudemehabu Bungiu lumoun le labürühabei Márükosu luagu le lasandirubei Hesusu (aliiha huméi Isaíasi 63:9; Márükosu 6:34). Ítarawaña san kei Hesusu ani óusera wamutiña san ha mégeibaña ídemuei lau gudemehabu súnwandan? Ténitiwa san lun apurichihani luma lun warufudahani uganu luáguti Larúeihan Bungiu kei meha ladügüni Hesusu? (Luk. 4:43). Anhein wadüga, warufuduñein gürigia wamá ha rúguatiña houngua lun Bungiu wagía.

13, 14. a) Ka hénpulu híchugubei woun ha rúguaaña houngua lun Bungiu ítara kei ladügüni Kristu? b) Abahüdaha humá aban sügǘ.

¹³ Uguñe weyu añahein saragu íbirigu arufudaaña aban lubuidun igaburi kei meha ligaburi Kristu. Gürigia ha, apurichihatiña lau ubebeni, areidatiña ani gudemehabutiña ani anihein amu burí igaburi hawagu. Ítara kei wagía, hageindaguña luma hadebilin luma hachara lun gayara lan gagaburi hamani ligaburi Kristu. Ariñagatu aban íbiri Brásilina gíritu Rachel: “Luagu meha aban dan hínsiñeti meha nun nasansiragun kei ligaburi hasansiragun ubouaguna. Adügati meha lira lun madunamagun tan nadaüragun. Gama lumoun, lau nafurendeiruni inarüni aba gunfuranda nani mosu lan náfaagun lun aban nan gürigia to rúguatu tungua lun Bungiu. Hénrenguti meha asansiruni le nun, guenlé, gúndaati nasandiragun nungua ani gasuuni haali nibagari”.

 ¹⁴ Amu meha le gádanbarun aban íbiri Filipínana gíritu Reylene. Íbini Gefentu lan, aba tetenirun lun taturiahan tidan luba furendei íñuti luma lun tibihin aban lubuidun wadagimanu lun gayara lan buidu lan lidin tun. Abahüdaguatu: “Aban eferidireina nani numadagua luma Bungiu. Lau lóufudagun aba níchugun fe megei nan somu katei lidan nibagari, aban katei le gebegitimati sügǘ luéi nuadigimari. Ábaya níchuguni neseriwidun lun Heowá lidan furumiñeti lúgaaru”. Lúmagiñe dan ligía, ábanharu meha íbiri Reylene to arufuduboun afiñeni luagu le füramase lubéi Heowá lidan Matéu 6:33, 34. Ariñagatu chouru tani lóunigiruboun lan Heowá. Gayaraati añahein hamá íbirigu lidan damuriguaü le ñein wabéi ha adügaaña áfaaguni libe burí le. Dan le warihini ida liña lan háyeihani Kristu, ma busentiwa giñe wadügüni ligiaméme? (1 Ko. 11:1; 2 Tesa. 3:7).

15, 16. a) Ka lunbei wadügüni lun ítara lan wagaburi kei Kristu? b) Ida luba san wafurendeirun luagu ligaburi lisaminan Hesusu?

¹⁵ Ida luba wáyeihani Kristu? Ariñagatu Bíbülia lidan 1 Korintuna 2:16 lunti lan aban lan wasaminan kei “lisaminan Kristu”. Ariñagati giñe Rómana 15:5 (TNM), lun aba lan ligaburi wasaminan “kei ligaburi lisaminan Kristu Hesusu”. Ligíati, lun ítara wamá kei Kristu, mégeitiwa wasubudiruni lisaminan, ligaburi, luma le ladügübei. Súdinitimati meha lumadagua luma Bungiu lun. Yarafagüda lumutiwa lun Heowá gagaburi wamani ligaburi Hesusu. Ligía, súdini lubéi wafurendeirun asaminara kei ligía.

¹⁶ Kaba íderaguawa ibihei? Ariha hamuti lani Hesusu disipulugu adüga milaguru, íchiga yanu, óuseraña gürigia buidu luma adügei le tariñagubei Bíbülia. Ariñagatiña: “Gefentiwa luagu sun katei le ladügübei” (Adü. 10:39). Inarüni, siñá lan warihini Hesusu. Gama lumoun, ru laaru Heowá ewanhéliu lani Matéu, Márükosu, Lúkasi, luma Huan woun lun wasubudiruni Hesusu buidu luma ida liña lan meha ligaburi. Ánhawa aliihoun ani samina wagíame luagu le waliihabei, wafurendeiruba saragu luagu ligaburi lisaminan Hesusu. Ítara luba wafalaruni adundehani le: “Adügameme waméi le ladügübei” ani “aranseñu wamá” lun wasaminarun kei lasaminarun Kristu (1 Fe. 2:21, TNM; 4:1).

17. Ida luba líderaguniwa wafurendeirun asaminara kei Hesusu?

¹⁷ Ida luba líderaguniwa wafurendeirun asaminara kei Hesusu? Lun gunfuranda wamani, samina wamá luagu le: Hérebadiwa ánhawa eiga éigini le buídubei lun átuadi. Ligiaméme ánhawa asaminara luagu katei le lúmagiñeti Kristu derebugubei wamadagua luma Bungiu. Ítarati, murusun murusun wasubudirubei kaba lan hamuga ladüga lidan furumiñeguarügü sügǘ hénrenguti. Ani líderagubadiwa katei le, lun buidu lan le lunbei wanúadiruni, lun darangilu lan wasaminan luma lun lagundaarun Bungiu. Furanguti lahuuduba lan woun wafalaruni adundehani le: “Ru huméi Kristu guánarügü hubaragiñe lidan sun katei” (Rom. 13:14).

18. Ka wafurendeirubei lidan arütíkulu le luagu gürigia le gámabalin sífiri sandu?

¹⁸ Afuranguagüdawati lidan arütíkulu le ida liña lan gürigia le gámabalin sífiri sandu. Ani ariha wamaali giñe ida liña lan lahuudun woun le hadügübei gürigia ha gamadaguabaña luma Bungiu. Ani furendeihadiwa kaba lan wadüga lun gürigia wamá ha gámabalin sífiri sandu lau gama wamani “lisaminan Kristu”. Aniheingua fiu katei le lunbei wakutihani luagu aturiahani le. Kéiburi, ida liña wasubudiruni derebugu lan wamadagua luma Bungiu?, ka gayaraabei wadügüni lun wederebudagüdüni wamadagua luma Bungiu? luma kaba buiti wibiha sagü weyu lau gamadagua wamá luma Bungiu? Lounabúba álügüdahani le lidan leweñegua arütíkulu.