Lidan irumu 1937 nágurahoua lidan fulasu le ñein lubéi burí ichari yarafa lun Tokmak (Kirguistán). Hádangiñetiña rasa Kirguís niduheñu ani Kirguís wañeñebei. Áraabu meha hawinwanda nagübürigu ani ñein hawadigimarida lúmagiñe labouchun weyu darí láludun. Ruwarügüti meha éigini houn nadagimeintiña, gama lumoun, abanrügüñein wéiyaasu lidan irumu heresibira fáyeiti. Hénrenguti meha tun núguchu tetenirun tun namulelua luma nun. Seingürügüñei irumu nidin leskuela, ladüga aba nagumeserun awadigimarida áraabu sun weyu.

Lidan fulasu le ñein lubéi meha wawinwanda anihein meha saragu gudemei, lun lóustarun waseinsun lunti meha wawadigimaridun saragu darí lun labuchadun wawagun. Ligíati, lúmagiñe nibureingidina masaminaruntina luagu lisuuni ibagari ni luagu ámuñegü. Masaminarungubeitina ni murusun lasansirubei lan lubuidun burí inarüni luagu Heowá luma luagu lisuuni houn gürigia nibagari saragu. Hínsiñeti hamuga nun nabahüdaguni lubuidun sügǘ luáguti ida liña lan lachülürün inarüni Kirguistán luma ida liña lan laburuchagun lidoun sun fulasu. Gumeseti sun le nórute lóubawagun fulasu le ñein lubéi naweirida.

Gumeseti inarüni luagu Heowá Kirguistán lidan irumu burí dimí san. Ani lun gayara lan lawanserun mosu meha lageindawagun luma aban saminaü le gabafubei saragu. Dan meha ligía aban lídangiñe lufulasun Unión Sowiétika Kirguistán, ani madanraguntiña gefentiña luagu Heowá hougua lidan polítika lidan sun ageiraü le lábugiñebei lagumadihan Unión Sowiétika (Huan 18:36). Adügati katei lira lun harihiniña kei láganigu ageiraü ani aba heibahaniña. Gama lumoun, madügünti le hasaminarunbei sásaamu lun  machülürün tan Lererun Bungiu tidoun hanigi gürigia ha harumabaña anigi. Ani aban lídangiñe katei gebegiti le nafurendeirubei lidan nibagari úa lan “ni kata lásiñarun Bungiu” adüga (Mar. 10:27).

Adügati éibaahouni le hasufurirubei Gefentiña lun laburuchagun uganu luáguti Larúeihan Bungiu lidan sun Kirguistán. Ida liña lasuseredun? Lani meha Unión Sowiétika Siberia, ani ñein hadagara láganigu Ageiraü. Dan le hígiragüdüniña aba houdin Kirguistán. Añahein hádangiñe barǘ hamuti inarüni hámagua ítara kei Emil Yantzen, le meha águrahoubei Kirguistán lidan irumu 1919 ani aban lounahóun lidoun fulasu le ñein lubéi hafosurua gürigia lun hawadigimaridun ani ñein lasubudiraña Gefentiña. Aba lánharun Emil lun inarüni ani lidan irumu 1956 aba lagiribudun lageiroun aba lerederun awinwanda yarafa lun Sokuluk, le ñein lubéi meha nawinwanda. Lidan irumu 1958 lagumesera furumiñeti damuriguaü Kirguistán.

Kéiburi aban irumu lárigiñe, aba láguyun íbiri Victor Vinter Sokulukoun, le meha agagibudagubei luma saragu lénrengunga. Kei úaragua lubéi meha lun Heowá aba ladaürǘn bián wéiyaasu luagu ǘrüwa irumu, dan lárigiñe dáüwati luagu diisi irumu ani ábaya ladaürǘn seingü irumu lidan fulasu le ñein lubéi hafosurua gürigia lun hawadigimaridun. Íbini gibe lan meha éibaahouni, úati ni kata adügüti lun lararamun inarüni.

Lidan irumu 1963 añahein meha 160 Gefentiña Kirguistán. Saragu hádangiñe lídangiñetiña ageiraü Yámani, Ukrania luma Rusia. Anihein Eduard Varter hadan, aban adaürüti le meha abadiseirúbei lidan irumu 1924 Alemania. Lidan irumu burí 40, aba hóunahani nazis lidoun aban fulasu le ñein lubéi hafosurua gürigia lun hawadigimaridun, fiu irumu lárigiñe aba hóunahani súdaragu ha lani Unión Sowiétika lidoun fulasu meme ligía. Lidan irumu 1961 aba láguyun íbiri úaraguati le lidoun aban aüdü le gíribei Kant, yarafa lun uburugu le ñein lubéi neredera.

Ñein Kant tawinwanda aban Gefentu luagu Heowá úaraguatu gíritu Elizabeth Fot hüchagua ligía meha tifisiutebei. Kei le gáhüchaguadi tan hüchaguatu meha houn surusiagu, houn máisturugu, luma houn amu burí gürigia ha furendeitiña. Aban meha hádangiñe ha únbaña táhüchagua Aksamai Sultanalieva, tíribei, lani aban wügüri weiriou le íñuti lubara tidan luban aguseragülei. Aban lídangiñe weyu le táchulürübei Aksamai arihoun Elizabeth aba tadügün saragu álügüdahani tun luagu lisuuni ibagari luma ka lan gádanbaliña hilaaña. Óunaba tumuti Elizabeth tálügüdaha tau Bíbülia. Lau lásügürün dan aba hádangiñehaaru lan ha apurichihabalin uganu lau ubebeni Aksamai.

Lidan dan ligía aba líridun Nikolai Chimpoesh, le lídangiñebei ageiraü Moldavia kei óunigiruti sirkuitu. Kéiburi yarafa lun darandi irumu lau agunfulira lau dasi le. Amu luéi labisidahani damuriguaü, adügati aransehani lun lawadigimariduniwa lun tasagahóun kopia tau agumeiraguagüdüni luma lun tafanreinhoun. Kei le aba lubéi híchugun gumadimatiña fe luagu le ladügübei, aba lariñaguni Eduard Varter lun kaba lan lariñaga: “Danme le hálügüdünibu, ariñagarügü ban houn tídangiñe lan áfisi to arihiboun luagu apurichihani lidan sun ubóu Brooklyn wibihoun. Ábame barihin lágurugun úfisi tani KGB. Máhüchüra ban” (Mat. 10:19).

Murusun dan lárigiñe yanu ligía, aba hamuriahan luma Nikolai lun larufudagun lungua tidan áfisi tani KGB to Kantboun. Ariñagati: “Aba lálügüdünina úfisi ida liña lan wibihinu agumeiraguagüdüni. Aba nariñagun Brooklyngiñe lan tounahóua woun. Ibidiñeti meha lun kaba lan lariñaga. Aba lígirunina nun nidin aba magúarun haali lan nun”. Sigitiña Gefentiña ganigitiña  hagía aburuchaguagüdei uganu luáguti Larúeihan Bungiu lidan nórute lani Kirguistán lau duari, yarafa ñein lubéi meha nawinwanda. Chǘlüdügan uganu harigeirugun niduheñu lidan irumu burí 80. Mairambubu, to nani weiriou tuguya furumiñetu aganbubalin uganu.

Lídangiñetu aban fulasu gíriti Naryn, Mairambubu, aban fulasu lóubawagun Kirguistán. Lidan widü-hati irumu 1974 aba wamarieidun túbiñe nitu. Furumiñe narihinu Mairambubu ani hínsiñegubeitu nun ani aba wamarieidun weyuméme ligía.

Aban weyu enerurugu lidan irumu 1981, dan le tagiribudunbei Mairambubu, mágidurugugiñe tidan busu, ligía taganbuni yanu le uágubei nabahüdahan furumiñe. Busentu meha nani weiriou tasubudirun lanwoun ariñahani, ligía aba lubéi tálügüdünu wuri tuguya ka lan tiri ani halía lan teredera. Aba tariñagun Apun lan tíribei, gama lumoun, dan meha ligía manhawati lun apurichihani le hadügübei Gefentiña ani mosu meha duari hamá íbirigu, lubaragiñe tariñagun tun halía lan teredera ábarüga tálügüdünu halía lan weredera. Lau aba lanarime ugundani tachülüra nani weiriou múnadoun.

“Aganbaadina aban lubuidun katei —liña tabahüdaha Mairambubu nun—. Aba tariñagun aban hiñaru nun yarafa lan madise móunwegun hañame lan gürigia. Íbini animaalugu ha gáñitiña úaalime gañi hamá”. Laganóun nun úraga lan ariñahani ligía, ani aba nariñagun tun: “Agurabahatina lun tiabin lun tafuranguagüdüni woun buidu”.

Ǘrüwa hati lárigiñe ligía tabisidahaniwa Apun. Lárigiñe, aba hachülürün fiu Gefentiña abisidahawa luagu furumiñeti wéiyaasu hádangiñetiña kirguís. Arufudaha hamuti íbirigu ha inarüni le aweiridagüdübarun wanigi luagu Heowá luma luagu lisuuni houn gürigia. Lun lira, yusu hamutu líburu De paraíso perdido a paraíso recobrado. * Abanrügüñoun meha líburu to lidan iñeñei Tokmak, mosu meha wasagarun aban kopia abürüharügü.

Aban lídangiñe furumiñeti katei le harufudahabei woun le lariñagubei profesía le lídanbei Agumesehani 3:15, le lunbei meha lagunfulirun luagu Mesíasi Urúei le líridubei Bungiu: Hesukrístu. Aban meha inarüni súdiniti lira le lunbei haganbuni sun gürigia. Buídurügüti meha lira woun lun wagumeserun apurichiha! (Mat. 24:14). Lidan murusun dan, le wafurendeirubei tídangiñe Bíbülia aba lagumeserun asansirei wabagari.

Dan le lagunbirihabadiwa aban Gefenti hádangiñeti Tokmak lidoun aban maríei, fureseti níchugun  fe tuma nani weiriou luagu mítaran hama Gefentiña kei amu gürigia. Darangiluti léibugun katei lidan fedu ligía, ani úati uniñein ñein. Menegeguati luma maríei le ídanbei burí meha woudin, le ñein lubéi hátagua gürigia darí habacharuadun féridi haméi hachügü ani ariñaga hagía burí bulagiadi.

Ñǘdüntiwa meha giñe lidan fiu adamuridaguni lidan damuriguaü Tokmak. Le adügǘbei áraabu, dan le buidu lan ligaburi dan. Subudi hamuti meha íbirigu aríaguhaña lan súdara woun, ligía súnwandan híchugun somu gürigia lun laríahaniña. Lidan lidaani lidiliga aba wóundaragun tidan aban muna, ani chülüguatiña súdara fiu wéiyaasu lun harihini ka lan wadaagubei. Weyu le wabadiseirubei, lidan duna Chu lidan sedü-hati irumu 1982, mosu meha duari wamá (Mat. 10:16). Chülǘguatiwa murusun murusun áraabun, eremuhatiwa lun Bungiu, lárigiñe aban waganbuni yanu lánina badisei.

Lidan irumu 1987, aba lamuriaha aban íbiri numa lun lidin abisidahei aban gürigia le arufudubei busén lan lafurendeiruni inarüni ani Balykchy leredera. Lun gayara lan wachülürün lúbiñoun mosu meha waweiyasuhan gádürü oura tidan íngiini. Lárigiñe woudin apurichiha saragu wéiyaasu Balykchy, aba wíchugun fe berese hamá saragu gürigia lau uganu le wapurichihabei. Ruti lira aban lubuidun chansi woun lun waganwoundagüdüni wapurichiha.

Au tuma Mairambubu súnwandan meha woudin Balykchy. Sagü meha samudi luma dimaasu ñein wamá, furitiwa meha apurichiha ani damuriguaütiwa. Eibu meha dan mégeitima wamá tanwoun agumeiraguagüdüni ani barǘ wamutu meha tidan aban sagü o sayu tun papas. Móustaruntu meha bián sagü agumeiraguagüdüni lun wapurichihan. Apurichihatiwa houn gürigia dan le woudin luma dan le wagiribudun.

Lidan irumu 1995, widü irumu lárigiñe wabisidahani uburugu Balykchy luagu furumiñeti wéiyaasu, aba ñein lan aban damuriguaü ñein. Sun aweiyasuhani le wadügübei lun woudin apurichiha ñein mégeiti meha saragu seinsu. Ida liña waransehan lun woudin apurichiha ñein maseinsunga? Íderagua lumutiwa aban íbiri lau seinsu. Kei le subudi lubalin Heowá busén wamá waganwoundagüdüni weseriwidun, aba ladaaruni “lubenari sielu” woun (Mal. 3:10). Le linarün katei, úati lásiñarun Heowá adüga.

Lidan irumu 1992, aba niridún kei wéiyaali lidan afiñeni. Au furumiñetibei wéiyaali lidan afiñeni hadan kirguís lidan sun ageiraü. Lidan damuriguaü le ñein nubéi Tokmak aba wadarirun chansi lúntima weseriwidun lun Heowá. Gumesetiwa aturiahoun Bíbülia hama saragu nibureintiña, hádangiñetiña kirguís tidan fiu leskuela to wadarirun to lídanboun fulasu. Aban hádangiñe nibureintiña hagía, guentó ligía aban hádangiñe Sétanu le Arihibei tau Beteli ani bián hádangiñe prekursorugu espechalitiña. Ídehatiwa giñe lun wíderaguniña amu lidan damuriguaü. Lidan lagumeseha irumu burí 90 lídanrügüñoun meha ruso agumeiraguagüdüni, ani lidan giñe iñeñei ruso adamuridaguni. Gama lumoun, eibu dan agíbedeina hamá meha íbirigu ha adimurehabaña kirguís, ligía aba lubéi nederegeragun nungua lun násügüragüdüni le ariñawagúbei lidan damuriguaü lidoun hañeñe. Ídehati lira lúntima gufuranda hamani inarüni buidu.

Au tuma Mairambubu bereseguñadiwa meha saragu etenira houn wasaanigu. Barǘ wamutiña apurichiha  luma adamuridagua. Dan meha le duusu lubéi irumu tau Gulsayra to wasaani, hínsiñeti meha tun tayanuhan tuagu Bíbülia houn asügürütiña. Hínsiñeti houn sun wasaanigu hafurendeiruni bérusu tídangiñeti Bíbülia. Súnwandan beresegu hamá wasaanigu hama wabaña lidan katei le lánina damuriguaü. Hádangiñe nefu isaanigu hama unsu ibañani ha wínwangiñabaña, disisiñanu lubúeingu Heowá o abasihatiña adamuridagua hama hagübürigu.

Taweiriduña hamuga hanigi íbirigu ha agumeserubaña apurichiha lidan burí irumu dimí san, lau hamuga harihini sun asansiruni le susereelibei lidan fulasu le ñein lubéi meha wawinwanda. Kéiburi lidan irumu burí 1990 gayaraahali meha wapurichiha manufudeuga ani gayaraali meha giñe ladügǘn adamuridaguni wéinamuti.

Lidan irumu 1991, au tuma nani weiriou aba woudin Kazajistán, uburugu Alma-Atá (subudiwati uguñe weyu kei Almaty), lun woudin luagu furumiñeti wéiyaasu lidan aban adamurini wéiriti. Lidan irumu 1993 ligía ladügǘn aban adamurini luagu furumiñeti wéiyaasu Kirguistán lidan láhureragüle bali le gíribei Spartak lidan uburugu Biskek. Ábanñein dimaasu hau íbirigu arumadahei lubá adamurini. Aba taweiridun lanigi le arihibei lau fulasu ligía darí lun ligirúniwa lun wayusuruni mafayeihanga.

Lidan irumu 1994 aba lasuseredun ámuya sügǘ súdiniti, dan le táfuridunbei furumiñetu agumeiraguagüdüni lidan kirguís. Uguñe weyu tidan Beteli to Biskek ñein lásügürawagüdüwa ariñahani lidoun iñeñei kirguís. Gama lumoun, lidan irumu 1998, gagaradan hamá Gefentiña Kirguistán to adügüboun lun uá lan ni aban ebereserei dasi le hadügübei. Añaheinhaña hóugiñe 5,000 apurichihatiña, 83 damuriguaü luma 25 sétanu lidan burí iñeñei cheiní, inglesi, kirguís, ruso, seini ruso, turku, uigur luma uzbeko. Íbini ámuñegueinarügü lan harasan luma hañeñe íbirigu ha, gama lumoun, heseriwiduña lun Heowá lidan aban. Furanguti ligía lan adügübalin lanarime asansiruni burí le.

Sansi lumuti Heowá nibagari. Lidan gudemei naweirida áraabu ani seingürügüñei irumu nidin leskuela. Íbini ítara ru haali Heowá chansi nun lun wéiyaali lan lidan afiñeni au luma lun narufudahani lubuidun inarüni le tídanbei Bíbülia houn gürigia ha furendei túmabaña sügǘ nau. Inarüni Heowá lan adügübei lun lagunfulirun sun katei íbini le masaminarun wamuti. Sun le winwan naalibei adügati lun nasigirun apurichiha luagu Heowá, Bungiu le “gayara lumuti sun katei adüga” (Mat. 19:26).