LIDAN anuhán lan waporu ebelura lidoun liyuma duna Belfast Lough, harihiñein meha gürigia ha tídanbaña, láfuachun weyu lídangiñe lubuidun burí lirahüñü wübü ligía, lídangiñe tubarandá waporu. Lidan meha seingü-hati irumu 1910. Liseingün meha wéiyaasu lidin Charles Taze Russel Irlanda, ligía aban hádangiñe gürigia ha meha ñéinbaña tidan waporu. Habaruaguóunmeme tadügǘña meha bián óunwenbu waporu ani arihúati meha lubuidun tesetirun; Titanic meha aban tídangiñe ani wuribati tagumuchun, Olympic meha to aban ani genegeguatu meha biángubei. * Yagürounmémeraü ñein lubéi talaküra waporu, añahein meha 12 Aturiahatiña Bíbülia agurabahaña luagu wafu.

Kéiburi wein irumu lubaragiñe lira, aweiyasuhati íbiri Russell saragu wéiyaasu bóugudin luéi Meriga lun laburuchaguagüdüni uganu buiti lidan sun ubóu. Adüga lumuti furumiñeti luwéiyaasu Irlandoun lidan sedü-hati irumu 1891. Tídanñein meha waporu to gíriboun City of Chicago dan le larihinbalin lálüdün weyu eibu hayarafadun lun kosu Queenstown (le gíribei guentó Cóbh). Másiñati haritagua lani le meha habahüdagubei lagübürigu lun luagu fulasu le ídanbei nasirua lan. Lau labisidahani lubuidun burí uburugu ligía hama lupaanágu, aba híchugun fe aranseeli lan meha fulasu ligía lun lalubahóun.

Sédüñein wéiyaasu lidin Rusell Irlanda. Arihúati lidan furumiñeti wéiyaasu le ladügübei berese hamá meha gürigia luagu inarüni ani adügati lira lun houdin saragu san ani anihein meha dan saragu milu gürigia aganbei yanu le líchugubei. Rútiña ñunsu tidan periodiku luagu hadüga lan adamuridaguni hounti sun gürigia Belfast luma Dublín, lidan libiaman wéiyaasu le hadügübei lidan seingü-hati irumu 1903. Abahüdaguati Russell “teni hamá meha gürigia buidu buidu” lun yanu le meha gíribei “Füramase lau áfiñuruni”, le meha ayanuhabei luagu lafiñen Abüraámü luma luagu abiniruni le lunbei heresibiruni gürigia ámuñegü.

Kei weiri lubéi meha hebereserun gürigia luagu inarüni, aba lagiribudun Russell ñeinhin, lidan lǘrüwan luwéiyaasu Yuropa. Resibi hamuti seingü íbirigu luagu wafu Belfast binaafin lidan irumu 1908 lidan gádürü-hati. Ruti aban yanu rábounweyumeme ligía le gíribei “Lábürühan lubafu Satanási”. Chülütiña “kéiburi 300 gürigia ha beresebaña luagu uganu”. Ariñagati aban gürigia saragu katei wuribati gama lumoun, rúati saragu óunabagülei le saminawati buidu ani le tídangiñebei Bíbülia lun. Anihein meha aban ebedaaguti le bulagiaditi Dublín, aban meha wügüri gíriti O’Connor aban abürühati lani Sétanu Kristiánu hani Nibureintiña (YMCA, lánibei sigülasi lidan inglesi), hóuchati layanuhan wuriba íchaaguniña Aturiahatiña Bíbülia houn hóugiñe milu gürigia ha meha ñéinbaña. Ka asuseredubei?

Másiñati susere lan katei le: Aba desidírü lan aban wügüri le beresebei luagu uganu le tídanbei Bíbülia lun lidin aganbei yanu hounti sun gürigia le iridúbei tidan periodiku The Irish Times. Dan le lachülürünbei buinñu liña fulasu ligía ani madariti halíaba lan lañuura. Aba lagumeserun wügüri ligía aganbei íchuguti yanu, aba wügüri lau ídiburi haruti ani gádiumati, tauñein aban abí migifetu wuritu, lánhinhañein meha lúhabu lidan aniha lan  éibuga lídangiñe aban oubaü lun amu lidan plataforma. Líriduñei meha bérusu tídangiñe Bíbülia aba lárigiñe aban lau aban igaburi furanguti ani adügati lira lun buídutima lan gunfuranda lani gürigia ligía inarüni le tídanbei Bíbülia. Íbini ua lan katei le adügübei lun here lan laganbún umalali, aganbúati lumalali íchuguti yanu buidu lidan sun lasali ani aganba hamuti gürigia yanu kéiburi luagu aban oura dimí. Lárigiñe, aba ladügǘn aban fánreinti lánina álügüdahani luma óunabagülei, álugati O’Connor hama lumadagu lun mafiñerúniwa lan luagu uganu le ichugúbei, gama lumoun, óunaba lumutiña íchuguti yanu lau bérusu tídangiñeti Bíbülia. Aba hapouhani gürigia háhabu lau ubebeni. Danbei lagalumadun katei, aba layarafadun wügüri le buga uágubei wayanuha, houn íbirigu ani aba lamuriahan lanwoun ariñahani hama. Según le hariñagubei gürigia, ítara liña hasubudiruni saragu inarüni.

Lidan seingü-hati irumu 1909 ligía labisidahani íbiri Russell Irlanda luagu ligadürün wéiyaasu, furiti Nuewayorugiñe tidan waporu gíritu Mauretania lun lidin ñeinhin. Barǘ lumuti íbiri Huntsinger le gabürüdadibei furese. Ítara, gayaraabei meha labürügüdunu Garüdia Awisahatu lidan añahán lan áfayaha anagü. Ruti Russell aban yanu hagibugiñe 450 gürigia, rédeitiña 100 hádangiñe rara ladüga úaali lan meha halíaba lan hañuura.

Susereti aban katei genegeti lidan liseingün wéiyaasu, le uágubei wayanuha lidan lagumesehan arütíkulu, luma wéiyaasu le meha adüga laalibei íbiri Russell Irlandoun. Chülüti aban sásaamu, le aturiahabei luagu katei lánina Bungiu, luma O’Connor lárigiñe líchuguni íbiri Russell yanu Dublín, resibiti wügüri ligía óunagülei tídangiñeti Bíbülia lun lálügüdahan. Gúndaatiña gürigia ha achülürübaña. Larugan, aban ládinun Russell hama lupaanágu tidoun waporu to anaahaboun gárada lun houdin Liverpool, lárigiñe, aba hádinun tidoun waporu to gíriboun Lusitania lun houdin Nuewayoru. *

Lidan lisisin luma lisedün wéiyaasu le ladügübei Russell Irlanda lidan irumu 1911 ábaya líchuguni yanu le meha ru laalibei. Lidan gádürü-hati lídanmeme irumu ligía, resibitiña 20 Aturiahatiña Bíbülia ha meha ñéinbaña 2,000 gürigia Belfastna, ha achülürübaña aganbei yanu le gíribei “Ibagari lárigiñe óunweni”. Chülüti O’Connor hama amu minisi tani ligilisi ani adügatiña saragu álügüdahani. Hínsiñeti óunabagülei tídangiñe Bíbülia le ichugúbei houn wügüriña ha, houn gürigia. Dan lárigiñe múberugu, ñǘdünti Russell lidan amu burí uburugu ani chülütiña saragu gürigia lun haganbuni. Afaaguáyati O’Connor hama 100 ebedaagutiña lun hararamuni adamuridaguni Dublín, gama lumoun, aban herederun gürigia ha ñéinbaña luéigiñe lóubadina íchuguti yanu lau ubebeni.

Íbini íbiri lan Russell íchugubalin sun burí yanu hounti sun gürigia burí lira, subudi lumuti meha, “mararamagunbei lan wadagimanu ladüga ua lan aban gürigia”, ladüga, “lani Bungiu wadagimanu le adügǘbei tidan óundaruni to, mama lani wügüri”. Ídehati meha yanu burí ligía lun lafuranguagüdüniwa inarüni houn gürigia ani lídangiñe meha yanu le aburuchaguagüdüwabei burí lira lagumesera Adamuridaguni hounti sun gürigia. Adügati sun burí katei lira, lun ñein lan damuriguaü lidan saragu uburugu luma lun laburuchaguagüdün inarüni Irlanda. (Lídangiñe ariñahani le areidúañubei wama Gran Bretaña).