Lidan uburugu Kebekü nagüriahóua, lóubawagun aban fulasu le giñe gíribei Kebekü le ñein lubéi layanuhóua faransu. Arufudati meha Louis le núguchi tuma Zélia to núguchu ínsiñeni nun. Aban meha wügüri maniti núguchi ani hínsiñeti meha lun laliihan. Ánheinti au hínsiñeti meha nun nabürühan ani le meha nabuserunbei lun nawadigimaridun kei íchaahati uganu o ñunsu.

Dan meha le duusu lubéi irumu nau, aba lachülürün aban lumada núguchi úara luma Rodolphe Soucy, aban meha lani núguchi paaná lidan wadagimanu abisidahawa wábiñoun. Gefentiña meha luagu Heowá hagía. Ibidiñeti meha hawaguti Gefentiña nun saragu, meberesentina meha giñe tau hani relihión. Gama lumoun, chawá lumuti naritagun ínsiñehabuni le harufudubei luma lubuidun óunabagülei le híchugubei tídangiñe Bíbülia lun álügüdahani le wadügübei. Wéirigüda lumutu giñe hanigi nagübürigu, ítara liña wánharun lun waturiahanu Bíbülia.

Dan meha ligía tidan aban leskuela katolika nidin leskuela. Anihein meha dan nayanuhan hama nánigu paaná luagu le nafurendeirubei tídangiñe Bíbülia. Lau lásügürün dan, aban híchugun numaisturungu ha meha fádirigu, fe ka lan uagu wayanuha. Aban hádangiñe numaisturungu lubaragiñe hamuga layusurunu Bíbülia lun larufuduni iyeeni lan le nariñagubei ábarüga lariñagun hagibugiñe sun nánigu paaná wügüriduana. Íbini hanarime lan sigenei ligía, íderagua lumutina saragu, lugundun aba gunfuranda nani múaran lan le harufudahabei luagu Bungiu luma le tariñagubei Bíbülia. Aba níchugun fe moun lumuti lan nerederun hadan. Lau hídehan nagübürigu aba nasansirun leskuela.

Sigitina afurendeira tuagu Bíbülia, gama lumoun, darasati meha nawanserun ladüga hanufude nan nidin apurichiha tidan burí muna. Gabafutu meha ligilisi katolika hawagu gürigia ani máhatu meha wapurichiha. Maurice Duplessis, ligía meha ábutibei Kebekü ani wéiriti meha  gamadagua lan tuma ligilisi lidan katei lánina polítika. Lau lídehan, éibaahouatiña Gefentiña darí lun lagayuahóun hawagu. Mosu meha ganigi lan gürigia lun láfuridun apurichiha dan ligía.

John Rae, ligía íbiri le íderagubalina lun neferidiruni anufudei. Eresibihati tídangiñe Leskuela Galaadü külase númeru nefu. Íbini gibe lan meha lisubudin, aban meha íbiri ǘnabuguti ani gamadounti. Anihein meha burí dan ayanuhati numa furangu, gama lumoun lubuidun ligaburi ligía ariñagubalin sun katei luagu. Kei meha hénrengu lan lun layanuhan faransu, gabügürüguati meha náfuridun luma apurichiha ani íderagua numuti lidan layanuhan. Adügati násügürün dan luma íbiri John lun nidin luéigiñe lóubadina inarüni. Aba nabadiseirun 26 lidan seingü-hati, irumu 1951, diisi irumu lárigiñe nayanuhan hama Gefentiña luagu furumiñeti wéiyaasu.

Prekursorugu meha lílanabaña liraüraü damuriguaü le Kebekübei. Ani le lubuidun igaburi le harufudubei lun hadasin ligía ínchahabalina lun prekursoru nan. Lidan dan ligía Bíbüliarügüñoun ayusurúa lidan apurichihani tidan burí muna. Kei meha le úatu lubéi agumeiraguagüdüni wama, mosu meha wayusurunu Bíbülia buidu. Ligía meha náfaagunbei lun nafurendeiruni bérusu burí le lunbei líderagunina afuranguagüdei inarüni. Gama lumoun, añahein meha saragu gürigia máhatiña ni lun haliihanu Bíbülia anhein míchugun Ligilisi katolika üma houn, le unbei hagúahan imprimátur.

Lidan irumu 1952, aba namarieidun tuma Simone Patry, aban íbiri úaraguatu ani Kebeküna. Aba wáguyun Montreal, ani lubaragiñe wagunfulirun irumu lúmagiñe wamarieidun aba gasaani wamá aban würi irahü, Lise tíribei. Íbini ígira nani eseriwiduni kei prekursoru murusun dan lubaragiñe wamarieidun, áfaaguatina au tuma Simone lun mibe lan wámati lun wetenirun kei iduheñu lun dasi le lídanbei damuriguaü.

Sügüti diisi irumu lun nasaminarun buidu buidu lun nagiribudun eseriwida kei prekursoru. Lidan irumu 1962, aba nidin tidan Beteli Kanadá tidan Leskuela houn Wéiyaaña hama Ídehatiña, lidan aban arufudahani le adurarubei aban hati. Aban meha nirumun luma íbiri le gíribei Camille Ouellette. Wéirigüda lumutu nanigi saragu lau narihini ubebeni le larufudubei íbiri le luagu apurichihani, láutima nasubudiruni gani lan weiriou ani gasaanigu ligía. Dan meha ligía míbetiña meha íbirigu wügüriña ni würiña Kebekü eseriwidutiña kei prekursorugu ani gasaanigu hagía. Ligía meha ladügübei Camille. Lidan dan le wásügürübei úara, ínchaha lumutina lun nakutihani le gádanbalina. Murusun dan lárigiñe, aban níchugun fe gayara lan  prekursoruya nan. Añahein machourutiña meha luagu buiti le nasaminarubei nadügün, lau sun lira sigitina nubaruaguóun, chóuruñu labinirubei lan meha Heowá náfaagun lau naganwoundagüdüni neseriwidun lun.

Lidan irumu 1964, aba wiridún au tuma Simone prekursorume Kebekü, uburugu le ñein lubéi wagüriahóua. Ñein weseriwida lidan burí irumu le asigirubei. Lidan dan ligía, máhawati meha lun apurichihani ñein, lárigiñe aba labuidurun katei.

Aban weyu, samudi rábounweyu, aba narügüdǘn Sainte-Marie, lidan aban liraüraü uburugu madise luéi uburugu Kebekü. Aba lanügünina aban polisía tidoun hani áfisi aba ladáürünina ladüga napurichiha tidan burí muna sin lichugún üma nun. Fiu oura lárigiñe, aba hanügünina lun aguseragüdüti gíriti Baillargeon, aban wügüri deregüdati. Aba lálügüdünina kaba lan ayanuha nuéigiñe lidan aguseruni. Dan le nariñagubei lun layanuhaba lan Glen How * nuéigiñe, aba awogóu gefenti luagu Heowá ani subudiwati, aba lariñagun adadagareina: “Uá, ligía no”. Aganbahouwati luagu Glen How luagu ageindagua lani hakesin saragu íbirigu ani gáñeiti burí. Murusun oura lárigiñe aban lariñagun Liñun-agei Lúrudu nun madurun nan.

Kei meha máhawa lan lun wapurichiha Kebekü, ligía meha hénrengu lubéi lun wadarirun muna buitu lun wáhayahanu lun wadamuridagun. Aba meha binadu tareidaagüle karü hadariruboun lílana liraüraü damuriguaü le ñein wabéi lun wadamuridagun ani úati garabali le abacharaguagülei ñein. Anihein meha aban estufa hama íbirigu lauti gasi lun wabacharagun murusunraü lidan lidaani lidiliga. Lubaragiñe adamuridaguni súnwandan meha wararamun geyegu lau kéiburi aban oura lun wabahüdahan lubuidun burí sügǘ.

Ma lubuidun larihín ida liña lan lawanserun apurichihani lau lásügürün dan. Lidan burí irumu 1960 fiúrügüñein meha lirahüñü damuriguaü geyegu lau Kebekü, lóubawagun Côte-Nord luma Gaspé. Uguñe weyu, lidan burí fulasu le, añahein saragu íbirigu ha adamuridagubaña tidan tubuidun burí Luban Adamuridaguni.

Lidan irumu 1970, aba nagunbirahóun au tuma Simone lun weseriwidun lidan lounigirún sirkuitu; lidan irumu 1973 aba wounahóun eseriwida lidan lounigirún distritu. Lidan burí irumu ligía furendeitiwa saragu hámagiñe amu óunigirutiña sirkuitu ha subudibaña saragu kei burí Laurier Saumur * luma David Splane. * Lárigiñe kada adamurini au luma David aba burí wayanuha wámagua lúntima buídutima lan warufudahan. Aritagua nágili lariñagun nun aban weyu: “Léonce, hínsiñeti lagumuhóun yanu le bíchugubei nun. Buiti, au hamuga lau sun ariñahani lira nasagarúña hamuga ǘrüwa yanu lídangiñe”. Anihein meha aban igaburi nuagu ganigitina meha nádarun saragu ariñahani lidoun yanu, ábati nafurendeirun lunti lan nóunigiruni katei le.

Lunti meha híchugun óunigirutiña distritu dǘgüdaguaü houn óunigirutiña sirkuitu. Subuditina  meha houn saragu íbirigu Kebekü, ligíati dan le nabisidahabalin sirkuitu busentiña meha hapurichiha numa. Hínsiñeti meha nun napurichiha hama, gama lumoun, metenitina meha lun óunigiruti sirkuitu saragu. Aban weyu, lau ínsiñehabuni aba laritaguagüdünina aban óunigiruti sirkuitu, lariñaga nun: “Buiti lun básügürün dan hama íbirigu, mabulieidabei nunba lan betenira dimaasu le. Mégeitina giñe lichugún dǘgüdaguaü nun”. Lubuidun adundehani le líchugubei nun íderagua lumutina lun marabachun nan luagu ni aban oubaü.

Lidan irumu 1976, aba lasuseredun aban katei lidan nibagari le magurabun numuti. Aba tasandirun Simone to nani weiriou ani aba tounwen. Lubuidun igaburi le meha tuágubei luma ínsiñeni le tasandirubei luagu Heowá ligía adügübei lun aban tan würi to buitu. Lau beresegu nan lidan apurichihani adügati lira lun gayara lan nawanduni igarigu le lanügübei tounwen, seremei numuti Heowá luagu línsiñehabu luma líderagunina lidan dan hénrenguti ligía. Dan lárigiñe, aba namarieidun tuma Carolyn Elliott, aban prekursora to gariñagaditu inglesi ani to apurichihaboun lau ubebeni, to águyuboun Kebekü lun tídehan lidan apurichihani ñein. Aban meha würi to wéiriti tebereserun hau gürigia, hawagutima ha haburibaña o ha asandiragubaña hougua hábugua. Íderagua tumutina saragu lidan neseriwidun kei óunigiruti sirkuitu o distritu.

Lidan eneru irumu 1978, aba hamuriahan numa lun au lan arufudaha tidan furumiñetu Leskuela houn Prekursorugu to lunboun tadügǘn Kebekü. Nadadagaruña meha ladüga iseri lan ariñahani nun ítara kei houn aturiahatiña. Le buídubei tidan lan leskuela tuguya añahein lan meha saragu prekursorugu ha subudihaña saragu. Íbini au lan meha arufudahabei, furendeitina saragu hámagiñe aturiahatiña.

Dan lárigiñe, lídanmeme irumu ligía, aba ladügǘn aban Adamurini le ñein lubéi hachülüra íbirigu lídangiñetiña ámuñegueinarügü ageiraü le gíribei “Fe victoriosa” lidan Estadio Olímpico Montreal, ligía adamurini le wéiritimabei le adügǘbei Kebekü, le ñein lunbei hachülüra hóugiñe 80,000 gürigia. Aban híchugunina lun nawadigimaridun lidan Departamentu lánina Ariñahani. Ayanuhatina hama saragu gürigia ha nadagimeinbaña lidan lichugún  ñunsu, aba nagundaarun lau narihini lubuidun burí dimurei le áfuachubei tidan bigibigitu luma tidan radiu. Sügügüda hamuti kéiburi lóugiñe 20 oura álügüdahani le hadügübei woun tidan radiu luma tidan bigibigitu, ani fuati giñe saragu burí arütíkulu tidan saragu san periodiku. Hanarimeti uganu buiti le íchugubei!

Lidan irumu 1996, aba lasuseredun aban lanarime asansiruni lidan nibagari. Lúmagiñe nabadiseirun, súnwandan Kebekü lan neseriwida le ñein lubéi layanuhóua faransu. Gama lumoun, aba nounahóun eseriwida lidan aban distritu le ñein lubéi layanuhóua inglesi Toronto. Sandiguatina meha nungua maranserun nan ani hanufudetina meha nasaminarun níchugun yanu lidan inglesi le bougua bougua. Mosu meha nafurieidun saragu luma lun nafiñerun luagu Heowá.

Guentó, gayara haali nariñagun luagu sügǘ nan bián lubuidun irumu Toronto. Íderagua tumutina Carolyn lau gurasu lun buídutima lan nasandiragun nungua ayanuha inglesi, ani íderagua hamutina giñe íbirigu ani ru hagía dǘgüdaguaü nun. Lau lóufudagun ábaya gamadagua wamá iseri íbirigu.

Sagü burí wándaradi rábounweyu, lubaragiñe adamurini le adügǘbei samudi luma dimaasu, amu luéi saragu wadagimanu le burí adügǘbei luma burí aransehani luba adamurini, hínsiñeti meha nun lun náfuridun apurichiha tidan burí muna. Másiñati añahein lan álügüdaguatiña houngua ka lan uéigiñe nidin apurichiha lau sun aniheinbei lan saragu dasi lun ladügǘn samudi luma dimaasu. Aba níchugun fe ru lan dǘgüdaguaü nun nayanuha hama gürigia. Ani sandiguatina nungua buidu sagü náfuridun apurichiha.

Lidan irumu 1998, aba nounahóun Montreal eseriwida kei prekursoru espechaliti úara tuma Carolyn. Lidan saragu irumu aba híchugunina, lun narihin lau apurichihani lidan fulasu le ñein habéi saragu gürigia luma lun nayanuhan hama ha íchugubaña ñunsu, lun lagumuchúniwa lau iyerehabuni hawagu gefentiña luagu Heowá. Ani guentó napurichihaña úara tuma Carolyn Kanadá houn gürigia ha lídangiñetiña amu ageiraü ha sun liña hachülürün lidoun ageiraü le, ani libe-agei dan ayumahatiña gürigia ha lun hasubudirun saragu tuagu Bíbülia, ani hínsiñeti woun lun warufudahan houn.

Dan le nasaminarun luagu 68 irumu le naubei lúmagiñe nabadiseirun, sanditina biní láadina lan Heowá. Gúndaatina saragu ladüga wéiriti línsiñe apurichihani nun ani íderaguadina saragu gürigia asubudirei inarüni. Lárigiñe tagüriaruniña Lise to nisaani luma tani weiriei hasaanigu, aba hadügagun houngua prekursorugu ha adügübaña 70 oura lidan hati. Ma nugundan narihini meferidirun tágili lan Lise ubebeni luagu apurichihani. Seremei numutiña giñe íbirigu ha íderagubalina lau lubuidun hani hénpulu luma lubuidun adundehani le híchugubei nun lun nabuiduragüdüni numadagua luma Bungiu luma lun netenirun lun buligasion le neresibirubei tidan óundaruni. Furendeihadina ánhawagubeirügü lan afiñera luagu lani Heowá sífiri sandu le gabafubei ligíarügüba úaragua wamá lidan dasi le ichugúbei woun (Sal. 51:11). Nichigamémeba seremei lun Heowá lau líchugun chansi nun lun nalawahani liri (Sal. 54:6).