1. Ka meha lunbei ladügüni aban gürigia le busenbei layanuhan luma lurúeite Pérüsia?

SAMINA wamá winwan wamá meha Pérüsia kéiburi 2,500 irumu guentó. Busentiwa wayanuhan luma urúei, ligíati aba waweiyasuhan Susa le ñein tubéi lani urúei palasiu. Gama lumoun, moucha wamá ñüdün ayanuha luma meresibirunga üma furumiñe, ánhawa hamuga adügei lira gayaraabei weferidiruni wabagari (Esü. 4:11).

2. Ka labusenrunbei Heowá lun wasandiruni dan le wayarafadun lun?

² Chóuruti gunda wamá saragu mítaran lan Heowá kei meha lurúeitegu Pérüsia. Íbini gabafutima lan ani iñu ligía lúbara sügǘ hawéi gumadimatiña, gayaraati wayarafadun lun furumiñeguarügü oura. Busenti lun manufudedun wamá lun wayanuhan luma. Inarüni hanarime lan iri le aubei laguarúa lun, kei burí: Le Adügübalin sun katei, Suntigabafu, luma Labureme ubóu. Gama lumoun busenti lun wayusurun aban dimurei le hayusurubei iduheñu, dimurei: “Wáguchi” (Mat. 6:9). Ma hingí lumutu wanigi lau busén lan Heowá lun gamadagua wamá luma?

3. Ka uagu wagúara lun Heowá “Wáguchi”, ani kaba wariha lidan arütíkulu le?

³ Gébunati wagúarun lun Heowá “Wáguchi” lugundun ligía íchugubalin wabagari woun (Sal. 36:9). Kei ligía lan wáguchibei, lunti gaganbadi wamá lun. Ánhawa adügei le lariñagubei woun, labinirubadiwa saragu (Ebü. 12:9). Aba lídangiñe, ibagari magumuchaditi sielu o ya ubouagu. Sagatiwa giñe buiti lídangiñe abiniruni le guentó. Lidan arütíkulu le, warihibei ida liña lan larufuduni Heowá aban lan Úguchili hínsiñehabuti luma ka lan uagu chouru wabalin maweiyasunbei lan ígirawa ámuñegü. Furumiñe akutiha waméi ka lan uagu gayara lubéi wachoururuni hínsiñe  wamá lun Wáguchi le siélubei saragu luma ka lan uagu lóunigirawa.

4. Ka uagu hénrengu lubéi houn fiu gürigia lun harihini Heowá kei Háguchi?

⁴ Hénrenguti san woun warihini Heowá kei aban Úguchili? Gayaraati añahein lan gürigia sandiguatiña houngua ni kata lan hagía lóubawagun Heowá. Añahein hagía machourutiña anhein berese lubéi Suntigabafu lau kada aban wádangiñe. Gama lumoun mabusenrunti Wáguchi Bungiu lun wasandiragun woungua ítara. Ligía íchugubalin ibagari woun ani busenti lun gamadagua wamá luma. Dan le lariñagunbalin apostolu Pábulu inarüni le Atenasi, ariñagati “luagu madise lan [Heowá] luéi kada aban wádangiñe” (Adü 17:24-29). Busenti Bungiu lun hayarafadun sun gürigia lun kei layarafadun aban irahü lun lúguchi le hínsiñehabubei.

5. Ka wafurendeirubei luagu le asuseredubei tun aban íbiri?

⁵ Anihein ábaya resun le adügübei lun hénrengu lan houn fiu gürigia harihini Heowá kei aban úguchili. Kati resun ligía? Ladüga murusunrügüñein lan ínsiñeni larufudun háguchi guánarügü houn o marufudun lan ni murusun. Ariñagatu aban íbiri: “Óusera lumutiwa meha núguchi wuriba. Dan le nagumeserunbei afurendeira tuagu Bíbülia, hénrenguti meha nun lun nasandiragun nungua yarafañu lun aban Úguchili le siélubei. Aba lasansirun katei le dan le nafurendeirubei luagu Heowá”. Susereti san aban katei ítarati woun? Anhein susere lubéi, chouru waméi gayara lan warihini Heowá kei Úguchili le buídutimabei.

6. Según Lúkasi 10:22, ida liña líderaguniwa Heowá arihei kei aban Úguchili hínsiñehabuti?

⁶ Ida liña líderaguniwa Heowá lun warihini kei aban úguchili hínsiñehabuti? Aba lídangiñe lau warihini tidan Bíbülia le lariñagubei luma le ladügübei Hesusu (aliiha huméi Lúkasi 10:22). Arufuda lumuti Hesusu lubuidun ligaburi Lúguchi darí lun lariñagun: “Le arihitina, larihiñein giñe Bungiu Úguchili” (Huan 14:9). Ayanuhati saragu wéiyaasu luagu ligaburi Heowá keisi Úguchili. Tídanrügü gádürü Ewanhéliu kéiburi 165 wéiyaasu wati lun Heowá “Núguchi”. Ka uagu layanuha Hesusu saragu luagu Heowá? Ladüga busén lan meha lun hachoururuni gürigia aban lan Úguchili hínsiñehabuti Heowá (Huan 17:25, 26).

7. Ka wafurendeirubei luagu Heowá dan le wakutihani ligaburi lóuseruni Lisaani?

⁷ Ariha waméi ida liña lan lóuseruni Heowá, Hesusu le Lisaani, luma le larufudahabei katei le woun. Súnwandan meha laganbuni Bungiu lafurieidun Lisaani ani óunabalei (Huan 11:41, 42). Súnwandan meha lasandiruni Hesusu línsiñehabu luma lídehan Lúguchi meberesenga meha lénrengunga le úmati lagagibudagua (Luk. 22:42, 43).

8. Ida liña lóunigiruni Heowá Hesusu?

⁸ Subudi lumuti meha Hesusu Lúguchi lan adügübei lun gabagari lan rulei le lemegeirubei lun lun lawinwandun. Ariñagati: ‘gabagaritina giñe lídaangiñe’ (Huan 6:57). Afiñeti meha Hesusu sunsuinagubei luagu Heowá ani ru lumuti meha giñe Heowá le lemegeirubei lun lun lawinwandun. Létima súdinitimabei íderagua lani Heowá lun úaraguameme lan (Mat. 4:4).

9. Ida liña larufuduni Heowá hínsiñe lan meha Hesusu lun?

⁹ Kei aban Úguchili hínsiñehabuti, chóurugüda lumuti Heowá lun Lisaani líderagubei lan (Mat. 26:53; Huan 8:16). Inarüni mesefu lani Heowá lisaani lídangiñe sun luriban katei le lásügürübei, lau sun lira, íderagua lumuti awanda lénrengunga. Subudi lumuti meha Hesusu madurabei lan furumiñeguarügü lénrengunga le úmati lagagibudagua lun súnwandan (Ebü. 12:2). Arufuda lumuti Heowá góunigi  lani Lisaani lau laganbuni, lau líchuguni le lemegeirubei lun, lau ladundehani luma lau líderaguni (Huan 5:20; 8:28). Guentó, ariha waméi ida liña lan líderaguniwa Wáguchi le siélubei lau ligiaméme igaburi.

10. Kei lariñaguni Sálumu 66:19, 20, ida liña larufuduni Heowá línsiñehabu woun?

¹⁰ Aganba lumuti Heowá wafurieidun (aliiha huméi Sálumu 66:19, 20). Mariñagunti Heowá woun halíaba lan lébeha wafurieidun lun, lubaragiñe lira ariñagati woun lunti lan wafurieidun sun dan (1 Tesa. 5:17). Lanwoun lira, gayaraati wayanuhan luma lau inebesei lidan furumiñeguarügü dan luma fulasu. Dan le gunfuranda wamani aganba lani Heowá wafurieidun, ábatima wayarafadun lun. Ariñagati aban abürühati Salumu: “Hínsiñeti Nabureme nun, ladüga aganba laali lan nayumuragun” (Sal. 116:1).

11. Ida liña lóunabuni Heowá wafurieidun?

¹¹ Mama aganbarügü lumuti Wáguchi wafurieidun, óunaba lumuti giñe. Chóurugüda lumuti apostolu Huan katei le woun lau lariñagun: “Subudi wamuti luagu ánhawa lan amuriaha furumiñeguarügü katei keisi lugundan, laganbubadiwa lan” (1 Huan 5:14, 15). Inarüni, háfuga móunabun lubéi lan Heowá wafurieidun ítara kei wagurabuni. Kei subudi lubalin kátima lan wemegeirubei, ñeinbei dan móunabun lubéi lan wafurieidun kei wabusenruni o ladügün lun wagurabaha luagu fiu dan (2 Ko. 12:7-9).

12, 13. Ida liña líchuguni Heowá le wemegeirubei woun?

¹² Ru lumuti Heowá le wemegeirubei woun. Adügati Heowá aban katei kei le hadügübei úguchiligu (1 Tim. 5:8). Téniti lun le hemegeirubei lisaanigu. Mabusenrunti lun wadiheridun luagu éigini, daüguaü o halíaba lan weredera (Mat. 6:32, 33; 7:11). Kei hínsiñe wabéi lun, adügaali aransehani lun wibihibei lan le wemegeirubei ámuñegü.

¹³ Létima súdinitimabei, ru lani Heowá le wemegeirubei woun lun buidu lan wamadagua luma. Afuranguagüda lumuti inarüni woun tídangiñe lererun káteiñein lan, ka lan lisuunibei, ka lan lisuunibei ibagari luma kaba lan asusereda ámuñegü. Beresetimaati lau kada aban wádangiñe dan le wagumeserun asubudirei inarüni ani yusu lumutiña wagübürigu o wamaisturugu lun líderaguniwa asubudirei. Ani anihagua íderaguawa lau ínsiñehabuni lau layusuruniña wéiyaaña lidan afiñeni hama amu íbirigu ha derebuguti hafiñen. Lanwoun lira, yusu lumuti adamuridaguni lun ladundehaniwa, le ñein lubéi wafurendeira luagu úara hama wíbirigu lidan afiñeni. Lau burí igaburi kei le larufudei woun aban lan Úguchili ligía le beresebei lau kada aban wádangiñe (Sal. 32:8).

14. Ka uagu ladundehawa Heowá ani ida liña ladügüni?

¹⁴ Adundeha lumutiwa Heowá. Kei gafigoun wabéi, mítarantiwa kei Hesusu. Ligíati lun ladundehaniwa Wáguchi le hínsiñehabubei, ererehati woun dan le wemegeiruni. Haritaguagüda tumutiwa Lererun lau dimurei le: “Arufudahati Bungiu houn ha hínsiñebaña lun, bei laña” (Ebü. 12:6, 7). Adüga lumuti lidan bandi igaburi. Kei hénpulu, gayaraati ladügün somu katei le waliihabei tidan Bíbülia o le waganbubei lidan adamuridaguni lun wasubudiruni wagía woungua mosu lan wasansirun. Másiñati giñe liabin ídemuei le wemegeirubei hámagiñe wéiyaaña lidan afiñeni. Meberesenga ida liña lan liabin, súnwandan lererehan Heowá woun ladüga wínsiñe lun (Her. 30:11).

15. Ida liña lóunigiruniwa Heowá?

¹⁵ Íderagua lumutiwa Heowá awanda lénrengunga. Góunigi lumutiwa Wáguchi le siélubei lidan lidaani lénrengunga, ítara kei ladügüni aban úguchili le hínsiñehabubei houn lisaanigu.  Yusu lumuti lani sífiri sandu lun magadeirun lan wamadagua luma (Luk. 11:13). Lanwoun lira, íderagua lumutiwa giñe Heowá dan le nidiheri wamá. Kei hénpulu, ruti aban lubuidun emenigini woun lubá ámuñegü, le íderagubaliwa awanda turobuli. Samina wamá luagu le: laransehabei Wáguchi hínsiñehabuti furumiñeguarügü luwuyeri damichi le wasufurirubei. Madurabei óuchawaguni lun sun dan, ánheinti abiniruni le lunbei líchuguni Heowá laduraruba lun sun dan (2 Ko. 4:16-18).

16. Ka asuseredubei dan le maganbadi lubéi Adán lun Lúguchi?

¹⁶ Aban katei le arufudubalin línsiñehabu Heowá wawagu, lau ligaburi laransehani turobuli dan le maganbadi lubéi Adán lun. Adügati maganbadi lan Adán lun mámabei lan hádangiñe liduheñu Bungiu ligía hau ladügawagun (Rom. 5:12; 7:14). Íbini ítara, aba laransehani Heowá katei le.

17. Ka ladügübei Heowá lau lóufudagun lárigiñebei maganbadi lan Adán?

¹⁷ Lau sun bei lani Heowá Adán, mígirun lumutiña ladügawagun memeniginga. Lau lóufudagun, füramaseti hayabinyaba lan ladügawagun Adán ha gaganbadibaña, lun hádangiñe hamaaya liduheñu Heowá (Agu. 3:15; Rom. 8:20, 21). Adügati lun lasuseredun le, seremei lun lani Hesusu, Liráü le hínsiñebei lun, sákürifisiu. Lau ladügün lun lounwen wawagu, arufuda lumuti woun weiri lan wínsiñe lun (Huan 3:16).

18. Ka uagu chouru wabalin hínsiñe wamá lun Heowá kei lisaanigu, íbini anhein ígira wamaali lubéi?

¹⁸ Íbini gafigoun wamá, busenti Heowá lun hádangiñe wamá liduheñu ani marihin lumutiwa kei ihürügu. Másiñati wadügün lun lírudagun o aba lan wadisedun luéi luagu fiu dan, íbini ítara, marihin lumutiwa kei gürigia ha máraninaali hawaguti. Lau hénpulu luáguti isaani le eferidirubei, arufuda lumuti Hesusu weiri lan wínsiñe lun Heowá (Luk. 15:11-32). Meferidirun  lumuti úguchili le eferidirubalin lisaani lemenigin luagu lagiribuduba lan lisaani. Ani dan le lagiribudunbei, resibi lumuti úguchili lisaani lau larüna daragu. Anhein ígira wamaali lubéi Heowá ani asakürihaadiwa, gayaraati wachoururuni busén lan Heowá lun wagiribudun lun.

19. Kaba ladüga Heowá lun laransehani damichi le adüga láalibei Adán?

¹⁹ Laransehabei Wáguchi sun damichi le adüga láalibei Adán. Dan le maganbadi lubéi Adán lun Heowá, aba ladügün Heowá aransehani lun lanúadirun 144,000 gürigia lun lirahüñüme, ha lúnbaña urúeigu hamá ani fádirigu hagíame sielu úara luma Liráü. Lídanme iseri ubóu, dandu Hesusu hama ha lúnbaña harúeihan luma híderagubaña gürigia gaganbaditiña lun mafigoun hamá. Lárigiñeme lagumuhóun óuchawaguni lánina gaganbadi, líchuguba Bungiu ibagari magumuchaditi houn. Wéiribei lugundan Wáguchi laume larihini Ubóu buin hau lirahüñü mafigountiña. Mame lueirin lubuidun katei le!

20. Ida liña larufuduni Heowá woun hínsiñe wamá lun sunsuinagubei ani kaba wakutiha lidan le aban arütíkulu?

²⁰ Arufuda laali Heowá hínsiñe wamá lun sunsuinagubei. Ligía Úguchili buídutimati le gayaraabei Gáguchi wamani. Aganba lumuti wafurieidun ani ru lumuti le wemegeirubei woun dandu lun wawinwandun kei lun wóunigiruni wamadagua luma. Adundeha lumutiwa ani íderagua lumutiwa. Lanwoun lira, líchuguba lubuidun burí abiniruni woun ámuñegü. Ma wéiritu wanigi lau wasubudiruni hínsiñe wamá lun Wáguchi ani góunigi lawa? Lidan le aban arütíkulu wakutihaba ida luba lan warufuduni, wagía lisaanigu, weteingiradi luagu ínsiñeni le lasandirubei wawagu.