1. Ka lariñagubei Hesusu houn lani disipulugu luagu “lagumuchagüle ubóu” ani ka adundehani líchugubei houn?

 MURUSUN dan lubaragiñe lounwen Hesusu aba hálügüdaguni gádürü hádangiñe lani disipulugu kaba lan liseinin “lagumuchagüle ubóu” (Mat. 24:3). Másiñati álügüdagua hamá disipulugu houngua ida luba lan hasubudiruni yarafaali lan lágünriñawagun uburugu Herusalén. Lau óunabagülei le líchugubei Hesusu houn, mámarügüñein luagu lagünrinchawagun uburugu Herusalén layanuha, ayanuhati giñe luagu “lagumuchagüle ubóu” le ídanbei wawinwanda. Dan le layanuhanbei ídaba lan lagumucha ubóu, ariñagati: “Ánheinti weyu luma oura le lunbei lasuseredun sun katei le, ibidiñeti ni ka un, ni houn lani Bungiu ánheligu ha siélubaña, ni lun Liráü; Búngiurügüñein le Úguchili asubudirei”. Lárigiñe ábanya lariñagun houn: “Aranseñu humá”, “agagudúañu humá lubeiti” (Mar. 13:​32-​37).

2. Ka meha uagu mosu lubéi agagudúañu hamá kristiánugu ha meha awinwandubaña uburugu Herusalén?

² Mosu meha agagudúañu hamá kristiánugu huríu ha lánina furumiñeti sígulu. Ladüga lídanñein meha huraraü habagari. Afuranguagüda lumuti Hesusu houn lani disipulugu kaba lan un hetenirun lun hasubudiruni yarafaali lan lagünrinchawagun Herusalén. Ariñagati houn: “Danme harihin geyegua hamá lan súdaragu uburugu Herusalén, subudi huméi luagu yarafaali lan lagünrinchawagun uburugu ligía”. Dan meha ligía, mosu hanurahan luagu wübü, kei lariñaguni Hesusu houn (Luk. 21:​20, 21). Ha meha adügübaña gasu lau le lariñagubei Hesusu lubaragiñe hagünrinchaguni rómana Herusalén, aba hanurahan ani sefu hamuti habagari.

3. Kaba wariha lidan aturiahani le?

 ³ Wawinwanduña lidan lidaani lagumuchagüle libidiegun ubóu le. Ligíati, ítara kei kristiánugu ha lánina furumiñeti sígulu mosu duari wamá ani agagudúañu wagíame. Lidan aturiahani le warihiba ida luba lan warihini katei lidan lubudubu sun awanha lan arihei le asuseredubei ubouagu. Warihibei giñe ka lan lunbei wadügüni lun waríagun woungua ida waña lan luma lun wasubudiruni ida luba lan wayusuruni wadaani buidu lidan lagumuhóun dan le erederubei lun ubóu le.

4. Ka uagu mariban lubéi lun wetenirun lun le asuseredubei ubouagu?

⁴ Gébunati webereserun lun wasubudiruni ida liña lan agunfulireina lan profesía le tídanbei Bíbülia ubouagu. Kéiburi, íridati Hesusu saragu sügǘ, le lunbei lasuseredun le lunbei líderaguniwa asubudirei yarafaali lan lagumuchagüle ubóu le lábugiñebei lubafu Satanási (Mat. 24:​3-​14). Ínchaha lumutiwa giñe apostolu Féduru lun wetenirun lun lagunfulirun profesía le tídanbei Bíbülia lun derebugu lan wafiñen (2 Fe. 1:​19-​21). Gumesetu tagumuhóun líburu to tídanboun Bíbülia lau burí dimurei le: “Anihán burí katei le larufudubei Bungiu lun Hesukrístu lun lasubudiragüdüni houn lánigu, katei le burí lunbei lasuseredun madise” (Aruf. 1:1). Ligíati maribanti wasubudiruni le asuseredubei ubouagu luma ida liña lan ladügün katei le lun lagunfulirun profesía le tídanbei Bíbülia. Másiñati hínsiñe lan giñe woun lun wayanuhan luagu tema le hama wábirigu.

5. Ka lunbei wóunigiruni dan le wayanuhan luagu profesía le tídanbei Bíbülia ani ka lunbei wadügüni? (Ariha humóun iyawaü)

⁵ Danme le wayanuhan luagu profesía le tídanbei Bíbülia lunti duari wamá. Ka uagu? Ladüga mabusenrúntiwa wariñaguni le wasaminarubei le gayaraabei ladügün lun lafanreinragun damuriguaü. Kéiburi, másiñati waganbuniña gumadimatiña ayanuha luagu le lunbei hadügüni lun haransehani turobuli le ubouagubei ani barǘ hameime nege darangilaü luma ichouruni. Lubaragiñe werederun asaminara anhein lagunfuliruña lubéi profesía le lídanbei 1 Tesalónikana 5:3, lunti wasubudiruni ka lan ariñahani le iseritimabei le tíchugubei lóundarun Heowá. Anhein sun lubéi le wariñagubei tídangiñeti agumeiraguagüdüni to tíchuguboun lóundarun Heowá wídehaba lun ñein lan úarani lidan damuriguaü luma lun giñe ábanmeme lan “luwuyeri saminaü luma aritaguni” wadan (1 Ko. 1:​10; 4:6).

6. Ka wafurendeirubei tídangiñe 2 Féduru 3:​11-​13?

⁶ (Aliiha huméi 2 Féduru 3:​11-​13). Íderagua lumutiwa apostolu Féduru lun warihini lau lubudubu dan le wakutihani profesía le tídanbei Bíbülia. Ínchaha lumutiwa lun agurabañu wamani “lachülürün luéyuri Bungiu”. Ka uagu? Mama ladüga busén wamá wasubudiruni kaba lan “weyu luma oura” lanügei Heowá Arümahedón, wadügünbalin ladüga busén hamá wayusuruni dan le erederubei lun ‘haruma lan wabagaridun, deregeguañu woungua lun Bungiu sunsuinagubei’ (Mat. 24:​36; Luk. 12:​40). Mini lan le wóuserun lau aban lubuidun igaburi luma lun wachoururuni sun lan le lunbei wadügüni luagu Heowá adüga wamuti ladüga línchahaniwa óunwenbu ínsiñeni le wasandirubei luagu. Lun wibihini lunti waríagun woungua ida waña lan.

7. Ka lunbei wadügüni lun waríagun woungua ida waña lan? (Lúkasi 21:​34).

⁷ Ariñagati Hesusu houn lani disipulugu lun lan hetenirun lun le asuseredubei ubouagu luma lun haríagun houngua ida haña  lan. Furanguti warihini le, lidan le lariñagubei houn lidan Lúkasi 21:​34 (aliiha huméi). Teni wamá lun dimurei le lariñagubei Hesusu: “Góunigi humá” húniwagua. Ka mini lubéi wóunigiragun wóuniwagua? Mini lan lun duari wamá luéi sun katei le gayaraabei lagadeiruni wamadagua luma Heowá luma lun wadügüni sun wayaraati lun wadisedun luéi. Anhein wadüga ítara wakipuraguba woungua lidan línsiñehabu Bungiu (Ari. 22:3; Hud. 20, 21).

8. Ka adundehani líchugubei Pábulu houn kristiánugu?

⁸ Ariñagati apostolu Pábulu houn kristiánugu lunti lan haríagun houngua ida haña lan. Abürühati houn kristiánugu ha Éfesubaña, ariñagati houn: “Góunigi humá lubeiti buidu ida liña lan hóuserun. Mabagarida humá kei ibidiougua tau, habagarida kei chu tau” (Efe. 5:​15, 16). Adüga lumuti Mafia sun liyaraati lun lagumuchun lau wamadagua luma Bungiu. Ligía tíchugunbei Bíbülia adundehani lun gunfuranda wamani “ka lan lugundanbei Wabureme” ítara lubati wawandun furumiñeguarügü óuchawaguni (Efe. 5:​17).

9. Ida luba gunfuranda wamani ka lan lugundanbei Bungiu woun?

⁹ Úatu ni aban lísüta tidan Bíbülia luagu sun katei le denchati le gayaraabei lagadeiruni wamadagua luma Heowá. Anihein dan wanúadirun wadügün somu katei ani úati adundehani tidan Bíbülia libügürü. Lun gayara lan wanúadirun buidu lunti gunfuranda wamani “ka lan lugundanbei” Heowá. Ida liña wadügüni le? Lau waturiahanu Lererun luma lau wararamagun asaminara luagu le waliihabei tidan. Éibutimaame gunfuranda wamani ka lan lugundanbei Heowá éibutimaame wáfaagun lun ítara lan wasaminan kei “lisaminan Kristu”, ani ménrenguntimabei woun wóuserun “kei chu tau”, íbini anhein úa lubéi aban lúrudu le ariñagubei woun kaba lan wadüga (1 Ko. 2:​14-​16). Anihein peliguru ménrengunti lasubudirúniwa ani anihein ligía hénrenguti lasubudirúniwa.

10. Ka san fiu lídangiñe denchaü lunbei wadisedun luéi?

¹⁰ Anihein fiu katei le moun lumuti wadügüni, kéiburi: werederun adarigúdügü, wátagun wéinamu lan weigin, mariñagun wagíame dimurei le abuleseihati, moun lumuti giñe waríagun anarimeni ni iyawaü lánina agamariduni (Sal. 101:3). Súnwandan láluahaña Mafia le wágani lun lagadeiruni wamadagua luma Heowá (1 Fe. 5:8). Ánhawa móunigi gayaraabei ládahan Mafia gimugaü, liwiye igaburi, igaaduaü, iyereehabúni luma pantaü lidoun wasaminan luma tidoun wanigi (Gal. 5:​19-​21). Másiñati manarime lan igaburi le furumiñe wawagu. Gama lumoun, anhein magidarun wamá igaburi le wawariua lau lóufudagun, aweirideinatima luba darime lun ítara lan kei aban nadü péisinitu ani to denchatu (Sant. 1:​14, 15).

11. Katei san denchaü le marihínbei furangu, ani ka uagu lunti lubéi wadisedun luéi?

¹¹ Samina wamá luagu aban denchaü le marihínti furangu: hagübüri umadagu. Samina wamá anihein lan aban wani paaná lidan wadagimanu ani mama Gefenti. Kei busén wabéi lun buidu lan lasaminarun hawagu gefentiña luagu Heowá, buiti wóuseruni ani gamadaguatiwa luma. Másiñati aniheinbei lan dan ábame lan weigin úara luma, gama lumoun, laume lásügürün dan ábame wéchudun luagu ligaburi. Anihein dan ayanuhati luagu agamariduni. Ani furumiñe madariraguntiwa woungua aganbei libe burí yanu le ani meberesentiwa lau le lariñagubei. Laume lásügürün dan aba wéchudun aganbahei liwiye liyanun ani marihin wamaali kei aban katei wuribati. Ábati lagunbirahaniwa ata somu katei lárigiñe wadagimanu, aba wariñagun lun anha lan. Lau lásügürün dan aba wáyeihani ligaburi lisaminan. Átiribei san dan ásügürüti lun  wagumeserun óusera kei ligía? Inarüni inebe hamá sun gürigia houn kristiánugu ani arufudatiña ínsiñehabuni houn. Mabulieida waméi gayara lan láfadarun hagaburi gürigia ha úmabaña wóundara wawagu (1 Ko. 15:​33). Ánhawa adügei le lariñagubei Hesusu ani aríagu wagíame woungua ida waña lan, másügürübadiwa saragu dan hama gürigia ha minebenehabubaña lun lilurudun Heowá (2 Ko. 6:​15). Warihibei denchaü ábame wadisedun luéi.

12. Ka lunbei meha hadügüni lani Hesusu disipulugu darí lagumuchun ubóu le lábugiñebei lubafu Mafia?

¹² Herederuba hamuga san lani Hesusu disipulugu chagu harüna agurabahei lagumuchun ubóu madügünga ni kata? Uá, lugundun ruti Hesusu aban dasi houn. Óunaha lumutiña apurichihei uganu buiti “dandu Herusalén kei sun lóubawagu Hudéa, Samaria, chülǘ lumoun lidise-agei fulasu ubouagu” (Adü. 1:​6-8). Wéiriti meha dasi le lunbei hadügüni. Ánhaña meha etenira lun dasi le sunsuinagubei, hayusurubei meha hadaani lidan aban igaburi buiti.

13. Ka uagu lunti lubéi wayusuruni wabagari lidan aban igaburi buiti? (Kolosana 4:5).

¹³ (Aliiha huméi Kolosana 4:5). Lun warihini ida waña lan lunti wasubudiruni ida liña lan wayusuruni wadaani. Kei lariñaguni Apurichihati 9:​11, gayaraati lachülürün “dan luma sügǘ le magurabúnti” woun sódini. Íbini  wabagari gayaraati giñe weferidiruni sódini.

14, 15. Ka lunbei wadügüni lun wayusuruni wadaani buidu? (Ebüréu 6:​11, 12; ariha humóun giñe iyawaü).

¹⁴ Aban igaburi lun wayusuruni wadaani buidu lau wadügüni lugundan Heowá luma lau wederebudagüdüni wamadagua luma (Huan 14:​21). Lunti wafalaruni adundehani le tídanbei Bíbülia: “Ítarameme humá deregüdagu lidan hafiñen, merederagunga ligía huádigimari súnwandan, gánwoungueinarügü lidan luadigimari Wabureme” (1 Ko. 15:​58). Ítarati danme le lachülürün —lagumuchagüle wabagari o lagumuchagüle ubóu— masakürihanbadiwa asaminara ka lan uéigiñe magawoungüdün wabalin weseriwidun lun Heowá (Mat. 24:​13; Rom. 14:8).

¹⁵ Uguñe weyu, aniheingua Hesusu adundehaña lani disipulugu lidan lapurichihóun uganu buiti luáguti Larúeihan Bungiu lidan sun ubóu. Lau layusurunu Heowá lóundarun, arufudahati Hesusu woun ida luba lan wapurichihani uganu buiti ani ru lumuti le wemegeirubei woun lun wadügüni dasi le (Mat. 28:​18-​20). Le lunbei wadügüni, wapurichihan luma lun warufudahan lau ubebeni, agagudúañu wagíame sun awanha lan agurabahei lagumuchun Heowá lau ubóu le. Ítara luba wárügüdün luagu wemenigin “darí lumoun lagumuhóun” kei lariñaguni Ebüréu 6:​11, 12 (aliiha huméi).

16. Ka aranseñu wabéi lun wadügüni?

¹⁶ Anúadiraali Heowá kaba lan dan lagumucha lau ubóu le lábugiñebei lubafu Satanási. Danme le lachülürün weyu ligía lagunfulirubei Heowá profesía le bürüwañubei tidan Bíbülia le magunfulirugilibei. Íbini anihein lan dan genege lan darasa lan lachülürün luéyuri Heowá, “lachülürüba lidan dan” (Abak. 2:3). Ligíati aranseñu waña lubéi lun wadügüni le lariñagubei Mikeasi 7:7: “Nagurabahaba lúmagiñe Wabureme, níchugubei nemenigin luagu Bungiu le nesefuragüle”.