YOMARA, Marcelo luma Hiver hagía ǘrüwa íbirigu ha awinwandubaña lidan aban liraüraü aüdü Wadimalu. Yomara agumeseruboun aturiahoun Bíbülia hama gefentiña luagu Heowá, lárigiñe aba giñe haturiahan bián tíbirigu. Gama lumoun, anihein meha aban turobuli: Maliiraditiña meha braile. Ligía mosu lubeiha laliihani íbiri le íchugubei aturiahani houn párafu luma burí bérusu tídangiñeti Bíbülia.

Hénrenguti giñeha houn houdin adamuridagua. Bián-wein minutu tidise Luban Adamuridaguni luéi fulasu le ñein lubéi heredera, ani siñati meha houdin hábugua ñeinhin. Ligía aba lubéi hadügün íbirigu ha lídanbaña damuriguaü ligía aransehani lun hanaahaniña lidoun adamuridaguni. Ani dan le hagumeserunbei ǘrüwagubei hagía íchiga fánreinti lidan adamuridaguni le labadinaguabei dimaasu, ábaha híderaguniña íbirigu lun hafurendeiruni le lunbei hariñaguni.

Lidan seingü-hati lidan irumu 2019, aba hagumeserun gefentiña luagu Heowá adüga adamuridaguni lidan liraüraü aüdü le ñein lubéi heredera íbirigu ha ani aba giñe háguyun aban feru maríeitiña prekursorugu awinwanda ñein. Aba háfaagun maríeitiña ha lun harufudahan aliiha luma abürüha braile houn ǘrüwa íbirigu hagía, íbini ibidiñe lan meha houn ida luba lan hadügüni. Ligía hóudinbei lidan aban fulasu le tani líburu-agei lun hafurendeirun braile luma ida luba lan harufudahani houn amu.

Lídanrügü fiu hati, aba hafurendeirun ǘrüwa íbirigu ha aliiha braile lau lumenrengun, adügati katei le lúntima hawanserun lidan hamadagua luma Heowá. a Guentó prekursoruhaña ha adügübaña 70 oura luagu hati Yomara, Marcelo luma Hiver, ani ábanhali ídehati lidan damuriguaü Marcelo. Yúsutiña saragu dan lidan dasi le lánina heseriwidun lun Heowá sagü dimaasu. Adüga hamuti dasi le, lau saragu ubebeni darí lun háyeihaniña amu íbirigu.

Wéiriti heteingiruniña ǘrüwa íbirigu ha lílana damuriguaü luagu sun le hadügübei hawagu luma luagu ínsiñeni le harufudubei houn. “Lúmagiñe weyu le wasubudirunbaliña íbirigu, arufudaaña ínsiñeni le inarüniti woun” tiña Yomara. Ani ariñagati giñe Marcelo: “Añahein umadagu buítiña wama lidan damuriguaü ani hádangiñetiwa íbirigu ha lídangiñetiña sun ubóu ha lídanbaña aban lidan larufudún ínsiñeni”. Dandu Yomara kei tíbirigu, busentiña tídangiñe sun hanigi lachülürün weyu lun harihini ubóu le ábanme paraísu (Sal. 37:10, 11; Isa. 35:5).