Aba néherahan. Marihin lumuti numada kei aban gürigia le hínsiñeti katei lánina Bungiu lun. “Aba nálügüdüni: Kati basubudirubei tuagu Bíbülia?”. Aba lámanichun. Lárigiñe aba lariñagun nun, gefentu lan luagu Heowá lúguchu ani arufudaha tan fiu katei lun. Aba nabusenrun nasubudiruntima luagu Bungiu aba nariñagun lun lun lasigirun abahüdaha nun.

Darüdüwatiwa ayanuha áriebu ligía. Ariñagati numada nun ariñaga tan Bíbülia Satanási lan arúeihabalin ubóu le (Huan 14:30). Másiñati mama lan aban katei iseri hun, ánheinti nun, iseriti meha le naganbunbei ani chawá lumuti naritagun. Súnwandan meha naganbun aban lan Bungiu buiti ani richati agumadirubalin ubóu le. Gama lumoun múaranti katei le luma le narihibei. Íbini meha 26 lan irumu nau, arihatina meha saragu katei wuribati.

Abugaha lumutu meha núguchi awión to hani lisudaranigu Meriga. Ligíati lúmagiñe niñüraü subudi numuti sétiñu haña lan súdaragu lun hayusurun bonba nuclear. Aranseñu haña súdaragu hagía lun haduurunu bonba to, láurügü hadügüdarun aban budún. Irumu le naubei aturiaha tidan luban furendei íñuti Kalifornia hénrenguti meha, ladüga wuribu le Vietnambei. Ñǘdüntina meha amarüchara hama aturiahatiña lun warufuduni magundan wamá luagu le asuseredubei. Aba héibaahaniwa polisía lau galufa, ani mosu meha wéibaagun lau sun hénrengu lan wawaragun ani marihin wagía buidu ladüga gasi lacrimógeno. Aban meha dan lánina chagaguaü ani hénrenguti. Áfarawaguatiña meha gürigia ha lídanbaña polítika hilagubei, anihein meha amarücharuni lun harufuduni magundan hamá lau chagaguaü. Fánreingu haña meha gürigia ladüga ámuñegueinarügü lan hasaminan, ani au ibidiñeti meha nun kaba lan nasaminara.

Lidan irumu 1970 aba nidin awadigimarida Alaska, le ñein lubéi nagañeira saragu seinsu. Lárigiñe aba nidin Alundu (Ingülatéra), le ñein lubéi nagañeiha aban moto ani aba nidin luéigiñe suru libiti Ingülatéra ibidiñega nun haliñounbadina lan. Fiu hati lárigiñe aba nachülürün Áfürika. Lidan néibuguniwa aba nasubudirun saragu gürigia, ítara kei au busentiña meha hanurahan luéi le geyegubei hau luma lun buidu lan hasandiragun houngua.

Sun le narihibei luma le naganbubei adügati lun nasaminarun inarüni lan le tariñagubei Bíbülia, dan le tariñagun aban lan sífiri wuribati agumadirubalin  ubóu. Gama lumoun busentina meha nasubudiruni ka lan lubarabei Bungiu lidan sun katei le.

Fiu hati lárigiñe darí numuti óunabagülei. Lau lásügürün dan, aba nasubudirun saragu wügüriña hama würiña ha úaraguabaña lun ábanrügü Bungiu inarüniti meberesenga ka lan gádanbaliña ani hínsiñetiña nun.

Dan le nagiribudunbei Alundun, aba nayanuhan tuma lúguchu numada, ani aba tedewehan aban Bíbülia nun. Lau lásügürün dan aban nidin Ámsterdam (Países Bajos). Aba weyu, naliihañoun Bíbülia lábugiñe aban lanpu ǘmadarugu. Aba lásügürün aban Gefenti ñéingiñe, aba lararamagun lun larufudahan nun. Lárigiñe, dan le Dublín nubéi (Irülánda), aba nidin tidan sukursáli hani gefentiña luagu Heowá. Aba nadaünha luagu bena, ani ñein nasubudirei aban íbiri le gíribei Arthur Matthews, aba íbiri lǘhali lidan inarüni. Aba nariñagun lun busén nan naturiahanu Bíbülia, ani ánhati.

Hínsiñeti meha le nafurendeirubei nun saragu, ani meredeti naliihanu líburu tuma burí garüdia to hadügüboun gefentiña luagu Heowá. Ani aliiha numutu giñe Bíbülia. Wéiritu nanigi narihiniña íbini irahüñü subudi hamuti óunabagülei lun burí álügüdahani le hadügübei saragu chu tau lidan saragu sígulu ubouagu, kei burí ka lan uagu anihein lubéi wuribani, ka lan Búngiubei luma anhein anihein lubéi ibagari lárigiñe óunweni. Sun meha numadagu gefentiña luagu Heowá, ladüga úatiña amu gürigia nasubudiragun lidan ageiraü haweidigia. Íderagua hamutina lun línsiñedun Heowá nun luma lun nabusenrun nadügüni lugundan.

Lidan irumu 1972 aba nabadiseirun. Aban irumu lárigiñe aba nadügagun nungua prekursorume ani aba náguyun eseriwida lidoun aban liraüraü damuriguaü Newry (Irülánda le lani nórute). Aba nerederun tidan aban muna lautu dübü to luáguboun aban wübü. Kei añahein lubéi fiu bágasu yarafa ñein, aba nidin asayahei niyanun hagibugiñe. Sun hamuuhan, genegeti heteniruña lan nun. Le linarün katei, mamuhantiña meha nau, gama lumoun íderagua lumutina nasayahani niyanun hagibugiñe lun gayara lan narihin hawagu gürigia danme le níchuguni niyanun. Lidan irumu 1974 aba níridún kei prekursoru espechaliti; ani Nigel Pitt nupanaabei, gamadaguagidina luma chülǘ lumoun dan le.

Lidan dan ligía, buin liña meha Irülánda le nórutebei lau turobuli. Ariñagatiña fiu gürigia ligía lan “tageirabei bonba luma burí balu”. Kamaniti meha ageindaguni ǘmadarugu, haduuragun súdaragu balu hama burí gürigia, hama ha burí giñe ha achüühabaña bonba lidan ítaga fulasu, ligía meha katei le asuseredubei sagü weyu. Susereti meha sun katei le ladüga turobuli lánina relihión luma burí katei lánina polítika. Gama lumoun subudi hamuti katoliku hama banheliu mádaragun hamá gefentiña luagu Heowá houngua lidoun polítika, ani gayaraati meha wapurichihan lau  darangilaü úouga ni murusun denchaü. Súnwandan hawisaruniwa burí gürigia ha únbaña wapurichiha, lun midin wamá lidan ítaga fulasu ni lidan ítaga dan ladüga lasusereduba lan somu katei wuribati ñein.

Íbini ítara, anihein burí dan aban wagagibudagun luma burí denchaü. Aban weyu, aba nidin apurichiha úara luma Dennis Carrigan, le giñe prekursoru, lidan aban aüdü yarafa. Úatiña meha ni aban Gefentiña ñein, ani ábanrügügili wéiyaasu woudin apurichiha ñein. Aba tíchugun aban würi wadurun luagu súdaragu wamá ingülatérana ha aríaahabalin fulasu, háfuga ladüga larihin luagu ligaburi wayanuhani hererun irülándana. Aba wanufudedun saragu. Subudi wamuti meha láurügü lan warufudun lubuidun igaburi houn súdaragu gayara lan wafarawagún hilagubei o laduurun luagu wagachürügü. Au luma Dennis wagurabahañein meha tásügürün busu ani úatiña meha saragu gürigia ñein, ani diligati meha weyu ligía. Ábati warihin tayarafadun aban karü lidan fulasu le ñein lubéi talugurahóua gafe le ñein tubéi würi to íchuguboun wadurun. Aba táfuridun ani aba tayanuhan hama bián wügüriña hagía, ha tídanbaña karü ani aba tínchahani túhabu wawagu lau irofuni. Lárigiñe aba habugahan wügüriña hagía wawagun hámaru hámaru ayarafadeina woun ani aba hagumeserun álügüdaguawa luagu tóurate busu. Dan le tachülürünbei busu, aba hayanuhan wügüriña hagía luma le abugahabei, maganbun wamuti le hariñagubei lun. Kei wagíarügüñadiwa lubéi tidan busu, ligía chouru wabalin busén hamá hasagaruniwa lídangiñe aüdü lun hadügün wuribati woun. Gama lumoun masuseredunti ni kata. Dan le nararirunbei tídangiñe busu, aba nálügüdüni le abugahabei: Ansan wügüriña hagüra, “ka san habusenrubei?” Aba lariñagun woun: “Madiherida humá. Afuranguagüda naali houn kátañadün lan. Furihadün lídangiñe denchaü”.

Lidan irumu 1976, lidan adamurini wéiriti lani distritu a le adügǘbei lidan uburugu Dublín, ñein nasubudiroun Pauline Lomax, aban íbiri prekursora espechalitu to awinwanduboun Ingülátera ani tabisidahaña meha ñein Dublín. Aban meha íbiri derebuguti tafiñen, ǘnabugutu ani buiti tigaburi. Dandu tugía kei Ray le tamulen lúmagiñe hañüraü hasubudiruni inarüni. Aban irumu lárigiñe, aban namarieidun tuma Pauline ani aba wasigirun eseriwida kei prekursorugu espechalitiña Ballymena (Irülánda le lani Nórute).

Lidan dan ligía seriwitiwa kei óunigirutiña sirkuitu Belfast, Londonderry luma burí lidan amu fulasu denchati. Wéiritu wanigi lau warihini hafiñen wábirigu, lun gayara lan heseriwidun lun Heowá mosu meha hígiruni afiñeni le mama inarüniti le güragubei tidan hanigi, mosu meha giñe higiruni iyereehabúni luma hasaminarun wuriba hawagu amu. Furanguti larihín góunigi lumutiña lan Heowá ani biniláña.

Díisiñein meha irumu nau Irülánda. Lidan irumu 1981 aba wagunbirahóun lidoun külase 72 tani Leskuela Galaadü. Dan le tagumuchun külase tani Leskuela Galaadü, aba wounahóun Sierra Leona (África Occidental).

Tidan aban muna weredera hama 11 íbirigu ha eseriwidubaña kei misionérugu. Ábanrügüñoun meha gusina ñein, ǘrüwa kumú, bián ágawagülei, aban gágamuru, aban máhina tachibaguagüle gamisa luma aban lun tamabeidun. Sun meha oura lidin leiti ñein, mawisahantiña dan le hagidaruni. Buin liña meha tábulugun muna hau garadun, ani añahein meha hewe péisinitiña lidan rumu le tabugiñebei muna.

Lau sun hénrengu lan ibagari lidan ageiraü ligía, gúndaatiwa meha saragu lidan apurichihani. Aganba hamutiwa meha gürigia ani inebetu meha Bíbülia houn. Saragu hádangiñe aturiaha hamutu Bíbülia ani aba hadügagun houngua gefentiñame luagu Heowá. “Mister Robert” hagúahan gürigia ha awinwandubaña lidan fulasu ligía nun ánheinti tun Pauline,  “Missus Robert”. Dan lárigiñe aba nagumeserun awadigimarida saragu tidan sukursáli, ani mámaali meha sagü weyu náfuridun apurichiha. Ábati hagumeserun gürigia agúaha tun Pauline “Missus Pauline” ani nun “Mister Pauline”. Ma meha tugundan Pauline lau laguahóun woun ítara.

Gudemetiña meha saragu íbirigu ha awinwandubaña Sierra Leona, gama lumoun ru lumuti Heowá le hemegeirubei houn, ani anihein dan lidan aban igaburi le magurabúnti (Mat. 6:33). Haritagua nágiru aban íbiri, seinsu meha le túmabei lúnrügü tagañeihan éigini tungua hama houn tirahüñü weyu ligía. Lau sun lira aba tíchuguni sun tiseinsun lun aban íbiri le sánditi, malaria luagu ani mégeiti meha árani, gama lumoun maseinsunti lun lagañeihani. Weyuméme ligía, aba tidin aban würi túbiñoun íbiri tugía ani aba tafeyeirunu lun taroragunu. Súnwandan meha lasuseredun aban katei ítarati.

Nefuñein meha irumu wau Sierra Leona. Lárigiñe aba wáguyun tidoun Beteli to Niheriaboun, aban óunwenbu sukursáli. Reideimemetina lau ligiaméme wadagimanu le nadügübei Sierra Leona, ánheinti tun Pauline aban óunwenbu asansiruni ani hénrenguti meha tun. Lúmagiñe aban tan apurichihatu to adügüboun 130 oura luagu hati ani ru tuguya meha aturiahani tídangiñeti Bíbülia houn ha ánharubaña lun inarüni, guentó tidanharu meha aban rumu áhüchagua sun weyu. Hénrenguti meha tun téchudun, gama lumoun aba gunfuranda tani weiri lan heteingirunu íbirigu luagu wadagimanu le tadügübei ani aba tetenirun lun tayusuruni sun tiyaraati lun tíchugun dǘgüdaguaü houn íbirigu ha eseriwidubaña Betelirugu.

Hénrenguti woun lun wéchudun luagu échuni le meha Niheriabei, gíbeti meha katei le ñeinna lunti meha wafurendeiruni. Haritagua nágili aban weyu aba lan lidin aban íbiri tidan nani áfisi lun larufudunu aban íbiri nun to meha lunboun teseriwidun Betelirugu. Aba nínchuni núhabu tun lun nabusuragun tun, ábati táhuduragun nigibugiñe. Aba taweiridun nanigi, aba liabin lidoun nisaminan le lariñagubei Adügaü 10:25, 26 luma Arufudúni 19:10. Aba nálügüdagun nungua: “Kaba funa san nariñaga tun?”. Lárigiñe aba nasaminarun: “Anhein agunbirahóuaru tubéi lun teseriwidun ya Betelirugu subudirügü tumuti le tariñagubei Bíbülia luagu katei le”.

Lau sun wuriba lan nasandiragun nungua luagu le tadügübei, aba nasigirun ayanuha tuma, ani lárigiñe aba nakutihan libügürü ka lan uagu táhuduragua nigibugiñe. Aba nasubudiruni tafalaruña lan íbiri to aban échuni le adügǘbei lidan fiu fulasu lidan ageiraü. Adüga hamuti giñe wügüriña ligiaméme. Aban meha igaburi lun harufudun inebesei, mama hadügüñein kamá hamuga hóuseruñanu gürigia ha únbaña habusura kamá le bungiu. Ani ayanuhatu Bíbülia luagu aban  katei ítarati (1 Sam. 24:8). Seremei mariñagun nan ni kata tun íbiri to, le yebe gayaraabei ladügün lun tasandiragun tungua wuriba!

Subuditiña meha saragu íbirigu woun Niheria ha arufudubaña lidan sun habagari aban afiñeni wéiriti. Aban hádangiñe íbirigu hagía Isaiah Adagbona b líribei. Lúmagiñe meha nibureingili lasubudirei inarüni, ani dan lárigiñe aba ladagarun lépüra luagu. Aba hóunahani lidoun aban fulasu le ñein habéi gürigia ha gawagutiña lépüra, gama lumoun, ligíarügüñein meha gefentiña luagu Heowá ñein. Lau sun lénrengunga le úmabei lagagibudagua, íderaguati 30 gürigia ha láubaña lépüra lun hadügagun houngua gefentiñame luagu Heowá ani aba ladügün aban damuriguaü ñein.

Lidan irumu 1996 aba wounahóun Kenia eseriwida Betelirugu. Magiribundungidina Kenia lúmagiñe aweiyasuhani ligira le uágubei nayanuhan lidan lagumeseha abahüdaguni le. Tidan Beteli añahein meha aban hawuyeri megu gachülüheitiña ñein: aban hawuyeri megu ha gíribaña cercopiteco verde. Dan meha hanügün íbirigu würiña furuda aba burí híweruhanu megu hagía hawéi. Aban weyu, aba tígiruni aban íbiri lifunedera tirumun daragu. Dan le tagiribudunbei, aba tadarirun saragu megu eigei éigini le hadarirubei tirumunrugu. Aba tagúaragun ani aba táfuridun éibaagueina tirumunrugugiñe. Aba giñe hagúaragun megu, ani aba halouchun, ábati hachubarun sun hagía lídangiñe funedera.

Au tuma Pauline aba wagumeserun ídeha lidan aban damuriguaü le ñein lubéi layanuhóua suajili. Murusun dan lárigiñe aba hariñagun nun lun nalidihani Taturiahóun Líburu lidan damuriguaü (le gíribei guentó Taturiahóun Bíbülia lidan damuriguaü). Gama lumoun, wuribati meha nayanuhani suajili. Aturiaha numuti meha ariñahani buidu lun gayara lan naliihani álügüdahani buidu. Úati meha gunfuranda nani hóunabagüle íbirigu dan le mama lan aliiharügü hamuti. Wuribati meha nasandiragun nungua hawagu íbirigu. Wéiritu meha nanigi lau narihini gaguraasun hamá íbirigu luma ǘnabuguni le harufudubei lau hígirun lun nalidihani adamuridaguni.

Manügüntiwa ni aban irumu Kenia. Lidan irumu 1997 aba wounahóun eseriwida tidan Beteli to Brooklynboun (Newayóru). Guentó lídanñadiwa aban ageiraü awanseti, le gayaraabei lanügün turobuli woun (Ari. 30:8, 9). Gama lumoun wéiriti giñe hafiñen íbirigu úaraguatiña ha yáabaña. Mayusurun hamuti íbirigu ha hadaani lun harisidun, lubaragiñe lira yúsurügü hamuti lun hídehan tidan lóundarun Heowá.

Lidan sun irumu le ásügürübei, ariha wamaali ida liña lan harufuduni íbirigu hafiñen lidan ámuñegueinarügü le gádanbaliña, kei burí: Irülánda, lau sun anihein lan anarimeni ñein; Áfürika, lau sun gudemenouga lan ñein, ani dise ligía, lúmati Meriga, aban ageiraü awanseti. Chóuruti gunda lan Heowá lau larihiniña lumutuniña arufuda ínsiñeni lun, laganagua sun lénrengunga.

Fureseti lásügürün irumu, kei lariñaguni Hobu 7:6, “ítara kei lufuresen luadigimari máhina le tadaaguagüle gamisa”. Guentó weseriwiduña tidan Beteli to Warwickboun (Newayóru), hama íbirigu ha hínsiñehabubaña. Hínsiñeti woun ani gúndaatiwa lau wadügüni sun wayaraati lun wídehan luma Hesukrístu le Warúeite, le lunbei líchuguni hafayeiruaha sun ha úaraguabaña (Mat. 25:34).