1. Afuranguagüda huméi lau aban hénpulu ka lan uagu lunti lubéi wafalaruni ladundehan Heowá.

 SAMINA humá féridihadün lan lidan aban dabíara. Lídanñadün denchaü: lugundun añahein animaalu denchatiña ñein, híduru péisinitu hama ámuñegueinarügü hawuyeri igei. Ani gayaraati giñe hachugeragun luagu dübü lun héiguadun. Ma seremei hubéi hamuga aban gürigia le subudihabúti lun dabíara lun ladundehanün ani íderagualaün lun ladireirunün luéi sun denchaü burí le? Ítara liña ubóu le kei dabíara le. Buin liña lau denchaü le gayaraabei lagadeiruni wamadagua luma Heowá. Gama lumoun, anihein aban adundehati le buídutimabei wama: Heowá. Arufuda lumuti üma le lunbei wafalaruni woun lun wadisedun luéi denchaü luma lun wachülürün lidoun iseri ubóu, le ñeinba lubéi wawinwanda lun súnwandan.

2. Ida liña ladundehaniwa Heowá?

² Ida liña ladundehaniwa Heowá? Adundeha lumutiwa láutima layusurunu Bíbülia to Lererun. Yúsuti giñe gürigia lun líchugun adundehani woun. Kei hénpulu, yusu lumuti “musu úaraguati ani gunfuranda ligía” lun líchugun ariñahani súdiniti woun le tídangiñeti Bíbülia le lunti líderaguniwa lun buidu lan le lunbei wanúadiruni (Mat. 24:45). Ani mámarügüñanu hagía layusura Heowá lun líchugun adundehani woun. Yusu lumutiña giñe óunigirutiña sirkuitu hama wéiyaaña lidan afiñeni lun híchugun dǘgüdaguaü woun luma lun hadundehaniwa lun gayara lan wagagibudagun luma lénrengunga. Rútiwa seremei lun Heowá lau líchuguni lubuidun adundehani le woun lidan dan hénrenguti. Ítara gayaraati wasigirun gamadagua luma Heowá luma lun wasigirun awansera lidan émeri le anügübei lidoun ibagari.

3. Kaba wariha lidan aturiahani le?

³ Íbini ítara, gayaraati hénrengu lan woun wasigiruni ladundehan Heowá, dántima le hámagiñeti lan wügüriña charatiña weresibirei. Ka uagu? Másiñati le lan hariñagubei woun mama lan ligía wabusenrubei waganbun. O háfuga samina wamá mabuidun lan  adundehani le híchugubei woun o habulieidaguña lan ani mama lan lúmagiñe Heowá liabin. Anihán dan létima lunbei ligíatima lan lun wafiñerun ladundehañanu lan Heowá lumutuniña ani le lan buídubei lun wadügüni wafalaruni ladundehan. Lun gayara lan wederebudagüdüni ichouruni ligía wakutihan ǘrüwa saminaü lidan aturiahani le: 1) ida liña lan ladundehaniña Heowá lumutuniña lidan tidaani Bíbülia, 2) ida liña ladundehaniña uguñe weyu luma 3) ka lan buiti gayaraabei wasagaruni anhein wafalara ladundehan Heowá súnwandan.

IDA LIÑA LADUNDEHANIÑA HEOWÁ ÍSÜRAELINA

4, 5. Ida liña larufuduni Heowá furangu layusuruñein lan Moisesi lun ladundehaniña ísüraelina? (Ariha huméi dibuhu le luágubei tidáü garüdia).

⁴ Írida lumuti Heowá Moisesi lun lasagaruniña ísüraelina Ehiptugiñe ani arufuda lumuti furangu layusuruñein lan wügüri le lun ladundehaniña lumutuniña. Aban seini luagu ladundehañanu lan Heowá lau harihin aban dúeri habá habá wéyuagu luma aban watu gemeti le giñe harihibei habá habá guñoun (Afu. 13:21). Falá lumuti Moisesi seini ligía ani adügati katei le lun lachülürün ligía habu ísüraelina lubadu barana Funati. Dan le harihinbei ísüraelina lau siñá lan hanurahan hawéi súdaragu ehiptuna aba hanufudedagun saragu. Saminatiña adügaali lan Moisesi aban óunwenbu charati lau lanügüniña laru barana Funati. Gama lumoun, mama meha labulieidaguña Moisesi. Heowá adügübei lun lanügüniña Moisesi lidoun fulasu ligía (Afu. 14:2). Ani lárigiñe aba lesefuruniña Heowá lau aban óunwenbu milaguru (Afu. 14:​26-28).

⁵ Lidan 40 irumu ligía, chouru lumuti Moisesi layusuruñein lan Heowá dúeri ligía lun ladundehaniña lumutuniña lidan fulasu mageirawati. a Anihein dan, adügati Heowá lun tararamagun dúeri tubenari likianpun Moisesi lun gayara lan harihinu sun gürigia (Afu. 33:​7, 9, 10). Lídangiñe dúeri ligía layanuha Heowá luma Moisesi, ani lárigiñe aba lariñaguni Moisesi adundehani le lariñagubei Heowá lun houn ísüraelina (Sal. 99:7). Ligíati, gayaraati meha harihini ísüraelina furangu layusuruñein lan Heowá Moisesi lun ladundehaniña.

6. Ida liña hóunabun ísüraelina lun ladundehan Heowá? (1 Lúrudu 14:​2, 10, 11).

⁶ Ma lirun hiibe-agei lan ísüraelina máhatiña harihini furangu anúadira laali lan Heowá Moisesi lun lóunagülebei lan (aliiha huméi 1 Lúrudu 14:​2, 10, 11). Kei maha hamá lun hánharun lun harihini Moisesi kei aban wügüri le líridubei Heowá, mígirun lumutiña Heowá lun hebelurun lidoun Fulasu Füramasewati (1 Lur. 14:30).

7. Kátaña afalarubalin ladundehan Heowá? (1 Lúrudu 14:24; ariha huméi giñe dibuhu).

⁷ Añahein meha hádangiñe ísüraelina ha afalaruti ladundehan Heowá. Ariñagati meha Heowá luagu aban hádangiñe: “Kalebürügüñein le nubúein, [ . . . ] adüga lumuti le nubeibei lidan lubudubu” (aliiha huméi 1 Lúrudu 14:24). Biní lumuti Bungiu Kalebü darí lun lígiruni lun lanuadirún fulasu le ñein lubéi labusenra lawinwandun Kaaná (Hos. 14:​12-14). Ítara kei meha Kalebü, ígiraguagüdatiña meha ísüraelina ha lúnbaña hayabin lárigiñe lun ladundehaniña Heowá. Ligíati, aba taweiridun hanigi sun ísüraelina lau Hosué “inebe ligía houn” lidan sun libagari, wügüri le meha lanúadirubei Heowá leweñegua Moisesi lun lalidihaniña lumutuniña (Hos. 4:14). Ligíati, labinirunbalin Heowá ani ígira ligía lun lebelurun lidoun Fulasu le Füramasewabei (Hos. 21:​43, 44).

8. Ida liña ladundehaniña Heowá lumutuniña lidan hadaani urúeigu? (Ariha huméi giñe dibuhu).

⁸ Fiu irumu lárigiñe, aba líridun Heowá alidihatiña lun hadundehaniña lumutuniña. Dan lárigiñe, lidan hadaani urúeigu aba giñe líchuguni dasi le houn profetagu. Urúeigu ha meha  úaraguabaña lun Bungiu aganba hamuti meha hadundeha profetagu. Kei hénpulu, ánhati meha urúei Dawidi lau ǘnabuguni lun lererehan profeta Natán lun (2 Sam. 12:​7, 13; 1 Kro. 17:​3, 4). Adügati giñe urúei Hosafátü gasu lun le lariñagubei profeta Haasieli lun, ani ínchaha lumutiña gürigia ha awinwandubaña Hudá lun hafiñerun hawagu lani Bungiu profetagu (2 Kro. 20:​14, 15, 20). Ani lidan lidaani idiheri dan ligía amuriahati urúei Esekiéli ídemuei luma profeta Isaíasi (Isa. 37:​1-6). Sagü hafalaruni urúeigu ladundehan Heowá, aba labiniruniña ani góunigilei ageiraü (2 Kro. 20:​29, 30; 32:22). Furanguti yusu lániña Heowá profetagu lun ladundehaniña lumutuniña. Íbini ítara, hiibe-agei urúeigu hama ísüraelina meberesentiña hau profetagu (Her. 35:​12-15).

IDA LIÑA LADUNDEHANIÑA HEOWÁ FURUMIÑETIÑA KRISTIÁNUGU

9. Ida liña ladundehaniña Heowá kristiánugu lidan furumiñeti sígulu? (Ariha huméi giñe dibuhu).

⁹ Lidan furumiñeti sígulu aba ladügüni Heowá damuriguaü kristiánu. Ida liña ladundehaniña lumutuniña lidan dan ligía? Aba líriduni Heowá Hesusu lun ligía lan ichügüdinaü lun damuriguaü kristiánu (Efe. 5:23). Inarüni mayanuhan lan Hesusu gagibugua luma kada kristiánu lun lariñaguni kaba lan adügǘwa, yúsurügü lumutiña apostolugu hama wéiyaaña lidan afiñeni ha Herusalénbaña lun ladundehani dasi lánina apurichihani dan ligía (Adü. 15:​1, 2). Lanwoun lira, lidan kada damuriguaü iridúaaña wéiyaaña lidan afiñeni lun hadundehaniña íbirigu (1 Tesa. 5:12; Titu 1:5).

10. a) Ida liña hóunabun furumiñetiña kristiánugu ha lánina furumiñeti sígulu lun adundehani le heresibirubei? (Adügaü 15:​30, 31). b) Ka uagu añahein habéi gürigia máhatiña houn lóunagülegu Heowá lidan tidaani Bíbülia? (Ariha huméi rekuáduru “ Ka uagu añahein lubéi máhatiña houn gürigia ha lóunahabaña Bungiu”).

¹⁰ Ida liña hóunabun kristiánugu ha lánina furumiñeti sígulu lun adundehani le heresibirubei? Hiibe-agei hádangiñe falá hamuti lau sun hagundan. Ariñagatu Bíbülia: “Aba hagundaarun saragu luagu gurasu le tíchugubei” gárada to óunahounboun houn (aliiha huméi Adügaü 15:​30, 31). Ida liñati ladundehaniña Heowá lumutuniña lidan wadaani?

IDA LIÑA LADUNDEHANIWA HEOWÁ UGUÑE WEYU

11. Írida humá aban sügǘ le arufudubei ida liña lan ladundehaniña Heowá lóunagülegu uguñe weyu.

¹¹ Lidan wadaani aniheingua Heowá adundehaña lumutuniña tau Lererun luma lau líchuguni Lisaani kei lichügüdina damuriguaü. Anihein  san achoururagüdütiwa aniheingua lan Heowá ayusuraña gürigia keisi lóunagülegu? Anha. Kei hénpulu, samina wamá luagu le asuseredubei lidan lagumuchagüle sígulu disinéfu. Gunfuranda lumuti meha íbiri Charles Russell luagu ábanbei lan irumu súdiniti irumu 1914 lun Larúeihan Bungiu (Dan. 4:​25, 26). Ida liña hachülürün lidoun saminaü le? Lau haturiahani profesía le tídanbei Bíbülia. Chóuruti adundeha lániña Heowá lidan akutihani le hadügübei. Le asuseredubei ubouagu lidan irumu 1914 ligía achoururagüdübalin gumeseeli lan Larúeihan Bungiu agumadiha: aba laduurun Furumiñeti Wuribu Wéiriti ani ñeinñein sandi, hárabaganali luma ilamaü (Luk. 21:​10, 11). Furanguti meha larihiniwa layusuruñanu lan Heowá wügüriña úaraguatiña ha lun híderaguniña lumutuniña.

12, 13. Ka adügǘbei lidan Libiaman Wuribu Wéiriti lun línchahoun apurichihani luma arufudahani?

¹² Samina wamá giñe luagu le asuseredubei lidan lidaani Libiaman Wuribu Wéiriti ubouagu. Íbirigu ha arihibaña lau apurichihani lidan sun ubóu ha tídanbaña Beteli to Merigaboun aturiaha hamuti le lariñagubei Arufudúni 17:8 ani gunfuranda hamuti lárigiñe lanme lagumuchun Libiaman Wuribu Wéiriti miábinbei lan Arümahedón, darangilaüba lan ñübuin, le lunbei meha ladügün lun lapurichihóun houn saragu gürigia. Ligíati aba tadügün lóundarun Heowá aban katei le genegebei mabuidun lan lidan dan ligía: aba tagumeserun Colegio Superior Bíblico de la Watchtower de Galaad, b lun gayara lan taranseruniña misionérugu lun houdin apurichiha luma arufudaha lidan amu burí fulasu ubouagu. Íbini laganagua wuribu, óunahouatiña íbirigu lidoun ámuñegueinarügü fulasu ubouagu apurichiha. Lanwoun lira, adüga lumutu musu úaraguati Curso en el Ministerio Teocrático c lun híderawagun sun apurichihatiña lun máisturugu hamá buítiña. Sun lira adügati lun aransetima hamá lubúeingu Heowá lun dasi le lunbei liabin.

¹³ Gayaraati warihini furangu adundeha lániña Heowá lumutuniña lidan dan hénrenguti ligía. Lúmagiñe lagumuchun Libiaman Wuribu Wéiriti, gayara hali meha hapurichihan lubúeingu Heowá maturobulinga lidan saragu fulasu ubouagu. Ani guentó subudi hamaali saragu gürigia Heowá, ani uguñe weyu lapurichihóuña lidan sun Ubóu.

14. Ka uagu gayara lubéi wafiñerun luagu adundehani le tíchugubei lóundarun Heowá luma le híchugubei wéiyaaña lidan afiñeni? (Arufudúni 2:1; ariha humoun giñe iyawaü).

¹⁴ Uguñe weyu, añahagua lílana Musu Úaraguati afalarei ladundehan Kristu. Adüga hamuti sun hayaraati lun adundehani lan le híchugunbei, lun úara lan dandu luma lisaminan Heowá kei luma lisaminan Hesusu. Ani yusu hamutiña óunigirutiña sirkuitu hama wéiyaaña lidan afiñeni lun hachülüragüdüni adundehani le houn lílana damuriguaü. d Añahein wéiyaaña lidan afiñeni ha hádangiñebaña kristiánu anuadirúaaña ‘lidan lúhabu’ Kristu le lóunwenren, —dandu giñe sun ha híbiri wéiyaaña— (aliiha huméi Arufudúni 2:1). Kei chará habéi sun gürigia, anihein dan hachararuba lan giñe wügüriña burí ha, ítara kei lasuseredun lun Moisesi, lun Hosué luma houn apostolugu (1 Lur. 20:12; Hos. 9:​14, 15; Rom. 3:23). Gama lumoun, subudi wamuti ladundehañein lan Hesusu musu úaraguati hama wéiyaaña lidan afiñeni buidu buidu ani ítara luba adügei “sagü weyu darime lagumuchun ubóu” (Mat. 28:20). Ligíati, gébunati wafiñerun luagu adundehani le líchugubei woun hámagiñe íbirigu ha.

BUITI LE IBIHIBEI LAU LAFALARÚNIWA LADUNDEHAN HEOWÁ SÚNWANDAN

15, 16. Ka hafurendeirubei hámagiñe ha ígiraguagüdübaña houngua lun ladundehan Heowá?

¹⁵ Lau wafalaruni ladundehan Heowá súnwandan huuti woun íbini guentó. Kei hénpulu, adügati Andy tuma Rubyn to lani weiriou gasu lau adundehani lunti lan mibe lan hámati (Mat. 6:22). Adügati katei le lun hídehan lidan bunaguaü le tadügübei lóundarun Heowá. Ariñagatu Rubyn: “Wínwantiwa lidan fulasu ñǘraüti, ani saragu burí dan ibidiñeti woun halíaba lan wábougua. Lanwoun lira, hínsiñeti adirahani nun, gama lumoun, mosu meha nalugurahani liibe-agei númegegun le lánina adirahani. Íbini álugurahanani katei le lau águiraü nágurugu, aranseñu niña meha lun ítara nan kei Sara, to lani Abüraámü weiriou lun marihin nan nárigoun, lun nubaruaguóun lan nariha” (Ebü. 11:15). Gúndaatiña san lau le hanúadirubei? Sigitu ariñaga: “Gúndaatiwa saragu ladüga wíchuguñein lan sun le wámabei lun Heowá. Sagü wawadigimaridun lun Heowá ítara liña kamá hamuga le wóuchuñein ida luba lan ibagari lidan iseri ubóu”. Ka lariñagubei Andy? Ariñagati: “Úati amu ugundani kei leseriwidun gürigia lun Larúeihan Bungiu sunsuinagubei”.

¹⁶ Ka amu katei wibihibei lau wafalaruni ladundehan Heowá súnwandan? Ariha waméi tikesin  aban íbiri gíritu Marcia. Dan le lagumuchunbei taturiahan aba tanúadirun tafalaruni adundehani le íchugubei tun lun tagumeseruni eseriwiduni kei prekursora (Mat. 6:33; Rom. 12:11). Ariñagatu: “Rutu aban Luban Furendei Íñuti aban beka nun lun naturiahan gádürü irumu ñein. Gama lumoun, busentina meha netenirun lun neseriwidun lun Bungiu, ligíati aba lubéi nabürüdagün nungua tidan aban leskuela to ñein lubéi lafurendeirua fisiu lun nafurendeirun aban fisiu lun nanuriagun nungua luma lun prekursora nan. Ligíatima katei le buidutimaabei le nanúadirubei lidan nibagari. Ani guenlé prekursora nuguya, ani adügati lóurate nuadigimaridun lun gayara lan nídehan Betelirugu luma lun nagundaarun lau amu burí chansi buíduburiti le nibihibei”.

17. Ka amu buiti wibihibei lau wafalaruni ladundehan Heowá súnwandan? (Isaíasi 48:​17, 18).

¹⁷ Anihein dan tíchugun lóundarun Heowá adundehani woun lun wóunigiragun woungua luéi saragu umegeguni luma burí luéi saragu katei le gayaraabei ladügün lun maganbadi wamá lun lilurudun Bungiu. Lidan kesi burí le, sagatiwa giñe buiti lau wafalaruni ladundehan Heowá, kíputiwa aban saminaü buiti ani díreitiwa luéi saragu turobuli (1 Tim. 6:​9, 10). Ítara luba gayara lan wetenirun lun weseriwidun lun Heowá sunsuinagubei. Úati ni kata le gayaraati líchugun saragu ugundani woun luma darangilaü kei weseriwidun lun Heowá (aliiha huméi Isaíasi 48:​17, 18).

18. Ka uagu busén hubéi lun hafalaruni ladundehan Heowá súnwandan?

¹⁸ Lasigiramémeba Heowá ayusuraña gürigia lun ladundehaniña lumutuniña lídanme lidaani saragu asufuriruni luma lidan Arúeihani le lánina Milu irumu (Sal. 45:16). Lídanme dan ligía, wasigirubei san ladundehan íbini wígiruni le himein wabéi? Anhein gaganbadi wabéi lúmagiñe guentó, ménrenguntimabei woun gaganbadi wamá ámuñegü. Ligíati, falá waméi súnwandan ladundehan Heowá, laganagua lira anihein adundehani le líchugubei woun hámagiñe wügüriña ha líridubaña lun hóunigiruniwa (Isa. 32:​1, 2; Ebü. 13:17). Gíbeti lébuna lun wafiñerun luagu Heowá, Bungiu le adundehabaliwa le íderagubaliwa adireira luéi denchaü le gayaraabei ladügün lun lábürühan warüna lidan weseriwidun lun, ani íderagua láwame lun wachülürün lidoun iseri ubóu, le ñeinba lubéi wawinwanda lun súnwandan.