Héregüda waméi wafiñen luagu katei le wagurabubei
“Afiñeni, achoururuni le gumuti luagu wabihibei lan le wagurabubei” (EBÜRÉU 11:1).
UREMU 54, 55
1, 2. a) Ka uagu amu lubéi le hagurabubei lubúeingu Bungiu luéi le hagurabubei gürigia ubouaguna? b) Kaba wariha lidan arütíkulu le?
FÜRAMASETI Heowá saragu katei buiti woun. Kei hénpulu, füramaseti larumadahabei lan liri, ani ladügüba lun ladügǘniwa lugundan sielu luma ya ubouagu (Matéu 6:9, 10). Anihán katei súdinitimati le wagurabubei. Füramaseti giñe Heowá woun líchuguba lan ibagari magumuchaditi woun, sielu lan yebe o ubouagu (Huan 10:16; 2 Féduru 3:13). Ani wagía lubúeingu Bungiu, agurabatiwa warihini ida luba lan lasigirun adundehawa luma íderaguawa lidan lagumuhóun dan le.
2 Ariñagatu Bíbülia “achoururuni [lan] le gumuti luagu wabihibei lan le wagurabubei” afiñenibei (ariha huméi rekuáduru “ Ka mini lubéi?”). Mini lan le luagu chouru wamani wagía le afiñebei lagunfulirubei lan Heowá le füramase lubéi (Ebüréu 11:1). Luagu amu oubaü, añahein saragu gürigia uguñe weyu agurabatiña ani busentiña saragu katei, ani machourun hamuti anhein hibihibei lubéi. Kei hénpulu, gayarati busén lan aban gürigia lagañeirunu chika. Gama lumoun siñati lachoururuni lagañeiruboun lan. Lidan arütíkulu le warihiba ida luba lan gayara lan wederebudagüdüni wafiñen luagu lani Bungiu füramasei. Warihibei giñe ida liña lan líderaguniwa aban afiñeni héreti uguñe weyu.
3. Ka uagu afiñe wabéi luagu lagunfulirubei lan Bungiu sun le füramase lubéi?
3 Úati gürigia agüriahóuti lau afiñeni. Anhein busén wabéi wafiñerun, mosu wígirun lun ladundehaniwa lani Bungiu sífiri sandu (Galasiana 5:22). Gayarati líderaguniwa sífiri sandu lun wasubudiruni Heowá. Dan le gunfuranda wamani weiri lan lubafu luma lichú lau, afiñetiwa luagu gayarabei lan lagunfuliruni sun le füramase lubéi. Chouru lumuti Heowá lagunfulirubei lan sun lani füramasei darí lun layanuhan luagu kamá hamuga gúnfulihali. Ligía lariñagunbei: “Sunha nadügüni sun katei le” (aliiha huméi Arufudúni 21:3-6). Aban Bungiu gúnfuliti Heowá ladüga súnwandan lagunfuliruni sun le füramase lubéi “lau úaraguni”. Ligía afiñe wabéi luagu sun le lariñagubei woun lubá ámuñegü (2 Lúrudu 7:9).
LUBÚEINGU BUNGIU LÁNINA BINADU DAN HA HÉREBAÑA AFIÑEN
4. Ka meha uagun híchigei lubúeingu Bungiu hafiñen?
4 Tidan liliburun Pábulu houn Ebüréu ayanuhati hawagu 16 wügüriña hama würiña ha lánina binadu dan ani héreti meha hafiñen luagu lani Bungiu füramasei. Ayanuhati giñe hawagu amu lubúeingu Heowá ha meha agundaaragüdübalin ladüga ‘hafiñen luagu’ (Ebüréu 11:39). Súngubei hagía agurabaha hamuti meha ‘adügawaguni’ le füramase lubéi Heowá. Ani subudi hamuti meha lagumuchuba lan adügawaguni ligía hau sun láganiñu Bungiu ani ladügüba lan lunya paraísu lan Ubóu (Agumesehani 3:15). Afiñetiña meha lubúeingu Heowá ha luagu lásaaragüdübaña lan lídangiñe óunweni ánhaña ounwe. Magurabuntiña meha háguyugun sielu, ladüga madügün lágili meha Hesusu aransehani lun hemenigidun gürigia hawinwandun sielu (Galasiana 3:16). Lubaragiñe lira, hemenigitiña hawinwandun lun súnwandan lidan aban paraísu ya ubouagu (Sálumu 37:11; Isaíasi 26:19; Oseasi 13:14).
5, 6. a) Ka meha lagurabubei Abüraámü hama liduheñu? b) Ka meha hadügübei lun hakipuruni hafiñen héreñu? (Ariha huméi dibuhu le lídanbei lagumeseha arütíkulu).
5 Ariñagati Ebüréu 11:13 hawagu lubúeingu Heowá ha úaraguabaña: “Hilaguatiña sun gürigia ha meresibirunga haméi sun le füramase lubéi Bungiu houn; gama lumoun ariha hamuti liabin dísegiñe ani aba hasubudiruni”. Lidan amu dimurei, aguraba hamuti iseri ubóu ani aríaguatiña houngua awinwanda lidan. Abüraámü meha aban hádangiñe gürigia hagía. Ariñagati Hesusu gunda lan meha Abüraámü saragu “lau lasubudiruni luagu larihibei lan” weyu ligía (Huan 8:56). Aguraba tumuti Sara, Isaakü, Hakobu hama saragu amu gürigia luéyuri lagumadiruni Larúeihan Bungiu sun Ubóu (Ebüréu 11:8-11).
6 Ka meha ladügübei Abüraámü hama liduheñu lun hakipuruni hafiñen héreñu? Mígirun hamuti hafurendeirun luagu Heowá. Anihein meha dan furendei hamá hámagiñe ánheligu, lidan arufudúni o lidan uénedü le ñǘbuinti lúmagiñe Bungiu. Másiñati furendei hamá giñe hámagiñe amu lubúeingu Bungiu ha wéiyougaaña o háfuga tídangiñe binadu dugumedu. Mabulieidun lumuti
Abüraámü hama liduheñu sun lani Bungiu füramasei. Hínsiñeti meha houn hasaminarun luagun. Ligía meha chouru habalin lagunfulirubei lan Heowá le füramase lubéi. Íderagua lumutiña afiñeni ligía lun úaragua hamá lun Bungiu íbini laganagua turóbuli luma éibaahouni.7. Ka ru láalibei Heowá woun lun líderaguniwa lun here lan wafiñen, ani ka lunbei wadügüni?
7 Kaba íderaguawa lun héreñu lan wakipuruni wafiñen luagu Bungiu? Ru laaru Heowá Bíbülia woun. Ani arufudaha lumuti lani füramasei woun tidan, luma le lunbei wadügüni lun gunda wamá. Ligía buidu lubéi lun waliihanu Bíbülia sagü weyu, ani falá wameime tadundehan (Sálumu 1:1-3; aliiha huméi Adügaü 17:11). Yusu lumuti giñe Heowá “musu úaraguati” lun líchuguni weigin woun “lidan dan” (Matéu 24:45). Ítara kei meha hadügün lubúeingu Bungiu ha lánina binadu dan, mosu waliihani sun lani Bungiu füramasei súnwandan ani samina wagíame luagun lau duari. Líderagubadiwa katei le lun úaragua wamá lun Bungiu ani lun wasigirun agurabahei luéyuri lagumadiruni Larúeihan Bungiu sun Ubóu.
Dan le lóunabuni Heowá wafurieidun, aba léredun wafiñen
8. Ida liña lídehan furíei lun here lan wafiñen?
8 Ka amu katei íderagubaliña lubúeingu Bungiu ha lánina binadu dan lun héreñu lan hakipuruni hafiñen? Hamuriahan ídemuei luma Heowá luma harihini ligaburi lóunabuni hafurieidun (Neemíasi 1:4, 11; Sálumu 34:4, 15, 17; Danieli 9:19-21). Ítarameme, héregüda wamuti wafiñen dan le wamuriahan ídemuei luma Heowá luma dan le warihini ligaburi lóunabuni wafurieidun ani ruléi sun le wemegeirubei woun dan le wemegeiruni (aliiha huméi 1 Huan 5:14, 15). Sigí wamá amuriaha luma Heowá lun líchugun sífiri sandu woun lun laganwoundun wafiñen (Lúkasi 11:9, 13).
9. Írida humá fiú katei le lunbei wafurieidun luagu.
9 Dan le wafurieidun lun Heowá, moun lumuti wadügüni lúnrügü wamuriahan lun líchuguni le wemegeirubei woun. Mosu giñe wafurieidun lun wíchugun seremei lun luma lun walawahani sagü weyu, ladüga adügaali saragu katei buiti (Sálumu 40:5). Mosu giñe wafurieidun hawagun wíbirigu ha lídanbaña sun ubóu, kéiburi hawagu ha ‘adaürǘbaña’. Lunti giñe wafurieidun hawagu íbirigu ha adundehabalin damuriguaü. Dan le warihini ida liña lan lóunabuni Heowá wafurieidun, yarafatimati wasandiragun woungua lun ani ábatima léredun wafiñen luagu (Ebüréu 13:3, 7).
LUBÚEINGU BUNGIU HA AKIPURUTIÑA ÚARAGUNI
10. Ka meha uagu ganigi habéi fiú lubúeingu Bungiu ani úaragua hagía lun?
10 Lidan Ebüréu kapítulu 11, ariñagati apostolu Pábulu: “Ñéinñanu würiña saragüdawatiña haduheñu lídangiñe óunweni houn. Añahein giñe híbiri, hilaguatiña lidan lueirin asufuriruni, máhatiña hígirawagüdüniwa, lun gayaraabei lan háguyugun lidoun aban ibagari le buídutimati” (Ebüréu 11:35). Saragu hádangiñe lubúeingu Bungiu kípuguatiña meha houngua úaragu íbini lidan lénrengunga ladüga hafiñen luagu águyuguni le meha füramase lubéi Bungiu. Subudi hamuti meha lagiribudagüdübei lan Heowá habagari houn ámuñegü ani hawinwanduba lan lun súnwandan ubouagu. Samina wamá luagun le asuseredubei lun Nawotu luma lun Sakaríasi. Biángubei hagía chamuwaguati dübü hawagu darí hóunwegun (1 Urúeigu 21:3, 15; 2 Krónikasi 24:20, 21). Fuíwati Danieli lidoun aban fusu buin hau liñún gáñitiña, ani fuiwatiña giñe ǘrüwa lumadagu lidoun aban régigi le wéiriti lisü. Himei hamuti hounwen lubaragiñe hachararun lun Heowá. Afiñetiña meha wügüriña ha luagu líchugubei lan Heowá lani sífiri sandu houn ani líderagubaña lan lun hawandun óuchawaguni (Danieli 3:16-18, 20, 28; 6:13, 16, 21-23; Ebüréu 11:33, 34).
Úaraguatiña lubúeingu Bungiu ladüga hafiñen luagu águyuguni le füramase lubéi houn
11. Ka hawandubei fiú profetagu ladüga hafiñen?
11 Saragu lubúeingu Bungiu awandatiña meha bula hámagiñe amu ani daüwa hagía, kéiburi Mikaya luma Heremíasi. Ani ítara kei Elíasi, “éibugañahadügü haña meha [amu profetagu] lidan burí fulasu mageirawati, áraabu, lidan burí lagadábugiñe dübü wéinamuti luma lidan burí huyu le múaruguti”. Súngubei hagía awanda hamuti óuchawaguni ani úaraguatiña meha lun Bungiu ladüga ‘chouru hamuti habihibei lan sun le’ füramasei lubéi Bungiu houn (Ebüréu 11:1, 36-38; 1 Urúeigu 18:13; 22:24-27; Heremíasi 20:1, 2; 28:10, 11; 32:2).
12. Ka san íchugubalin hénpulu le buídutimabei woun, ani ka íderagubalin lun lawanduni óuchawaguni?
12 Hesusu íchugubalin hénpulu le buídutimabei. Awanda lumuti óuchawaguni le wéiritimabei ani úaraguati lun Heowá. Ka íderagubalin lun lawandun? Ariñagati Pábulu: Súfuriti Hesusu [...] lugundun subudi lani luagu lásurun lanme lasufurirun, lagundaaruba lan” (Ebüréu 12:2). Ligía línchahanbaliña Pábulu kristiánugu lun hetenirun lun lani Hesusu hénpulu (aliiha huméi Ebüréu 12:3). Ítara kei Hesusu, hilatiña saragu hádangiñe furumiñetiña kristiánugu ladüga úaragua hamá lun Heowá. Antipasi meha aban hádangiñe (Arufudúni 2:13). Resibi hamaali kristiánugu ha hafayeiruaha, ánheinti lubúeingu Bungiu ha meha awinwandubaña habaragiñe ani ha hemenigibaña hawinwandun lun súnwandan ubouagu, meresibirun hamagili (Ebüréu 11:35). Murusun dan lárigiñe lagumeserun Hesusu arúeiha lidan irumu 1914, águyuguagüda lumutiña Bungiu kristiánugu anuadirúaaña ha meha hilaguaañabaña ani aba heresibirun ibagari magumuchaditi sielu. Hagumadirubaña gürigia ya ubouagu úara luma Hesusu (Arufudúni 20:4).
LUBÚEINGU BUNGIU HA HÉRETI HAFIÑEN UGUÑE WEYU
13, 14. a) Ka burí lénrengunga úmabei lagagibudagua Rudolf Graichen? b) Ka íderagubalin lun úaragua lan lun Heowá?
13 Uguñe weyu añahein saragu míñunu gefentiña luagu Heowá ha áyeihabalin lani Hesusu hénpulu. Saminatiña luagun le füramase lubéi Bungiu ani kípuguatiña houngua úaragu íbini labadinagua lénrengunga. Samina wamá luagun lani Rudolf Graichen Isaíasi 11:6-9). Íderagua lumuti katei ligía Rudolf lun lasaminarun súnwandan luagun Paraísu ani héregüda lumuti lafiñen luagu füramasei le. Kei resultóu, úaraguati lun Heowá íbini labadinagua saragu éibaahouni hámagiñe súdaragu yámanina.
hénpulu, aba íbiri le nasiruabei Yámani lidan irumu 1925. Haritagua lágili dan le lan nibureingili, ariha lan fiú kuáduru lau dibuhu luáguti somu ariñahani tídangiñeti Bíbülia fidiñu luagu touba muna hábiñe. Ariñagati: “Lidan kuáduru ligía dibuwati meha aban ounli áraabuna luma aban mudún, aban liraüraü gábara luma aban géigusi, bágasu luma liñún: súngubei hagía aganawatiña lidan darangilaü hámagua ani aban irahü ñǘraügili etenirubei houn” (14 Mosu meha lawandun Rudolf saragu amu asufuriruni. Hilatu meha lúguchu lau aban sandi gíriti tifus lidan aban fulasu le ñein lubéi hadaüraña nazi gürigia. Ánheinti lúguchi aba meha láfiñurun aban dugumedu to ídanboun lariñaga mámaali lan gefenti luagu Heowá. Gama lumoun kipu lumuti Rudolf lafiñen héreñu. Lárigiñebei láfuridun furisurugugiñe, seriwiti [1] (ariha huméi abürüdǘni lidan lagumuha arütíkulu).
kei óunigiruti sirkuitu. Lárigiñe ñǘdünti tidoun Leskuela Galaadü ani aba lounahóun eseriwida Chile. Ñein, ábaya leseriwidun keisi óunigiruti sirkuitu ani aba lamarieidun tuma aban misionera gíritu Patsy. Gasaanitiña aban irahü, gama lumoun hilatu irahü tugía aban irumu lárigiñe. Dan lárigiñe, aba tounwen Patsy. Bián-wein-ǘrüwa meha irumu tau dan le tóunwenbei. Íbini ítara, sigiti Rudolf eseriwida lun Heowá. Íbini dan le meha wéiyaali ani sándihali, seriwiti kei prekursoru ani kei wéiyaali lidan afiñeni lidan damuriguaü. Gayarati waliihani abahüdaguni luáguti libagari tidan garüdia La Atalaya to lánina 1 lidan widü-hati, 1997, páhina 20 darí 2515. Írida huméi hiri fiú íbirigu ha eseriwidubaña lun Heowá lau ugundani íbini labadinagua éibaahouni.
15 Uguñe weyu, añahein saragu wíbirigu heseriwiduña lun Heowá lau ugundani íbini hasufuriruña lan lanarime burí éibaahouni. Saragu hádangiñe añahein adaürǘwa Eritrea, Singapur luma Corea del Sur ladüga hamahadun hayusurun áruma (Matéu 26:52). Kei hénpulu, barühaña íbirigu Isaac, Negede luma Paulos lóugiñe 20 irumu adaürǘwa Eritrea. Ani wuribati houserúniwa ñein. Lidan sun irumu le siñagili hamarieidun ni lun hetenirun houn hagübürigu. Íbini ítara, úaraguatiña lun Heowá ani héreti hafiñen. Ani inebetiña giñe houn súdaragu ha óunigirubarun furisun. Lidan jw.org gayarati warihin aban hayawa íbirigu ha, ñein lubéi háfuacha hayañu íbini hasufuriruña lan.
Ida liña hakipuruni íbirigu ha lídanbaña wani damuriguaü hafiñen héreñu? (Ariha huméi párafu 15, 16).
16. Anhein here lubéi wafiñen, ka gayarabei wadügüni?
16 Hiibe-agei gefentiña luagu Heowá madaürǘntiña ani mouserún hagía wuriba kei íbirigu ha uágubaña wayanuha. Gama lumoun, gíbetiña asufurirutiña ladüga gudemei, chagaguaü lánina liñawan dan o wuribu. Añahein amu falá hamuti lani Abüraámü, Isaakü, Hakobu luma Moisesi hénpulu ani aba masigirun hamá áluaha irisini o aban ubaraü íñuti lun gayara lan heseriwidun lun Heowá. Ka íderagubaliña íbirigu ha lun heseriwidun lun Heowá lau ugundani? Ínsiñeni le hasandirubei luagu luma hafiñen luagu sun lani füramasei. Subudi hamuti líchuguba lan Heowá ibagari magumuchaditi houn lubúeingu ha úaraguabaña lidan iseri ubóu. Úabei marichaü ñein (aliiha huméi Sálumu 37:5, 7, 9, 29).
17. a) Ka lunbei wadügüni anhein busén wabéi lun héreñu lan wafiñen? b) Kaba wafurendeira lidan le aban arütíkulu?
17 Lidan arütíkulu le ariha wamaali ‘achoururuni lan luagu wabihibei lan le wagurabubei’ afiñenibei. Anhein busén wabéi lun héreñu lan wafiñen, mosu wafurieidun lun Heowá ani sigí wagíame asaminara luagun sun lani füramasei. Ítara luba gayara lan wasigirun úaragu lun íbini labadinagua óuchawaguni. Lidan le aban arütíkulu wasigiruba afurendeira luagu le mini lubéi afiñeni.
^ [1] (párafu 14): Ariha huméi giñe abahüdaguni luáguti libagari Andrej Hanák, Eslovaquiagiñe, le gíribei “Mi esperanza sigue brillante a pesar de las pruebas”. Le áfuachubei tidan garüdia ¡Despertad! to lánina 22 lidan gádürü-hati, 2002.